Haf Tu—Ol Bigfala Laet Mo Ol Smol Laet We Oli Saenaot

“From laet blong yu nao, mifala i stap luk delaet.”​—OL SAM 36:9.

1. ?Olsem wanem oli traehad fastaem blong kasem save long mining blong ol tok blong Revelesen?

BUK blong Revelesen long Baebol, i wekemap intres blong ol Kristin, stat long taem bifo kam kasem naoia. Hem i soemaotgud olsem wanem laet blong trutok i stap saenaot moa, taem ol yia oli stap pas. Long 1917, ol man blong Jeova oli eksplenem ol tok blong Revelesen long wan buk we nem blong hem, The Finished Mystery. Long buk ya, oli no fraet blong soemaot long klia ples, fasin blong ol lida blong ol skul blong Krisendom mo ol lida blong politik. Be plante blong ol tok blong hem we i eksplenem Revelesen, oli kam long sam narafala ples. Nating se i olsem, buk ya, The Finished Mystery, i rili traem ol Baebol Studen, long saed blong fasin blong olgeta blong fasgud long rod we Jeova i stap yusum long wol ya.

2. ?Haf ya “Wan Nesen i Bon” i givim wanem laet long saed blong buk blong Revelesen?

² Wan strongfala laet i saen long buk blong Revelesen tru long haf long Wajtaoa blong Maj 1, 1925, nem blong hem “Wan Nesen i Bon.” Oli bin gat tingting se Revelesen japta 12 i stap tokbaot wan faet bitwin ol man Rom we oli hiten mo Katolik Jyos blong Rom. Oli ting se pikinini boe i minim rul blong ol pop. Be Wajtaoa ya i soem se Revelesen 11:​15-18 i laenap wetem ol samting we japta 12 i tokbaot, mo i soemaot se hem i stap tokbaot taem we Kingdom blong God i bon.

3. ?Wanem ol buk we oli givim moa laet long saed blong Revelesen?

³ Samting ya i lidim olgeta blong prentem tu buk long 1930, we nem blong tufala se Light. Tufala buk ya oli givim save we i moa klia long saed blong Revelesen. Save ya i kam moa klia bakegen long tu narafala buk ya, “Babylon the Great Has Fallen!” God’s Kingdom Rules! (1963) mo “Then Is Finished the Mystery of God” (1969). Be, i gat plante samting yet blong lanem long saed blong ol profet tok blong Revelesen. Yes, laet i saen moa long 1988, taem oli prentem buk ya Revelation​—Its Grand Climax At Hand! Maet yumi save talem se laet ya i saen strong long ol yia ya from we ol profet tok blong Revelesen oli stret long “dei blong Masta,” we i stat long 1914. (Revelesen 1:10) Taswe, mining blong buk blong Revelesen i save kam klia moa taem dei ya i stap gohed.

“Ol Paoa We Oli Hae Moa” i Kam Klia

4, 5. (a) ?Ol Baebol Studen oli ting se Rom 13:1 i minim wanem? (b) ?Biaen, oli kasem wanem save we i laenap wetem Baebol long saed blong “ol paoa we oli hae moa”?

⁴ Wan bigfala laet i saenaot long 1962 long saed blong Rom 13:​1, we i talem se: “Olgeta man oli mas ona long ol paoa we oli hae moa [“ol haeman,” New World Translation].” (King James Version) Ol faswan Baebol Studen oli kasem save se “ol paoa we oli hae moa” we vas ya i tokbaot, hemia ol rula blong wol. Oli ting se vas ya i minim we sipos oli singaot wan Kristin blong joen long ami long taem blong faet, hem i mas putum wan yunifom, karem wan masket, mo go wetem ol soldia long ples we faet i strong. Oli ting se, from we wan Kristin i no save kilim narafala man i ded, hem i mas sutum masket blong hem i go antap, sipos hem i fesem wan bigfala trabol.a

⁵ Wajtaoa blong Novemba 15 mo Desemba 1, 1962, i soemaot klia laet long saed blong ol tok blong Jisas long Matyu 22:21: “Samting we i blong Sisa, yufala i givimbak long Sisa. Samting we i blong God, yufala i givimbak long God.” Tok blong ol aposol long Ol Wok 5:29 i laenap wetem tok ya, i se: “Mifala i mas obei long God, mifala i no save obei long ol man nomo.” Ol Kristin oli stap aninit long Sisa​—“ol paoa we oli hae moa”—​sipos oli no askem wan samting we i agensem loa blong God. Oli luksave se fasin blong stap aninit long Sisa i dipen long loa blong God, i no wan samting we oli mas folem oltaem. Ol Kristin oli givimbak long Sisa ol samting ya nomo we oli no agensem loa blong God. !Oli haremgud tumas blong kasem klia save long saed ya!

Laet We i Saen Moa Long Saed Blong Ogenaesesen

6. (a) Blong stap longwe long fasin blong Krisendom blong putumap ol lida blong olgeta ?oli folem wanem rul? (b) ?Wanem rod nao we oli faenemaot se i stret blong jusumaot ol man blong lidim kongregesen?

⁶ I gat wan kwestin i kamaot se hu i stret blong karem wok olsem elda mo dikon insaed long kongregesen. Blong stap longwe long fasin blong Krisendom blong putumap ol lida blong olgeta, oli mekem disisen se bambae ol wanwan memba blong ol kongregesen oli vot blong putumap ol elda mo dikon blong olgeta. Be laet i saenaot moa long Wajtaoa blong Septemba 1 mo Oktoba 15, 1932, ale hem i soem se Baebol i no sapotem tingting ya blong vot blong putumap ol elda. Taswe, long ples blong ol elda, oli stanemap wan sevis komiti, mo Sosaeti i jusum wan sevis daerekta.

7. ?Laet we i saenaot i soem wanem rod we i moagud, long saed blong fasin blong putumap ol man blong wok insaed long kongregesen?

⁷ Wajtaoa blong Jun 1 mo Jun 15, 1938, i mekem laet i saenaot blong soem se bambae oli no vot blong putumap ol man blong wok insaed long kongregesen, be bambae oli putumap olgeta long tiokratik fasin. Long 1971, wan narafala laet i saenaot blong soem se i no wan man nomo we i mas lidim wan kongregesen. Be, i mas gat wan bodi blong ol elda, no ol man blong lukaot long kongregesen, we Hed Kampani blong ol Wetnes blong Jeova i putumap. Taswe tru long ol laet we i saenaot moa long ol 40 yia we oli pas, oli luksave se Hed Kampani blong “slef we i stret mo waes” i mas putumap ol elda wetem ol dikon, we naoia oli kolem ol man blong givhan. (Matyu 24:​45-47) Fasin ya i sem mak long fasin we oli bin folem long taem blong ol aposol. Long faswan handred yia, Hed Kampani nomo i putumap ol elda olsem Timote mo Taetas. (1 Timote 3:​1-7; 5:22; Taetas 1:​5-9) Samting ya i kamaot folem tok blong Aesea 60:17 we i talem se: “Bambae mi no karem kopa i kam be bambae mi karem gol, mo bambae mi no karem aean be bambae mi karem selva, mo i no wud, be kopa, mo i no ston, be aean. Mo bambae mi putumap pis olsem ol man blong lukaot long yufala, mo stret fasin olsem ol man blong givim wok long yufala.”

8. (a) ?Trutok we i stap kam moa klia i soem wanem rod we i moagud long saed blong fasin blong Sosaeti blong mekem ol wok blong hem? (b) ?Wanem ol defren komiti blong Hed Kampani, mo wanem ol defren wok we olgeta wanwan oli stap mekem mo lukaot long hem?

⁸ I gat kwestin i stap tu, long saed blong wok blong Watch Tower Sosaeti. Blong plante yia, Hed Kampani blong ol Wetnes blong Jeova i sem mak olsem ol daerekta blong Watch Tower Bible and Tract Society of Pennsylvania, mo bighaf blong ol disisen oli stap long han blong presiden nomo. Olsem oli soem long 1977 Yearbook of Jehovah’s Witnesses (pej 258 mo 259), long 1976, Hed Kampani i stat blong wok wetem sikis defren komiti, we wanwan blong olgeta ya i lukaot long wan haf blong wok we i stap gohed long olgeta ples blong wol. Pesonel Komiti i lukaot long olgeta we oli mekem wok long ol ofis mo faktri blong Sosaeti long olgeta ples blong wol, olsem ol memba blong ol Betel famle. Pablising Komiti i stap lukaot long ol wok we oli no long saed blong speret stret mo ol wok long saed blong loa, olsem long saed blong graon mo wok blong prentem ol samting. Sevis Komiti i lukaot long wok blong prij mo ol elda we oli stap goraon, ol paenia, mo ol wok blong ol pablisa long ol kongregesen. Tijing Komiti i mekem plan blong ol miting blong kongregesen, ol spesel dei asembli, ol seket, distrik mo intenasnal asembli, mo tu ol defren skul we oli stap tijim ol man blong God long ol samting blong speret. Raeting Komiti i lukaot long wok blong mekemrere mo tanem olgeta buk oli go long ol defren lanwis. Oli meksua se evri tok i laenap wetem Baebol. Jeaman Komiti i lukaot long ol bigfala trabol no disasta, mo ol narafala samting we i mekem se oli mas givim help kwiktaem.b Mo tu, stat long ol yia we oli ron biaen long 1970, wan komiti i lukaot long ol branj ofis blong Watch Tower Sosaeti, i no moa wan elda nomo.

Laet Long Saed Blong Ol Kristin Fasin

9. ?Olsem wanem laet blong trutok i givhan long ol Kristin blong luksave wanem fasin oli mas gat long ol gavman blong wol?

⁹ Plante laet i saenaot long saed blong fasin blong ol Kristin. Olsem nao, yumi save tingbaot we ol Kristin oli no mas joen long wol. Wan laet we i strong i bin saenaot long saed ya, long haf ya “No Joen Long Wol” we i kamaot long Wajtaoa blong Novemba 1, 1939. !Hem i rili kamaot long stret taem, smoltaem afta we Seken Bigfala Faet blong Wol i stat! Haf ya i eksplenem mining blong no joen long wol, mo i soem se ol Kristin oli no mas joen long politik no ol faet bitwin ol defren nesen. (Maeka 4:​3, 5; Jon 17:​14, 16) Hemia wan stampa risen we i mekem se ol nesen oli no laekem olgeta ya nating. (Matyu 24:9) Ol faet blong Isrel bifo, oli no blong soemaot rod long ol Kristin tede. Jisas i soemaot samting ya i klia nomo, long tok blong hem long Matyu 26:52. Antap long hemia, i no gat wan politik nesen tede we i folem tiokratik fasin, we God i rul long hem, olsem long taem blong Isrel bifo.

10. ?Olsem wanem ol laet we oli saenaot oli soem stret tingting we ol Kristin oli mas gat long saed blong blad?

¹⁰ Mo tu, laet i saenaot blong soem se blad i wan samting we i tabu. Sam Baebol Studen oli ting se loa ya we i talem se oli no mas kakae blad, long Ol Wok 15:​28, 29, i blong ol man Jyu nomo we oli Kristin. Be, Ol Wok 21:25 i soem se long taem blong ol aposol, loa ya i go long ol man blong ol narafala nesen tu, we oli kasem bilif. Taswe, blad i wan tabu samting blong evri Kristin, olsem Wajtaoa blong Julae 1, 1945 i talem. Samting ya i no jes minim blong no kakae blad blong ol anamol, olsem sosej we oli wokem long blad, be i minim blong stap longwe long blad blong man tu, olsem fasin blong karem blad blong narafala man long hospital.

11. ?Oli luksave se Kristin i mas gat wanem tingting long saed blong fasin blong yusum tabak?

¹¹ From we laet i kam bigwan moa, ol fasin we bifo oli luk olsem nating nomo, biaen oli luksave se oli ol bigfala sin. Wan eksampel, hemia long saed blong fasin blong yusum tabak. Long Zion’s Watch Tower blong Ogis 1, 1895, Brata Russell i pulum tingting blong ol man i go long 1 Korin 10:31 mo 2 Korin 7:1 mo hem i raetem se: “Mi no save luk olsem wanem enikaen fasin blong wan Kristin blong yusum tabak, i save leftemap nem blong God, mo i no save mekem i gud long man ya tu.” Stat long 1973, oli kasem klia save se wan man we i stap yusum tabak, i no save kam wan Wetnes blong Jeova. Long 1976, oli mekem i klia se sipos wan Wetnes i karem wok long wan ples blong plei laki, i no save stap insaed long kongregesen.

Sam Narafala Samting We Oli Kam Moa Klia

12. (a) ?Laet i soemaot wanem long saed blong namba blong ol ki blong Kingdom we Pita i kasem? (b) ?Wanem ol defren taem we Pita i yusum ol wanwan ki ya?

¹² I gat laet we i kam bigwan moa long saed blong namba blong ol ki we oli olsem saen nomo, we Jisas i givim long Pita. Ol Baebol Studen oli bilif se Pita i kasem tu ki, we oli openem rod blong sam man blong kasem Kingdom blong God​—wan we i openem rod blong ol man Jyu long Pentekos 33 K.T., mo narawan we i openem rod blong ol Jentael, we Pita i yusum fastaem long 36 K.T. taem hem i prij long Konilyas. (Ol Wok 2:​14-41; 10:​34-48) Biaen, oli luksave se i gat namba tri grup​—ol man Sameria. Pita i yusum namba tu ki taem hem i openem rod blong olgeta ya blong oli gat jans blong kasem Kingdom. (Ol Wok 8:​14-17) Olsem nao, Pita i yusum namba tri ki taem hem i prij long Konilyas.​—Wajtaoa, Oktoba 1, 1979, pej 16-22, 26 (Engglis).

13. ?Laet we i saenaot i soemaot wanem long saed blong ol yad blong sipsip we Jon japta 10 i tokbaot?

¹³ Wan narafala laet i soemaot se Jisas i no tokbaot tu yad blong sipsip nomo, be hem i tokbaot tri yad. (Jon, japta 10) Hemia ol yad ya: (1) yad blong ol man Jyu, we Jon Baptaes i olsem man blong lukaot long get blong yad ya, (2) yad blong ol man we tabu speret i makemaot olgeta, we bambae oli rul long Kingdom blong heven, mo (3) yad blong ol “narafala sipsip,” we hop blong olgeta i blong stap long wol ya.​—Jon 10:​2, 3, 15, 16; Wajtaoa, Febuwari 15, 1984, pej 10-20 (Engglis).

14. ?Olsem wanem laet we i saenaot moa i soem klia wetaem Jubili i stat?

¹⁴ Save long saed blong mining blong Jubili i kam moa klia tu. Aninit long Loa, evri 50 yia i gat wan bigfala Jubili. Long taem ya, ol man oli givimbak ol samting we oli bin karem long ol narafala man. (Levitikas 25:10) Longtaem finis oli kasem save se samting ya i minim Wan Taosen Yia Rul blong Kraes. Be, long ol yia we oli pas i no longtaem, oli luksave se Jubili ya i stat long Pentekos 33 K.T., taem olgeta we oli kasem tabu speret oli kam fri long kontrak blong Loa blong Moses.​—Wajtaoa, Janewari 1, 1987, pej 18-28 (Engglis mo Franis).

Laet i Saenaot Moa Long Fasin Blong Talem Ol Tok

15. ?Wanem laet i saenaot long saed blong fasin blong yusum tok ya “plan”?

¹⁵ “Man ya we i singaot ol man oli kam wanples i traehad blong faenem ol gudfala tok mo fasin blong raetem ol stret tok blong trutok.” (Eklesiastis 12:10) Ol tok ya oli laenap gud long samting we yumi stap tokbaot naoia. Laet i no saenaot long saed blong ol impoten samting olsem ol tijing mo fasin blong Kristin nomo. Be i saenaot tu long saed blong fasin blong ol Kristin blong talem ol tok, mo stret mining blong olgeta tok ya. Wan eksampel, wan buk we olgeta Baebol Studen oli rili laekem, hemia namba wan buk blong Studies in the Scriptures, we nem blong hem The Divine Plan of the Ages. Be, biaen, oli luksave se Tok blong God i talem se ol man nomo oli mekem ol plan. (Proveb 19:21) Baebol i neva tokbaot se Jeova i mekem wan plan. Hem i no nidim blong mekem wan plan. Olgeta samting we hem i wantem mekem oli sua blong kamaot, from we hem i gat olgeta waes mo paoa, olsem yumi ridim long Efesas 1:​9, 10 (NW) se: “Stampa tingting blong hem i stret long ol samting we hem i laekem, mo hem nomo i wokem stampa tingting ya, blong mekem fasin blong lukaot long ol samting i stanap long stret taem we hem i makemaot finis.” Taswe sloslou oli luksave se tok ya “stampa tingting” i moa stret taem yumi stap tokbaot Jeova.

16. ?Wanem stret mining blong Luk 2:14 we sloslou i kam klia?

¹⁶ Afta, oli nidim blong kasem moa klia save long saed blong Luk 2:14. Long King James Version, vas ya i talem se: “Leftemap God ya we i hae, mo long wol ya, pis i stap wetem ol man we God i agri long olgeta.” Oli luk se tok ya i no givim stret tingting, from we God i no save agri long ol rabis man. Taswe, ol Wetnes oli luksave se tok ya i stap minim se pis i go long olgeta man we oli gat fasin blong agri wetem God. Ale oli gohed blong singaot olgeta we oli intres long Baebol se ol man we oli gat fasin blong agri wetem God. Be, biaen oli kasem save se i no ol man we oli mas gat fasin agri, be God. Taswe, long futnot blong Luk 2:14 long New World Translation, hem i tokbaot ol “man we hem [God] i agri long olgeta.” Olgeta Kristin man we oli stap laef folem promes we oli mekem long God, taem oli givim laef blong olgeta i go long hem, God i stap agri long olgeta ya.

17, 18. ?Bambae Jeova i soemaot se wanem samting i hae olgeta, mo wanem samting we bambae hem i mekem i tabu?

¹⁷ Long sem fasin, longtaem finis ol Wetnes oli tokbaot fasin blong pruvum se nem blong Jeova i hae olgeta. ?Be, Setan i bin stanemap kwestin long saed blong nem blong Jeova? Mo tu, ?i gat sam man blong Setan, we oli sakem kwestin ya, olsem we Jeova i no gat raet long nem blong hem? No gat. I no nem blong Jeova we oli stap agensem, mo i no nidim pruf se nem ya i hae olgeta. From samting ya, naoia ol buk blong Watch Tower Sosaeti oli no moa tokbaot fasin blong pruvum se nem blong Jeova i hae olgeta. Oli stap tokbaot fasin blong pruvum se rul blong Jeova i hae olgeta, mo fasin blong mekem nem blong hem i tabu. Hemia i folem samting we Jisas i talem long yumi blong tokbaot long ol prea blong yumi, se: “Mekem nem blong yu i tabu.” (Matyu 6:9) Plante taem bakegen, Jeova i talem se bambae hem i mekem nem blong hem i tabu. Ol man Isrel oli no talem se nem ya i no hae, be oli sakem doti long hem.​—Esikel 20:​9, 14, 22; 36:23.

¹⁸ Yumi intres long poen ya se, long 1971, buk ya “The Nations Shall Know That I Am Jehovah”​—How?, i soem olsem wanem tufala tok ya i defren, i se: “Jisas Kraes i stap faet . . . blong pruvum se hae rul blong Jeova i beswan, mo blong givim ona long nem blong Jeova.” (Pej 364, 365) Long 1973, God’s Kingdom of a Thousand Years Has Approached i talem se: “‘Bigfala trabol’ we i stap kam, hem i taem we Hae God Jeova we i gat olgeta paoa, bambae i soemaot se hae rul blong hem i beswan, mo bambae i mekem nambawan nem blong hem i kam tabu.” (Pej 409) Ale, long 1975, Man’s Salvation Out Of World Distress at Hand! i talem se: “Samting we bambae i hapen long taem ya, i bigwan moa long olgeta narafala samting long histri blong heven mo wol, hemia fasin blong pruvum se hae rul blong Jeova i antap olgeta, mo fasin blong mekem nambawan nem blong hem i tabu.”​—Pej 281.

19, 20. ?Olsem wanem yumi save soemaot fasin tangkyu from laet long saed blong speret we i saenaot long yumi?

¹⁹ !Ol man blong Jeova oli gat wan bigfala blesing blong haremgud long ol bigfala laet ya long saed blong speret! Be i defren olgeta long ol lida blong Krisendom. Tok blong wan lida blong jyos i rili soemaot tudak long saed blong speret we oli stap long hem. Hem i talem se: “?From wanem i gat sin? ?From wanem man i safa? ?From wanem i gat wan Setan? Hemia sam long ol kwestin we bambae mi askem Masta, taem mi go long heven.” Be ol Wetnes blong Jeova oli save talem long hem from wanem i olsem: From bigfala kwestin we i stanap se hae rul blong Jeova i moa gud no no gat, mo kwestin ya se, ol man oli save holemstrong long God, nating se Setan i stap agensem olgeta.

²⁰ Tru long ol yia we oli pas, ol bigfala laet mo ol smol laet we oli saenaot, oli stap soem rod long ol man we oli givim laef blong olgeta i go long Jeova. Hemia i mekem ol vas olsem Ol Sam 97:11 mo Proveb 4:18 i kamtru. Be yumi neva mas fogetem se blong stap wokbaot long laet, i minim se yumi mas gat fasin tangkyu long God from laet ya we i stap kam klia moa, mo yumi mas mekem laef blong yumi i laenap wetem laet ya. Olsem we yumi luk finis, laet ya we i stap kam bigwan moa i joen wetem tufala samting ya: ol fasin blong yumi, mo wok blong yumi blong prij.

[Ol futnot]

?Yu Yu Save Tingbaot?

◻ ?Wanem laet i saenaot long saed blong fasin blong stap aninit long “ol paoa we oli hae moa”?

◻ ?Laet we i saenaot i mekem wanem jenis i kamaot insaed long ogenaesesen?

◻ ?Olsem wanem laet we i kam bigwan moa i gat paoa long ol fasin blong ol Kristin?

◻ ?Olsem wanem laet long saed blong speret i mekem save blong yumi long saed blong ol defren poen long Baebol, i kam moa klia?

[Foto Credit Line blong pija long pej 25]

Keys on page 24: Drawing based on photo taken in Cooper-Hewitt, National Design Museum, Smithsonian Institution