?Fasin Blong Man i Lidim Ol Man i Bin Karem Gudfala Frut?

HU I wokem olgeta samting? Sipos ansa blong yu i “God,” ale yu yu stap long kampani blong ol milyan man we oli bilif long God blong Baebol, Man ya blong Wokem olgeta samting.

Be, plante man we oli bilif long God oli faenem i hadwok blong akseptem se hem i stap mekem samting blong stretem trabol blong ol man. ?I stret blong ting se God i stap wokem wan program we bambae i stretem trabol blong olgeta man? Plante man oli no trastem se hem i save mekem olsem.

Blong plante taosen yia, ol man oli bin traem fulap defren rod blong lukaot prapa rod blong olgeta blong winim ol trabol ya, oli no wantem help blong God. ?Be ol man oli faenem ol ansa blong ol trabol? ?No ol trabol oli kam moa bigwan mo oli hadwok moa blong stretem? ?Ol man oli stap mekem wanem blong winim ol bigfala trabol long wol tede?

Wan man we i gat spesel save i talem se: “Stat biaen long ol yia 1700 taem wok blong ol faktri i kam antap bigwan, ol kantri we oli rij oli spolem bigwan ol gudfala samting long wol we oli stap sapotem laef, from we ol plan blong olgeta blong kasem mo yusum ol samting ya oli no stret, ale fasin ya i stap spolem ol samting raonabaot long yumi olsem win, wora mo graon, nao ol samting ya oli stap spolem ol pua kantri bakegen.”

Man i stap gohed blong spolem wol ya. Nyuspepa blong Ajentina, Clarín i talem se: “Long ol fefte yia we oli jes pas, fasin blong wantem kasem moa long saed blong mane‚ fasin blong no lesin long ol woning, mo fasin blong no moa lukaotgud long ol wok blong olgeta, i stampa blong ol bigfala disasta we oli mekem plante man i ded, be tu i spolem ol samting we oli stap raonabaot long yumi, plante taem i spolem bitim mak.”

Naoia i luk olsem se fasin we man i pua tumas, i kam olsem wan samting we i stap oltaem long medel blong ol man tede. Fasin pua i kam wan samting we i hevi tumas long olgeta kantri we oli rij tu long olgeta ples long wol. The Globe and Mail blong Toronto, Kanada, i ting se “wan long ol tri man Kanada bambae oli sot long mane long samtaem long ol yia long laef blong olgeta we oli stap wok.” Nyuspepa ya i ademap se “bigfala risen blong ol famle oli seraot i from we oli no gat mane, mo fasin ya i kam antap moa long ol yia we oli jes pas.”

Fasin blong yusum drag i wan narafala saen we i soem se fasin blong laef blong ol man i stap godaon. ?Ol man oli save mekem wanem blong winim samting ya? I klia se oli no save mekem plante samting. Plante milyan man oli gohed blong kam moa nogud long saed blong bodi, tingting, mo fasin from we oli stap yusum ol drag. Mo trabol ya i stap kasem plante ples kwiktaem.

I luk olsem we ol sayentis oli lusum faet ya blong agensem sik. I tru se, ol hae save long saed blong sayens blong tede i bin winim plante sik. Be, sam wok blong sayens oli bin givhan blong mekem se ol nyufala smosmol bebet blong givim sik oli stap kamaot, mo ol drag oli no naf blong winim olgeta.

Ol gavman blong man oli no save stopem ol samting we oli hapen we oli agensem raet blong olgeta man. Eksampel, nating se oli mekem plante loa mo promes blong blokem fasin blong yusum man olsem slef, be oli talem se long olgeta ples blong wol, i gat moa long wan handred milyan man we oli mas wok folem ol rul we oli sem mak nomo long fasin slef.

?Be from wanem fasin blong man blong lidim man i no bin wokgud? Luklukgud long ol poen ya. Ol man nomo oli lidim ol man bakegen, fasin ya i stanap long ol man nomo​—ol man we oli save wok folem ol stret mak blong olgeta nomo. Ples we oli stap long hem mo kastom blong olgeta, oli save mekem se ekspiryens blong olgeta i smol nomo. Save blong olgeta tu i gat wan mak blong hem we oli no save bitim. Advaes we oli givim i soemaot we oli gat ol mak ya. Olsem aposol Pol i talem, “olgeta evriwan oli mekem nogud finis, mo oli stap longwe long ol gudgudfala fasin blong God.”​—Rom 3:23.

I tru se plante long ol trabol mo ol hadtaem we bighaf blong ol man oli kasem, hemia from we oli no wantem God i lidim olgeta. ?Be weples oli save faenem ol advaes blong God blong lidim olgeta? ?Olsem wanem God i save lidim yumi tede? Haf ya we i kam biaen bambae i givim ol ansa blong olgeta kwestin ya.