‘Yufala, Smol Kampani Blong Ol Sipsip, Yufala i No Fraet’
“Yufala we i smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.”—LUK 12:32, NW.
1. ?Wanem bigfala tingting i stap biaen long ol tok blong Jisas se: “Yufala we i smol kampani blong ol sipsip, yufala i no fraet”?
“YUFALA i mas gohed blong lukaot kingdom blong [God].” (Luk 12:31, NW) Taem Jisas i talem ol tok ya long ol disaepol blong hem, hem i talemaot wan rul we i lidim tingting blong ol Kristin, stat long taem blong hem kam kasem taem blong yumi. Kingdom blong God i mas stap long fasples olgeta long laef blong yumi. (Matyu 6:33) Be, long buk blong Luk, Jisas i gohed blong toktok long kaen fasin long wan spesel grup blong ol Kristin, long ol tok we i mekem tingting blong olgeta i strong. Hem i talem se: “Yufala we i smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.” (Luk 12:32, NW) Olsem Gudfala Man ya blong Lukaot Sipsip, Jisas i save se i gat ol trabol i stap fored long ol disaepol blong hem we hem i laekem olgeta tumas. Be oli no gat risen blong fraet sipos oli gohed blong lukaot Kingdom blong God. Taswe, advaes ya blong Jisas i no wan strong oda. Be, hem i wan promes we i givim wetem lav, blong mekem olgeta oli strong mo blong mekem se oli no fraet.
2. ?Hu ya smol kampani blong ol sipsip ya, mo from wanem oli gat spesel blesing?
2 Jisas i stap toktok long ol disaepol blong hem, mo i singaotem olgeta se “smol kampani.” Hem i stap toktok tu long olgeta we bambae Jeova ‘i givim kingdom’ long olgeta. Taem yumi tingbaot bigfala namba blong man we oli akseptem Jisas long ol yia we oli kam biaen, i tru se grup ya i smol nomo. Wan narafala risen from wanem grup ya i impoten se, God i jusum olgeta blong oli kasem wan nambawan fyuja, hemia blong wok olsem ol king. Papa blong olgeta, Bigfala Man blong Lukaot Sipsip, Jeova, i singaotem smol kampani ya wetem tingting ya se bambae oli kasem ol blesing long heven we oli joen wetem Kingdom blong Mesaea, Kraes.
Smol Kampani Blong Ol Sipsip
3. ?Jon i luk wanem gudfala drim long saed blong smol kampani blong ol sipsip?
3 ?Oraet, hu nao i stap insaed long smol kampani ya blong ol sipsip we oli gat nambawan hop ya? Ol man blong Jisas Kraes we tabu speret i makemaot olgeta. (Ol Wok 2:1-4) Aposol Jon i luk ol man ya taem oli stap singsing long heven we oli holem ol gita long han blong olgeta, nao hem i raetem se: “Nao mi luk, mo antap long bigfala hil ya Saeon, i gat Smol Sipsip blong God i stap stanap. Mo i gat wan handred fotefo taosen man oli stap wetem hem, we i gat nem blong Smol Sipsip ya wetem nem blong Papa blong hem i stap finis long fes blong olgeta. Hemia ol man ya we oli holem laef blong olgeta i stap klin, from we oli no go long woman. Olgeta ya oli no slip wetem woman samtaem. Oli biaen long Smol Sipsip ya long evri ples we hem i pas long hem. God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya. Neva gyaman tok i kamaot long maot blong olgeta, mo oli no gat wan samting nating i stap long olgeta blong mekem olgeta oli doti long fes blong God.”—Revelesen 14:1, 4, 5.
4. ?Smol kampani blong ol sipsip oli gat wanem wok long wol tede?
4 Stat long Pentekos 33 K.T., olgeta ya we tabu speret i makemaot olgeta, oli olsem ol man blong wok long nem blong Kraes long wol. (2 Korin 5:20) Tede, i gat smol nomo blong olgeta oli stap yet long wol, oli stap wok olsem wan grup, slef ya we i stret mo waes. (Matyu 24:45; Revelesen 12:17) I stat long yia 1935, plante “narafala sipsip,” ol Kristin we oli gat hop blong laef long wol long fyuja, we namba blong olgeta naoia i kasem sam milyan, oli joen wetem olgeta. Ol narafala sipsip ya oli givhan long olgeta blong talemaot gud nyus long ful wol.—Jon 10:16.
5. ?Wanem tingting blong ol memba blong smol kampani we oli stap yet long wol, mo from wanem oli no gat risen blong fraet?
5 ?Wanem tingting blong ol memba blong smol kampani ya we oli stap yet long wol? Oli save se bambae oli kasem ‘wan kingdom we paoa blong hem i no save lus, i no save foldaon samtaem,’ taswe oli mekem tabu wok blong olgeta wetem fasin fraetgud long God mo bigfala ona long hem. (Hibrus 12:28) Wetem tingting daon, oli luksave se oli gat wan blesing we i no gat tok blong talem se i gud olsem wanem, mo se samting ya i givim glad long olgeta we i bigwan tumas. Oli faenem finis “wan perel we i nambawan” we Jisas i tokbaot taem hem i tokbaot Kingdom. (Matyu 13:46) Long taem ya we bigfala trabol i stap kam kolosap, ol man blong God we tabu speret i makemaot olgeta, oli stanap strong, oli no fraet. Nomata wanem bambae i kamtru long ol man blong wol long taem blong ‘bigfala dei ya blong Jeova we i gud tumas,’ oli no harem nogud from fraet long fyuja. (Ol Wok 2:19-21) Yes, oli no gat wan risen nating blong fraet.
Namba i Godaon
6, 7. (a) ?From wanem namba blong smol kampani blong ol sipsip we oli stap yet long wol i smol nomo? (b) ?Olsem wanem olgeta man wanwan oli mas tingbaot hop we hem i gat?
6 Long ol yia we oli jes pas, namba blong smol kampani blong ol sipsip we oli stap yet long wol, i kam smol. Ripot blong Memoriol long 1994 i pruvum samting ya. Long bitim 75,000 kongregesen blong ol man blong Jeova long ful wol, 8,617 man nomo oli kakae bred mo dring waen long Memoriol, blong soemaot se oli memba blong smol kampani we oli stap yet long wol. (Matyu 26:26-30) Be fulnamba blong ol man we oli kam long Memoriol se 12,288,917. Ol Kristin we tabu speret i makemaot olgeta oli save se i mas olsem. Jeova i putum wan stret namba, 144,000 blong smol kampani ya blong ol sipsip, mo hem i stap hivimap olgeta stat long Pentekos 33 K.T. I stret we, taem kolosap namba ya i fulwan, God bambae i no moa singaot plante man blong joen long smol kampani ya. Mo ol samting we oli kamaot, oli soem se bighaf blong wok blong hivimap ol man blong kasem spesel blesing ya, i finis long 1935. Be, profet tok i talem se long taem blong en, namba blong ol narafala sipsip bambae i gru. Bambae oli kam “wan bigfala hif blong man, we olgeta oli plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis.” Stat long 1935, bigfala wok blong Jeova i blong hivimap bigfala kampani ya, we hop blong olgeta i blong kasem laef we i no save finis long paradaes wol.—Revelesen 7:9; 14:15, 16; Ol Sam 37:29.
7 Bighaf blong smol kampani ya we oli stap yet long wol, naoia oli gat 70, 80, no 90 yia. Sam long olgeta oli bitim 100 yia finis. Evriwan long olgeta, nating se oli gat hamas yia, oli save se tru long fasin blong laef bakegen long heven, bambae oli joen wetem Jisas Kraes, mo bambae oli rul wetem hem long Kingdom blong hem we i gud tumas. Olgeta long bigfala kampani bambae oli stap long wol aninit long King ya, Kraes. Yumi evriwan i save glad long fyuja we Jeova bambae i givim long olgeta we oli laekem hem tumas. I no blong yumi blong jusum wanem hop yumi wantem kasem. Hemia i blong Jeova blong jusum. Tufala grup ya i save glad tumas long hop blong olgeta blong wan hapi fyuja, nating se i blong stap long Kingdom blong heven no long paradaes long wol aninit long Kingdom ya.—Jon 6:44, 65; Efesas 1:17, 18.
8. ?Wok ya blong putum mak blong God long ol 144,000 man, i kasem wanem mak finis, mo wanem bambae i hapen taem wok ya i finis fulwan?
8 Smol kampani ya blong 144,000 sipsip i olsem “Isrel blong God,” we long tingting blong God, oli tekem ples blong ol prapa man Isrel. (Galesia 6:16) From samting ya, smol namba blong olgeta we oli laef yet long wol, oli haf blong nesen ya long saed blong speret we oli stap yet long wol. Jeova i stap putum mak blong hem long olgeta ya we oli stap yet, blong Hem i save agri long olgeta fulwan. Long wan drim, aposol Jon i luk we samting ya i stap hapen, mo i talemaot se: “Nao mi luk wan narafala enjel i stap kam, we i aot long saed we san i stap kam antap. Hem i holem mak we God ya we i laef we i no save ded, hem i stap yusum blong makem ol man blong hem. Enjel ya i singaot bigfala, i tok long ol fo enjel ya we God i givim paoa finis long olgeta blong oli spolem graon mo solwora. Hem i talem se ‘Yufala i no spolem graon mo solwora mo tri fastaem, gogo bambae mifala i makem ol man blong wok blong God blong yumi, mifala i putum mak blong hem long fes blong olgeta.’ Nao mi harem namba blong ol man we mak blong God i stap long olgeta. I gat wan handred fotefo taosen man olgeta, we oli kamaot long olgeta laen blong ol man Isrel [long saed blong speret].” (Revelesen 7:2-4) I klia se wok ya blong putum mak long ol man Isrel long saed blong speret i stap kam kolosap long en blong hem. Taswe, drim ya i gohed blong soemaot ol samting we oli mekem yumi glad tumas, we bambae oli hapen i no longtaem. Wan samting, “bigfala trabol,” taem ol enjel oli lego ol fo win blong spolem ol samting long wol, i mas stap kolosap nomo.—Revelesen 7:14.
9. ?Wanem tingting blong smol kampani from we namba blong bigfala kampani i stap kam antap?
9 Namba blong ol man we oli hivap finis long bigfala kampani, i kasem sam milyan. !Samting ya i mekem hat blong olgeta blong smol kampani we oli stap yet long wol, i glad! Nating se namba blong smol kampani we oli stap yet long wol i stap godaon, oli trenem mo mekemrere finis ol man long bigfala kampani we oli nafgud blong mekem ol wok long ogenaesesen blong God long wol, we i stap kam bigwan. (Aesea 61:5) Olsem we Jisas i talem, bambae i gat ol man we oli laef tru long bigfala trabol.—Matyu 24:22.
“No Fraet”
10. (a) ?Wanem faet agens long ol man blong God i rere blong kamaot, mo wanem bambae i kamaot biaen? (b) ?Wanem ol kwestin we yumi wanwan i mas tingbaot?
10 Olgeta long heven oli sakemaot Setan mo ol dimon blong hem finis, oli kamdaon long wol. Naoia, oli stap pusum Hem mo ol man blong hem blong oli faetem ol man blong Jeova fulwan. Baebol i tokbaot faet ya, olsem faet blong Gog blong Magog. ?Devel Setan i faetem hu stret? Ol laswan memba blong smol kampani blong ol sipsip, Isrel blong God long saed blong speret, we oli stap laef long pis “long medel blong wol”. (Esikel 38:1-12) Yes, smol haf blong grup ya we tabu speret i makemaot olgeta, we oli stap yet long wol, wetem ol fren blong olgeta we oli wok kolosap long olgeta, ol narafala sipsip, bambae oli luk olsem wanem faet ya blong Setan i kamaot. Nao biaen bambae oli luk wan bigbigfala samting we Jeova God i mekem blong ansa long fasin ya we Setan i mekem. Hem bambae i go insaed long bisnes ya blong protektem ol man blong hem, mo samting ya bambae i mekem “bigfala dei blong Jeova, we i mekem ol man oli fraet,” i faerap. (Joel 2:31) Tede, slef we i stret mo waes i stap mekem wan wok we i impoten tumas, i blong sevem laef blong ol man. Oli stap givim woning blong bigbigfala samting ya we bambae Jeova i mekem. (Malakae 4:5; 1 Timote 4:16) ?Yu yu strong blong sapotem wok ya, mo yu stap joen long wok blong talemaot gud nyus blong Kingdom blong Jeova? ?Bambae yu yu gohed blong mekem wok ya olsem wan man blong talemaot Kingdom we i no fraet?
11. ?From wanem yumi nidim fasin blong no fraet tede?
11 From ol samting we oli stap kamaot long wol naoia, taem ya i stret blong smol kampani blong ol sipsip oli harem ol tok we Jisas i talem long olgeta, se: !“Yufala we i smol kampani blong ol sipsip, yufala i no fraet”! Oli mas gat fasin ya blong no fraet from we plante samting i stap kamtru naoia folem stampa tingting blong Jeova. Olgeta man evriwan long smol kampani blong ol sipsip, oli luksave nid ya blong stanap strong gogo kasem en. (Luk 21:19) Jisas Kraes, Rula mo Masta blong smol kampani blong ol sipsip, i stanap strong mo i soemaot strong bilif gogo kasem en blong laef blong hem long wol. Olsem nao, evriwan long smol kampani we oli stap yet long wol, oli mas stanap strong mo holemtaet strong bilif.—Hibrus 12:1, 2.
12. ?Olsem Jisas, Pol i givim wanem advaes long ol tabu Kristin blong oli no fraet?
12 Olgeta tabu Kristin oli mas gat semfala tingting olsem we aposol Pol i gat. Tingbaot olsem wanem ol tok blong hem olsem wan tabu man blong talemaot laef bakegen, oli joengud wetem advaes blong Jisas blong no fraet. Pol i raetem se: “ ‘I gud yumi stap tingbaot Jisas Kraes, we hem i kamaot long laen blong Deved, mo i laef bakegen long ded.’ From gud nyus ya we mi stap talemaot, ol man oli stap mekem mi mi harem nogud, mo oli stap fasem mi long jen olsem wan man blong brekem loa. Be tok blong God, jen i no save fasem. From samting ya, mi mi stap harem nogud long evri samting be tingting blong mi i no save foldaon. Mi mi wantem givhan long olgeta we God i jusumaot olgeta finis. Long fasin ya, bambae olgeta ya oli save faenem rod we God i yusum blong sevem olgeta we oli joen long Kraes, mo bambae oli go joen long hem bakegen long gudfala laef ya long heven, we i no save finis samtaem. I gat wan tok we i talem se ‘Sipos yumi joen finis long hem long ded blong hem, bambae yumi save joen long hem bakegen long laef blong hem. Sipos yumi harem nogud be yumi stap stanap strong, bambae yumi save joen wetem hem blong holem hae nem wetem hem. Sipos yumi talemaot se yumi no man blong hem, hem tu bambae i talemaot se i no Masta blong yumi. Sipos yumi no holem promes blong yumi, be hem bambae i stap holem promes blong hem oltaem, from we hem i no save jenisim tok blong hem.’ ”—2 Timote 2:8-13.
13. ?Ol memba blong smol kampani oli gat wanem strong bilif, mo samting ya i pusum olgeta blong mekem wanem?
13 Olsem aposol Pol, ol memba blong smol tabu kampani ya blong ol sipsip we oli laef yet long wol, oli rere blong stanap strong nating se oli stap safa taem oli talemaot strong mesej we i kamaot long Tok blong God. Bilif blong olgeta i kam strong moa taem oli gohed blong trastem ol promes blong God blong sevem olgeta, mo blong givim ‘laef long olgeta blong flasem olgeta, olsem we oli putum hat long man we i win long resis blong flasem hem,’ sipos oli bilif strong gogo oli ded. (Revelesen 2:10) Wantaem nomo, bambae oli laef bakegen mo bambae bodi blong olgeta i jenis, nao bambae oli joen wetem Kraes, blong rul wetem hem olsem ol king. !Fasin blong olgeta blong holemtaet stret fasin bambae i win long taem ya we oli winim wol!—1 Jon 5:3, 4.
Wan Hop We i Spesel
14, 15. ?Olsem wanem hop blong laef bakegen blong smol kampani i spesel?
14 Hop ya we smol kampani blong ol sipsip oli holem long saed blong laef bakegen, i spesel. ?Long wanem rod? Wan samting, oli laef bakegen fastaem long “ol man we oli stret wetem ol man we oli no stret.” (Ol Wok 24:15) Tru ya, laef bakegen blong ol Kristin we tabu speret i makemaot, i gat wan ples we i impoten tumas, olsem ol tok blong 1 Korin 15:20, 23 i soemaot klia: “Kraes ya, God i mekem hem i laef bakegen finis long ded. Long olgeta we oli ded finis, hem i faswan blong laef bakegen long ded. Hem i olsem fas kakae ya we i rere long garen. Faswan blong kasem, hemia Kraes ya we i olsem fas kakae we i rere long garen. Nao biaen, long taem ya we Kraes bambae i kamtru, ol man blong hem bambae oli kasem.” Sipos smol kampani ya i gat fasin blong stanap strong longtaem mo bilif folem eksampel blong Jisas, oli save wanem i stap long fyuja blong olgeta taem laef blong olgeta long wol ya i finis. Samting ya i tru moa afta we trufala Masta i kam blong klinim haos blong hem long 1918.—Malakae 3:1.
15 Pol i givim wan moa risen blong yumi tingbaot fasin ya blong laef bakegen olsem samting we i spesel. Long 1 Korin 15:51-53, Pol i raetem se: ‘Mo naoia mi mi talem wan tok haed long yufala. I no evriwan long yumi we bambae oli slip [long ded], be bambae yumi evriwan i jenis. Wantaem nomo, olsem taem blong satem ae nomo, taem laswan pupu i krae, bambae yumi jenis. . . . From we bodi ya blong yumi we oli blong ded, oli mas jenis blong kam we bambae oli no moa save ded samtaem. Bodi ya blong yumi we oli blong lus oli mas jenis blong kam we bambae oli no moa save lus samtaem.’ Ol tok ya oli go stret long olgeta blong smol kampani we oli ded long taem ya we Kraes i kambak finis, i stap. Oli no slip longtaem long ded, “wantaem nomo, olsem taem blong satem ae nomo,” oli kasem laef ya we bambae oli no moa save ded samtaem.
16, 17. Long saed blong hop blong olgeta blong laef bakegen, ?olsem wanem ol tabu Kristin oli kasem spesel blesing tede?
16 From ol save ya, yumi save kasem mining blong ol tok blong aposol Jon long Revelesen 14:12, 13. Hem i raetem se: “ ‘Yufala ol man blong God we yufala i stap folem ol loa blong God mo we yufala i stap folem fasin blong bilif long Jisas, yufala i mas harem ol tok ya, nao yufala i mas stanap strong.’ Nao mi harem wan tok we i kamaot long heven, i talem se ‘Yu raetem tok ya. I stat naoia, ol man we taem oli ded oli man blong Masta blong yu, bambae oli save haremgud.’ Nao tabu speret i talem se ‘!Yes i tru ya! Bambae oli save kasem spel long ol hadwok blong olgeta, from we bambae oli tekem frut blong wok blong olgeta i go wetem olgeta.’ ”
17 !I wan spesel presen we i stap rere blong ol memba blong smol kampani we oli stap yet long wol! Fasin blong olgeta blong laef bakegen long ded, bambae i kam kwiktaem, stret afta we oli slip long ded. !Tingbaot bigfala jenis ya we bambae i kamaot long laef blong olgeta taem oli statem wok blong olgeta long ples blong ol speret man! From wok ya we i stap gohed blong givim laef long heven long smol kampani ya, mo from we ol bigfala profet tok blong Baebol kolosap oli kamtru fulwan, ol laswan memba blong smol kampani we oli stap yet long wol, tru ya oli no gat risen blong “fraet.” Mo fasin blong olgeta blong no fraet i leftemap tingting blong bigfala kampani. Oli mas wokem semfala fasin blong no fraet, taem oli tingbaot bigfala taem blong trabol we wol ya i neva save bifo, we bambae i mekem olgeta oli fri.
18, 19. (a) ?From wanem taem ya we yumi laef long hem i impoten tumas? (b) ?From wanem ol Kristin we tabu speret i makemaot olgeta mo ol narafala sipsip tu, oli no mas fraet?
18 Fasin ya blong talem bakegen ol wok blong smol kampani blong ol sipsip i givhan long olgeta mo long bigfala kampani blong gohed blong fraetgud long trufala God. Taem blong hem blong jajem ol man i stap finis, mo smol taem ya we i stap yet blong givim jans long ol man, i impoten tumas. I tru, ol man oli gat smol taem nomo i stap blong tekem wan disisen. Be, yumi ya, yumi no fraet se bambae stampa tingting blong God i no save kamtru. !Bambae i sua blong kamtru!
19 I kamtru finis we, ol bigfala voes oli kamaot long heven, oli talem se: “Ol Kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i holem nem blong king, we bambae i rul gogo i no save finis.” (Revelesen 11:15) I tru, Bigfala Man blong Lukaot long Sipsip, Jeova, i stap lidim olgeta sipsip blong hem long “ol stret rod, olsem we hem i bin promes.” (Ol Sam 23:3) Hem i stap lidim smol kampani blong ol man we oli olsem sipsip long stret rod blong oli kasem pei blong olgeta long heven. Mo ol narafala sipsip bambae oli stap sef tru long bigfala trabol blong haremgud long laef blong olwe long wol, aninit long gudfala Kingdom blong God we Jisas Kraes i king long hem. Taswe, olgeta man blong God long wol oli gat risen blong lesingud long ol tok blong Jisas we hem i talem long smol kampani, se: “Yufala i no fraet.”
?Yu Yu Save Eksplenem?
◻ ?From wanem yumi save se namba blong smol kampani we oli stap yet long wol, bambae i godaon?
◻ ?Olsem wanem long laef blong ol tabu Kristin we oli stap yet long wol tede?
◻ ?From wanem ol Kristin oli mas no fraet, nating se faet blong Gog blong Magog i kam kolosap?
◻ ?From wanem hop blong laef bakegen blong 144,000 i spesel, i tru moa tede?