?Olsem Wanem Blong Mekem Ol Prea Blong Yu Oli Kam Gud Moa?
PREA i nambawan long olgeta samting we Jeova God i givim, long fasin lav. Maet ol man blong agens oli sakemaot Baebol blong yu, no blokem yu, blong yu no joen long miting wetem ol man blong wosip. Be i no gat wan we i save blokem yu, blong yu no prea. Prea hem i impoten tumas. Taswe hem i impoten we yumi wanwan i tinghae mo yusumgud nambawan jans ya we yumi gat. ?Wanem i save givhan long yu, blong mekem se ol prea blong yu oli kam gud moa?
Baebol hem i no wan buk we i fulap long ol prea. Be, yumi save talem se hem i nambawan buk long wol, we i tokbaot prea. Long Hibru haf blong Baebol nomo, i gat bitim 150 prea. Sam oli sot; sam narafala oli longfala. Ol prea ya, ol king no ol man we oli stap long kalabus oli mekem, long open ples no long fasin haed, taem oli glad from we oli win long faet no taem oli kasem trabol. Olsem Deved i singsing long Ol Sam 65: 2, “Olgeta man long olgeta ples” oli kam long Jeova, we hem i “stap ansa long ol prea.” ?From wanem God i yusum tabu speret blong hem, blong pusum ol man blong oli raetemdaon plante defren kaen prea olsem, long Baebol?
Blong ansa long kwestin ya, lukluk 2 Timote 3:16. Hem i talem se: “Olgeta tok ya blong Baebol oli kamaot long God fastaem, mo oli stret gud.” Taswe ol prea we oli stap long Baebol, oli blong lidim yumi, olsem ol profet tok blong Baebol, ol rul, mo histri. ?Olsem wanem ol prea ya oli save givhan long yumi?
Taem yumi luklukgud long ol prea long Baebol, yumi save faenem olgeta ya we oli laenap stret wetem ol samting we i kamaot long laef blong yumi. Yumi save lanem olsem wanem ol prea oli defdefren, long saed blong risen mo fasin blong olgeta. Antap moa, bambae yumi faenemaot ol nyufala toktok blong presem mo talem tangkyu long God. Mo bambae yumi faenem ol nyufala tok blong yusum taem yumi askem ol samting long hem mo taem yumi stap krae bigfala. Blong talem long tok we i sot, olgeta prea long Baebol oli save halpem yumi, blong mekem se ol prea blong yumi, oli kam gud moa.
I luk olsem we Meri, we i kam mama blong Jisas, hem i wan woman we i kasem blesing, from ol toktok blong wan prea we i stap long Baebol. Hem i go visitim wan famle blong hem, Elisabet, afta we wanwan long tufala, oli gat bel wetem wan pikinini boe from help blong God. Meri i presem mo i talem tangkyu long God, mo sam long ol tok blong hem oli sem mak long ol tok we i stap long wan prea, long Hibru haf blong Baebol. Ating Meri i savegud long prea we Hana, mama blong profet Samuel, i mekem. Bitim wan taosen yia bifo, Hana tu i bonem wan pikinini wetem help blong God. ?Yu ting se Meri i tingting dip long prea ya, from we i soemaot sem filing olsem we hem i gat?—1 Samuel 2:1-10; Luk 1:46-55.
?Olsem wanem long yu? ?Yu save tingbaot wan prea long Baebol, we wan man i mekem, we i laenap gud wetem samting we i kamaot long laef blong yu? Taem yu faenem, ridim, mo tingting dip long ol prea olsem, bambae samting ya i halpem yu blong mekem fasin blong yu blong toktok wetem God i kam gud moa. Long nekis haf, mifala i askem yu blong luklukgud long trifala prea long Baebol. Oli mekem ol prea ya from plante defren samting we i stap hapen long laef blong olgeta. Ating i sem mak long ol samting we i kamaot long laef blong yu.