Olsem Wanem Ol Kristin Oli Save Halpem Ol Olfala

“NEVA tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i nyuwan bakegen. . . . Nao mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk. From we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.” Aposol Pol i talem samting ya long seken leta blong hem long ol man Korin.​—2 Korin 4:​16-18.

Long taem bifo, ol man mo woman blong bilif oli no tekemaot ae blong olgeta long ol samting we oli no save luk, wetem ol samting we God blong olgeta, Jeova, i promes finis blong mekem long stret taem blong hem. Long buk blong Hibrus, Pol i toktok blong leftemap olgeta ya, we oli holemtaet bilif kasem taem we oli ded​—mo sam long olgeta ya oli stap laef gogo oli olfala tumas. Hem i poenemaot olgeta olsem wan eksampel blong yumi, i se: “Olgeta man ya oli bilif long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we oli stap longwe yet long olgeta, be oli glad tumas tu blong luk olgeta.”​—Hibrus 11:13.

Tede yumi stap kolosap long ol samting blong promes we bambae i kamtru fulwan. Be yumi gat sik mo ol olfala we oli stap wetem yumi we oli no harem se bambae oli save stap laef gogo oli luk en blong rabis fasin blong naoia. Ating sam long olgeta ya bambae oli ded wetem bilif we bambae oli no luk olgeta promes ya fulwan long laef blong olgeta naoia. Long ol man olsem tok blong Pol long 2 Korin 4:​16-18 i save leftemap tingting blong olgeta bigwan.

Jeova i no fogetem olgeta stret man ya we tingting blong olgeta i stap strong long hem, wetem olgeta we oli sik mo ol olfala. (Hibrus 6:10) I gat plante ples long Baebol we i yusum ol tok blong ona long olgeta olfala we oli bilif, mo long Loa blong Moses tu, i gat spesel tok blong talem se yumi mas soemaot ona long olgeta. (Levitikas 19:32; Ol Sam 92:​12-15; Proveb 16:31) Long taem bifo, ol Kristin oli lukaot gud long ol olfala wetem ona. (1 Timote 5:​1-3; 1 Pita 5:5) Wan buk blong Baebol i gat naesfala tok we i soemaot lav, fasin kea mo fasin blong wan yangfala woman blong lego ol samting we hem wan i wantem blong lukaot long olfala mama blong man blong hem. I stret nomo we buk ya i karem nem blong yangfala woman ya, Rut.

Strong Tingting Blong Givhan

Laef blong olfala Naomi i kam nogud. Hanggri i fosem hem, wetem smol famle blong hem, blong livim ol fren mo graon mo olting blong olgeta i stap biaen long Judia blong go laef long is saed blong Jodan Reva long Moab. Long ples ya man blong Naomi i ded, i livim hem wan wetem tufala boe blong tufala. Biaen, tufala boe i kam bigwan mo mared, be nao tufala tu i ded. Naomi i stap we i no gat pikinini blong lukaot long hem.

Hem i olfala tumas blong save statem wan nyu famle bakegen, mo i olsem we laef blong hem i nating nomo. Wetem gud fasin we hem i no tingbaot hem wan fastaem, hem i wantem sanemaot Rut mo Opa, tufala wido blong tufala boe blong hem, blong gobak long ples blong mama blong tufala blong bambae maet tufala i faenem man blong mared wetem. Hem bambae i gobak hem wan long ples blong hem. Tede, tu, sam olfala, tingting blong olgeta i foldaon, antap moa sipos oli lusum olgeta we oli laekem tumas long ded. Olsem Naomi, maet oli nidim wan man blong lukaot long olgeta, be oli no wantem kam olsem wan samting we i hevi long narafala.

Be Rut, i no wantem livim mama blong man blong hem. Hem i laekem tumas olfala woman ya, mo hem i laekem tumas Jeova, God we Naomi i stap wosip long hem. (Rut 1:16) Taswe tufala i mekem rod blong tufala blong gobak long Judia. Long ples ya, i gat wan gudfala plan blong Jeova long Loa we i mekem se ol man we oli pua oli save hivimap, wanem samting i stap long garen afta we ol man blong karem kakae oli kambak. Rut, we hem i no olfala yet, hem i wantem blong mekem wok ya, i se: “Letem mi mi go, plis.” Hem i wok blong mekem i gud long tufala we hem i no taed nating.​—Rut 2:​2, 17, 18.

Bilif blong Rut mo lav blong hem long Jeova hem i wan strong samting we i leftemap tingting blong Naomi, nao hem i stat blong gat tingting we i stret mo we i wantem traem mekem ol samting oli kam gud. Nao hem i save yusum ol save blong hem long Loa mo long ol kastom blong kantri blong hem. Hem i givim advaes we i waes long yangfala woman ya we i stap halpem hem, mekem se hem i mared bakegen wetem wan famle blong man blong hem we i ded nao hem i save winimbak graon mo olting blong famle mo blong gat wan pikinini boe blong mekem laen blong famle i save stap gohed. (Rut, japta 3) Rut i gudfala eksampel long olgeta we oli rere blong livim sam samting we olgeta nomo oli wantem blong lukaotgud long ol man we oli sik mo ol olfala. (Rut 2:​10-12) Insaed long kongregesen tede, plante oli save mekem sem mak blong halpem ol man we oli sik mo oli olfala. ?Olsem wanem?

Mekem Plan i Gud Tumas

Long taem bifo long Kristin kongregesen, i gat lis blong ol wido we oli nidim sam samting blong sapotem laef blong olgeta. (1 Timote 5:​9, 10) Sem mak tede, maet ol elda oli mekem lis blong ol man we oli sik mo ol olfala we oli nidim man blong givhan long olgeta. Long sam kongregesen oli bin askem wan elda blong lukaotgud long spesel wok olsem. From we i gat fulap olfala man mo woman, olsem Naomi, we oli no wantem askem help, brata olsem i nidim waes blong luksave trabol blong wan olfala mo​—long kaen mo waes fasin​—mekem sua se oli mas mekem evri samting we i impoten blong oli mas mekem. Eksampel, hem i save luk sipos Haos Kingdom i gat ol samting we ol man we oli sik mo ol olfala oli nidim. Sipos i gat nid, hem i save lukluk long ol samting olsem spesel rod blong wiljea i go antap long step mo i kamdaon, ol samting we ol sikman mo olfala oli nidim blong givhan long olgeta long rum blong spel mo tolet, samting blong putum long sora blong olgeta we oli gat trabol blong harem evri samting, ples blong jea we i spesel. Brata ya i save mekem sua se olgeta we oli no save kam long Haos Kingdom oli save harem wan kaset blong miting, no lesin long olgeta tok long telefon.

Maet i gat nid tu blong mekem rod blong olgeta blong oli go long ol miting mo asembli. Wan olfala sista i gat problem from we hemia we i stap tekem hem oltaem i go long miting i no stap. Hem i mas telefon long plante long ol brata bifo i save faenem wan we i save tekem hem i go long miting mo from samting ya hem i harem se hem i kam wan bigfala wok blong olgeta narafala. Sipos hem i save mekem plan wetem wan elda we i lukaot long ol bisnes olsem, samting ya bambae i mekem se hem i no save sem.

Elda ya i save askem sam famle sipos oli save mekem wan stret taem blong olgeta wanwan blong visitim ol olfala. Long rod ya ol pikinini tu oli save lanem se wok blong lukaot long ol olfala hem i haf blong laef blong ol Kristin. Hem i gud blong ol yangfala i save lanem blong karem wok ya we oli mas mekem. (1 Timote 5:4) Wan seket elda i talem se: “Mi mi luk se, i gat smol namba nomo blong ol pikinini mo ol yangfala we oli visitim ol olfala no ol man we oli sik, hemia taem olgeta nomo oli wantem blong mekem.” Ating oli no tingbaot, no maet oli harem olsem we oli no save wanem blong mekem no talem; papa mama i save tijim olgeta long samting ya.

Be, plante olfala bambae oli glad blong save fastaem se wan fren bambae i kam. Samting ya bambae i mekem se oli glad moa taem oli wet blong luk wan we i kam blong visitim olgeta. Sipos hemia we i visitim olgeta i karem samting olsem kofe no kek, blong oli dring mo kakae smol tugeta taem oli stap spel, mo kwiktaem wasem ol kap biaen, olfala ya i no gat bigfala wok olsem wan hevi samting blong mekem biaen. Wan olfala man mo woman, we tufala i gat paoa yet, oli makemaot wan stret dei evri wik, nao tufala i putum ol samting i go long smol basket blong piknik mo tufala i go visitim ol narafala olfala long kongregesen. Ol olfala long kongregesen oli glad tumas long visit blong tufala ya.

Blong mekem i gud long ol olfala, plante kongregesen oli gat Buk Stadi blong Kongregesen long dei. Long wan ples, oli askem sam famle mo ol pablisa we oli no mared, sipos oli naf blong save givhan long grup olsem, mo samting we i kamaot se wan buk stadi we ol olfala mo ol yangfala oli save joen blong givgivhan long olgeta.

I no blong ol elda nomo blong lukluk long bisnes olsem. Yumi evriwan i mas lukluk long ol nid blong ol olfala mo ol man we oli sik. Yumi save sekhan long olgeta long Haos Kingdom mo tekem taem blong toktok wetem olgeta. Ating bambae oli glad sipos yumi askem olgeta blong kam storeyan wetem yumi samtaem. No yumi save askem olgeta blong kam wetem yumi long piknik no long wan holede. Oltaem i gat wan brata we i stap tekem ol olfala pablisa wetem hem long trak blong hem taem hem i go afsaed long taon blong mekem bisnes blong hem. Hem i impoten blong halpem ol olfala blong oli harem olsem we olgeta tu oli tekem pat long wan samting. No letem olgeta oli stap olgeta nomo, olsem Naomi i mekem, we i save mekem oli lusum paoa no tingting blong olgeta kwiktaem.

Ol yangfala we oli handikap no oli sik oli nidim blong man i givhan long olgeta. Wan man we i wan Wetnes hem i gat tri boe we oli gat wan sik we dokta i no save winim, mo naoia tu long ol boe ya oli ded finis, ale Wetnes ya i talem se: “I save kam wan hadwok blong kongregesen i save gohed blong soemaot fasin kea taem wan man i stap sik blong longtaem. I gud blong givim wok long sam yangfala pablisa we yumi save trastem olgeta blong oli tokbaot vas blong dei mo ridim wan japta blong Baebol evri dei long ol fren blong olgeta we oli stap long bed. Ol yangfala, mo ol paenia tu, oli save gat wan stret taem blong olgeta wanwan blong mekem olsem.”

Taem Ded i Kam Kolosap

Oltaem ol man blong Jeova oli no fraet blong ded, nating se samting ya i kamaot from sik no from we ol man oli ronem olgeta. Taem olgeta we oli kasem bigfala trabol oli stap harem se ded i kam kolosap, oli kasem ol defren filing. Afta we oli ded, ol famle blong olgeta tu oli harem nogud, oli sore, mo oli tekem longtaem blong oli haremgud bakegen. Taswe plante taem i gud blong ol man we oli kolosap long ded oli save tokbaot ded long open ples, olsem Jekob, Deved, mo Pol oli mekem.​—Jenesis, japta 48 mo 49; 1 King 2:​1-10; 2 Timote 4:​6-8.

Wan wetnes we i wan dokta i raetem se: “Yumi mas tok klia long bisnes ya. Neva long laef blong mi olsem wan dokta mi faenem we i gud blong haedem long wan sik man se bambae hem i mas ded.” Nating se i olsem, yumi nidim blong save wanem wan man we i sik hem wan i wantem save, mo wetaem hem i wantem save samting ya. Sam man we oli sik oli save talem se oli stap kolosap long ded, oli nidim blong talemaot tingting mo filing blong olgeta long samting ya. Samfala oli mekem hop blong olgeta i stap strong, mo i gud we ol fren blong olgeta tu oli gat sem fasin we oli stap gat hop.​—Skelem Rom 12:​12-15.

Wan man we kolosap i ded hem i save taed mo tingting blong hem i fasfas nao i hadwok blong hem i prea. Man we i sik olsem i save haremgud sipos hem i kasem save long Rom 8:​26, 27 se Jeova i kasem save taem “i no gat ol tok we i naf blong talem tok blong hem.” Jeova i save se taem man i harem nogud long wan bigfala trabol olsem i hadwok blong hem i save faenem ol toktok blong i prea.

Taem yu save mekem, hem i impoten blong prea wetem ol man we oli sik. Wan brata i talem se: “Taem mama blong mi kolosap hem i ded mo hem i no moa gat paoa blong toktok, hem i mekem saen long han blong hem olsem se hem i wantem mifala i prea wetem hem. Afta we mifala i prea, mifala i singsing wan singsing blong Kingdom, from we mama blong mifala i laekem tumas myusek. Fastaem, mifala i no singsing wetem ol tok, be biaen mifala i singsing wetem ol wod long kwaet fasin nomo. I klia se hem i glad tumas long hem. Tru ya ol singsing ya we yumi joenem wetem laef blong yumi olsem ol Wetnes blong Jeova oli gat filing long olgeta we i hadwok blong talem.”

Blong toktok wetem ol man we kolosap oli ded yumi nidim lav, kaen mo waes fasin, mo filing. Wan man blong mekem visit i save rere blong talem ol gudfala tok mo blong leftemap bilif blong sik man, mo hem i mas lukaot gud blong blokem nogud toktok we i tokbaot ol narafala mo ol trabol blong olgeta. Mo tu hem i mas mekem se hem i stap wetem sik man i no longtaem tumas, i stret nomo long sik man ya. Sipos wan sik man i hafded, hem i gud blong tingbaot se hem i save harem yet wanem samting ol man oli stap talem. Taswe yu lukaot moa long wanem we yu talem.

Wok We Yumi Serem

Wok blong lukaot long ol sikman mo ol olfala hem i wan wok we i hevi blong mekem. Long olgeta we oli stap kolosap long man we i sik, hem i hevi tumas, long saed blong bodi mo filing tu. Oli nidim mo i stret nomo we ol narafala long kongregesen oli traem kasem save long trabol blong hem mo givhan. Olgeta we oli lukaot gud long ol famle we oli sik no oli kea gud long olgeta we oli gat sem bilif nomo we oli sik, oli stap mekem wan samting we i stret, nating sipos oli mas mestem sam miting no oli no mekem plante long wok blong prij long taem ya. (Skelem 1 Timote 5:8.) Bambae oli stap strong from we olgeta long kongregesen oli soem se oli kasem save wok blong olgeta. Samtaem maet wan brata no sista i save jenisim olgeta blong smoltaem mo letem hemia we i stap lukaot long sik man i save go long miting no hem i save glad long smol haoa we i spenem long wok blong prij.

Sipos yu yu man we i sik yu save mekem samting tu. Sipos yu lusum hop mo yu no traem halpem yu wan long saed blong sik blong yu, tingting blong yu i save kam konkon, mo tingting olsem i save mekem man i seraot long ol narafala mo ol narafala oli no wantem stap kolosap long hem tu. Defren nao, yu save traem talem toktok we i blong soemaot glad no tangkyu mo we yu yu wantem wok wetem olgeta we oli stap halpem yu. (1 Tesalonaeka 5:18) Prea mo tingbaot ol narafala we oli stap harem nogud. (Kolosi 4:12) Tingting dip long ol nambawan trutok blong Baebol, mo talemaot long ol man we oli visit. (Ol Sam 71:​17, 18) Intres long ol nyufala wok we ol man blong God oli stap gohed blong mekem, we i save bildimap bilif blong yumi. (Ol Sam 48:​12-14) Talem tangkyu long Jeova from ol gudfala wok ya we i blong mekem man i glad. Fasin blong tingting dip long ol samting olsem, i save mekem ol laswan yia no dei blong laef blong yumi oli naes, olsem taem san i stap godaon we i givim laet we i strong mo i womgud bitim laet blong san long medel dei.

Yumi mas wok had blong holemtaet hop, speseli long taem blong ol traem, we i save lukaot gud long tingting blong yumi olsem hat we i blokem hed blong man. (1 Tesalonaeka 5:8) Hem i gud blong tingting dip long hop blong laef bakegen mo strong stampa blong hem. Yumi save lukluk stret wetem tingting mo hop long dei ya we bambae i no moa gat sik no paoa i no moa slak from we man i kam olfala. Long taem ya evriwan bambae oli haremgud. Ol ded man tu bambae oli girap bakegen. (Jon 5:​28, 29) Ol samting ya we yumi “no save luk” yumi save luk long ae blong bilif blong yumi mo hat blong yumi. Yu mas neva fogetem ol samting ya.​—Aesea 25:8; 33:24; Revelesen 21:​3, 4.