!I No Longtaem, Bambae i No Moa Gat Puaman!

“YUFALA i no fraet. Mi mi gat wan gud nyus blong talem long yufala, we i save mekem olgeta man oli haremgud tumas.” (Luk 2:10) Ol man blong lukaot long ol sipsip, we oli fraet, oli harem ol gudfala tok ya. Hemia kolosap long Betlehem, long naet ya we Jisas i bon long hem. Folem ol tok ya, Jisas i rili leftemap “gud nyus,” taem hem i stap mekem minista wok blong hem long wol. Tede, yumi stap dipen bigwan long mane blong kasem ol samting we yumi nidim. ?Be olsem wanem gud nyus long saed blong Jisas i save givhan long yumi?

Jisas Kraes i talemaot “gud nyus long ol puaman.” (Luk 4:18) Matyu 9:​35 i talem se: “Nao Jisas i stap wokbaot, i stap pas long ol taon mo ol velej, mo i stap tij insaed long ol haos prea blong olgeta. Hem i stap talemaot gud nyus blong [kingdom blong God].” Mesej blong hem i rili leftemap tingting blong olgeta we oli pua. “Taem hem i luk plante man we oli stap, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we oli no gat man blong lukaot long olgeta.” (Matyu 9:36) I tru, Jisas i talem se: “Ol puaman bambae oli stap oltaem wetem yufala.” Be, yumi no mas ting se, ol tok ya oli minim se ol puaman oli no gat hop. (Jon 12:8) Go kasem en blong ol nogud fasin blong wol ya, bambae i gat ol puaman, nomata wanem stampa blong trabol blong olgeta. Tok blong God i intres long ol problem blong ol puaman. Be hem i no tokbaot ol nogud saed blong hem nomo. Hem i halpem ol puaman blong oli save winim ol wari blong laef.

Help Blong Ol Puaman

Tok ya i stret se: “Long olgeta baden we man i save karem, i no gat wan i hevi moa, i bitim hemia we man i kasem save se i no gat wan i kea no i kasem save long hem.” Be, nating se bighaf blong ol man oli no gat fasin sore, i gat gud nyus yet blong ol puaman​—naoia mo long fyuja tu.

Sore tumas, plante man oli no intres tumas blong halpem ol puaman. Folem The World Book Encyclopedia, sam man oli bilif se, “ol man long ol sosaeti oli traehad tumas blong kasem ol samting blong laef mo . . . ol wanwan haeman, oli kam strong mo oli kam rij.” Ol man we oli bilif long tingting ya, we oli kolem tingting blong Darwin long saed blong ol grup blong ol man, oli luk ol puaman olsem ol les man nomo no ol man blong westem taem. Be, ol man we oli wok long garen, ol man we oli go long ol defren blong faenem wok, mo sam narafala bakegen, nating se oli kasem smol pei nomo, oli mas wok had tumas blong fidim famle blong olgeta.

Long plante kantri, fasin pua i bigwan lelebet. From samting ya, ol puaman​—bighaf blong olgeta—​oli no harem nogud tumas from trabol blong olgeta. Be long sam kantri, i gat plante rijman we oli laef long medel blong ol puaman. Oli wokem ol haos we oli naes mo oli sas tumas, kolosap long ol smosmol haos we oli no klin mo oli fasfas. Ol man we oli kasem bigfala vatu, oli draevem ol sas trak blong olgeta, nao oli pas long ol rod we i fulap long ol puaman mo ol man we oli no gat wok. Long ol kantri olsem, ol puaman oli savegud trabol blong olgeta. I tru, The World Book Encyclopedia i talem se, “ol puaman oli safa from we oli no kakaegud, oli no gat gudfala haos, mo oli no gat inaf meresin. Be i no hemia nomo. Oli safa tu from we oltaem oli stap wari long laef we oli stap long hem. Oli no save kasem mo holem ol gudfala wok. Oli no moa gat respek mo ona long olgeta bakegen.” Nao, ?olsem wanem sam long ol man we oli pua tumas oli winim ol trabol blong olgeta? ?Gud nyus long saed blong Jisas i save givhan olsem wanem long olgeta?

Fastaem, tingbaot se ol man we oli no waes oli save mekem se oli kam pua moa. Tingbaot sam eksampel. Valdecir i talem se, nating we waef mo ol smol pikinini blong hem, long Brasil, oli gat smol kakae nomo, hem i westem mane blong ronem ol rabis fasin blong laef. Hem i talem se: “Nating se mi mi wok, mi neva gat mane blong givhan long famle. Be oltaem, long poket blong mi, i gat mane blong pem ol defren tikit blong lotri.” From we Milton i dring mo i smok tumas, hem i draonem wan bisnes we i gat 23 wokman. Hem i talem se: “Sam naet, mi slip long rod, mi no save gobak long haos. Mo mi mekem se famle blong mi i safa bigwan.”

Joao tu i westem pei blong hem blong mekem ol samting we oli no stret. “Sam naet, mi no slip long haos. Ol vatu we mi mi kasem i no naf blong pem ol nogud samting mo ol pleplei we mi mekem. Mi go bitim mak long ol fasin ya. Ale, waef blong mi i wantem se bambae mitufala i seraot.” Antap long ol problem long saed blong mane mo long saed blong mared we hem i kasem, i gat sam narafala problem yet. Hem i talem se: “Mi mekem problem wetem ol famle mo ol man we oli stap kolosap. Mo plante taem, mi gat problem long wok. Frut we i kamaot se, mi lusum ol wok blong mi oltaem.” Júlio i wan man blong yusum drag. Hem i eksplenem se: “From we mane blong mi i no naf blong pem drag, mi stat blong wok olsem wan man blong salem drag ya, nakotik. Olsem nao, bambae mi no nid blong pem drag.”

José, we i gruap long wan pua famle we i gat eit pikinini, i wantem wan samting blong hem wan. From we hem i tingting se laef blong hem i nogud finis, ale hem i joen wetem ol nara yangfala, nao i stat blong stilim olting blong ol man. Wetem tingting we i trabol, wan nara yangfala i kam wan memba blong wan grup blong stronghed yangfala we oli kolem ‘Ol Man blong Bangem Hed’ (Headbangers). Hem i eksplenem se: “From we plante long mifala i pua tumas, mifala i haremgud taem mifala i brekem ol samting mo faet wetem ol man.”

Be tede, ol man ya wetem ol famle blong olgeta oli no moa safa from fasin pua, oli no moa gat nogud filing mo filing blong kros. Naoia, i gat man i givhan long olgeta mo oli gat hop. ?From wanem? From we oli stadi long gud nyus we Jisas i bin talemaot. Oli folem ol advaes blong Baebol mo oli joen wetem kongregesen blong ol Wetnes blong Jeova, we ol memba blong hem oli gat wan tingting nomo. Mo oli lanem sam samting we oli rili impoten, long saed blong fasin blong gat plante mane mo fasin pua.

Help Blong Winim Fasin Pua

Fastaem, oli lanem se sipos oli folem ol rul blong Baebol, oli save blokem sam nogud trabol we oli kamaot from fasin pua. Baebol i blokem fasin blong slip olbaot, fasin blong dring tumas, plei laki, mo fasin blong yusum drag. (1 Korin 6:​9, 10) Ol fasin ya oli sas tumas. Oli save mekem wan rijman i kam pua, mo oli save mekem wan puaman i kam pua moa. Taem man i lego ol nogud fasin ya mo sam narafala fasin olsem, samting ya i givhan bigwan long famle blong hem long saed blong mane.

Seken samting, oli faenem se laef i moa impoten bitim mane. Ol tok ya we oli kamaot from tabu speret, oli makem stret tingting long saed ya, se: “From we waes i blong lukaotgud long man olsem we mane i blong lukaotgud long man. Be save i moa gud i winim mane, from we waes i save sevem laef blong man we i kasem hem.” (Eklesiastis 7:​12) Yes, yumi nidim mane. Be, waes we i stanap long Baebol mo save long saed blong ol stampa tingting blong God, oli givhan moa. I tru, man we i no gat waes, nating we hem i gat plante mane, be hem i stap karem wan baden we i sem mak olsem man we i no gat mane. Long waes fasin, man ya blong raetem Baebol i prea se: “Tekemaot ol tok we oli no tru mo ol tok we oli gyaman long mi. Mekem se mi no pua mo mi no rij tu. I gud mi mi solemdaon kwiktaem ol kakae we oli mekemrere from mi, blong bambae mi no haremgud long hem mo tanem baksaed long yu mo talem se: ‘?Hu ya Jeova?’ mo blong bambae mi no kam pua mo afta mi save stil mo spolem nem blong God blong mi.”​—Proveb 30:​8, 9.

Namba tri samting, oli faenem se sipos man i mekem laef blong hem i laenap wetem gud nyus we Jisas i talemaot, neva bambae hem i harem se hem i stap hem wan. Gud nyus ya i tokbaot Kingdom blong God. Oli kolem mesej ya se, “gud nyus blong kingdom.” Mo long taem blong yumi, ol man oli talemaot long olgeta ples long wol. (Matyu 24:​14, NW) Jisas i talem long yumi se bambae yumi kasem sapot sipos yumi putum hop blong yumi long Kingdom ya. Hem i talem se: “Fastaem yufala i mas [lukaot kingdom blong God mo stret fasin]. Nao biaen hem i save givim olgeta samting ya tu long yufala.” (Matyu 6:33) God i no promes blong givim ol nambawan trak mo ol flas haos long yumi. Jisas i stap tokbaot ol samting we yumi rili nidim long laef, olsem kakae mo klos. (Matyu 6:31) Be plante milyan man tede, oli save talem se promes ya blong Jisas i tru nomo. Wan man, nating se i wan man we i pua tumas, hem i no stap hem wan sipos hem i putum Kingdom fastaem.

Namba fo samting, oli faenem se man we i putum Kingdom blong God long fasples, hem i no harem nogud taem hem i fesem hadtaem long saed blong mane. Yes, wan puaman i mas wok had. Be sipos hem i mekem wok blong God, hem i gat wan jans blong frengud wetem Man we i Wokem hem, we Baebol i tokbaot Hem se: “Hem i no save fogetem ol puaman, mo i no save livim olgeta oli stap harem nogud. Hem i no save tanem baksaed blong hem long olgeta, hem i stap ansa long olgeta taem oli singaot long hem blong i givhan long olgeta.” (Ol Sam 22:24) Antap long ol samting ya, wan puaman i save kasem help blong winim ol problem blong laef. Hem i haremgud long nambawan fasin joen we hem i gat wetem ol Kristin brata mo sista. Mo hem i kasem save mo i bilif long wil blong Jeova we Hem i mekem i kam long klia ples. Ol samting olsem, “man i wantem olgeta moa, i winim we hem i wantem gol we i beswan.”​—Ol Sam 19:10.

!Nao, i No Moa Gat Fasin Pua!

Laswan samting, se olgeta we oli obei long gud nyus, oli lanem se Jeova God i gat plan blong yusum Kingdom blong hem blong finisim fulwan problem blong fasin pua. Baebol i promes se: “Ol trabol man bambae oli no save trabol oltaem. Ol puaman, tingting blong olgeta i no save lus olgeta, God bambae i leftemap olgeta.” (Ol Sam 9:18) Kingdom i wan trufala gavman. God i stanemap long heven mo i putumap Jisas Kraes olsem Rula. I no longtaem, bambae Kingdom ya i tekem ples blong olgeta gavman blong man. Mo bambae hem i lukaot long ol nid blong ol man. (Daniel 2:44) Long taem ya, olsem King we i sidaon long jea blong hem finis, Jisas “bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”​—Ol Sam 72:​13, 14.

Taem yumi stap wet long taem ya, Maeka 4:​3, 4 i talem se: “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek. From we prapa maot blong Jeova blong ol ami i talem olsem.” ?Vas ya i stap tokbaot hu? Yes, hemia olgeta we oli stap aninit long Kingdom blong God. Bambae Kingdom ya i finisim olgeta problem we oli stap spolem ol man​—mo tu, problem long saed blong sik mo ded. “Bambae hem i finisim ded blong olwe, mo Hae God Jeova bambae i ravemaot wora blong ae long fes blong olgeta man.” (Aesea 25:8; 33:24) !Bambae hemia wan wol we i defren olgeta! Mo tingbaot, yumi save bilivim ol promes ya from we oli kamaot long God. God i talem se: “Ol man blong mi oli mas stap long wan ples blong pis, mo long ol haos we oli no save fraet nating long hem, mo long ol ples blong spel we i no gat trabol long olgeta.”​—Aesea 32:18.

Taem wan puaman i bilif long Kingdom blong God, fasin ya i blokem ol filing ya we oltaem, hem i no gat respek long hem wan, we plante taem i kamaot from fasin pua. Wan Kristin we i pua i save se, long lukluk blong God, hem i impoten sem mak nomo olsem wan Kristin we i rij. God i laekem tufala sem mak nomo. Mo tufala evriwan i gat sem hop. Tufala evriwan i stap wet long taem ya, aninit long Kingdom blong God, we fasin pua bambae i kam olsem wan samting blong bifo. !Bambae hemia i wan nambawan taem stret! !Nao, i no moa gat puaman!

[Tok blong pija long pej 5]

?From wanem yu westem mane long fasin blong plei laki, smok, fasin blong dring tumas, fasin blong yusum drag, no wan rabis fasin blong laef?

[Tok blong pija long pej 7]

Bambae Jeova God i yusum Kingdom blong hem blong finisim ol problem blong fasin pua we ol man oli kasem