Wan Kwestin
?From pris ya blong bifo we nem blong hem Melkisedek i wan trufala man, from wanem Baebol i talem se hem i ‘no gat ol olfala blong hem bifo’?
Tok ya i stap long Hibrus 7:3. Ridim vas ya tugeta wetem ol narafala vas raonabaot:
“Melkisedek ya, hem i king blong Salem, we hemia nem blong Jerusalem bifo, mo hem i wan pris blong God ya we i Antap Tumas. Bifo, long taem ya we Ebraham i go faet long ol king, mo i winim olgeta, nao i stap kambak, Melkisedek i faenem hem long rod, nao i blesem hem. Nao Ebraham i seraotem olgeta samting blong hem long ten hif, nao i givim wan hif i go long Melkisedek, Fas nem ya blong Melkisedek i min se ‘King blong mekem stret fasin’, mo narafala nem ya blong hem, se King blong Salem, hem i min se ‘King blong mekem pis’. I no gat tok blong papa mo mama blong hem mo blong ol olfala blong hem bifo. Mo i no gat tok blong talem we hem i bon, no we hem i ded. Hem i olsem Pikinini blong God. Hem i wan pris we i stap holem wok ya blong pris oltaem nomo.”—Hibrus 7:1-3.
Olsem Baebol i talem, Melkisedek i wan trufala man olsem Ebraham, we tufala i stap toktok stret long tufala. (Jenesis 14:17-20; Hibrus 7:4-10) Blong i olsem, Melkisedek i mas gat wan papa mo wan mama, mo maet hem i gat pikinini. Olsem nao, wan prapa man i mas gat ol olfala blong hem, no famle laen. Hem i mas kasem en blong laef blong hem. Melkisedek i mas ded long wan taem, olsem tok we aposol Pol i talem long Rom 5:12, 14. Be from we yumi no save wetaem Melkisedek i ded mo taem we hem i no moa holem wok blong pris, samting ya nao i mekem se yumi no save en blong wok blong hem.
Long Hibrus, Pol i tokbaot Melkisedek taem hem i stap tokbaot wok blong Jisas olsem wan Hae Pris we i hae moa. Hem i yusum Melkisedek olsem wan pija, no wan saen blong Jisas long wok blong hem olsem pris, Pol i talem se: “Jisas . . . i olsem pris ya Melkisedek bifo.” (Hibrus 6:20) ?Olsem wanem Jisas i olsem Melkisedek?
Maet Pol i luksave se Baebol i no tokbaot famle laen blong Melkisedek—ol olfala blong hem no laen we hem i kamaot long hem. Samting ya i no wan bisnes blong stap insaed long Baebol. Be folem samting we Pol i save no yumi save, i stret blong talem se Melkisedek i “no gat laen blong hem” (New World Translation of the Holy Scriptures; American Standard Version), “i no gat ol laen we hem i kamaot long hem” (W. J. Conybeare), no hem i “no gat famle laen.”—J. B. Phillips.
?Olsem wanem Jisas i olsemia tu? I tru, yumi save se Papa blong Jisas hem i Jeova God mo we mama blong hem long wol ya hem i Meri we i laen blong Juda. Be i gat samting we i sem mak yet long saed blong Melkisedek mo Jisas. ?Olsem wanem? Jisas i no kamaot long laen blong Livae, laen ya blong ol pris long nesen blong Isrel. No gat, Jisas i no kam pris tru long laen blong ol man. Sem mak long Melkisedek we hem tu i no kam wan pris “from loa ya we i makem wanem laen i laen blong ol pris” olsem se hem i bon long wan laen no famle blong pris. (Hibrus 7:15, 16) Jisas i no kam wan pris from we papa blong hem long wol ya hem i wan pris, no gat, be “God i givim nem ya long hem, se hem i hae pris olsem pris ya Melkisedek bifo.”—Hibrus 5:10.
Mo tu, Jisas i no gat ol laen we i kamaot biaen long hem we oli pris no ol man we bambae oli karemaot wok blong pris long hem. Folem tingting ya tu, hem i no gat ol olfala blong hem bifo. Bambae hem i gohed nomo blong mekem wok blong pris olsem wan man blong tij. Pol i tokbaot wok ya blong hem we i gohed oltaem nomo i se:
“Be Jisas, hem i stap laef, we bambae i no save ded samtaem. Mo hem i no givim wok ya blong hem we hem i pris i go long sam narafala man. From samting ya, i stat naoia, gogo bambae i no save finis, hem i save sevem olgeta we oli joen long hem blong kam long God. From we hem bambae i laef oltaem, mo bambae i stanap oltaem long fes blong God, blong prea from olgeta.”—Hibrus 7:24, 25.
From samting ya tingting blong yumi long ol tok blong Pol long Hibrus 7:3 i go moa bitim save nomo we yumi holem long hed blong yumi. Hem i mas pulum fasin tangkyu blong yumi moa long nambawan rod ya we Jeova i mekem blong yumi save kasem fasin fogif oltaem long ol sin blong yumi mo from rod ya we hem i mekem i rere long yumi blong kasem help mo faenem rod oltaem.