!Gohed Wetem Strong Tingting, Nating Se Yumi Ases Nomo!

“Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.”​—⁠OL SAM 103:⁠14.

1. ?Baebol i stret wetem sayens taem i talem se man i kamaot long ases? Eksplenem.

LONG saed blong bodi, yumi olsem ases nomo. “Jeova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan laef sol.” (Jenesis 2:⁠7, NW) Vas ya we i soem se God i wokem man long wan isi fasin nomo, i laenap wetem trufala sayens. Insaed long “graon,” yumi save faenem moa long 90 samting we oli mekemap bodi blong man. Wan taem, wan man blong stadi long ol kemikol long bodi blong man i talem se, insaed long bodi blong wan bigman, i gat 65% oksijen, 18% kabon, 10% aedrojin, 3% naetrojin, 1.5% kalsium, mo 1% fosforas, mo sam narafala samting bakegen oli mekemap haf blong bodi we i stap. I no impoten we olgeta namba ya oli stretgud olgeta no no gat. Trutok i stap se: “!Yumi ases nomo”!

2. ?Fasin ya we God i folem blong wokem olgeta man i mekem wanem long yu, mo from wanem?

² ?Sipos i no Jeova, hu bakegen i save wokem nambawan bodi blong man wetem plante smosmol haf blong hem, long ases nomo? Ol wok blong God oli stretgud olgeta mo i no gat mastik long olgeta, taswe i no gat man i save komplen from disisen blong hem blong wokem man long ases. I tru, samting ya se Bigfala Man we i Mekem Olgeta Samting i save wokem man long ases blong graon nomo, long wan fasin we i mekem man i sapraes mo i nambawan tumas, i mekem se yumi gat moa fasin tangkyu long paoa blong Hem we i no gat mak blong hem, gudhan, mo waes blong Hem we i save wok.​—⁠Dutronome 32:​4, futnot; Ol Sam 139:14.

Ol Samting Oli Jenis

3, 4. (a) ?Taem we God i wokem man long ases, hem i no wantem wanem? (b) ?Deved i stap tokbaot wanem long Ol Sam 103:​14, mo olsem wanem ol vas we oli stap raonabaot oli halpem yumi blong kasem save long samting ya?

³ Olgeta man we oli ases nomo, oli gat mak long saed blong paoa blong olgeta. Be neva God i wantem we ol mak ya oli kam hevi tumas no oli blokem man tumas. Ol mak ya oli no blong mekem tingting blong man i foldaon no blong mekem hem i no moa glad. Be yet, ol vas we oli stap raonabaot long ol tok blong Deved long Ol Sam 103:​14 oli soemaot se, ol mak we ol man oli mas respektem, oli save mekem tingting blong man i foldaon mo oli save mekem man i no moa glad. ?From wanem? Taem Adam mo Iv, tufala i no obei long God, tufala i mekem ol jenis i kamaot long famle blong tufala biaen. Long taem ya, fasin ya we man i kamaot long ases nomo i tekem nyufala mining.a

⁴ Deved i no stap tokbaot ol mak blong ol man we oli stretgud olgeta, we God i putum long olgeta taem i mekem olgeta long ases, be hem i stap tokbaot ol slak fasin blong ol man, we oli kamaot from sin we oli bon wetem. Sipos no, hem i no save tokbaot Jeova se: “Hem i stap fogivim mi from olgeta sin blong mi, mo i stap mekem mi mi gud bakegen long olgeta sik blong mi. Hem i stap lukaot long mi blong mi mi no ded. Hem i no save panisim yumi stret long ol samting nogud ya we yumi stap mekem. Hem i no save givimbak ol rabis fasin ya long yumi we yumi stap mekem long hem.” (Ol Sam 103:​2-4, 10) Nating se God i wokem ol man we oli stretgud olgeta long ases nomo, sipos oli bin stap tru long God, neva bambae oli mekem i no stret, mekem sin, nao oli nidim fasin fogif; mo neva bambae oli sik we oli nidim wan samting blong mekem oli gud bakegen. Antap moa, neva bambae oli ded, we fasin blong laef bakegen nomo i save mekem oli kambak.

5. ?From wanem i no hadwok long yumi blong kasem save long ol tok blong Deved?

⁵ From we yumi evriwan i no stretgud olgeta, yumi kasem olgeta samting we Deved i tokbaot. Oltaem yumi stap luksave se yumi gat mak from we yumi no stretgud olgeta. Samtaem, yumi sore tumas taem ol mak ya oli spolem fasin fren blong yumi wetem Jeova no ol Kristin brata sista blong yumi. Yumi harem nogud se ol mastik we yumi mekem from we yumi no stretgud olgeta mo ol hadtaem long wol blong Setan, samtaem, oli mekem se tingting blong yumi i foldaon bigwan. From we kolosap nomo bambae rul blong Setan i finis, naoia, bitim bifo, wol blong hem i stap mekem hadtaem long olgeta man mo antap moa, long ol Kristin.​—⁠Revelesen 12:⁠12.

6. ?From wanem tingting blong sam Kristin i save foldaon, mo olsem wanem Setan i save yusum filing ya blong traem winim yumi?

⁶ ?Yu harem se i stap kam moa had blong folem ol Kristin fasin long laef? Sam Kristin oli bin talem se taem oli stap longtaem moa long trutok, oli kam moa we oli no stretgud olgeta. Be, ating samting we i moa tru se oli luksave moa we oli no stretgud olgeta mo we oli no naf blong folem ol rul blong Jeova we oli stretgud olgeta, kasem mak we oli wantem kasem. Samting ya i olsem wan frut we i kamaot taem save mo fasin tangkyu blong ol Kristin long saed blong ol stret rul blong Jeova i stap gohed blong gru. I impoten se yumi neva mas letem eni fasin blong luksave ol slak fasin blong yumi, i mekem tingting blong yumi i foldaon, nao yumi mekem samting we Devel Setan i wantem yumi mekem. Long ol handred yia we oli pas, plante taem Setan i bin yusum tingting we i foldaon blong traem mekem ol man blong Jeova oli lego trufala wosip. Be trufala lav long God, mo fasin blong “agensem fulwan” Devel Setan, i blokem bighaf blong olgeta blong oli no lego trufala wosip.​—⁠Ol Sam 139:​21, 22; Proveb 27:⁠11.

7. ?Samtaem yumi save kam olsem Job long wanem fasin?

⁷ Be yet, wan taem no narafala taem, maet tingting blong ol man blong Jeova i save foldaon. Mo tu, maet from yumi no haremgud long ol samting we yumi mekem. Maet ol trabol long saed blong bodi no fasin blong no frengud wetem narafala long famle, ol fren, no olgeta we yumi wok wetem olgeta, i save mekem tingting blong yumi i foldaon. Job we i fasgud long God, tingting blong hem i foldaon bigwan, mekem se hem i askem strong long God se: “!Plis yu haedem mi long Seol, plis yu livim mi mi stap haed gogo kasem taem we bambae kros blong yu i finis, plis yu makem dei we bambae yu yu tingbaot mi bakegen!” Job i wan man we “i no gat rong long hem mo hem i stret nomo. Hem i fraetgud long God mo hem i tanem baksaed long ol rabis fasin,” ale sipos ol traem long laef oli save mekem tingting blong hem i foldaon samtaem, yumi no sapraes se samting ya i save hapen long yumi tu.​—⁠Job 1:​8, 13-19; 2:​7-9, 11-13; 14:⁠13.

8. ?From wanem tingting we i foldaon samtaem i wan gudfala saen?

⁸ !Yumi haremgud tumas blong save se Jeova i stap lukluk insaed long hat mo hem i save ol gudfala tingting we oli stap pusum yumi! Bambae hem i neva sakemaot olgeta we oli rili traehad blong mekem hem i glad. Tru ya, maet tingting we i foldaon samtaem, i wan gudfala saen, we i soemaot se yumi tinghevi long wok we yumi mekem long Jeova. Folem poen ya, man we neva tingting blong hem i foldaon, maet long saed blong speret, hem i no luksave ol slak fasin blong hem olsem ol narafala oli luksave blong olgeta. Tingbaot se: “Man we i ting se i stap stanap strong, hem i mas lukaotgud blong bambae i no foldaon bakegen.”​—⁠1 Korin 10:12; 1 Samuel 16:7; 1 King 8:39; 1 Kronikel 28:⁠9.

God i Wokem Olgeta Long Ases Tu

9, 10. (a) ?Ol Kristin oli mas folem fasin blong bilif blong hu? (b) ?Moses i mekem wanem taem God i askem hem blong mekem wan wok?

⁹ Hibrus japta 11 i mekem lis blong sam wetnes blong Jeova bifo long Kristin Taem, we oli soemaot strong bilif. Ol Kristin blong faswan handred yia mo long taem blong yumi oli mekem sem mak. Ol lesen we yumi save lanem long olgeta oli impoten tumas. (Lukluk Hibrus 13:⁠7.) Eksampel, ?ol Kristin oli save folemgud fasin blong bilif blong hu bitim fasin blong bilif blong Moses? God i singaot hem blong talemaot ol mesej blong jajmen long Fero blong Ijip, rula blong wol we i gat bigfala paoa long taem blong hem. Tede, ol Wetnes blong Jeova oli mas talemaot sem mesej blong jajmen agens long ol gyaman skul mo ol narafala ogenaesesen we oli agensem Kingdom blong Kraes we i stanap finis.​—⁠Revelesen 16:​1-15.

¹⁰ I no isi blong mekem wok ya, olsem Moses i soem. Hem i talem se: “Mi mi olsem nating nomo. Mi mi no naf blong go luk king ya blong tekem ol laen blong Isrel oli kamaot long Ijip.” Yumi save kasem save long ol filing blong hem we hem i harem se hem i no naf. Hem i wari tu long saed ya se bambae ol man Isrel oli mekem wanem: “?Sipos ol laen blong Isrel ya oli no save bilif long tok blong mi, bambae mi talem olsem wanem long olgeta?” Ale Jeova i eksplenem long hem olsem wanem hem i save soemaot paoa blong hem, be Moses i gat wan narafala problem. Hem i talem se: ‘Jeova, plis yu no sanem mi. Mi mi no wan man blong mekem gudfala toktok, mo yu yu kam toktok wetem mi be fasin blong mi long saed ya i no jenis yet. Taem mi traem blong talemaot tingting blong mi, mi no save toktokgud nating.’​—⁠Eksodas 3:11; 4:​1, 10.

11. ?Olsem Moses, maet yumi talem wanem long saed blong ol tiokratik wok blong yumi, be sipos yumi soem bilif, yumi save sua long wanem samting?

¹¹ Samtaem, yumi save gat filing olsem Moses. Nating se yumi luksave ol tiokratik wok blong yumi, maet yumi save wari se olsem wanem yumi save mekem ol wok ya. ‘Mi mi olsem nating nomo. Mi no naf blong go luk ol man, we samfala oli gat haenem, oli rij, no oli skulgud, mo blong tijim olgeta long ol rod blong God. ?Wanem tingting blong ol brata blong mi long saed blong speret taem mi givim ansa long ol Kristin miting no givim tok long platfom long Tiokratik Skul? ?Bambae oli luk we mi mi no naf blong mekem ol samting ya?’ Be tingbaot, Jeova i stap wetem Moses mo i givhan long hem long wok blong hem from we Moses i soemaot bilif. (Eksodas 3:12; 4:​2-5, 11, 12) Sipos yumi folem fasin blong bilif blong Moses, bambae Jeova i stap wetem yumi mo i givhan long yumi tu long wok blong yumi.

12. ?Olsem wanem fasin blong bilif blong Deved i save leftemap tingting blong yumi taem yumi harem nogud from sin no mastik we yumi mekem?

¹² Man we i harem nogud no tingting blong hem i foldaon from hem i mekem sin no from ol slak fasin blong hem, i rili save kasem save long tingting blong Deved taem hem i talem se: “Mi mi luksave ol rabis fasin blong mi, oltaem mi mi savegud ol sin blong mi.” Taem Deved i stap prea long Jeova, hem i askem tu se: “Plis yu satem ae blong yu blong yu no moa luk ol sin blong mi, mo yu ravemaot olgeta samting nogud blong mi.” Be neva hem i letem tingting we i foldaon i spolem fasin blong hem we hem i wantem tumas blong mekem wok blong Jeova. ‘Plis yu no ronemaot mi mi gowe long yu, mo yu no tekemaot tabu speret blong yu i gowe long mi.’ I klia se Deved i “ases” nomo, be Jeova i no tanem baksaed long hem, from we Deved i soemaot bilif long promes ya blong Jeova se ‘hem i no save tanem baksaed blong hem long man we i tanem tingting blong hem mo i putum hem i stap daon.’​—⁠Ol Sam 38:​1-9; 51:​3, 9, 11, 17.

13, 14. (a) ?From wanem yumi no mas kam ol man we oli folem man? (b) ?Olsem wanem eksampel blong Pol mo Pita i soem se tufala i kamaot long ases?

¹³ Be makemgud se, nating we yumi tingbaot “ol wetnes ya blong God . . . we kampani blong olgeta i bigfala tumas” olsem samting we i leftemap tingting ‘blong yumi blong resis long rod ya we i stap long fes blong yumi,’ Baebol i no talem se yumi mas kam man blong folem olgeta. Baebol i talem long yumi blong folem ol trak blong leg blong ‘Jisas, Bigfala Man we God i yusum blong givim bilif long yumi mo mekem bilif ya blong yumi i stretgud,’ be i no ol man we oli no stretgud olgeta we yumi mas folem​—⁠mo tu i no ol aposol blong faswan handred yia we oli fasgud long God.​—⁠Hibrus 12:​1, 2; 1 Pita 2:⁠21.

¹⁴ Tufala aposol ya, Pol mo Pita, we tufala i olsem pos long Kristin kongregesen, tufala tu i foldaon samtaem. Pol i raetem se: “Oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating. Man, mi mi no save haremgud nating.” (Rom 7:​19, 24) Mo Pita, long wan smol taem we hem i trastem hem wan bitim mak, i talem long Jisas se: “Maet bilif blong olgeta ya evriwan i save foldaon, be bilif blong mi bambae i no save foldaon samtaem.” Taem Jisas i givim woning long Pita se bambae Pita i haedem Hem tri taem, se hem i no save Jisas, Pita i tok flas agens long Masta blong hem se: “Sipos olgeta oli wantem kilim mi wetem yu, be bambae mi mi no save haedem yu, se mi no save yu.” Be, Pita i haedem Jisas, hem i talem se hem i no save Jisas, wan mastik we i mekem se hem i krae we i krae tumas. Yes, Pol mo Pita, tufala i ases nomo.​—⁠Matyu 26:​33-35.

15. ?Nating se yumi ases nomo, wanem gudfala samting we i save pusum yumi blong gohed?

¹⁵ Be nating se oli gat ol slak fasin, Moses, Deved, Pol, Pita, mo ol narafala olsem olgeta, oli winim resis blong olgeta. ?From wanem? From we oli soemaot strong bilif long Jeova, oli trastem hem fulwan, mo oli fasgud long hem nating se oli kasem ol traem. Oli dipen long hem blong givim “paoa ya we i bigfala tumas.” Mo God i givim paoa ya long olgeta, hem i neva letem olgeta oli foldaon we oli no save girap bakegen. Sipos yumi gohed blong soemaot bilif, yumi save sua se taem God i jajem yumi, jajmen ya bambae i folem ol tok ya se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i laekem hem tumas.” !Samting ya i mekem se yumi gat strong tingting blong gohed nating se yumi ases nomo!​—⁠2 Korin 4:⁠7; Hibrus 6:⁠10.

?Fasin Ya We Yumi Ases Nomo i Minim Wanem Long Yumi Wanwan?

16, 17. ?Taem Jeova i jajem ol man, olsem wanem hem i folem rul we Galesia 6:⁠4 i eksplenem?

¹⁶ Ekspiryens i bin tijim plante papa mama mo plante tija se i waes blong jajem ol pikinini no studen wanwan folem save blong wanwan long olgeta, i no blong skelem wan pikinini wetem narafala pikinini long famle no blong skelem studen wetem narafala studen long klasrum. Samting ya i folem wan rul we Baebol i talem long ol Kristin blong oli folem, se: “Evri man wanwan i mas traem ol wok we hem nomo i mekem. Nao oli save makem we oli kam man olsem wanem, from ol wok blong olgeta nomo, i no from wok blong sam narafala man.”​—⁠Galesia 6:⁠4.

¹⁷ Folem rul ya, nating se Jeova i stap wok wetem ol man blong hem olsem wan grup we i gat gudfala plan, hem i jajem olgeta wanwan. Rom 14:12 i talem se: “Bambae yumi evriwan i mas talemaot olgeta fasin blong yumi long fes blong God.” Jeova i savegud bodi mo fasin we ol wanwan man blong hem oli bon wetem. Hem i save ol wok blong bodi mo tingting blong olgeta, save blong olgeta, ol gudfala fasin mo slak fasin we oli bon wetem, samting we oli naf blong mekem, mo tu, traehad blong olgeta folem samting we oli naf blong mekem, blong karem ol Kristin frut. Ol tok blong Jisas long saed blong wan wido we i sakem tu smol mane long ples blong sakem kleksin long haos prea, mo parabol blong hem long saed blong ol sid we oli foldaon long gudfala graon, oli ol eksampel we i leftemap tingting blong ol Kristin we maet oli harem nogud from we oli no waes, nao oli stap skelem olgeta wetem sam narafala man.​—⁠Mak 4:​20; 12:​42-44.

18. (a) ?From wanem yumi mas luksave olsem wanem fasin ya we yumi olsem ases i gat paoa long yumi wanwan? (b) ?From wanem trufala fasin blong skelem yumi wanwan i no mas mekem tingting blong yumi i foldaon?

¹⁸ I impoten blong save se fasin ya we yumi olsem ases i gat wanem paoa long yumi wanwan, blong yumi save mekem wok go kasem fulwan mak blong yumi. (Proveb 10:4; 12:24; 18:⁠9; Rom 12:⁠1) Sipos yumi stap luksave klia ol mastik mo ol slak fasin blong yumi wanwan, samting ya nomo i save mekem se oltaem yumi tingbaot we yumi nidim blong kam moagud mo olsem wanem blong mekem olsem. Taem yumi skelemgud yumi wanwan, neva fogetem paoa blong tabu speret we i save halpem yumi blong kam moa gud. God i yusum tabu speret ya blong wokem heven mo wol, blong raetem Baebol, mo, blong stanemap wan nyufala sosaeti blong man we oli gat pis, long medel blong wan wol we i stap lus. Taswe, yumi sua se tabu speret blong God i gat inaf paoa blong givim waes mo paoa long olgeta we oli askem waes mo paoa we oli nidim blong stap holemstrong oltaem long God.​—⁠Maeka 3:8; Rom 15:13; Efesas 3:⁠16.

19. ?Long wanem samting, yumi no save mekem es­kyus se yumi kamaot long ases?

¹⁹ !Yumi haremgud tumas blong save se Jeova i stap tingbaot we yumi kamaot long ases nomo! Be yumi neva mas ting se hemia i wan eskyus blong kam slak no ating blong mekem samting we i no stret. !No gat! Taem Jeova i stap tingbaot we yumi kamaot long ases nomo, hem i stap soemaot gladhat blong hem long yumi. Be yumi no wantem kam olsem ‘ol man ya we oli no obei long God, mo oli tanem gladhat blong God blong yumi i kam olsem eskyus blong mekem nogud. Mo oli tanem baksaed long Masta blong yumi, we yumi blong hem nomo, Jisas Kraes.’ (Jud 4, NW) Fasin ya se God i wokem yumi long ases i no wan eskyus blong no obei long God. Wan Kristin i mas traehad blong faet agensem ol rong tingting, stap faetem bodi blong hem mo lidim olsem wan slef, blong blokem fasin blong ‘mekem tabu speret blong God i harem nogud.’​—⁠Efesas 4:⁠30; 1 Korin 9:27.

20. (a) ?Long wanem tufala rod yumi gat “plante wok blong mekem long wok blong Masta”? (b) ?From wanem yumi gat risen blong holem gudfala tingting?

²⁰ Naoia, long ol laswan yia blong wol blong Setan, hem i no taem blong kam slak​—⁠long saed blong wok blong talemaot Kingdom mo blong mekem ol frut blong tabu speret blong God oli wok moa long laef blong yumi. Long tufala samting ya, “yumi gat plante wok blong mekem.” (NW) Naoia i taem blong gohed from we yumi save se “wok ya bambae i gat frut blong hem.” (1 Korin 15:58) Bambae Jeova i givhan long yumi, from we Deved i tokbaot hem se: “Hem i no save letem stret man i lus.” (Ol Sam 55:22) !Yumi glad tumas blong save se Jeova i letem yumi wanwan blong joen long wok ya we i bigfala moa bitim ol narafala wok we ol man we oli no stretgud olgeta oli bin mekem​—⁠nating se yumi kamaot long ases nomo!

[Futnot]

?Yu Save Eksplenem?

◻ ?Olsem wanem Jenesis 2:7 mo Ol Sam 103:14, oli defren taem oli talem se ol man oli kamaot long ases?

◻ ?From wanem Hibrus japta 11 i wan stampa japta we i leftemap tingting blong ol Kristin tede?

◻ ?From wanem yumi waes sipos yumi folem rul we i stap long Galesia 6:⁠4?

◻ ?Olsem wanem Hibrus 6:10 mo 1 Korin 15:58 oli halpem yumi blong blokem tingting we i foldaon?

[Tok blong pija long pej 10]

Ol Kristin oli folem fasin blong bilif blong ol narafala Kristin, be oli biaen long Jisas we i mekem bilif blong olgeta i stretgud