En Blong Fasin Pua i Klosap

WANEM mining blong tok ya blong Jisas se: “Ol puaman bambae oli stap oltaem wetem yufala.” (Matiu 26:11) ?Hem i minim se fasin pua bambae i stap olwe, i no gat rod blong winim problem ya?

Jisas i save se, long olgeta taem we man i rul long wol ya, bambae i mas gat fasin pua. Hem i save se olkaen gavman blong man, no eni ogenaesesen long wol ya, bambae oli no naf blong ravemaot fasin pua. Mo histri i pruvum se samting ya i tru.

Long ol taosen yia we oli pas finis, ol man oli traem ol defren kaen gavman mo ogenaesesen, be fasin pua i stap yet wetem yumi. Nating se save blong man long saed blong sayens, meresin mo fasin blong wok, i kam antap moa, be namba blong ol man we oli no save ronwe long fasin pua, i stap kam antap moa tu.

Jisas i savegud wanem samting i mekem fasin pua i kamaot: kakae i sot, ol draeples, ol faet, ol gavman we oli nogud, fasin blong no yusum mane long rod we i waes, ol rijman mo man long paoa we oli spolem ol puaman mo olgeta we oli no gat paoa, ol aksiden, ol sik, mo ded we i karemaot ol hasban long woman mo pikinini blong olgeta we oli no gat samting nating. Jisas i save se antap long olgeta samting ya, man hem wan i stap karem fasin pua i kam long hem mo famle blong hem from ol nogud fasin ya blong les, drong, plelaki, mo tekem drag.

Taswe, taem Jisas i talem se “ol puaman bambae oli stap oltaem wetem yufala,” hem i minim se i no gat wan paoa long wol ya we i naf blong ravemaot fasin pua. Hem i minim se, sipos man i gohed blong rul long wol ya, bambae ol pua man oli stap oltaem.

Nating se problem ya blong fasin pua hem i olfala finis, yumi no mas ting se Jisas mo Papa blong hem long heven oli no gat sore long ol man we oli pua. Mo i nogud tu blong ting se ol tok ya blong Jisas oli minim se bambae fasin pua i neva finis samtaem. Taem yumi ridim samting we Baebol i talem, yumi save se problem ya i no save gohed olsem.

Fasin Pua Mo Loa Blong Moses

Eksampel, tingbaot Loa we God i givim tru long Moses, long nesen blong Isrel bifo. Wan haf blong Loa ya i mekem se evri famle long Isrel i gat wan pis graon blong hem long kantri blong Kenan. (Dutronome 11:8-15; 19:14) Ol Livaet nomo oli no gat prapa graon blong olgeta. Graon we oli kasem i kam nomo long ol narafala man Isrel. Ol Livaet ya oli stap mekem spesel wok long tempel blong God. Taswe, olgeta man Isrel oli mas givim wan hif blong olgeta ten hif samting we oli kasem long garen blong olgeta, i go long ol Livaet ya.—Namba 18:20, 21, 24.

Antap long samting ya, i gat rul aninit long Loa blong Moses we i talem se ol wanwan papa oli mas talem wanem samting bambae oli letem long ol pikinini blong hem taem hem i ded. Ol rul ya oli meksua se graon blong wanwan famle bambae i pas long ol memba blong semfala famle no laen ya nomo we i bin kasem graon ya fastaem. (Namba 27:8-11) Mo tu, taem wan man i salem graon blong hem, be bambae narafala man i no save holem graon ya olwe. Biaen, bambae graon ya i mas kambak long famle blong hemia we i bin salem graon ya.

Taem sam samting oli hapen we i mekem se wan man i kam pua, maet hem i no waesgud long fasin blong lukaot long graon blong hem no hem i yusum olting blong hem olbaot, ale, Loa i givim raet long hem blong karem eni haf kakae we i stap long ol plantesin, garen, mo grep blong ol narafala man Isrel. (Levitikas 23:22) Mo tu, wan man Isrel we i gat bigfala nid, i save lendem mane long narafala mo narawan ya i no gat raet blong askembak mane ya wetem intres. Yes, Loa i wantem se ol man Isrel oli gat gudfala tingting ya blong givim samting long ol pua man, wetem gladhat.—Eksodas 22:25.

Jisas i Kea Long Ol Man We Oli Pua

Plante handred yia biaen, taem Jisas i kam long wol, hem i gohed blong soemaot gudfala fasin ya blong givim wetem gladhat, olsem we Papa blong hem, Jeova, i bin soem long hem. Jisas i rili intres long olgeta we oli no gat samting blong laef. Hem, mo ol disaepol blong hem tu, oli gat wan basket blong mane, we oli stap yusum blong givhan long ol man Isrel we oli gat nid.—Jon 12:5-8.

Afta we Jisas i ded, semfala tingting ya blong tingbaot ol pua man, i gohed long medel blong ol Kristin. Oli rere blong givim mane blong givhan long ol brata mo sista blong olgeta long saed blong spirit, we oli pua tumas. (Rom 15:26) Ol trufala Kristin tede tu, oli soem semkaen lav mo fasin kea bitwin long olgeta.

I tru se Baebol i tokbaot fasin blong gat sore long ol man we oli stap long hadtaem. Be tu, hem i tok strong long eni man we i ‘hanggri gogo i ded’ from we hem i les tumas. (Eklesiastis 4:1, 5) Aposol Pol i raetem se: “Man we i les blong wok, yufala i no givim kakae long hem.” (2 Tesalonaeka 3:10) Hemia i tru tu long ol man we oli westem mane blong olgeta long ol nogud fasin ya blong tekem drag, smok tabak, no drong. Olgeta ya bambae oli save kam pua from ol nogud fasin ya. Oli stap ‘kakae frut blong sid we oli planem fastaem.’—Galesia 6:7.

Seftaem Naoia

Baebol i soemaot se God i gat spesel intres long laef blong ol man we oli stap traehad blong mekem wanem we hem i wantem. Eksampel, long Ol Sam 37:25, Deved i talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” Vas ya i no promes se, olgeta we oli traehad blong folem stret fasin bambae oli kam rij. Be i klia se, God i meksua we ol man ya oli gat ol samting we oli nidim blong stap laef. Mo vas 28 blong semfala Sam ya i talem se: “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem.”

Taem Jisas i laef long wol ya, hem i no jes soem se hem i kea long ol pua man blong givim samting we oli nidim long bodi nomo. Hem i talem long olgeta se sipos oli traehad blong mekem wanem we God i wantem, bambae God i meksua se oli kasem ol stamba samting we oli nidim, naoia mo long fiuja. Jisas i talem tok ya se:

“Yufala i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i gud moa i winim ol pijin. . . . ?Mo from wanem yufala i stap tingting tumas from klos blong yufala? Yufala i traem tingbaot ol flaoa ya we oli stap gru olbaot. Olgeta oli no wok, mo oli no somap klos blong olgeta. Mi mi talem long yufala, se King Solomon ya bifo we hem i rij we i rij, be klos blong hem i no flas olsem ol flaoa ya. Ol flaoa ya i blong wan dei nomo, tumora bambae ol man oli bonem long faea, be God i stap flasem gud olgeta. ?Yufala i ting se bambae hem i no save givim klos long yufala? !Man, bilif blong yufala i smol tumas! Nao from samting ya, i nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ . . . Papa blong yufala long heven, hem i save we yufala i mas gat olgeta samting ya.”—Matiu 6:26-32.

Jisas i finisim tok ya wetem wan advaes long ol man blong hem se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Matiu 6:33) !Hemia sam nambawan advaes blong olgeta we oli pua be oli stap traehad blong mekem samting we God i wantem! Makemgud wan narafala samting long tok blong Jisas. Hem i soem se Kingdom blong God i mas impoten moa long laef blong ol man blong hem, i bitim ol narafala samting. Jisas i save se taem Kingdom blong God long heven bambae i rul antap long ful wol, ale, long taem ya nomo, fasin pua bambae i lus olgeta.

I No Stap Wetem Yumi Blong Olwe

Yes, Jisas i givim wan nambawan hop blong fiuja. Taswe, taem hem i talem se “ol puaman bambae oli stap oltaem wetem yufala,” hem i stap minim, long laef blong naoia, aninit long rul blong man. Hem i no stap tokbaot laef long fiuja, aninit long rul blong Kingdom blong God. Baebol i talemaot se: “Ol man we oli no gat man blong givhan long olgeta, bambae oli no save trabol oltaem, hem bambae i givhan long olgeta. Ol puaman, tingting blong olgeta bambae i no save foldaon olgeta, hem bambae i leftemap olgeta.” (Ol Sam 9:18) Mo, Jisas Kraes we i King long Kingdom ya blong God, bambae i no save letem man we i stap traem rabem no spolem narafala, i gohed blong laef.

Stamba samting we Jisas i tokbaot long olgeta tijing blong hem, hemia rul blong Kingdom blong God long heven. (Matiu 4:17) Aninit long rul blong Kingdom ya, laef long wol ya bambae i sem mak long laef blong heven. Taswe Jisas i tijim ol man blong hem blong prea long God se: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.”—Matiu 6:10, NW.

?Olsem wanem samting ya bambae i save kamtru? Stamba tingting blong God i blong finisim rul blong man olgeta, mo blong putumap rul blong Kingdom blong hem long heven. Profet tok blong Daniel 2:44 i se: “Long taem blong ol king ya [we oli stap yet long wol], God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem [i no moa gat gavman blong man]. Bambae hem i save flatemgud paoa blong ol narafala king [blong naoia], nao bambae hem i rul oltaem gogo i no save finis.”

Nao, long niufala wol, aninit long Kingdom blong God, ful wol bambae i kam wan paradaes we i fulap long evri samting we man i nidim. Bambae i no moa gat saen blong fasin pua. Tingbaot sam long ol profet tok ya blong Baebol long saed blong laef long taem ya:

“Hae God i gat olgeta paoa . . . hem bambae i mekemrere wan bigfala lafet blong yumi, we bambae yumi kakae ol nambawan kakae, mo yumi dring ol waen we i beswan.” (Aesea 25:6) “Yu mekem we bambae i gat plante kakae long ples ya, we bambae ol hil oli fulap gud long hem.” (Ol Sam 72:16) “Bambae mi blesem yufala, mi givim ren long yufala long stret taem blong hem. Olgeta tri bambae oli karem plante frut, mo ol garen bambae oli karem plante kakae, mo yufala evriwan bambae i save stap gud long graon blong yufala.” (Esikel 34:26, 27) “God i God blong yumi, mo hem i stap blesem yumi, i mekem we graon ya blong yumi i givim plante kakae long yumi.” (Ol Sam 67:6) “Draeples bambae i harem gud, i glad. Ples we ol samting i no save gru long hem, ol flaoa bambae oli save gru long hem.”—Aesea 35:1.

Mo tu, Maeka 4:4 i promes se: “Olgeta man bambae . . . oli save stap gud long ol plantesin blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.” Olgeta man bambae oli gat prapa haos blong olgeta: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya.” (Aesea 65:21, 22) !Taswe, yumi no sapraes se Jisas i mekem promes long ol man we oli bilivim tijing blong hem se: “Bambae yu stap wetem mi long Paradaes”!—Luk 23:43.

Yes, Tok blong God we tabu spirit i pusum man blong raetem, i tijim klia long yumi se bambae i gat wan taem we fasin pua i finis olgeta. Mo taem ya i stap kam klosap nao, from we ol profet tok blong Baebol oli soemaot se naoia wol i stap long ol ‘las dei,’ hem i stap gotru long ol taem we ‘laef i kam strong tumas.’ (2 Timoti 3:1-5, 13) I no longtaem, laef long wol blong naoia bambae i finis olgeta, mo fasin pua bambae i go lus we i no save kambak bakegen samtaem. Samting ya i no kamtru from traehad blong sam man, be from paoa blong God nomo. King Jisas Kraes bambae i “sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting.”—Ol Sam 72:12, 13.

[Tok blong pija long pej 9]

Long niufala wol blong God, bambae i gat ol gudfala haos mo plante kakae we i naf blong evriwan

[Tok blong pija long pej 10]

Long niufala wol, neva bambae i gat pikinini we i hanggri