?Krismas i Minim Wanem Long Yu?
?Bambae yu yu ansa olsem wanem? Krismas i (1) wan taem blong stap wetem famle blong yu; (2) wan taem blong mekem ol lafet; (3) wan taem blong tingbaot skul; (4) wan taem blong wari; (5) wan taem blong tingtingbak long ol gudfala taem we oli pas; (6) wan taem blong mekem bisnes stret.
MAET yumi sapraes blong save se, taem oli askem kwestin long bitim 1,000 man long Briten, 6 pesen nomo oli tingbaot Krismas olsem taem blong tingbaot skul. Defren olgeta, 48 pesen blong ol man oli tingbaot Krismas olsem wan taem blong stap wetem famle blong olgeta. Yes, plante oli ting se i wan spesel taem blong ol pikinini. Eksampel, taem oli askem long wan gel we i gat 11 yia, se wanem nao hem i laekem moa long saed blong Krismas, hem i ansa se: “Strong filing, fasin glad, [mo] fasin blong givim ol presen.” The Making of the Modern Christmas i agri se “bigfala tingting blong . . . ‘kastom’ blong Krismas i stap moa long hom, famle mo speseli long ol pikinini.”
Be ol skul blong Krisendom long ol kantri blong Wes oli talem moa se Krismas i wan spesel taem blong famle, taem ol famle oli stap wanples blong givgivim ol presen long olgeta. Long ol kantri we Is Otodoks Jyos i gat paoa long hem, ol man oli tingting strong moa long Ista; nating se i olsem, kolosap oltaem Krismas i wan taem blong spel.
“Taem Blong Mekem Bisnes”
The New Encyclopædia Britannica i talem se “naoia Krismas i wan taem blong . . . mekem bigfala bisnes nomo.” Ating i no gat wan kantri we i bitim Japan long saed ya.
Daily Record blong Wasington i talem se, “Ol man Japan oli no moa joenem Krismas wetem skul, be oli mekem i kam wan taem blong mekem bisnes nomo.” Nyuspepa ya i ademap se Krismas long Japan i, “bigfala lafet ya we i strong moa blong mekem bisnes bitim we i joen long skul.”
Long plante kantri we ol man oli stap talem se oli Kristin, plante taem i strong blong luksave olsem wanem Krismas i joen wetem “skul.” Samwe 40 yia bifo, wan pepa we i agensem Krismas i sore blong talem se: “Ol bisnesman oli leftemap Krismas. I wan taem we i bitim ol narafala taem blong yia blong winim plante mane. Ol bisnes man we oli talem se oli Kristin oli wet long taem blong Krismas, i no from Kraes, be blong winim mane.” !Ol tok ya oli tru tumas tede! Long plante kantri, bifo yumi kasem tri laswan manis blong yia yumi harem bakegen mo bakegen hamas dei i stap yet blong pem ol presen blong Krismas. Bisnes i kam antap moa long en blong yia, samtaem ol stoa oli save salem kasem 25 pesen blong ol samting we oli salem long ful yia long taem blong Krismas.
Nomata wanem mining blong Krismas long yu, maet yu wantem save olsem wanem i bin stat. ?I tru se Baebol i sapotem fasin blong givim presen long Krismas? ?Ol lafet blong Krismas tede oli blong ol Kristin? Yumi traem faenemaot.
[Foto Credit Line blong pija long pej 2]
Cover: Thomas Nast/Dover Publications, Inc., 1978