?Fasin Blong Traem Winim Narafala i Rod Blong Kasem Gudfala Samting?

“I NO gat samting we i moa impoten bitim fasin blong win.” Tede plante man oli folem ol tok ya, we plante oli talem se i blong Vince Lombardi, trena blong ol man blong plei futbol long Amerika. Naoia, ol kantri we bifo oli Komunis, oli joen blong leftemap tingting ya we man i traem winim narafala. Oli talem se taem ol man i stat blong traem winim narafala long fasin blong salem olting blong olgeta, fasin ya i rod blong kam rij. Long Is, plante papa mama oli mekem rod blong ol pikinini blong olgeta blong traem winim ol narafala mo sanem olgeta oli go long ol praevet skul we i tijim olgeta olsem wanem blong winim ol eksam. Ol papa mama we oli wari tumas long samting ya, oli bilif se fasin blong go long wan skul blong lanem hae save, hemia nao rod blong kasem gudfala samting long fyuja.

Plante man oli bilif strong se fasin blong traem winim narafala i rod blong kasem gudfala samting. Long tingting blong olgeta, ol man oli bin kamgud moa long plante rod taem oli stap traem blong winim narafala. Ol 65.9% blong ol haeman blong ol bigfala kampani we ‘Federation of Economic Organizations’ blong Japan i askem kwestin long olgeta, oli talem se: “Fasin blong traem winim narafala blong kasem haeples, i stampa fasin we i mekem ol kampani blong Japan oli gohed strong.” Mo i luk olsem se ol kampani blong ol man Japan oli stap win longtaem finis. ?Be, fasin blong traem winim narafala, i rili rod ya blong kasem gudfala samting?

?Hem i Rili Givim Praes?

Ol man we oli stap traem blong winim ol narafala, oli soem fasin blong tingbaot olgeta nomo, tingting ya se mi fastaem. Oli glad taem ol narafala oli lus, tingting blong olgeta se samting ya bambae i leftemap olgeta nomo. Oli mekem ol samting we i save mekem ol narafala oli harem nogud, blong oli kasem samting we olgeta nomo oli wantem. ?Fasin olsem blong traem winim narafala bambae i lidim man i go long wanem samting? Yasuo, we i joen fulwan long fasin blong traem winim narafala blong kam wan impoten man long kampani blong hem, i tingbaot rod blong hem bifo mo i talem se: “From we mi tingting tumas blong traem winim narafala mo blong gat haenem, mi mi skelem mi wan wetem ol narafala mo mi harem se mi hae moa long olgeta. Taem ol man ya oli kasem mak we i moa hae long mak we mi stap long hem, evridei mi wari mo mi toktok smol long saed blong ol man we oli lidim kampani. Mi no gat fren long trufala mining blong tok ya fren.”

Tingting blong traem winim narafala i save mekem tu se man i lusum laef blong hem kwiktaem. ?Olsem wanem? Magasin ya blong Japan, Mainichi Daily News i joenem karoshi, no ded from fasin blong wok bitim mak, long wan kaen prapa fasin blong man we oli kolem fasin-A. Fasin-A i tokbaot fasin blong man we i winim trabol from tingting blong no westem taem, fasin blong traem winim narafala, mo fasin agens. Tufala man ya blong Amerika, Friedman mo Rosenman, we tufala i man blong stadi long hat blong ol man, tufala i joenem fasin-A wetem sik blong hat we i mekem se blad i no rongud. Yes, tingting blong traem winim narafala i save givim ded.

Fasin blong traem winim narafala long ples blong wok i save mekem tu se man i kasem narafala trabol long saed blong bodi mo tingting. Wan eksampel hemia Keinosuke, we hem i nambawan man blong salem samting long wan bigfala bisnes blong salem trak long Japan. Hem i kasem wan mak we i antap long ol narafala taem hem i salem wan total blong 1,250 trak. Oli putum pija blong hem long glas nao oli hangem insaed long rum we ol daerekta oli stap yusum long hedkwota blong kampani ya. Nating se hem i no wantem yusum ol man we hem i wok wetem olgeta olsem rod blong kasem haenem, kampani ya i pusum hem blong traem winim narafala. Frut we i kamaot se, long wan yia hem i kasem sik long bel mo i gat plante soa long bel blong hem. Long sem yia ya, 15 haeman long kampani blong hem oli go slip long hospital, mo wan i kilim hem wan i ded.

Long ol ples afsaed long wok, tingting ya we man i wantem kasem plante samting olsem narafala i pusum ol man blong stap mekem flas from ol sas samting we oli gat, gogo oli neva finis long fasin ya blong agensem narafala. (1 Jon 2:16) Samting ya i givhan long ol bisnes nomo, i stap putum mane nomo long han blong ol tredaman blong wol.​—⁠Skelem Revelesen 18:⁠11.

Nating se fasin blong agensem narafala mo tingting blong traem winim narafala i save mekem se man i kamgud moa blong wok, yumi no sapraes we King Solomon i talem se: “Mi mi luk se fasin ya we man i wok had mo i kamgud moa long wok i minim se man i wok agens long narafala nomo. Hemia tu i blong nating nomo, mo i olsem fasin blong ronem win.” (Eklesiastis 4:⁠4) ?Ale olsem wanem yumi save holemtaet pis long tingting nating se yumi stap long medel blong ol man we oli gat fasin blong traem winim narafala? Blong faenem ansa, fastaem i gud yumi luk weples tingting ya blong traem winim narafala i stat long hem.