Olsem Wanem Blong Mekem Wan Tiokratik Laebri

SHEREZADE, wan smol waes gel blong Spen, hem i gat fo yia taem tija blong hem i talem long ol pikinini long klas se bambae oli kalarem sam pija blong “Fata Krismas.” Wantaem nomo, Sherezade i askem blong no joen long samting ya. Hem i eksplenem se voes blong hat mo tingting blong hem i no save letem hem blong mekem samting ya.

From we tija blong hem i sapraes long samting ya, hem i talem long Sherezade se hemia i olsem we hem i stap pentem wan pija blong wan doli nomo, mo se i no gat wan samting i rong long samting ya. Sherezade i ansa se: “Sipos samting ya i wan doli nomo, bambae mi laekem moa we mi wan nomo mi mekem pija blong wan doli, sipos yu yu agri.”

Long wan narafala taem, tija ya i askem ol pikinini long klasrum blong kalarem pija blong flag blong kantri. Bakegen, Sherezade i askem sipos hem i save mekem wan defren samting. Blong eksplenem from wanem, hem i talem store blong Sedrak, Mesak, mo Abednigo long tija.​—Daniel 3:​1-28.

Smoltaem biaen, tija ya i telefon long mama blong Sherezade blong talemaot we hem i sapraes tumas. Hem i talem se: “Plante taem, dota blong yu i toktok wetem mi blong talemaot voes blong hat mo tingting blong hem long sam samting. ?Yu tingbaot samting ya? !Wan smol gel olsem i eksplenem long mi from wanem voes blong hat mo tingting blong hem i trabol! Yu luk, mi no agri wetem samting we yu stap tijim long hem, be mi sua se ol tijing blong yu oli gat bigfala paoa long gel ya. Mo mi wantem blong yu save se mi respektem dota blong yu.”

?Olsem wanem wan gel we i gat fo yia nomo i save gat wan voes blong hat mo tingting we Baebol i trenem? Mama blong hem, Marina, i eksplenem se, Sherezade i gat wan prapa tiokratik laebri blong hem long rum blong hem blong slip. Long laebri ya, i gat ol wanwan namba blong Wajtaoa, we hem i bin makem laen long olgeta, ol buk blong hem blong prij, mo olgeta buk blong Watchtower Society we i bin kamaot stat long taem we hem i bon. Samting we hem i laekem tumas long laebri blong hem, hemia ol kaset blong buk ya My Book of Bible Stories, we hem i stap lesin long olgeta evri naet mo i stap folem wetem buk blong hem. Ol store ya blong Baebol nao we i mekem se hem i naf blong mekem ol disisen we yumi tokbaot antap.

?Wan gudfala tiokratik laebri we i stap long oda i save halpem yu mo ol pikinini blong yu? ?From wanem i impoten blong gat wan laebri long haos?

“Wan Laebri i No Wan Samting We Yumi Gat Be Yumi No Rili Nidim”

Henry Ward Beecher i talem se: “Wan laebri i no wan samting we yumi gat be yumi no rili nidim, be i wan samting we man i nidim long laef.” Tru nomo, kolosap se yumi evriwan i gat ‘samting ya we man i nidim long laef,’ nating se yumi no save se yumi gat. ?Olsem wanem i olsem? Sipos yumi gat Baebol nomo, hemia i olsem we yumi gat wan laebri.

Baebol i rili wan nambawan tiokratik laebri. Long ol yia bitwin 300 mo 400 K.T., Jerome i statem tufala tok ya Bibliotheca Divina, long lanwis Latin (Laebri blong God) blong tokbaot olgeta buk we ol defren man oli raetem, we yumi kolem Baebol, we i kamaot from tabu speret blong God. Jeova i givim tabu laebri ya long yumi, blong mekem se yumi save kasem help we i save wok gud long laef blong yumi, ol tijing, mo ol advaes blong lidim yumi. Hem i wan samting we neva yumi mas ting nating long hem. Fulwan Baebol we yumi gat i minim se laebri blong yumi i bigwan moa bitim laebri blong bighaf blong ol man blong wok blong God bifo.

Taem we i gat ol kopi blong Baebol we man i raetem wetem han blong hem nomo, we oli sas, sam famle nomo, no maet i no gat wan, we i gat wan ful Baebol. Taem Pol i wantem stadi long Baebol long laswan taem we hem i stap kalabus long Rom, hem i mas askem Timote blong tekem sam skrola long Esia Maena mo karem i kam long hem​—ating hemia sam haf blong Hibru Baebol. (2 Timote 4:13) Be, i gat ol defren kaen skrol long ol haos prea, mo Jisas Kraes mo aposol Pol, tufala i yusumgud ol laebri ya long wok blong prij blong tufala. (Luk 4:​15-17; Ol Wok 17:​1-3) Yumi glad tumas se naoia i isi blong kasem Baebol bitim long faswan handred yia.

Wetem ol mesin blong prentem buk we ol man oli mekem, kolosap se olgeta man blong wok blong God tede​—nating se oli toktok wanem lanwis​—oli save kasem fulwan Baebol long wan praes we i no sas tumas. Yumi gat wan spesel jans blong ademap sam moa buk long tabu “laebri” ya. Bitim wan handred yia finis, “slef ya we i stret mo waes” i stap bisi blong givim kakae long saed blong speret long stret taem blong hem.​—Matyu 24:​45-47, NW.

Be yumi no save yusum fulwan nambawan save ya sipos yumi no mekem wan prapa tiokratik laebri blong yumi wanwan, we i gat oda long hem. ?Olsem wanem blong mekem samting ya? Yes, faswan samting i blong kasem ol buk we yumi nidim long laebri. Bambae yumi kasem gudfala frut from fasin traehad blong yumi, from we bambae laebri ya i halpem yumi blong faenem kwiktaem ol stret save we yumi nidim blong winim ol problem, mo blong faenem ansa long ol kwestin blong Baebol.

?Mi Nidim Wanem Buk?

?Samtaem yu bin tingting olsem wanem yu save fiksimap wan problem long saed blong toktok tugeta long mared blong yu no olsem wanem yu save halpem pikinini blong yu blong talem no long fasin blong yusum drag? ?Olsem wanem yu save halpem wan fren we tingting blong hem i foldaon? ?Yu save eksplenem klia wanem pruf nao i soem se God i stap mo from wanem hem i letem ol fasin nogud oli stap? ?Anamol ya we i red we i red long Revelesen japta 17 i pija blong wanem?

Yu save kasem ansa blong ol kwestin ya mo plante narafala kwestin sipos yu gat wan tiokratik laebri we i gat naf buk long hem. Watchtower Society i bin prentem plante save long ol buk, buklet, mo ol magasin we oli tokbaotgud olgeta poen long Baebol. Antap long samting ya, ol buk ya oli tokbaot ol problem long saed blong famle, oli mekem bilif blong yumi i strong moa long God mo Baebol, i givhan long yumi blong kam moa gud long wok blong prij mo blong kasem save long ol profet tok blong Baebol.

Ol buk we Sosaeti i prentem long ol 20 yia we oli pas, yumi save kasem yet bighaf blong olgeta. Sipos yu jes kam long trutok, bambae i givhan bigwan long yu blong gat ol buk ya sipos oli stap long lanwis we yu save ridim. Maet yu save kasem ol volyum blong Wajtaoa blong ol yia we oli pas long lanwis blong yu. Ol nambawan buk olsem Insight on the Scriptures mo Comprehensive Concordance we oli givhan bigwan long yumi, Sosaeti i bin prentem long plante defren lanwis. Be, blong kasem ol buk ya i faswan samting nomo.

!Putum Ol Buk Long Stret Ples Long Laebri Blong Yu!

Maet yu save se yu gat buk ya we yu nidim i stap samples, be yu no save faenem. Sipos yumi mas westem plante taem blong lukaot ol buk refrens we yumi nidim, ating bambae yumi lusum intres long poen we yumi wantem faenemaot. Long defren fasin, sipos yumi putum ol buk blong yumi oli stap long gudfala oda, long wan ples we i isi blong faenem olgeta, bambae yumi laekem moa blong mekem dip stadi yumi wanwan.

Sipos i gat inaf ples, i givhan bigwan long yumi taem yumi putum bighaf blong olgeta tiokratik buk long wan ples. Sipos kapod blong putum ol buk we oli wokem finis i sas tumas, yumi save mekem ol kabod we plante taem oli no sas tumas, mo oli no tekem tumas ples. I impoten tu blong gat wan laebri we i stap long wan ples we i isi blong kasem. Ol buk we yu hivimap i go long ol bokis oli no givhan bigwan, oli kam doti nomo.

Wan narafala samting i blong putum ol buk long stret oda. Smoltaem we yumi spenem blong putum ol buk long stret oda i save givhan bigwan.

?Olsem wanem sipos bighaf blong famle blong yu oli no Wetnes blong Jeova? Nating se yu no save mekem wan laebri olsem we yu yu wantem, be long prapa rum blong yu, yu save gat wan kabod blong putum buk we i gat sam buk we oli tokbaot Baebol.

Wan Tiokratik Laebri i Save Halpem Yumi Blong Gru Long Saed Blong Speret

Taem yumi putum ol buk blong yumi oli stap long stret oda, yumi nidim wan samting we i halpem yumi blong faenem save. Tingting blong yumi i save fogetem weples yumi save faenem, mo yumi wanwan i no save tingbaot olgeta samting insaed long evri buk long tiokratik laebri blong yumi. Nating se i olsem, ol save long laebri oli rere blong yumi kasem. Sipos i gat Watch Tower Publications Index long lanwis blong yumi, hem i save halpem yumi blong faenem ol klia save long kolosap evri poen long wan sot taem nomo.

Julián, we i bin wok plante yia olsem wan spesel paenia mo wan elda, i eksplenem se Index i nambawan blong tijim lasbon boe blong hem blong mekem prapa stadi blong hem. “Jairo, we i gat seven yia, i kambak long skul wan dei mo i askem mi se: ‘?Papa, Sosaeti i talem wanem long saed blong ol daenasos?’ Mitufala i go stret long Index mo mitufala i luk aninit long tok ya ‘dinosaurs.’ Kwiktaem nomo, mitufala i faenem wan Wekap! magasin we i tokbaot poen ya. [Febuwari 8, 1990, Engglis mo Franis] Long sem dei ya, Jairo i stat blong ridim Wekap! ya. Hem i save finis se tiokratik laebri blong mifala i gat ol nambawan save long kolosap evri poen. Mi mi bilif strong se taem ol pikinini blong yumi oli lanem blong yusumgud tiokratik laebri blong yumi, samting ya i halpem olgeta blong gru long saed blong speret. Oli lanem blong tingtinggud, antap moa, oli faenem se stadi wanwan i save mekem olgeta oli haremgud.”

Fausto, papa blong Sherezade we yumi tokbaot long stat, i talem se yu mas stat kwik blong trenem ol pikinini blong yu blong yusum wan tiokratik laebri. Hem i eksplenem se: “Mifala i stap soem long Sherezade, we naioa i gat sikis yia blong hem, olsem wanem blong yusum Index. From we hem i laekem tumas hop long saed blong Paradaes long wol, mifala i stat blong soem long hem wod ya ‘paradise’ long Index mo biaen mifala i jekemap long ol Wajtaoa we Index i talem. Plante taem mifala i jes soem ol pija nomo long hem. Nating se i olsem, fasin ya i lanem hem se Index i nambawan rod blong faenem save long laebri blong mifala long haos. Mifala i save se hem i kasem save long poen ya taem hem i kambak long skul wan dei, mo i gat wan kwestin long saed blong lafet blong Ista. Hem i askem mama blong hem se: ‘?From wanem yumi no save lukluk wan poen long Index?’”

Nating se yumi yangfala no olfala, Baebol i leftemap tingting blong yumi blong ‘traem olgeta samting fastaem, nao yumi save holemstrong long olgeta samting we oli gud.’ (1 Tesalonaeka 5:21) Blong mekem samting ya, yumi mas stadi long ol tok blong Baebol. (Ol Wok 17:11) Sipos yumi gat wan tiokratik laebri we i stap long gudfala oda, yumi save haremgud long ol dip stadi olsem. Evri taem yumi yusumgud laebri blong yumi blong mekemrere wan tok, blong faenem wan gudfala advaes blong winim wan problem, no blong jekemap ol save we yumi intres long hem, bambae samting ya i soemaot long yumi olsem wanem laebri blong yumi i save givhangud long yumi.

Papa mama blong Sherezade, tufala i talem klia se: “!Long wan Kristin famle, wan tiokratik laebri i no wan samting we yumi gat be yumi no rili nidim!”

[Futnot]

[Bokis blong pija long pej 30]

?OLSEM WANEM YU SAVE PUTUM OL BUK BLONG YU?

I no gat wan strong rul we i talem olsem wanem yu mas putum ol buk blong yu. Nating se i olsem, fasin blong putum buk long gudfala oda we i kam biaen i soem wan rod we yu save folem blong putum ol buk blong yu, folem ol save we i stap insaed long olgeta.

1. Ol buk we oli eksplenem ol vas wanwan blong sam haf blong Baebol

(Eksampel: Man We i Hae Moa Long Olgeta Man, Revelation​—Its Grand Climax At Hand!, “The Nations Shall Know That I Am Jehovah”​—How?, “Your Will Be Done on Earth”)

2. Ol buk we oli tokbaot famle

(Eksampel: Olsem Wanem Blong Mekem Famle Blong Yu i Hapi, Questions Young People Ask​—Answers That Work, My Book of Bible Stories)

3. Ol Baebol mo buk refrens

(Eksampel: New World Translation of the Holy Scriptures​—With References, ol narafala Baebol, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, wan gudfala diksonari)

4. Ol buk we yumi stap yusum olgeta naoia long Kongregesen Buk Stadi mo Tiokratik Skul

5. Ol kaset mo video

6. Ol volyum blong Wajtaoa mo Wekap!

7. Histri blong ol Wetnes blong Jeova

(Eksampel: Yearbook of Jehovah’s Witnesses, Jehovah’s Witnesses​—Proclaimers of God’s Kingdom)

8. Ol buk mo buklet we yumi stap yusum long wok blong prij

(Eksampel: Yu Save Laef Foreva Long Paradaes Long Wol, Reasoning From the Scriptures, Life​—How Did It Get Here? By Evolution or by Creation?, Mankind’s Search for God, Joen Tugeta Long Wosip Blong Trufala God)

[Tok blong pija long pej 31]

Sherezade i kam wan gudfala Baebol studen finis

[Tok blong pija long pej 31]

Nating se boe ya i smol nomo, hem i stap yusum wan tiokratik laebri