Wokbaot Olsem We God i Tijim Yu Long Hem
“Yumi go antap long hil blong Jeova . . . , mo hem bambae i tijim yumi long ol wei blong hem, mo bambae yumi wokbaot long ol rod blong hem.”—MAEKA 4:2.
1. Folem tok blong Maeka, ?God bambae i mekem wanem long ol man blong hem long taem blong las dei?
PROFET blong God Maeka i bin talem se “long laswan haf blong ol dei,” hemia taem blong yumi, plante man bambae oli mekem plante samting blong traem faenem God, blong wosip long hem. Olgeta bambae oli leftemap tingting blong olgeta wanwan bakegen, bambae oli talem se: “Yumi go antap long hil blong Jeova . . . , mo hem bambae i tijim yumi long ol wei blong hem, mo bambae yumi wokbaot long ol rod blong hem.”—Maeka 4:1, 2.
2, 3. ?Olsem wanem tok blong Pol se ol man bambae oli laekem mane tumas i stap kamtru fulwan tede?
2 Taem yumi stadi long 2 Timote 3:1-5, samting ya i save halpem yumi blong luk frut we i save kamaot taem God i tijim yumi long ‘ol las dei.’ Long haf blong magasin ya we yumi stadi long hem finis, fastaem yumi bin tokbaot ol gudfala samting we oli kamaot long olgeta we oli lesin long woning blong Pol blong oli no kam “ol man we oli tingbaot olgeta nomo.” Pol i talem tu se long taem blong yumi ol man “bambae oli wantem mane tumas.”
3 Man i no nidim wan pepa blong hae skul long saed blong histri blong tede blong luksave olsem wanem ol tok ya oli stret nomo long taem blong yumi. ?Yu ridim finis nyus blong ol man we oli lukaot long mane mo ol bigfala bos blong ol kampani we oli no glad yet, nating se oli stap kasem plante milyan vatu evri yia? Ol man ya we oli wantem mane tumas oli gohed blong wantem moa, nating se oli kasem long rod we i no folem loa. Tok blong Pol i stret long plante man tede tu we, oli no rij tumas, be oli jes wantem moa, oli no save haremgud long wanem we oli gat. Maet yu save sam man olsem long ples blong yu.
4-6. ?Olsem wanem Baebol i halpem ol Kristin blong blokem fasin ya blong laekem mane tumas?
4 ?Wanem we Pol i tokbaot hem i wan fasin we man i gat taem hem i bon, we i no save blokem? Bigfala man blong raetem Baebol i talem se samting ya i no tru, Hem i talemaot trutok ya longtaem finis: “Fasin blong laekem mane tumas, hem i stampa blong olgeta fasin nogud. Mo i gat sam man we oli strong blong folem fasin ya, we oli gowe finis long fasin blong bilif. Nao oli stap mekem ol samting we olgeta tu oli harem nogud from.” Tingbaot, God i no talem se, ‘Mane i stampa blong olgeta fasin nogud.’ Hem i talem se “fasin blong laekem mane tumas.”—1 Timote 6:10.
5 I gud blong makem se, ol vas we oli stap raon long ol tok ya blong Pol oli mekem i klia se sam gudfala Kristin long faswan handred yia oli rij long ol samting blong wol ya, maet oli kasem ol rij samting long ol olfala blong olgeta taem oli ded no oli wok blong kasem ol rij samting ya. (1 Timote 6:17) Taswe i mas klia, se nating se yumi rij no yumi no rij long saed blong mane, Baebol i givim woning long yumi long denja ya blong kam we yumi laekem mane tumas. ?Baebol i givim eni moa tijing blong talem long yumi blong ronwe long fasin ya we i bigwan tumas tede mo we i save mekem yumi harem nogud tumas? Yes Baebol i givim moa tok, olsem tok blong Jisas antap long Hil. Olgeta man long wol oli savegud waes we i stap insaed long ol tok ya. Wan eksampel, tingbaot wanem Jisas i talem long Matyu 6:26-33.
6 Olsem we i stap long Luk 12:15-21, Jisas i tokbaot wan rij man we i stap traehad blong kam rij moa, be kwiktaem nomo i lusum laef blong hem. ?Wanem poen we Jisas i wantem makem? Hem i talem se: “Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stampa blong prapa laef blong man i no stap long ol samting ya.” Antap long ol advaes olsem we hem i givim, Baebol i tok agens long fasin les mo i talemaot klia se i impoten we man i wok had blong kasem mane blong hem. (1 Tesalonaeka 4:11, 12) Samfala oli save ting se ol tijing ya oli no stret long taem blong yumi—be oli stret, mo oli stap wokgud.
Kasem Tijing Mo Ol Gudfala Frut From
7. ?Wanem risen we yumi gat blong bilif se yumi save mekem advaes blong Baebol long saed blong ol rij samting i wokgud long laef blong yumi?
7 Long plante nesen, yu save faenem ol trufala eksampel long laef blong ol man mo ol woman long olgeta ples, sam long olgeta oli gat haenem, sam oli man nating, sam oli rij sam oli pua, we oli stap mekem ol stampa rul blong God long saed blong mane i wok long laef blong olgeta. Oli mekem i gud long olgeta bakegen mo long ol famle blong olgeta tu, taswe olgeta we oli no Wetnes oli save luk samting ya. Eksampel, long buk ya Religious Movements in Contemporary America, we man blong prentem ol buk blong Prinston Yunivesiti i prentem, wan man we i stadi long saed blong laef blong ol man i raetem se: “Long ol buk mo ol tok blong kongregesen [blong ol Wetnes], oli pulum olgeta blong tingbaot se oli no stap dipen long ol nyufala trak, ol klos we oli sas tumas, no fasin blong laef we i stanap long ol sas samting, blong leftemap olgeta long ae blong ol narafala man. Be wan Wetnes i mas wok had blong ful dei long masta blong hem [mo i mas] lukaotgud oltaem blong no gyaman no stil . . . Ol fasin olsem oli mekem se nating we wan man i no gat plante save long wok, i save kam wan gudfala man blong wok, mo sam Wetnes long Not Filadelfia [Yunaeted Stet] oli kasem ples we i hae moa we oli karem moa responsabiliti long saed blong wok blong olgeta.” I klia se, ol man we oli akseptem tijing blong God tru long Baebol oli kasem woning blong lukaotgud long ol fasin we oli mekem i moa had blong stanap strong long ol hadtaem blong naoia. Ekspiryens blong olgeta i soemaot se tijing blong Baebol i lidim olgeta blong mekem laef blong olgeta i moa gud, i moa hapi.
8. ?From wanem yumi save joenem “ol man blong tok flas,” “ol man we tingting blong olgeta i go antap tumas,” mo “ol man we oli tok nogud long ol man” long wanples, mo wanem mining blong ol trifala tok ya?
8 Yumi save joenem nekis trifala samting we Pol i raetemdaon. Long ol las dei, ol man bambae oli “man blong tok flas, we tingting blong olgeta i go antap tumas, mo oli save tok nogud long ol man.” Trifala fasin ya oli no sem mak, be evriwan oli joen long fasin flas. Faswan i “man blong tok flas.” Wan diksonari i talem se stampa Grik tok long ples ya i minim: “ ‘Man we i leftemap hem wan bitim we i stret blong mekem,’ no ‘i mekem plante promes i bitim we i save mekem i kamtru.’ ” Yu save kasem save from wanem sam Baebol oli yusum tok ya “man we i tok flas.” Nekis wan hemia “tingting we i go antap tumas,” no prapa mining se “soemaot tingting we i antap long ol narafala.” Laswan hem i, “man we i tok nogud long ol man.” Samfala oli save tingbaot fasin ya blong tok nogud long ol man olsem fasin blong toktok we i no gat respek long God, be bigfala mining biaen long tok ya i joen wetem tok we i spolem, i daonem, no we i nogud agens long ol man. Taswe Pol i minim fasin ya blong tok nogud agensem God mo agensem man tu.
9. ?Wanem ol fasin we Baebol i leftemap tingting blong ol man blong mekem we oli defren olgeta long ol nogud fasin blong naoia?
9 ?Yu harem olsem wanem taem ol man we oli stret long tok blong Pol oli stap raon long yu, maet oli ol man we yu wok wetem olgeta, ol pikinini we yu skul wetem olgeta, no ol famle blong yu? ?Samting ya i mekem laef blong yu i isi moa? ?No ol man ya oli mekem laef blong yu i fasfas, we i had moa long yu blong stanap strong long ol hadtaem ya we yumi stap long hem? Tok blong God, i tijim yumi blong ronwe long ol fasin ya, i givim tijing olsem we i stap long 1 Korin 4:7; Kolosi 3:12, 13; mo Efesas 4:29.
10. ?Wanem i soem se ol man blong Jeova oli kasem ol gudfala samting taem oli akseptem ol tijing blong Baebol?
10 Nating se ol Kristin oli no stretgud olgeta, be taem oli mekem ol nambawan tijing ya i wok long laef blong olgeta, samting ya i halpem olgeta bigwan long ol taem ya we laef i strong tumas. Nyuspepa blong Itali La Civiltà Cattolica i talem se wan risen from wanem Ol Wetnes blong Jeova oli gohed blong gru “i from we ogenaesesen ya i givim ol memba blong hem wan stret mo klia fasin we i makemaot olgeta.” Be, taem man we i raetem samting ya i tokbaot “klia fasin we i makemaot olgeta,” ?hem i minim “man we i tok flas, tingting we i go antap tumas, man we i tok nogud long ol man”? I no olsem nating, magasin ya blong Jesuit i talem se ogenaesesen ya “i givim ol memba blong hem wan stret mo klia fasin we i makemaot olgeta, mo hem i ples blong olgeta we oli save harem se ol narafala oli glad blong luk olgeta mo oli laeklaekem olgeta mo oli save harem se olgeta oli olsem wan brata nomo mo oli joengud long wan tingting nomo.” ?Samting ya i no soemaot klia se ol tijing we ol Wetnes oli stap kasem oli stap halpem olgeta?
Tijing i Halpem Ol Memba Blong Famle
11, 12. ?Pol i talem wanem stret toktok blong soem se fasin blong plante famle bambae i olsem wanem?
11 Yumi save putum fo narafala samting long wanples, from we oli kolosap sem mak. Pol i talem se long taem blong las dei, plante man bambae oli ‘no save ona long papa mo mama blong olgeta, oli no man blong talem tangkyu, oli no gat fasin blong stap tru long God mo ol narafala man, oli no man blong sore.’ Yu save se tu long ol nogud fasin ya—fasin blong no talem tangkyu mo fasin ya blong no stap tru long God mo ol narafala man—oli stap raon long yumi oltaem. Be, i isi blong luksave from wanem Pol i putum olgeta long medel blong fasin ya blong “no ona long ol papa mo mama” mo fasin ya blong “no gat sore.” Ol fofala fasin ya oli joen wanples.
12 Kolosap eni man we i gat fasin luksave, yangfala no olfala, bambae oli agri se fasin ya blong no ona long ol papa mo mama i kam antap bigwan, mo i stap kam moa nogud. Plante papa mo mama oli komplen se ol yangfala oli no talem tangkyu from olgeta samting we ol papa mo mama oli mekem long olgeta. Plante yangfala oli talem se ol papa mo mama oli no tingbaot olgeta (no famle), oli bisi tumas long ol wok blong olgeta, ol samting we olgeta oli mekem blong spel, no oli tingbaot olgeta nomo. Bitim we yumi stap traem blong tingbaot se i fol blong hu, i moa gud blong lukluk long ol frut we oli kamaot. Fasin seraot long medel blong ol bigman mo ol yangfala, plante taem i lidim ol yangfala blong folem ol prapa rul blong olgeta nomo long saed blong ol fasin no long saed blong ol rabis fasin. ?Wanem i stap kamaot from ol samting ya? Namba blong ol yangfala gel we oli gat bel, fasin ya blong kilim pikinini long bel blong mama, mo ol sik long saed blong seks oli kam antap tumas. Kolosap oltaem nomo, fasin blong no soem sore insaed long famle i mekem faet i kamaot. Maet yu save tingbaot ol eksampel olsem long ples blong yu, blong pruvum se fasin sore i no moa stap.
13, 14. (a) Taem yumi luk we plante famle oli seraot, ?from wanem yumi mas lesin long Baebol? (b) ?Wanem waes advaes we God i givim long saed blong laef blong famle?
13 Samting ya i save soemaot from wanem i gat moa fasin agens i kamaot long medel blong olgeta we bifo oli olsem ol famle nomo, sem laen, velej, no grup we oli stap long wanples nomo. Be tingbaot, se yumi no stap tokbaot ol samting ya blong makem ol nogud samting long saed blong laef tede. Tufala stampa poen we yumi intres long olgeta se: ?Ol tijing blong Baebol oli save halpem yumi blong blokem ol trabol we i kamaot from ol rabis fasin ya we Pol i raetemdaon, mo bambae ol tijing blong Baebol oli halpem yumi sipos yumi mekem olgeta oli wok long laef blong yumi? Yumi save ansa yes long ol kwestin ya, olsem i kam klia long saed blong ol fo poen ya we Pol i raetemdaon.
14 Stampa toktok ya i stret se: I no gat wan tijing we i moa gud long tijing blong Baebol, blong mekem se famle laef i kamgud mo evriwan long famle oli haremgud long hem. Yumi save luk wan eksampel blong samting ya long ol advaes blong hem we i save halpem ol memba blong famle, i no jes blong blokem ol trap we oli save foldaon long hem, be blong kam moagud tu. Kolosi 3:18-21 i soemaotgud samting ya, nating se i gat plante narafala gudfala vas tu we oli save wokgud we oli go stret long ol hasban, ol waef, mo ol pikinini. Tijing ya i stap wokgud long taem blong yumi. I tru, long ol famle blong ol trufala Kristin tu, oli gat ol hadtaem mo ol trabol. Be, ol frut we oli kamaot biaen i pruvum se Baebol i stap givim ol nambawan tijing we oli givhan bigwan long ol famle.
15, 16. ?Woman ya we i mekem dip stadi i faenemaot wanem taem hem i stadi long saed blong ol Wetnes blong Jeova long Sambia?
15 Long wan yia haf, wan woman blong Yunivesiti blong Letbrij i stadi long fasin joen long laef blong ol man Sambia. Hem i faenemaot se: “Ol Wetnes blong Jeova oli karem frut we i moagud long saed blong fasin joengud long mared blong olgeta bitim ol memba blong ol narafala skul. . . . Frut ya i soemaot wan defren kaen fasin fren bitwin hasban mo waef we tufala i stap givgivhan long tufala, from we, long ol nyufala fasin we tufala i jes faenemaot nomo, we tufala i no traem blong bos long tufala, be tufala i wokgud tugeta nomo, tufala i mas talemaot ol fasin we tufala i mekem long tufala long nyufala lida blong olgeta, God. . . . Wan hasban we i wan Wetnes blong Jeova i kasem tijing blong kam bigman long saed blong fasin blong karem ol responsabiliti blong hem blong lukaotgud long waef mo ol pikinini blong hem. . . . Oli leftemap tingting blong hasban mo waef blong holemstrong long ol nambawan rul long saed blong stret fasin . . . Bigfala fasin ya we oli nidim, hemia blong holemstrong long ol nambawan rul long saed blong stret fasin, samting ya nao i mekem mared i stanap strong.”
16 Stadi ya i stanap long plante trufala ekspiryens. Wan eksampel, woman ya i talem se samting we ol Wetnes oli mekem we i defren long ol narafala man se, “Plante taem yu faenem ol man we oli Wetnes blong Jeova oli stap halpem ol waef blong olgeta long garen, i no taem oli brasem garen nomo, be taem oli digim graon mo planem kakae tu.” I klia se plante ekspiryens olsem long olgeta ples long wol oli soem se tijing blong Baebol i gat paoa long fasin blong laef.
17, 18. ?Wan stadi we oli mekem long saed blong skul we papa mama i givim long pikinini mo fasin ya blong slip wanples bifo mared i soemaot wanem?
17 Faswan haf we yumi bin stadi long hem long magasin ya i tokbaot Journal for the Scientific Study of Religion. Long 1991 nyuspepa ya i karem store ya we taetel blong hem se “Skul We Papa Mama i Givim Long Pikinini Mo Fasin Blong Slip Olbaot Bifo Mared: Pruf We i Kamaot Long Sam Yangfala Long Nesen Ya.” Maet yu save se fasin blong slip wanples bifo long mared i bigwan tumas. Plante we oli yangfala nomo oli foldaon long filing blong olgeta blong wantem seks, mo plante yangfala we oli no gat twante yia yet oli gat plante fren we oli slip wetem olgeta. ?Ol tijing blong Baebol oli save jenisim fasin ya we i bigwan tumas?
18 Trifala tija we oli joen blong stadi long bisnes ya oli ting se bambae oli faenemaot ‘se smol nomo blong ol bigman mo ol yangfala we oli gruap long famle we oli folem kastom blong Kristin bambae oli slip olbaot bifo mared.’ ?Be wanem trufala samting we oli faenemaot? Long olgeta long grup ya, samwe 70 pesen kasem 82 pesen blong ol yangfala oli bin joen long fasin blong slip wanples bifo we oli mared. Long samfala, “fasin blong gruap long wan skul we i stap talem se hem i Kristin i [daonem] fasin ya blong slip wanples bifo mared, be i no long saed blong ‘ol yangfala we oli no kasem twante yia yet we oli slip wanples bifo we oli mared.’ ” Ol man we oli mekem stadi ya oli tokbaot sam yangfala long ol famle we oli ol man blong skul se “namba blong olgeta i bigwan moa long saed blong fasin ya blong slip wanples bifo mared taem oli skelem wetem namba blong ol man Protestan.”—Mifala nomo i putum italik.
19, 20. ?Olsem wanem tijing blong God i givhan mo i lukaotgud long plante yangfala Wetnes blong Jeova?
19 Ol tija ya oli faenemaot se i defren long ol yangfala blong ol Wetnes blong Jeova, we oli stap wetem “grup ya we i defren olgeta long ol narafala.” ?From wanem? “Ol ekspiryens blong olgeta, ol samting we oli wantem mo fasin blong olgeta blong joen fulwan long ol wok blong skul, oli mekem se oli tingting strong long skul blong olgeta mo oli joengud wetem ol narafala . . . mo samting ya i save mekem se oli strong moa blong obei long ol stret rul blong bilif blong olgeta.” Oli ademap se: “Ol Wetnes oli save se oli mas karem responsabiliti blong mekem wok blong tijim narafala nating se oli yangfala nomo.”
20 Taswe tijing blong Baebol i mekem i gud long ol Wetnes blong Jeova taem i halpem olgeta blong blokem ol rabis fasin long saed blong seks. Samting ya i blokem olgeta long saed blong ol sik blong seks, we sam long ol sik ya oli no gat meresin blong olgeta mo sam oli save mekem man i ded. I minim se i no gat wan man i save fosem olgeta blong kilim pikinini long bel, we Baebol i tijim se i sem mak nomo long fasin ya blong kilim wan laef. I minim tu se ol yangfala we oli bigwan oli save mared wetem tingting we i no jajem olgeta. Hemia i minim ol mared we oli stanap long wan fandesen we i moa strong. Ol tijing olsem nao oli save halpem yumi blong stanap strong long laef blong yumi, blong moa strong long saed blong bodi mo stap glad moa.
Tijing We i Olsem Wan Oda
21. ?Wanem ol stret samting we Pol i tokbaot long taem blong yumi?
21 Naoia traem gobak long 2 Timote 3:3, 4, mo tingbaot wanem narafala samting we Pol i talem se bambae i mekem laef blong plante man—be i no olgeta man—i strong tumas long taem blong yumi: “[Bambae ol man oli] mekem i strong tumas oltaem long narafala man. Bambae oli man blong spolem nem blong narafala man, mo oli man blong lusum hed mo oli wael olgeta. Bambae oli no wantem ol fasin we i gud nomo, oli agens long hem. Bambae oli man blong spolem ol fren blong olgeta, oli man we oli no kea, we flas i mekem tingting blong olgeta i lus. Bambae oli man we oli wantem tumas ol samting we oli stap haremgud long hem, i winim we oli stap laekem God.” !Ol tok ya oli stret nomo! Be, tijing we i kamaot long Baebol i save lukaotgud long yumi mo mekem we yumi save stanap strong, blong winim ol samting ya.
22, 23. ?Pol i finisim ol samting we i raetemdaon wetem wanem advaes we i olsem wan oda, mo wanem bigfala mining blong hem?
22 Aposol Pol i finisim ol samting we i raetemdaon long ol tok we i olsem wan oda nomo. Hem i jenisim las samting i kam olsem wan loa blong God we i save givhan long yumi bigwan. Pol i tokbaot ol man we oli stap “folem fasin blong Kristin man, be oli no wantem paoa blong God nating long laef blong olgeta. Bambae yu no go kolosap nating long ol man olsem.” Tingbaot bakegen se i gat moa yangfala we oli blong wan skul we oli slip wanples bifo mared i bitim ol narafala yangfala. Mo tu, nating se ol nogud fasin blong ol yangfala ya we oli go long jyos i kasem medel namba nomo, bambae samting ya i mas pruvum se fasin blong wosip blong olgeta i no gat paoa long laef blong olgeta, ?i tru? Antap moa, ?ol tijing blong skul oli jenisim fasin blong ol man long saed blong bisnes, fasin we oli mekem long ol man we oli daon moa long olgeta, no olsem wanem oli mekem long ol famle blong olgeta?
23 Ol tok blong Pol i soemaot se yumi mas mekem wanem we yumi lanem long Tok blong God i wok long laef blong yumi, folem fasin blong wosip we i soemaot bigfala paoa blong trufala Kristin skul. Long saed blong olgeta we fasin blong wosip blong olgeta i no gat paoa, Pol i talem long yumi se: “Bambae yu no kolosap nating long ol man olsem.” Tok ya i wan klia oda, wan we bambae i sua blong mekem i gud long yumi.
24. ?Olsem wanem oda blong Revelesen japta 18 i sem mak long advaes blong Pol?
24 ?Long wanem rod? Traem tingbaot, laswan buk blong Baebol i tokbaot wan woman we i olsem wan pijatok, wan woman blong rod, nem blong hem Bigfala Babilon. Pruf i soemaot se Bigfala Babilon i minim olgeta gyaman skul long wol, we Jeova God i skelem olgeta mo i no wantem olgeta. Be, yumi no nidim blong stap long grup ya. Revelesen 18:4 i givim oda long yumi se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong panis wetem hem.” ?Hemia i no semfala mesej we Pol i bin talem se, “Bambae yufala i no go kolosap nating long ol man olsem”? Sipos yumi obei long oda ya, hemia wan narafala rod blong kasem blesing from tijing blong God.
25, 26. ?Wanem fyuja i stap blong olgeta we naoia oli akseptem mo mekem tijing ya we i kamaot long God i wok long laef blong olgeta?
25 I no longtaem God hem wan bambae i mekem sam samting blong go insaed long olgeta bisnes blong ol man. Hem bambae i finisim olgeta gyaman skul mo ol narafala haf blong rabis wol blong naoia. Hemia bambae i wan samting blong mekem ol man oli glad, olsem Revelesen 19:1, 2 i talem. Long wol, olgeta we oli akseptem mo folem tijing blong God bambae oli save gohed blong folem ol tijing blong hem taem ol trabol blong ol hadtaem ya oli pas.—Revelesen 21:3, 4.
26 Tru ya, laef long wol ya taem i kam Paradaes, bambae i gud tumas bitim samting we yumi save tingbaot. God i mekem promes se yumi save kasem blesing ya, mo yumi save trastem hem fulwan. Taswe hem i givim plante risen long yumi blong akseptem mo folem tijing blong hem we i save halpem yumi. ?Wetaem? Yumi mas folem ol tijing blong hem naioa long ol taem ya we laef i strong tumas mo taem yumi go insaed long Paradaes ya we hem i promes long hem.—Maeka 4:3, 4.
Ol Poen Blong Tingtinggud Long Olgeta
◻ ?Olsem wanem ol man blong Jeova oli kasem gudfala samting long advaes blong hem long saed blong ol rij samting?
◻ ?Nyuspepa blong Jesuit i tokbaot wanem gudfala frut we i kamaot long ol man blong God we oli mekem Tok blong Hem i wok long laef blong olgeta?
◻ ?Wan stadi long Sambia i soemaot wanem gudfala samting we i kamaot long ol famle we oli mekem tijing blong God i wok long laef blong olgeta?
◻ ?Tijing blong God i lukaotgud long ol yangfala long wanem rod?
[Bokis blong pija long pej 15]
!BIGFALA TRABOL I SAVE KAMAOT FROM!
Wan ripot we oli bin givim long wan miting long saed blong AIDS mo ol yangfala i talem se:“Ol yangfala oli stap fesem wan bigfala denja long saed blong sik ya AIDS from we oli wantem traem fasin blong seks mo drag, oli wantem mekem ol samting we oli denja tumas mo oli wantem haremgud naoia nomo oli no tingbaot fyuja, mo from we oli harem se oli no save ded mo oli no wantem lesin long ol haeman.”—Nyu Yok Daily News, Sande, Maj 7, 1993.
Nyuspepa ya The New York Times, Fraede, Julae 30, 1993 i talem se: “Ol yangfala gel we oli joen long fasin blong seks finis olgeta nao oli bigfala grup we AIDS i stap kasem olgeta.” Hemia samting we oli faenemaot long wan stadi we Yunaeted Nesen i mekem long Yurop, Afrika mo Saot Is Esia.
[Tok blong pija long pej 17]
Tijing blong Baebol i halpem ol Wetnes blong Jeova long kongregesen mo long haos