?Olsem Wanem Man i Olsem Pija Blong God?
‘NAO God i mekem man, i olsem pija blong hem, i olsem hem stret. Fastaem, hem i mekem tu man nomo, wan i man mo wan i woman.’ Hemia nao tok we i kamaot from paoa blong tabu speret, ?be tok ya i minim wanem? ?Olsem wanem God i mekem faswan man mo woman, olsem we tufala i pija blong hem?—Jenesis 1:27.
?Bodi blong tufala i olsem God? No gat, yumi no save talem olsem. Ol man oli gat bodi, mit mo blad, we i stret blong oli stap long wol. God, hem i speret, hem i stap long bigfala laet blong hem long heven, we tingting blong yumi i no naf blong kasem save long hem, i no gat wan man i save go kolosap long hem samtaem. (Eksodas 33:18-20; 1 Korin 15:50) Nao, ?olsem wanem God i mekem man olsem we i pija blong hem? Long fasin ya we hem i mekem man i naf blong soemaot ol nambawan fasin ya blong hem—lav, stret fasin, waes, mo paoa—mo ol nara gudfala fasin tu.
Ol Gudgudfala Fasin Blong Jeova
Yumi save luk ol gudgudfala fasin blong Jeova long olgeta samting we hem i wokem, be hem i soemaot long fasin we i bigfala moa, long ol samting we hem i mekem long faswan man mo woman, Adam mo Iv. (Rom 1:20) Yumi save luk fasin lav blong hem, long fasin ya we hem i wokem wol, i stret nomo blong man i stap long hem. Jeova i wokem wan woman we i stretgud olgeta blong givim long Adam olsem prapa fren blong hem mo olsem mama blong ol pikinini blong hem. Hem i putum tufala long wan naesfala garen mo i givim plante samting long tufala, ol samting we tufala i nidim blong gohed blong laef mo blong stap glad. Samting we i bigwan moa long ol narafala samting, God i givim jans long tufala blong laef blong olwe.—Jenesis 2:7-9, 15-24.
Yumi save luk waes fasin blong God long fasin ya we hem i traem tufala faswan man. Sipos tufala i wantem stap olsem ol memba blong famle blong Jeova long wol, mo sipos tufala i wantem stap blong olwe olsem papa mama blong olgeta man, tufala i mas soem eksampel long fasin blong stap tru long God mo long tru wosip. Taswe, long wan traem we i stret long tufala—se tufala i no mas kakae long frut blong tri we i save mekem tufala i save ol fasin we oli gud mo ol fasin we oli nogud—Jeova i givim jans long tufala blong soemaot samting we i stap long hat blong tufala. !Long saed blong Jeova, hem i soemaot waes blong hem taem i letem olgeta man oli pruvum fasin obei mo fasin lav we oli gat long hem, bifo we hem i givim long olgeta ol nambawan blesing we oli stap long tingting blong hem!
Yumi save luk stret fasin blong God long fasin we hem i putum ol hae mak, blong ol samting we hem i wokem oli kasem, mo hem i no jenisim ol mak ya. Yumi save luk samting ya tu long fasin ya we hem i givim evri jans long Adam mo Iv blong mekem samting we i stret. Mo taem tufala i no mekem samting we i stret, yumi save luk stret fasin blong hem long fasin ya we hem i letem tufala blong harem nogud long panis ya we hem i bin talem se tufala i save kasem sipos tufala i rebel.
Yumi save luk paoa blong Jeova long fasin ya we hem i mekem ol tok panis blong hem oli kamtru. Setan, bigfala man blong rebel, i bin talem se Jeova i wan man blong gyaman, mo Setan i talem se Iv i save kasem ol nambawan samting sipos hem i no obei long God. (Jenesis 3:1-7) Be Setan i no naf blong mekem ol promes blong hem oli kamtru. Hem i no save blokem Jeova blong i no putumaot Adam mo Iv long garen blong Iden, mo hem i no naf blong blokem tok ya blong God blong i no kamtru long Adam se: “Mi mi wokem yu long graon fastaem, mo bambae yu yu kam graon bakegen.” (Jenesis 3:19) Be, Jeova i no kilim tufala i ded wantaem nomo, mo long rod ya, hem i gohed blong soemaot fasin lav blong hem. Hem i letem taem long Adam mo Iv blong karem pikinini, mo tru long ol pikinini ya, bambae hem i mekem faswan stampa tingting blong hem long saed blong olgeta man i kamtru.—Jenesis 1:28.
Antap long olgeta samting ya, Jeova God i soemaot stret fasin, lav, paoa, mo waes blong hem, long promes we hem i mekem blong makemaot wan laen we bambae i finisim ol wok blong Setan mo blong tekemaot nogud frut blong faswan fasin rebel agens long hae rul blong God. (Jenesis 3:15) !Yumi gat wan nambawan Man we i Wokem yumi!
Traehad Blong Folem Ol Fasin Blong God
Nating se ol man oli no moa stretgud olgeta, be oli naf yet blong soemaot ol gudgudfala fasin blong God. Taswe, Pol i leftemap tingting blong ol Kristin long taem blong hem se: “From we yufala i pikinini blong God, we hem i laekem yufala tumas, yufala i mas traehad blong folem ol fasin blong hem.” (Efesas 5:1) Be, tru long histri, bighaf blong ol man oli soem se oli no tinghevi nating long ol gudfala fasin blong God. Long taem blong Noa, rabis fasin blong ol man i kam bigwan tumas, nao Jeova i mekem disisen blong spolem olgeta man, mo blong sevem Noa nomo wetem famle blong hem. Noa i “wan stret man (man blong mekem stret fasin), hem wan nomo long taem ya we God i glad long hem,” mo hem i soemaot se hem i laekem God tumas, taem hem i mekem olgeta samting we God i talem.a “Nao Noa i mekem olsem. Hem i mekem olgeta samting ya we Hae God i talem.” (Jenesis 6:9, 22) Noa i soem lav long ol narafala man mo i soem se hem i fasgud long stret fasin taem hem i kam “wan prija blong talemaot stret fasin.” (2 Pita 2:5) Hem i soem fasin waes mo i yusumgud paoa long bodi blong hem taem hem i folem oda blong God blong bildim wan bigfala ak, i hivimap kakae mo ol anamol oli go insaed, mo hem tu i go insaed long ak, olsem we Jeova i talem. Hem i gohed blong soemaot lav blong hem long stret fasin, taem hem i strong blong no letem ol man nogud we oli stap kolosap long hem oli spolem gudfala fasin blong hem.
Baebol i tokbaot plante narafala man tu we oli soemaot ol gudgudfala fasin blong God. Nambawan long olgeta, hemia Jisas Kraes, we hem i stretgud olgeta olsem pija blong God, taswe hem i save talem se: “Man we i luk mi, hem i luk Papa blong mi.” (Jon 14:9) Long ol gudgudfala fasin we Jisas i soemaot, nambawan long olgeta, hemia lav. Lav we hem i gat long Papa blong hem mo long olgeta man, i pusum hem blong livim ples blong hem long heven, mo blong kam stap olsem man long wol. Lav i pusum Jisas blong leftemap nem blong Papa blong hem long ol stret fasin blong hem, mo blong talemaot gud nyus we i rod blong God blong sevem man. (Matyu 4:23; Jon 13:31) Biaen, lav i pusum Jisas blong givim laef blong hem we i stretgud olgeta blong sevem ol man mo, samting we i moa impoten, blong leftemap nem blong God. (Jon 13:1) Taem yumi stap traehad blong folem ol fasin blong God, ?i gat wan narafala eksampel blong folem, we i bitim eksampel blong Jisas Kraes?—1 Pita 2:21.
?Olsem Wanem Yumi Save Kam Moa Olsem God Tede?
?Tede, olsem wanem yumi save soemaot ol gudgudfala fasin blong God, we i soem se yumi stap mekem ol samting stret olsem we yumi pija blong God? Tingbaot fastaem fasin ya, lav. Jisas i talem se: “Yu mas laekem Hae God ya we i God blong yu long olgeta tingting blong yu, mo long olgeta laef blong yu, mo long olgeta maen blong yu.” ?Olsem wanem yumi save soem se yumi laekem God? Aposol Jon i ansa, i se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.”—Matyu 22:37; 1 Jon 5:3.
Tru ya, blong obei long ol loa blong Jeova, yumi mas save ol loa ya. Samting ya i min se yumi mas ridim, stadi, mo tingting dip long Tok blong God, Baebol, mo long ol buk we oli tokbaot Baebol. Olsem man ya blong raetem Ol Sam, yumi mas kasem mak we yumi save talem se: “Hae God, mi mi laekem loa blong yu tumas, mi stap tingting long hem i stat long moning, gogo kasem sapa.” (Ol Sam 119:97) Taem save blong yumi long Tok blong God i stap go dip moa, yumi kasem save olsem wanem God i stap tingbaot ol samting. Bambae yumi laekem tumas stret fasin mo, no laekem nating fasin blong brekem loa. (Ol Sam 45:7) Ples ya nao Adam i rong long hem. Hem i save loa blong Jeova, be lav we hem i gat long loa ya i no naf blong mekem hem i fasgud long hem. Taem we yumi stap ridim Tok blong God, oltaem yumi mas askem yumi wanwan se, ‘?Olsem wanem mi save folem samting ya? ?Mi save mekem wanem blong mekem fasin blong mi i laenap moa wetem ol gudgudfala fasin blong God?’
Mo tu, Jisas i talem se: “Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu wan.” (Matyu 22:39) Evri man wanwan we i no sik, i laekem hem wan tumas mo i wantem mekem i gud tumas long hem wan. Fasin ya i oraet nomo. ?Be yumi soem sem lav olsem tu long ol man raonabaot long yumi? ?Yumi stap folem oda ya blong Baebol se: “Yu no holembak samting we i gud long olgeta we oli nidim, taem han blong yu i gat paoa blong mekem olsem.”?—Proveb 3:27; Galesia 6:10.
?Olsem wanem long gudfala fasin ya, fasin waes? Taem yumi stap traehad blong wokem fasin waes, samting ya i lidim yumi blong stadi long Baebol, from we hemia nao ples we waes blong God i stap long hem. Ol Sam 119:98-100 i talem se: “Tok ya we yu yu putum i stap oltaem long tingting blong mi, i stap mekem mi mi waes moa, i winim ol enemi blong mi. From we oltaem mi mi stap tingting long ol rul we yu yu mekem, mi mi save plante samting moa, i winim ol tija blong mi. From we mi stap obei long ol loa we yu yu tijim mifala long hem, mi mi waes moa, i winim ol ololfala.” Proveb 3:18 i tokbaot fasin waes olsem “wan tri blong laef.” Sipos yumi kasem fasin waes mo yumi soemaot, bambae God i glad long yumi mo bambae hem i blesem yumi long laef we i no save finis.—Eklesiastis 7:12.
?Olsem wanem long stret fasin? Long wol ya we i fulap long rabis fasin, stret fasin i wan impoten fasin long olgeta we oli wantem mekem God i glad. Jisas i laekem tumas stret fasin (mekem i stret folem loa blong God) mo hem i no laekem nating fasin blong brekem loa. (Hibrus 1:9) Ol Kristin tede oli mekem sem mak. Fasin blong mekem i stret folem loa blong God i pusum olgeta blong tinghae long ol stret fasin. Oli stap longwe long ol rabis fasin blong wol ya, mo oli mekem wil blong God i impoten samting long laef blong olgeta.—1 Jon 2:15-17.
Long saed blong paoa, yumi evriwan i gat paoa. Taem yumi bon, yumi gat paoa long bodi mo long tingting, mo taem yumi stap gru long saed blong speret olsem ol Kristin, yumi stap kasem paoa long saed blong speret. Jeova i mekem paoa blong yumi i strong moa wetem tabu speret blong hem go kasem mak we, nating se i luk olsem we yumi no strong, yumi naf blong mekem wil blong hem. Pol i talem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) Yumi save kasem sem paoa ya sipos yumi prea blong askem tabu speret blong Jeova.
Talemaot Gud Nyus
Yumi save soemaot klia ol fo bigfala fasin ya blong God taem yumi obei long oda ya se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret. Mo yufala i mas tijim olgeta blong oli folem ol tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.” (Matyu 28:19, 20) Wok ya blong tijim ol man i karem laef long olgeta we oli lesin. !Hemia wan nambawan fasin blong soem lav long olgeta we, plante long olgeta, fastaem oli ol strenja long yumi!
Antap moa, tijing ya i rod blong soemaot fasin waes. Hem i karem ol frut we oli save stap longtaem. ?Long wanem narafala wok, yu save talem tok ya se: “Oltaem yu mekem fasin ya, nao bambae yu sevem yu, wetem ol man we oli stap lesin long yu”? (1 Timote 4:16) I no gat man we i no kasem gudfala samting long wok ya blong mekem disaepol. Man we i lesin mo man we i tijim, tufala tugeta i kasem ol blesing blong olwe.
Long saed blong stret fasin we i folem loa blong God, ol Kristin ol stap tijim ol Baebol studen blong olgeta long ol stret fasin we i folem loa mo ol stret rul blong Baebol. Yumi stap halpem olgeta blong mekem wok blong Jeova, “God blong stret fasin.” (Malakae 2:17) Tede, olgeta we oli givim laef blong olgeta blong mekem wok blong Jeova, mo oli stap tru long God, oli kam stret man long fes blong God, ale oli soemaot se oli stret man, mo from samting ya, bambae oli save pastru long Amageden.—Rom 3:24; Jemes 2:24-26.
!Wok blong prij mo tijim gud nyus long olgeta ples long wol i wan nambawan rod blong soemaot paoa! (Matyu 24:14) I nidim fasin blong stanap strong longtaem blong gohed blong prij long ol teritori we bighaf blong ol man oli no wantem harem gud nyus. Be Jeova, tru long tabu speret blong hem, i givim paoa we ol Kristin oli nidim blong stanap strong gogo kasem en.—Aesea 40:30, 31; Matyu 24:13; Luk 11:13.
Tru ya, olsem ol pikinini blong Adam we oli no stretgud olgeta, yumi no save soemaot ol gudfala fasin ya long mak we i stretgud olgeta. Nating se i olsem, rimemba se, God i mekem man i olsem pija blong hem, mo sipos yumi traehad blong kam moa olsem God, ale yumi stap soemaot wan risen from wanem yumi stap laef. (Eklesiastis 12:13) Sipos yumi wanwan i traem bes blong yumi mo askem God blong i fogivim yumi taem yumi mekem sin, ale yumi save gat hop blong laef long nyufala wol blong God we i gat stret fasin long hem, we sloslou yumi save kam stretgud olgeta. Long taem ya, bambae yumi stap long wan paradaes wol we i fulap wetem ol man we oli stretgud olgeta, evriwan oli soemaot ol gudfala fasin blong Jeova God fulwan. !Hemia wan glad taem ya! Long taem ya, bambae ful mining blong tok ya i kamtru long ol man, se oli olsem pija blong God.
[Futnot]
a “Stret man” mo “man blong mekem stret fasin, kolosap i sem mak.” Long Grik haf blong Baebol, i gat wan tok nomo blong talem tufala tok ya, hemia se, diʹkai·os.
[Tok blong pija long pej 25]
Jisas i soemaot long yumi olsem wanem blong wokem ol gudfala fasin blong Jeova God
[Tok blong pija long pej 26]
Long taem ya, bambae ful mining blong tok ya i kamtru long ol man, se oli olsem pija blong God