Pis Long Tingting Long Medel Blong Ol Man We Oli Stap Traem Blong Winim Narafala

JISAS KRAES i givim advaes long ol aposol blong hem se: “Man we i wantem kam hae moa long ol narafala man, hem i mas tekem las ples, daon long ol man. Hem i mas kam olsem man blong wok blong olgeta.” Ol aposol oli stap rao se hu man long olgeta nao i hae moa. Oli save se Jisas i agensem tingting ya. Hem i neva fosem ol disaepol blong hem blong gat fasin ya blong traem winim narafala, olsem rod blong gru moa long saed blong speret.​—⁠Mak 9:​33-37.

Bifo we Jisas Kraes i kam long wol, hem i joen wetem God blong wokem tufala faswan man mo woman mo hem i save olsem wanem tufala i kamaot. (Kolosi 1:​15, 16) God i wokem tufala faswan man we tufala i no nidim fasin blong traem winim narafala blong tufala i save kamgud moa. Ol man oli no gat nid blong faet blong faenemaot hu i hed blong olgeta, mo oli no traem blong winim ol anamol long wan faet blong stap laef.​—⁠Jenesis 1:26; 2:​20-24; 1 Korin 11:⁠3.

Stampa Blong Tingting Ya Blong Traem Winim Narafala

?Oraet, olsem wanem tingting ya blong traem winim narafala i kam wan bigfala paoa long medel blong ol man? Faswan fasin blong kilim man i ded i halpem yumi blong faenemaot. Tingting blong traem winim narafala we Ken, fasbon pikinini boe blong faswan man mo woman, i gat, i lidim hem i go long bigfala trabol. Ken i kilim i ded brata blong hem Ebel from God i glad long sakrifaes blong Ebel, be i no glad long sakrifaes blong Ken. Mo Baebol i talem se Ken “i wan pikinini blong Setan, nao hem i kilim brata blong hem i ded.”​—⁠1 Jon 3:12; Jenesis 4:​4-8.

Yes, rabis man ya, Devel Setan, i stampa mo i man blong leftemap tingting ya blong traem winim narafala. Nating se hem i wan enjel pikinini blong God we i gat bigfala wok, hem i wantem moa. (Skelem Esikel 28:​14, 15.) Taem hem i trikim Iv, hem i soemaot klia prapa samting we hem i wantem. Hem i talem se sipos Iv i kakae long frut blong tri ya we God i putum tabu long hem, bambae hem ‘i kam olsem God.’ (Jenesis 3:​4, 5) Rili, Setan nao i wantem kam olsem God, i stap agensem Jeova. Tingting blong traem winim God i pulum hem blong gat fasin rebol.​—⁠Jemes 1:​14, 15.

Tingting ya i save pas i go long narafala kwiktaem. Aninit long paoa blong Setan, pis we God i putum long faswan famle i lus. (Jenesis 3:​6, 16) Stat long taem we Devel Setan i rebol agens long God kam kasem naoia, Devel Setan i bin rulum olgeta man, i stap leftemap tingting ya blong traem winim narafala, mo tu i stap gyaman long ol man mo woman blong oli bilif se ol raf fasin blong traem winim narafala i rod blong kasem gudfala samting. Be, Baebol i eksplenem se: “Taem ol man oli jelas, mo oli wantem kam hae moa long narafala man, evri samting oli no moa joengud, nao olgeta fasin nogud oli stap kamaot.” (Jemes 3:​14-16) Olsem nao Setan i tekemaot glad blong man mo pis long tingting.

Kasem Gudfala Samting Long Rod We i No Gat Fasin Blong Traem Winim Narafala

Defren olgeta long tingting blong Setan, Baebol i givim ol eksampel long fasin blong kasem samting we i no joen wetem fasin blong traem winim narafala. Nambawan long ol eksampel ya, hemia Jisas Kraes. Nating se hem i olsem God nomo, neva hem i gat tingting se hem i wantem kam sem mak long God be hem i kam olsem man blong wok nomo mo i kam long wol. Antap long samting ya, hem i mekem tingting blong hem i stap daon mo i obei long God gogo kasem we hem i ded long pos. Tingting ya blong obei, we i no joen nating long eni tingting blong agensem narafala, i mekem se God i glad long hem. “From samting ya, God i leftemap hem blong hem i go antap, i givim nem long hem we i hae moa long ol narafala nem.” (Filipae 2:​5-9) ?Wan man i save kasem wanem samting we i gudfala moa bitim samting ya? Hem i mekem Papa blong hem i glad long wan mak we i no gat wan man i save mekem, mo hem i no mekem samting ya long fasin blong agensem narafala no blong traem blong winim narafala.​—⁠Proveb 27:⁠11.

Bigfala namba blong ol enjel long heven we oli stap holem strong long God oli soem sem tingting. Nating se Jisas, we i hed blong ol enjel, i stap daon long ol enjel taem hem i kam long wol, ol enjel oli rere blong mekem ol samting we hem i askem. I klia nomo, oli no gat tingting se hemia nao jans blong olgeta blong traem tekem ples blong hem olsem Jif blong ol enjel.​—⁠Matyu 4:11; 1 Tesalonaeka 4:16; Hibrus 2:⁠7.

Fasin blong olgeta blong no laekem nating tingting blong traem winim narafala, i kam moa klia taem yumi skelem fasin blong olgeta long saed blong stampa tingting blong God blong leftemap sam man we oli no stretgud olgeta blong oli kam ol speret man we oli no save ded, we bambae oli “jajem ol enjel.” (1 Korin 6:⁠3) Ol enjel oli gat plante ekspiryens blong mekem wok blong Jeova mo oli naf blong mekem samting we i moa gud bitim ol man we oli no stretgud olgeta. Be, ol enjel oli glad blong kam man blong wok blong ol tabu man long wol, neva oli jelas long samting we bambae ol man ya oli kasem. (Hibrus 1:14) Gudfala tingting blong olgeta, we oli no gat tingting blong traem winim narafala i mekem se oli save gohed blong mekem wok fored long bigfala jea blong Hae Masta Jeova.

Nao, tingbaot ol man blong God bifo, we oli stap tru long hem we bambae oli laef bakegen long ded long wol. Ebraham i wan nambawan eksampel long saed blong bilif mo Baebol i kolem hem se ‘papa blong olgeta we oli gat bilif.’ (Rom 4:​9, 11) Job i soem nambawan eksampel long fasin blong holem strong longtaem. (Jemes 5:11) Moses, we “tingting blong hem i stap daon moa i winim ol narafala man long wol long taem blong hem,” i lidim nesen blong Isrel blong kam friman. (Namba 12:⁠3) ?Hu long medel blong olgeta man we oli no stretgud olgeta, we i bin soem wan eksampel we i gud moa long saed blong bilif, fasin blong stanap strong longtaem, mo tingting daon, bitim ol man ya? Be, olgeta ya bambae oli kasem laef long wol ya we Kingdom blong God i rulum. (Matyu 25:34; Hibrus 11:​13-16) Ol man ya, olsem Jon Baptaes, bambae oli stap daon ‘long man we i daon moa long kingdom blong heven.’ (Matyu 11:11) ?Bambae oli gat tingting blong tok smosmol, blong talem se bilif blong olgeta, fasin blong stanap strong, no tingting daon blong olgeta i sem mak no long sam taem, i bitim ol fasin ya blong olgeta we oli blong go laef long heven? !No gat! Bambae oli ol man we oli glad blong laef aninit long Kingdom blong God long wol.

Tede tu, yumi haremgud blong stap kolosap long ol man we oli no gat tingting blong traem winim narafala. Yasuo, we yumi tokbaot long faswan atikol, i gat bigfala kaon from we hem i mekem bisnes blong pem mo salem gol mo i lusum olgeta samting blong hem. “Ol fren” blong hem oli lego hem. Ale, from we waef blong hem i bin stat blong stadi Baebol wetem ol Wetnes blong Jeova, hem i go long ol miting blong olgeta nomo from we hem i sore from trabol we hem i bin mekem long famle blong hem. Biaen, hem i lego fasin ya blong traem winim narafala mo i kam wan Wetnes blong Jeova. Naoia hem i glad blong stap long medel blong ol Kristin fren, ol fren we oli rere blong givhan long hem long taem blong trabol.

Olsem Wanem Blong Holemtaet Pis Long Tingting

I no isi oltaem blong holemtaet pis long tingting long medel blong ol man we oli no gat sore, oli stap traem blong winim narafala. I gud we yumi makemgud se Baebol i agensem fasin ya we ol man “oli stap rao oltaem, nao oli stap seraot from. Oli stap faet, oli stap jelas, oli stap kros, oli stap leftemap olgeta nomo, oli stap mekem enemi long olgeta, oli wantem kasem mak blong narafala man.” Ol fasin ya oli olsem ‘ol rabis samting we tingting blong man i wantem’ we oli save blokem ol man blong oli no go insaed long Kingdom blong God. Ol fasin ya oli joen oltaem wetem tingting blong traem winim narafala. Yumi no sapraes se aposol Pol i leftemap tingting blong ol man Galesia se: “I no gud yumi stap flas, no yumi stap mekem yumi nomo i stap kros long yumi, no yumi nomo i stap jelas long yumi.”​—⁠Galesia 5:​19-21, 26.

Long medel blong ol vas ya, leta blong Pol i soem rod blong blokem fasin blong agensem ol narafala blong traem winim olgeta, we i stanap long fasin flas. Hem i talem se: “Tabu speret, hem i stap mekem ol man oli gat narafala fasin. Hem i stap mekem olgeta oli laekem tumas ol man, mo oli gat glad mo pis long tingting blong olgeta. Tingting blong olgeta i longfala, mo oli gat sore long man. Fasin blong olgeta i gud nomo, mo oli no save jenis. Olgeta oli kwaet man, mo oli save blokem ol samting we olgeta nomo oli wantem. I no gat loa blong blokem yufala long ol samting ya.” (Galesia 5:​22, 23) Ol frut blong tabu speret oli halpem yumi blong tekemaot tingting ya blong agensem narafala. Eksampel, tingbaot fasin ya blong laekem ol man tumas. Pol i eksplenem se: “Man we i stap laekem ol man tumas, hem i no save jelas, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik.” (1 Korin 13:​4-7) Taem yumi wokem fasin ya blong laekem ol man tumas, yumi save tekemaot fasin jelas, wan paoa we i stap pusum man blong gat tingting blong traem winim narafala. Ol narafala frut blong tabu speret tu oli save halpem yumi blong klinim hat mo tingting blong yumi long eni fasin we i stap yet, we i joen wetem tingting ya blong spolem narafala blong winim hem. !Yes, taem man i gat fasin blong bos long tingting, hem i save blokem kwiktaem, enikaen tingting we i stap kam antap blong traem winim narafala long ol rod ya we oli blong spolem hem!​—⁠Proveb 17:⁠27.

Be, blong wokem ol gudgudfala fasin ya, yumi mas letem tabu speret blong God i lidim yumi. Yumi save mekem gudfala fasin ya blong tabu speret i wok moa long yumi taem yumi stap prea oltaem mo askem tabu speret blong God blong givhan long yumi. (Luk 11:13) Blong ansa long prea blong yumi, ?bambae God i givim wanem long yumi? Baebol i ansa se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.”​—⁠Filipae 4:​6, 7.

Samting ya i tru long saed blong ol aposol blong Jisas. Afta we Jisas i stanemap Kakae blong Masta long laswan naet blong hem wetem ol aposol, ol aposol oli stap rao yet from bisnes ya se hu man long medel blong olgeta we i hae moa. (Luk 22:​24-27) Long ol defren taem, Jisas i bin traem blong givhan long olgeta blong stretem tingting blong olgeta, be tingting ya blong traem winim narafala i stap dip insaed long olgeta. (Mak 9:​34-37; 10:​35-45; Jon 13:​12-17) Be, taem oli kasem tabu speret 50 dei afta long rao ya blong olgeta, tingting blong olgeta i jenis. I no moa gat rao long bisnes ya se hu i save stanap long nem blong olgeta blong toktok long bigfala hif blong man we oli hivap long dei blong Pentekos.​—⁠Ol Wok 2:​­14-21.

I no mas gat fasin ya we wan man i traem blong rulum Kristin kongregesen. Taem oli mas stretem wan problem long saed blong sakomsaes, Jemes, we hem i no wan disaepol long taem we Jisas i ded, i presiden long impoten miting ya. I no gat wan saen blong rao long bisnes ya se hu bambae i lidim miting blong hed kampani blong Kristin kongregesen. !Hemia i defren olgeta long taem ya bifo we, tingting blong traem winim narafala i bin gat paoa long ol aposol! Wetem help blong tabu speret, oli tingbaot ol tijing blong Jisas mo oli stat blong kasem mining blong ol lesen blong hem.​—⁠Jon 14:⁠26.

Sem samting i save hapen long yumi. Wetem help blong tabu speret, yumi save winim eni tingting we i stap longtaem wetem yumi blong traem winim ol narafala, blong yumi save gru moa from fasin we yumi yusum blong daonem olgeta. Defren nao, yumi save kasem pis long tingting we i bitim save blong yumi olgeta. Baebol i promes long yumi se stampa blong fasin ya blong spolem narafala blong winim hem, Devel Setan, bambae i no longtaem hem i go long bigfala hol ya we i godaon we i godaon, we i no save mekem wan samting. (Revelesen 20:​1-3) Fasin blong man i agensem man we i stap kolosap long hem nomo bambae i no moa stap. ?Bambae frut we i kamaot se hemia i wan grup blong ol man we oli no save kamgud moa? !No gat! Bambae ol man oli kam stretgud olgeta, i no from we oli gat fasin blong traem winim narafala, be from ol samting we ransom sakrifaes blong Jisas bambae i mekem long olgeta.​—⁠1 Jon 2:​1, 2.

Keinosuke, we yumi tokbaot long stat, we fastaem hem i winim haenem blong wol taem hem i salem bigfala namba blong trak, i spolem hem wan long saed blong tingting mo long saed blong bodi, be biaen hem i lego wok blong hem. Hem i talem se: “Naoia, laef blong mi i fulap long trufala glad.” Nao hem i luksave olsem wanem laef blong Jisas i soemaot trufala fasin blong winim gudfala samting. Naoia hem i haremgud long eni samting we hem i save mekem long kongregesen blong God we i stap raonabaot long wol. Olsem nao hem i stap mekem rere blong go insaed long nyufala wol, we long ples ya nao, bambae i no gat fasin blong traem winim narafala. Yu tu yu save lukluk fasin blong kampani blong ol man ya we bambae oli stap long nyufala wol ya taem yu visitim wan long ol Haos Kingdom long ples blong yu mo joen wetem ol Wetnes blong Jeova.

[Tok blong pija long pej 7]

Ol man long nyufala wol blong God bambae oli haremgud long pis mo fasin blong wokgud wanples