Ol Wetnes Blong Jeova Raonabaot Long Wol—Porto Riko

AELAN blong Porto Riko i stap long hot ples, bitwin Karibin Si mo mo Solwora blong Atlantik. Long 1493 Christopher Columbus i talem se ples ya i blong Spen mo i givim nem blong hem se San Juan Bautista blong tingbaot Jon Baptaes. Blong longtaem, oli bin kolem taon ya we i bigfala moa Porto Riko, no “Rij Pot” (“Rich Port.”) Afta, oli yusum nem ya blong talem ful aelan, be oli kolem taon San Juan.

I gat plante samting we i soem se Porto Riko hem i wan rij pot. Long stat blong rul blong Spen, ol sip oli go plante taem long ples ya blong karem fulap gol. Aelan ya i stap salem i go ovasi sugaken, kofe, banana, mo ol frut, nating se tede ol bisnes we oli halpem ol man mo ol faktri oli bigfala rod blong winim mane. Be, Porto Riko i pruvum se hem i kam rij pot long wan fasin we i impoten moa.

Oli stat blong talemaot gud nyus blong Kingdom long ples ya, long ol yia we oli ron biaen long 1930. Tede, i gat bitim 25,000 pablisa blong gud nyus long Porto Riko. Long 1993 namba blong ol man we oli wok long branj ofis ya blong Watch Tower Society i go antap, stat long 23 i go bitim 100. Fasin blong gat moa man we oli wok, i mekem se branj ya i save lukaot long translesen blong ol buk long saed blong Baebol, long Spanis lanwis. Samting ya i mekem se ol 350,000,000 man long wol we oli toktok Spanis oli save kasem ol buk olsem.

Branj ofis i givim ripot tu se: “Mifala i save prij bakegen long sam kaen man long Porto Riko, from mifala i traehad blong tekem gud nyus i go long ol man we sora blong olgeta i fas. Wan sista i talem ekspiryens ya se: ‘Mi stap wok long medel blong ol man we sora blong olgeta i fas, mo mi visitim wan woman wetem tu smol pikinini. Taem woman ya i kasem save se mi wan Wetnes, hem i sakemaot mi wantaem nomo from hasban blong hem, we sora blong hem i fas tu, i no laekem ol Wetnes blong Jeova.

“‘Sam manis biaen, sem woman ya i go luk wan fren we i stap stadi Baebol wetem ol Wetnes. Hem i joen long stadi ya mo i haremgud tumas long hem. Mi visitim woman ya bakegen, mo hem talem bakegen se hasban blong hem i no laekem ol Wetnes. Be, hem i wantem blong kasem save long Baebol mo hem i taed finis long jyos blong hem from oli no tijim Baebol. Mifala i yusum wan traket blong statem stadi. Wan dei hem i talem long mi blong kambak long sarede from hasban blong hem bambae i stap wetem hem. Mi askem se “Be hem i no laekem mifala, ?i tru?” Woman ya i ansa se: “Hem i wantem blong faenemaot wanem stret nao ol Wetnes blong Jeova oli stap tijim.”

“‘!Long nekis dei tufala i kam noknok long doa blong mi! From we hasban blong hem i gat plante kwestin, mi askem tufala blong kam long miting blong ol man we sora blong olgeta i fas. Man ya i kasem longwe bifo mi, mo stat long taem ya hem i neva mestem wan miting. Hem i stap prij long ol narafala man we sora blong olgeta i fas, hem i bin go long wan asembli, mo hem i stap tingting blong baptaes.’”

Ripot blong branj i gohed: “Long distrik asembli blong mifala long yia ya, oli mekem ful program long saen lanwis, ale plante man we sora blong olgeta i fas mo ol famle blong olgeta oli stap long taem ya tu. Taem man we givim tok i tokbaot wok we oli mekem long saed blong ol man we sora blong olgeta i fas, mo i talem se i gat samwe 70 man we sora blong olgeta i fas oli stap long medel blong olgeta long dei ya, samting ya i pulum filing bigwan. Oli klapem han bigwan, be, olsem man blong givim tok i makem, ol man we sora blong olgeta i fas oli no save harem. Ale, hem i askem ol man we sora blong olgeta i fas blong lukluk i go long ol man we oli stap, man blong givim tok i askem bakegen kwestin ya se ‘?Yufala i glad blong gat ol brata sista blong yufala we sora blong olgeta i fas oli stap wetem yufala?’ mo askem ol man we oli stap blong klapem han​—taem oli saksakem tufala han blong olgeta. I gud tumas blong luk 11,000 brata mo sista oli klapem han taem oli saksakem han blong olgeta. Ol brata mo sista blong yumi we sora blong olgeta i fas, oli glad tumas mo oli harem se oli haf blong bigfala famle blong ol brata. Plante oli krae from glad.”

Taem ol Wetnes blong Jeova oli stap joen long wok blong karem kakae long Porto Riko, bambae hem i gohed blong stap wan rij pot. Ol “sipsip” blong God we hem i kolem olgeta “ol gudfala samting blong olgeta nesen,” bambae oli gohed blong kam insaed, blong mekem se haos blong Jeova i fulap long ona.​—Jon 10:16; Hagae 2:7.

[Bokis blong pija long pej 9]

LUKLUK LONG OL NAMBA BLONG KANTRI YA

1994 Sevis Yia

BIGFALA NAMBA BLONG OLGETA WE OLI STAP PRIJ: 25,428

SKELEM: 1 Wetnes long 139

NAMBA BLONG OL MAN WE OLI KAM LONG MEMORIOL: 60,252

MEDEL NAMBA BLONG OL PAENIA: 2,329

MEDEL NAMBA BLONG OL BAEBOL STADI: 19,012

NAMBA BLONG OL MAN WE OLI TEKEM BAPTAES: 919

NAMBA BLONG OL KONGREGESEN: 312

BRANJ OFIS: GUAYNABO