Krismas—?From Wanem Hem i Stap Tu Long Esia?

WAN olfala bilif blong ol man blong Is, i klosap sem mak long bilif blong sam man tede long saed blong Santa Klos blong Krismas. Hemia bilif blong ol man Korea long saed blong wan man we nem blong hem Chowangshin, mo yumi save faenem sam bilif we oli klosap sem mak long ol man Jaena mo Japan.

Ol man oli ting se Chowangshin hem i god we i lukaot long kijin. Hem i wan god blong faea we i joen wetem olfala wosip we ol man blong Korea oli mekem long faea. (Long taem bifo, taem ol man Korea oli wokbaot i go long narafala ples, oli stap karem sam jakol we oli laet yet, i go wetem olgeta, mo oli meksua se jakol ya i laet oltaem.) Oli bilif se god ya i stap wajem fasin blong ol wanwan memba blong famle go kasem wan yia, nao hem i pastru long stof blong kijin i go insaed long paep we smok i stap kamaot long hem mo i gobak long heven.

Ol man oli ting se long namba 23 dei blong manis Desemba we oli kaontem folem mun, Chowangshin bambae i go givim ripot blong hem long king blong heven. Oli talem se bambae hem i kambak long en blong yia, bambae hem i pastru long paep we smok i stap kamaot long hem, mo i aot long stof blong kijin bakegen. Nao, oli ting se bambae hem i givim blesing long olgeta we oli bin mekem gudfala fasin, mo bambae hem i givim panis long olgeta we oli bin mekem rabis fasin. Long dei we oli ting se bambae hem i kambak, ol memba blong famle oli mas laetem ol kandel long kijin mo sam narafala rum long haos. Sam long ol pija blong god ya blong kijin oli soem wan narafala samting we i sem mak long Santa Klos​—!hem i werem klos we kala blong hem i red! Bifo, i gat wan kastom long Korea we olgeta woman we oli mared oli mas folem. Long koltaem, samtaem biaen long Desemba 22, ol woman oli mas wokem tu stoking blong givim long olfala mama blong hasban blong olgeta. Hemia wan saen blong soemaot se ol woman ya oli wantem se mama blong hasban blong olgeta i gat wan longfala laef, from we long stret taem ya blong yia, ol dei oli longfala moa.

?Yu luksave sam samting long olgeta kastom ya we oli klosap sem mak long Krismas? Oli gat sem kaen stori mo kastom: paep we smok blong faea i stap kamaot long hem, ol kandel, fasin blong givim presen, ol stoking, wan olfala man we i werem red klos, mo semfala taem blong lafet ya. Nating se i olsem, ol samting ya nomo i no save eksplenem risen we ol man Korea oli akseptem Krismas. Taem lafet blong Krismas i kam long Korea fastaem, bilif we man i gat long saed blong Chowangshin klosap i lus finis. Blong talem stret, tede, bighaf long ol man Korea oli no save se, bifo i gat wan bilif olsem.

Nating se i olsem, samting ya i soemaot olsem wanem we, tru long defren rod, ol kastom we oli laenap wetem taem blong yia we ol dei oli longfala moa, mo ol kastom we man i mekem long en blong yia, oli kavremap plante ples long wol. Long ol yia tri handred K.T.,a bigfala jos blong ol man Rom i jenisim nem blong Satunalia, we hem i lafet blong betde blong god blong san we ol hiten man Rom oli stap mekem, nao oli joenem wetem Krismas. Taswe, long taem blong Krismas ol man oli gohed nomo folem ol olfala kastom blong olgeta, be wan samting nomo i jenis, hemia nem blong lafet ya. ?Olsem wanem samting ya i save hapen?

Fasin Blong Givim Presen

Fasin blong givim presen hem i wan kastom we i neva lus. Longtaem finis i kam, ol man Korea oli kasem bigfala glad taem oli givim mo kasem ol presen. Hemia wan risen we i mekem se ol man Korea oli laekem tumas lafet blong Krismas.

Biaen long Namba Tu Bigfala Faet blong Wol, ol soldia blong Amerika we oli stap long Korea, oli wantem fren gud wetem ol man Korea. Ale oli yusum ol jos olsem ples blong mitim ol man, mo tu, blong givim presen mo narafala samting blong givhan long nid blong olgeta. Samting ya i hapen bigwan moa long taem blong Krismas. Plante pikinini oli kam long ol jos jes blong luk wanem samting i stap hapen, ale, long ol ples ya nao, oli stat kasem ol presen mo joklet. From samting ya, plante long ol pikinini ya oli glad tumas blong tingbaot Krismas bakegen long nekis yia.

Long tingting blong ol pikinini ya, Santa Klos hem i wan soldia blong Amerika we i werem wan red stoking olsem hat blong hem. Ol Proveb 19:6 i talem se: “Sipos wan man i man blong [“givim presen” NW] long man, plante man oli wantem kam fren blong hem.” Yes, fasin blong givim presen i wan rod blong winim plante fren. Be olsem vas ya i soem, ol presen ya oli no mekem se ol man ya oli trufala fren blong longtaem. Long Korea, i gat plante man we, taem oli yangfala, oli go long jos nomo blong kakae joklet. Nating se i olsem, ol man oli no fogetem Krismas. Taem ekonomi long Korea i gru, fasin blong mekem bisnes i kam antap tu. Mo fasin blong givim presen long taem blong Krismas hem i wan isi rod blong pulum ol man blong spenem moa mane. Ol stoa mo bisnes oli stat yusum Krismas blong winim moa mane.

Ol samting ya oli soemaot tingting long saed blong Krismas we i stap tede long ol kantri blong Is. From we ol man oli glad blong spenem bigfala mane long Krismas, ol stoa oli wokem ol niufala samting oltaem blong man i save pem. Long hot taem yet, ol advetaesmen blong Krismas oli stat finis. Namba blong ol samting we ol stoa oli salem, i go antap bigwan long en blong yia, from we ol man oli stap pem ol presen blong Krismas, ol Krismas kad, mo ol myusek blong Krismas tu. !Tru ya, ol advetaesmen ya oli bigwan tumas mekem se ol yangfala oli save harem nogud sipos oli no kasem presen long taem blong Krismas!

Taem Krismas Dei i kam klosap, ol smosmol stoa wetem ol bigbigfala stoa long Seoul oli kam fasfas long man we i kam blong pem ol presen. Semfala samting i hapen long ol narafala taon blong Is tu. Ol trak oli fasfas long rod. Ol hotel, ol ples blong bisnes, ol restoron, mo ol naetklab oli fulap gud wetem ol man. Yu save harem bigfala noes blong ol man we oli stap mekem lafet—olsem ol strongfala singsing. Long naet bifo long dei blong Krismas, ol drong man mo woman oli stap wokbaot long olgeta rod blong taon we oli fulap long ol doti we man i sakem olbaot.

Hemia nao, Krismas. Long ol kantri long Is, Krismas i no moa wan holide blong ol man nomo we oli talem se oli Kristin. I klia se, long Korea mo ol narafala kantri tu, ol bisnes oli win bigwan from lafet ya we i blong Krisendom.b ?Ol bigfala bisnes nomo, oli gat fol from we lafet blong Krismas i no moa laenap nating wetem stret tingting blong Kraes? Ol trufala Kristin oli mas lukluk gud long saed blong impoten kwestin ya.

Stamba Blong Krismas

Sipos yu putum wan wael anamol long wan kej long ples blong ol anamol, be samting ya bambae i no jenisim hem. Bambae hem i wan wael anamol yet. Yumi mastik bigwan sipos yumi ting se anamol ya i no moa wael from we hem i stap insaed long wan kej, mo i luk olsem se hem i kwaet, i stap pleplei wetem ol pikinini blong hem. Ating yu harem finis sam ripot blong sam man we oli wok long ples blong ol wael anamol, se oli kasem bigfala kil from ol wael anamol ya we oli stap long kej.

Long sam rod, yumi save talem se lafet blong Krismas i sem mak. Fastaem, lafet ya i olsem wan “wael anamol” we i stap afsaed long Kristin skul. Buk ya The Christian Encyclopedia (long lanwis blong Korea)c i tokbaot Krismas, aninit long stamba tok ya “Olsem Wanem Hem i Joen Wetem Satunalia Blong Ol Man Rom,” hem i se:

“Lafet blong Satunalia mo Brumaliad oli fasgud long kastom we olgeta man oli stap folem longtaem finis. Taswe, i hadwok blong Kristin skul i jenisim no finisim tufala lafet ya. Taem haeman ya Constantine, i makemaot Sande (we hem i dei blong Phœbus mo Mithras, mo tu, Dei blong Masta) olsem wan spesel dei, . . . maet hemia nao i bin pulum ol Kristin blong ol yia tri handred, blong ting se i oraet blong mekem betde blong Pikinini blong God i joen wetem betde blong san. Long ol spesel dei ya, ol hiten man oli mekem bigfala lafet bitim mak mo oli gat gudtaem. Taswe, ol Kristin oli glad nomo blong faenem wan eskius we bambae i letem olgeta oli gohed blong mekem ol lafet ya, we oli no nidim blong jenisim tingting mo fasin blong olgeta.”

?Yu ting se olgeta man evriwan oli glad long ol jenis ya we oli kamaot? Semfala buk i gohed blong talem se: “Ol Kristin prija long ol kantri blong Wes mo ol kantri klosap moa long Is, oli tok strong agensem fasin blong mekem lafet bitim mak, long taem blong betde blong Kraes. Long semtaem, ol Kristin blong Mesopotemia oli tok agensem ol Kristin blong Wes se oli stap wosipim ol giaman god mo oli stap wosipim san, from we oli akseptem lafet ya we i blong ol hiten man.” I klia nomo se i gat wan samting i no stret nating long lafet ya. Buk ya i makem se: “Nating se i olsem, ol man oli akseptem lafet ya mo hem i kam olsem wan stamba lafet blong ol Kristin. Taswe, nating se ol Protestan oli traem jenisim sam tijing blong jos long ol yia 15 handred, be oli no save karemaot lafet ya.”

Yes, wan lafet blong god blong san, we i no joen nating wetem ol trufala Kristin tijing, i kam insaed long mama jos blong taem ya. Lafet ya i jenisim nem blong hem​—be hem i no jenisim ol hiten fasin we oli joen long hem. Mo hem i mekem rod blong tingting blong ol hiten man i kam insaed long ol jos we oli talem se oli Kristin, nao hem i spolem ol sas samting long saed blong spirit we ol man oli gat. Histri i soemaot se, taem Krisendom i kam antap, ol man oli lego stamba tijing ya blong “lavem ol enemi,” nao ol gudfala fasin oli godaon mo ol fasin we oli raf tumas oli kamaot bitwin ol man.

Sloslou, i kam klia se lafet ya, nating se hem i karem nem ya Krismas, hem i kamaot long ol hiten man nomo. Samting ya i kam klia from ol fasin we oli kamaot long taem blong lafet ya, olsem fasin blong mekem lafet bitim mak, fasin blong drong, danis, givim presen, mo flasem haos wetem ol lif mo tri. Ol bisnes oli yusum Krismas long evri rod we oli naf blong yusum, blong winim moa mane. Ol iuspepa, radio mo televisen oli leftemap Krismas, mo samting ya i mekem ol man oli haremgud. Long medel taon blong Seoul, wan stoa we i salem ol andapan, i pulum ae blong ol man long televisen, taem hem i putum wan Krismas tri long windo blong hem, we oli flasem wetem ol andapan nomo. Tru ya, tingting blong mekem lafet long taem blong Krismas i stap, be i no gat wan saen we i soemaot se ol man oli stap welkamem Kraes.

Tingting Blong Baebol Long Saed Blong Krismas

?Histri long saed blong Krismas i tijim yumi long wanem? Sipos yu batenem sot blong yu be yu luk se yu bin mestem wan baten long stat, i gat wan rod nomo blong stretem, hemia blong stat bakegen. ?I tru, no? Nating se samting ya i tru, Krisendom i agri finis blong folem Krismas. From samting ya, sam man oli talem se yumi no nid blong wari se stamba blong Krismas i kamaot long lafet blong hiten man we oli wosipim san. Oli tingting se, taem jos i jenisim lafet ya i kam betde blong Kraes, i olsem we hem i mekem lafet ya i kam tabu, mo i karem niufala mining.

Yumi save lanem wan impoten lesen from samting we i bin hapen long Juda bifo. Long 612 B.K.T.,e ol man Juda oli karem hiten fasin blong wosipim san i kam insaed long tempel blong Jerusalem. ?Wosip ya blong ol hiten man, i kam tabu from we oli karem i kam insaed long tabu ples blong mekem klin wosip blong Jeova God? Wan man blong raetem Baebol, nem blong hem Esikel, i tokbaot samting ya i se: “I gat samwe long twanti faef man, oli stap stanap klosap long doa blong Rum we i Tabu, long medel blong olta mo vranda blong haos ya. Oli tanem baksaed i go long Rum ya we i Tabu, nao oli lukluk i go long is, oli bodaon, oli stap mekem wosip long san we i stap kam antap. Nao hem i talem long mi se, ‘?Yu luk samting ya? Ol man Juda ya oli stap mekem ol samting we i nogud we i nogud, stret long fes blong mi. Mo olgeta oli girap, oli stap mekem olgeta man oli stap faet agensem olgeta bakegen olbaot long kantri ya, we i mekem mi mi kros we mi kros moa. Be yu luk. Oli tanem baksaed long mi, oli stap spolem mi long fasin we i nogud we i nogud olgeta.’”​—Esikel 8:​16, 17.

Yes, hiten fasin ya blong wosipim narafala god, i no kam tabu long ae blong God, be hem i pulum trabol i kam long tempel blong Jerusalem. Wosip ya i kam antap bigwan long Juda mo i mekem kantri ya i kam fulap long ol raf fasin mo doti fasin tu. Sem samting i hapen insaed long Krisendom. Olkaen kastom we stamba blong olgeta i kamaot long wosip blong san long Satunalia, oli plante tumas long taem blong Krismas. Makemgud se, sam yia nomo afta we Esikel i bin luk vison ya, Jerusalem i kasem jajmen blong God​—ol man Babilon oli bin spolemgud taon ya.​—2 Kronikel 36:15-​20.

Maet i fani long yu taem yu ridim toktok we man Korea ya we i mekem dip stadi, i talem long saed blong pija blong Jisas we hem i luk. Be, blong talem tru, hemia wan tingting we i stret nomo blong wan man we i no gat trufala save long saed blong Jisas. Maet toktok blong hem i save pulum ol man we oli stap mekem lafet blong Krismas, blong oli tingting. ?From wanem? From we Krismas i no soemaot trutok long saed blong Kraes. Lafet ya i haedem trufala wok we Jisas i stap mekem naoia. Jisas hem i no moa wan bebi we i stap slip long ples we ol buluk oli stap kakae long hem.

Bakegen mo bakegen, Baebol i soemaot se, naoia, Jisas hem i Mesaea mo hem i strongfala King we i rul long Kingdom blong God long heven. (Revelesen 11:15) Hem i rere blong finisim fasin pua mo fasin blong harem nogud we smol man nomo oli stap tingbaot long Krismas, taem oli givim mane long sam ogenaesesen blong lukaot long ol pua man.

Blong talem stret, Krismas i no bin givhan long ol kantri blong Krisendom mo ol narafala kantri, mo i no givhan long ol kantri blong Is tu. Defren olgeta, hem i pulum tingting blong ol man i gowe long trufala Kristin mesej long saed blong Kingdom blong God. Hem i mekem se ol man oli no luksave mesej ya, se en blong rabis wol ya i klosap. (Matiu 24:14) Mifala i singaot yu blong askem ol Witnes blong Jeova blong eksplenem olsem wanem en blong rabis wol ya bambae i kam. Mo tu, yu save lanem ol nambawan blesing we bambae oli kamaot long wol, aninit long Kingdom blong God mo blong King ya we bambae i rul long Kingdom ya, hemia Jisas Kraes.​—Revelesen 21:​3, 4.

[Ol futnot]

[Tok Blong Makem Poen Long Pej 6]

Krismas i mekem rod blong tingting blong ol hiten man i kam insaed long ol jos we oli talem se oli Kristin

[Tok Blong Pija Long Pej 5]

Plante pikinini oli kam long ol jos jes blong luk wanem samting i stap hapen, ale oli kasem ol presen mo joklet. Samting ya i mekem se, oli glad blong tingbaot Krismas bakegen long nekis yia

[Tok Blong Pija Long Pej 7]

Naet bifo long Krismas long medel bigfala taon ya Seoul, long Korea

[Tok Blong Pija Long Pej 8]

Kraes i no moa wan bebi, be hem i strongfala King ya long Kingdom blong God