Mitufala i Kasem Wan Perel We i Sas Tumas

RICHARD GUNTHER I TALEM STORE YA

Hem i Septemba 1959. Mifala i stap long wan bigfala sip blong ol man Itali, Julio Caesar. Sip i aot long Nyu Yok, ale mifala i stap krosem Solwora blong Atlantik, blong go long Kadis, long Spen. Wajtaoa Sosaeti i sanem mi, mo waef blong mi, Rita, wetem tu narafala misinari, Paul mo Evelyn Hundertmark, mifala i go long kantri ya Iberia. Bambae mifala i mas fesem plante hadtaem. ?Be olsem wanem mifala i mekem disisen blong wok olsem ol misinari?

LONG 1950, mi mo Rita, mitufala i tekem baptaes olsem ol Wetnes blong Jeova, long Nyu Jesi, Yunaeted Stet. I no longtaem, mitufala i mekem wan disisen, se bambae mitufala i mas putum wan perel we i sas tumas long han blong mitufala. Mitufala i stap long wan kongregesen we i gat inaf brata mo sista finis, blong wokem teritori blong hem. Taswe, mitufala i harem se mitufala i mas go wok long ples we i nidim moa man blong prij. Long hot taem blong 1958, long intenasnal asembli blong ol Wetnes blong Jeova long Nyu Yok, mitufala i fulumap pepa blong mekem misinari wok.

Smoltaem biaen, oli singaot mitufala blong go long Wajtaoa Baebol Skul blong Gilead. Biaen, bifo we wan yia i pas, mitufala i stap long rod blong mitufala, blong go long Spen olsem misinari. Long taem ya, mitufala i bisi tumas wetem ol plan blong mitufala mo mitufala i glad tumas, taswe mitufala i no luksave wanem we mifala i bin kasem. Jisas i tokbaot wan perel we i sas tumas. (Matyu 13:​45, 46) Nating se jans blong mitufala blong wok olsem misinari, i no poen we Jisas i tokbaot long parabol ya, be long tingting blong mitufala, hem i sem mak olsem perel ya. Naoia, taem mitufala i tingtingbak, mitufala i gat tangkyu fulwan long sas presen ya, blong mekem wok insaed long ogenaesesen blong Jeova.

Wan Ekspiryens Blong Tingbaot Olwe

Long taem ya, oli mekem kos blong ol misinari blong Gilead, long naesfala ples afsaed long taon, long Fingga Lek, Nyu Yok Stet. Long ples ya, mitufala i spenem sikis nambawan manis. Tingting blong mitufala i stap fulwan long Baebol stadi mo kampani blong ol trufala Kristin brata mo sista, longwe long ol bisnes mo trabol blong wol ya. Ol brata mo sista we oli mekem kos ya wetem mitufala, oli kam long plante defren ples long wol, olsem Bolivia, Briten, Gris, Nyu-Silan, mo Ostrelya. I no longtaem, mifala i kasem dei we kos i finis, ale oli givim stefeket long mifala. Long Ogis 1959, mifala evriwan i talem tata wetem wora long ae blong mifala. Ale mifala i aot long sip blong go long ol wanwan kantri we mifala i mas wok long olgeta. Wan manis biaen, mifala i kasem Spen.

Wan Nyufala Kastom

Mifala i kam so long wan haba long saot, nem blong hem Aljesiras. Hem i kolosap nomo long bigfala Ston ya blong Jibralta. Long sem naet, fo blong mifala, hemia mi mo Rita wetem Brata mo Sista Hundertmarks, mifala i tekem tren blong go long Madrid. Mifala i go long Hotel Mekado. Long ples ya, mifala i wet go kasem we sam memba blong branj ofis blong Sosaeti we oli stap wok long fasin haed, oli singaot mifala. Long taem ya, Spen i stap aninit long strong rul blong Jenerol Francisco Franco. Samting ya i minim se, gavman i letem skul blong Roman Katolik Jyos nomo long kantri ya. Man i brekem loa sipos hem i folem eni narafala skul long open ples. Oli putum tabu long wok blong ol Wetnes blong Jeova, blong prij long ol haos wanwan. Mo tu, oli putum tabu long ol miting blong skul. Taswe, ol Wetnes blong Jeova we namba blong olgeta long taem ya, i kasem kolosap 1,200 long 30 kongregesen long Spen, oli no save mekem miting tugeta long ol Haos Kingdom, olsem oli mekem long ol narafala kantri. Mifala i mas mekem ol miting long fasin haed, long ol haos blong ol man nomo.

Lanem Lanwis Blong Spen Mo Stat Blong Wok

Faswan hadwok blong mifala, i blong lanem wan nyufala lanwis. Long faswan manis, mifala i spenem 11 haoa evri dei blong lanem lanwis blong Spen​—4 haoa evri moning long klas, mo 7 haoa we mifala i stadi wanwan. Long seken manis, mifala i folem sem plan evri moning, be long ol aftenun, mifala i prij long ol haos wanwan. !Traem tingbaot! !Mi mo Rita, mitufala i no save lanwis ya! !Mitufala i jes lanem baehat wan fastok we mitufala i raetem long wan kad, ale mitufala i go prij long ol haos wanwan, mitufala nomo!

Mi tingbaot we mi bin kilim doa blong wan haos long Valesas, wan ples long Madrid we ol man oli no rij tumas mo oli no pua tu, oli jes long medel nomo. Mi holem kad ya long han blong mi. Olsem nao, sipos mi fogetem wanem mi mas talem, mi save ridim long kad. Ale mi talem long lanwis blong Spen se: “Gud moning. Mitufala i stap mekem wan Kristin wok. Baebol i talem se (mi ridim wan vas). Mifala i wantem se yu ridim buklet ya.” Woman we mi toktok wetem hem i lukluk nomo, ale hem i tekem buklet ya. Taem mitufala i gobak blong luk hem bakegen, hem i tekem mitufala i go insaed long haos. Taem mitufala i toktok, hem i stap lukluk nomo. Mitufala i statem wan Baebol stadi wetem hem, nating se mitufala i no savegud lanwis blong Spen. Mo long ol stadi, hem i lesin mo lukluk nomo. Afta we sam taem i pas, hem i talem long mitufala se hem i no bin kasem wanem we mitufala i talem long fastaem we mitufala i toktok wetem hem. Hem i bin harem tok ya “Dios” (God), mo samting ya nomo i naf blong mekem hem i save se storeyan ya i gud. Biaen, hem i gohed blong kasem save long saed blong Baebol, mo hem i tekem baptaes blong kam wan Wetnes blong Jeova.

I hadwok long mi blong lanem lanwis blong Spen. Taem mi wokbaot long taon, mi stap talem baehat ol tok we oli soem aksin. !Samting we mi lanem long wan wik, mi fogetem long nekis wik! Samting ya i mekem tingting blong mi i foldaon. Plante taem, kolosap mi lego. From we fasin blong mi blong toktok lanwis blong Spen i nogud olgeta, ol brata long Spen oli mas gat bigfala longfala tingting, taem mi stap lidim olgeta. Long wan distrik asembli, wan brata i givim wan mesej long mi we oli bin raetemdaon long pepa, blong mi ridimaot long fored blong ol man. Mi faenem i had blong ridim raeting ya, ale mi talemaot se: “Karem muletas blong yufala (ol wud we man i yusum blong wokbaot, taem leg i nogud), i kam tumora long stad ya.” Be stret mesej hemia, “Karem maletas blong yufala (ol basket blong klos) i kam tumora long stad.” Yes, ol man oli laf. Mo mi harem mi sem.

Ol Faswan Traem Long Madrid

Ol faswan yia long Madrid oli hadwok long saed blong filing, long mi mo Rita. Mitufala i mestem tumas, ples blong mitufala mo ol fren blong mitufala. Evri taem mitufala i kasem wan leta long Yunaeted Stet, fasin blong sore long hom i kam bigwan long mitufala. Olgeta taem ya blong sore long hom oli had tumas, be biaen, oli pas. Yes, mitufala i bin lego ples blong mitufala, famle, mo ol fren, blong kasem wan perel we i sas tumas. Mitufala i mas jenisim ol tingting mo fasin blong mitufala.

Long Madrid, fastaem mitufala i stap long wan olfala hotel. Mitufala i gat wan rum long hem, mo mitufala i stap kasem kakae tri taem long wan dei. Hem i wan smol rum we i dak, mo oli wokem ol matres long ol drae gras. Blong pem ren, mitufala i yusum olgeta smol mane we mitufala i kasem evri manis. Plante taem, mitufala i kakae dina long ples ya. Mo long naet, woman blong haos i livim kakae blong mitufala long oven blong i stap hot, ale let long naet mitufala i kakae. Be, taem mitufala i wokbaot long wok blong prij long dei mo long sapa, mitufala i hanggri tumas. Sipos mane we mitufala i kasem evri manis i finis, mitufala i spenem ol smol mane blong mitufala nomo blong pem joklet we praes blong hem i daon. Be i no longtaem, son elda blong Sosaeti i kam luk mifala, nao ol samting ya i jenis. Hem i luk ol samting long laef blong mitufala, ale hem i talem se mitufala i save lukaot wan smol haos blong yusum, olsem haos blong ol misinari. Yes, bambae samting ya i moa gud i bitim we mitufala i stanap insaed long wan besin long floa long kijin, blong swim. Ale, mitufala i kasem wan ples blong swim, wan aesbokis blong putum kakae insaed, mo wan oven we i wok wetem lektrik blong mekemrere ol kakae blong mitufala. Mitufala i talem bigfala tangkyu we oli tingbaot mifala olsemia.

Ol Nambawan Ekspiryens Long Madrid

Mitufala i lukaotgud taem mitufala i prij long ol haos wanwan. Ol bigfala noes we i gohed oltaem long taon blong Madrid i givhan long mitufala. Hem i mekem se ol man oli no luksave mitufala. Mitufala i traehad blong werem ol klos mo mekem ol fasin we oli sem mak olsem ol narafala. Olsemia nao, ol man oli no luksave se mitufala i strenja. Fasin blong mitufala blong prij long ol haos wanwan, hemia: go insaed long wan store haos, kilkilim wan long ol doa, toktok long wan man, ale biaen, lego haos ya, rod ya, mo eria ya. Maet man ya blong haos i save singaot polis. Taswe, i no waes blong stap long eria ya. Paul mo Evelyn Hundertmark tufala i yusum fasin ya tu. Nating se tufala i stap lukaotgud, long 1960, polis i holem tufala, mo oli sanemaot tufala long Spen. Tufala i go long Potugal, wan kantri kolosap. Tufala i wok blong sam yia long Potugal, mo Paul i lukaot branj ofis we i stap wok long fasin haed. Tede, hem i elda we i lukaot long olgeta kongregesen long taon blong San Diego, Kalifonia.

Nao taem i kam blong mitufala i serem ol samting blong mitufala wetem sam narafala we oli kasem trabol. !Jes sam manis biaen, oli talem long sikis misinari we oli wok long Potugal blong aot long kantri! Samting ya i mekem mitufala i glad, from we Eric mo Hazel Beveridge, we tufala i bin stap wetem mitufala long kos blong Gilead, tufala i aot long Potugal mo tufala i kam long Spen. Ale long Febuwari 1962, wan taem bakegen mitufala i stap long Hotel Mekado​—long taem ya blong welkamem Eric mo Hazel.

Hem i long ol faswan yia long Madrid we mi mo Rita, mitufala i kasem faswan ekspiryens blong mitufala wetem ol skul we oli gat tu fes. Mitufala i stadi Baebol wetem wan man mo woman blong hem, Bernardo mo Maria. Tufala i stap long wan haos we tufala i wokem long ol pis wud olbaot we Bernardo i faenem. Mitufala i stadi wetem tufala ya let long naet. Afta long stadi, tufala i givim bred long mitufala, wetem waen, mo jis, no wanem samting we oli gat. Mi luk we jis ya i sem mak long jis blong Amerika. Wan naet afta long stadi, tufala i tekemaot tin we jis ya i stap insaed long hem. Raeting we i stap long hem long Engglis, long ol bigfala leta se, “Ol man Amerika oli sanem samting ya i go long ol man Spen​—hemia i no blong salem.” ?Olsem wanem famle ya we i pua i kasem jis ya? Gavman i yusum Katolik Jyos blong givimaot jis ya long ol puaman. !Be pris i stap salem jis ya!

Kasem Frut Long Minista Wok Wetem Ol Ami

I no longtaem, wan nambawan samting i kamaot. Samting ya i kam wan bigfala blesing long mitufala mo long plante narafala. Branj ofis i sanem wan leta i kam long mitufala, blong askem mitufala blong go luk wan yangfala man we nem blong hem, Walter Kiedaisch. Hem i stap long ples blong ol plen blong faet blong Amerika long Torekon, we i stap sam kilomita afsaed long Madrid. Mitufala i go luk hem mo waef blong hem, mo statem wan Baebol stadi wetem tufala mo wetem wan narafala man mo waef blong hem long ples ya.

Long taem ya, mi stap mekem kolosap faef Baebol stadi wetem ol man we oli wok long ples blong ol plen blong faet blong Amerika. Ol stadi ya mi mekem long Engglis lanwis. Long olgeta ya, seven oli tekem baptaes biaen. Mo afta we oli gobak long Yunaeted Stet, fo blong ol man ya oli kam elda long kongregesen.

Long taem ya, i no gat plante rod blong karem ol buk, ol magasin, mo ol Baebol oli kam insaed long kantri, from we oli putum tabu long wok blong mifala finis. Be, sam turis mo sam man Amerika we mifala i save olgeta, oli karem sam buk oli kam wetem olgeta. Branj i askem mi blong lukaot long wan ples blong kipim ol buk ya, long fasin haed. Ples ya, hem i wan rum biaen long wan stoa we i salem ol nyuspepa mo buk, long Valekas. Man we stoa ya i blong hem, waef blong hem i wan Wetnes blong Jeova. Nating se man ya i no wan Wetnes, hem i respektem wok blong mifala. Sipos oli faenemaot wanem we mifala i stap mekem, hem i save kasem trabol mo samting ya i save spolem bisnes blong hem. Be nating, hem i letem mi blong yusum rum ya biaen long stoa. Mi mekemrere ol smol katon blong buk, blong sanem i go long ol taon long olgeta ples long kantri ya. Oltaem rum ya i mas luk olsem we i no gat wan wok i gohed long hem​—mas gat smok blong rod olbaot long hem, mo i mas fulap long ol katon. Mi wokem wan tebel mo wan ples blong putum ol buk. Kwiktaem nomo, mi save stanemap tebel ya mo rere blong wok, mo kwiktaem mi save tekemaot mo haedem. Long en blong dei, mi wet go kasem taem we i no moa gat man long stoa, ale mi kamaot kwik wetem ol katon blong mi.

Hem i wan nambawan jans blong joen long wok blong givimaot kakae long saed blong speret, olsem Wajtaoa mo Wekap! magasin mo ol narafala buk, long ol kongregesen long olgeta ples long kantri ya. Ol taem ya oli givim bigfala glad long mi.

Rita i glad tumas long taem ya tu from we hem i stap mekem 16 Baebol stadi long haos blong ol man. Biaen, kolosap stret haf blong olgeta oli tekem baptaes blong kam ol Wetnes blong Jeova. Dolores, hem i wan yangfala woman we i mared. Hem i spenem olgeta manis blong koltaem long bed, from we hem i gat wan sik blong hat. Long taem we ol tri oli putum floa, hem i girap mo i kam strong lelebet. Bilif blong Dolores i strong. Taswe, taem mifala i mekem distrik asembli long Tulus, long Franis, hem i wantem tumas blong go. Dokta i givim woning long hem se i no waes blong go, from hat blong hem. Ale hem i go long stesen blong tren blong talem tata long hasban mo mama blong hem, wetem ol narafala we oli mekem trep ya. Hem i werem wan dres blong haos mo ol savat nomo, mo hem i no holem wan basket. Wora blong ae blong hem i ron. Hem i no save luk we olgeta oli go, be hem i stap. !Ale, hem i klaem long tren, mo hem i mekem trep long Franis! Rita i no save se samting ya i hapen. !Hem i sapraes tumas taem hem i luk Dolores long asembli, wetem bigfala smael long fes blong hem!

Wan Baebol Stadi We i Defren

Bifo we mitufala i finisim store ya long wok blong mitufala long Madrid, mitufala i mas tokbaot Don Benigno Franco, “el profesor.” Wan Wetnes long ples ya, i tekem mi blong luk wan olfala man we i stap wetem waef blong hem, long wan olfala ren haos we i nogud finis. Mi statem wan Baebol stadi wetem hem. Afta we hem i stadi kolosap wan yia haf, hem i askem sipos hem i save tekem baptaes blong kam wan Wetnes blong Jeova.

Olfala man ya, Don Benigno Franco, hem i kasen blong Francisco Franco, strong lida blong Spen long taem ya. I luk olsem se Don Benigno i wan man we i bin laekem fasin fri olwe. Long Faet Blong Ol Man Spen, hem i tekem saed blong Ripablik, mo hem i stap agensem kasen blong hem​—jenerol ya we i winim faet ya mo i stanemap wan strongfala rul blong Katolik. Stat long 1939, Don Benigno i no gat raet blong kasem wok, mo hem i gat smol mane nomo. Ale, kasen blong Jenerol Francisco Franco, strong lida blong Spen, i kam wan Wetnes blong Jeova.

Mi Sek Long Wan Wok We Oli Singaot Mi Blong Mekem

Long 1965, branj ofis blong Spen i singaot mitufala blong mekem wok blong goraon long ol kongregesen long Baselona. Samting ya i minim se mitufala i mas livim ol gudfala brata long Madrid, we mitufala i laekem olgeta tumas. Hemia i no stat blong wan nyufala wok nomo. Hem i wan traem long mi tu. Mi stap fraet long wok ya from we oltaem mi stap ting se mi no naf. Mi savegud se Jeova nomo i mekem se mi mi naf blong mekemgud wok ya.

Go long wan defren kongregesen evri wik i minim se mitufala i mas stap long haos blong ol brata. Mitufala i no gat prapa ples blong mitufala, mo kolosap evri tu wik, mitufala i muf i go long narafala haos. Fasin ya i had moa long woman blong mi. Be i no longtaem, José mo Roser Escudé, we tufala i stap long Baselona, oli talem se mitufala i save stap wetem olgeta blong sam dei, enitaem we mitufala i wantem. Oli rili soemaot lav long mitufala long rod ya. Samting ya i minim se mitufala i gat wan ples blong putum ol olting blong mitufala, mo wan stret ples we mitufala i save kambak long hem evri Sande naet.

Mi mo Rita, mitufala i stap fo yia long wok ya blong visitim ol kongregesen long ples ya Katalonia, we i stap kolosap long solwora blong Mediterenia. Mifala i mekem ol miting long saed blong Baebol long ol haos blong ol man, long fasin haed. Mo taem mifala i prij long ol haos wanwan, mifala i lukaotgud blong no pulum ae blong ol man. Samtaem evriwan long kongregesen i kam wanples long Sande blong mekem wan “piknik” long bus, antap moa taem mifala i mekem wan seket asembli.

Mitufala i glad oltaem long strong bilif blong plante brata long saed blong speret, we oli putum ol wok blong olgeta mo fasin fri blong olgeta long denja. Oli traehad blong mekem se ol kongregesen oli joengud mo oli strong. Plante blong olgeta ya oli go blong mekem wok ya long ol smol taon, afsaed long ol bigfala taon. Samting ya i mekem se namba blong ol brata i go antap bigwan long Spen, afta we oli tekemaot tabu long mifala mo givim fasin fri long saed long skul, long 1970.

Mitufala i Livim Misinari Wok

Long ol ten yia we mitufala i stap long Spen, mitufala i stap haremgud long spesel blesing ya blong mekem wok blong Jeova. Be oltaem, mitufala i wari long papa mama blong mitufala. Plante taem, kolosap mitufala i lego misinari wok mo gobak long ples blong mitufala blong lukaot long mama papa blong mi. Be, mi talem tangkyu long ol brata mo sista we oli gat lav, we oli stap long ol kongregesen kolosap long papa mama blong mi. Olgeta ya nao oli mekem se mitufala i save gohed blong mekem misinari wok long Spen. Yes, wan samting we i mekem se mitufala i save gat jans blong spenem plante yia long misinari wok, hemia ol narafala we oli givhan long mitufala from we oli putum Kingdom blong God long fasples tu.

Be biaen, long Desemba 1968, mitufala i mas gobak long ples blong mitufala blong lukaot long mama blong mi. Long sem manis, papa blong mi i ded. Ale, mama blong mi i stap hem wan. Mitufala i fri smol yet, blong wok fultaem long Kristin wok. Ale, mitufala i kasem wan ples blong wok olsem seket elda, long Yunaeted Stet. Long ol 20 yia we oli kam biaen, mitufala i visitim ol kongregesen blong ol man Spen we oli stap long Yunaeted Stet. Mitufala i lusum misinari wok blong mitufala, we i olsem wan perel we i sas tumas. Be, mitufala i kasem wan narafala perel bakegen.

Mitufala i Prij Long Medel Blong Ol Drag Mo Raf Fasin

Mitufala i stap wok wetem plante brata mo sista we oli stap long ol bigfala taon, we fasin blong brekem loa i bigwan tumas. Long faswan wik we mitufala i visitim ol kongregesen long Bruklin, Nyu Yok, oli stilim basket blong Rita, taem oli pulumaot long han blong hem.

Long wan taem mi mo Rita, mitufala i stap prij long ol haos wanwan wetem wan grup, long wan haf long taon blong Nyu Yok. Taem mitufala i wokbaot raon long kona long wan rod, mitufala i luk sam man we oli mekem laen long fored blong wan hol long wol blong wan haos we i no moa gat man i stap long hem. Taem mitufala i wokbaot smol moa i go, mitufala i luk wan yangfala man we i stanap long saed blong rod mo i stap lukluk mitufala. I gat wan narafala man i stap longwe long kona, we i stap stanap blong luk sipos ol trak blong polis oli kam. !Mitufala i stap long medel blong ol man ya we oli karem mo salem ol drag, long fasin we i no folem loa! Faswan we i lukluk mitufala i fraet. !Yes, maet mi mi wan polis! Be taem hem i luk Wajtaoa magasin hem i no moa fraet. Ale, hem i singaot long lanwis blong Spen “Los Atalayas! Los Atalayas!” (Wajtaoa! Wajtaoa!) Oli save se mitufala i hu, taem oli luk ol magasin ya, mo from samting ya oli no mekem trabol long mitufala. Taem mi pas kolosap long hem, mi talem se, “Buenos dias, como está?” (Gud moning, ?olsem wanem long yu?) !Ansa we hem i givim se, hem i askem mi blong prea blong hem!

Wan Had Disisen

Long 1990, i kam klia se mi mas stap wetem mama blong mi evri dei. Mitufala i traehad blong stap gohed long wok blong visitim ol kongregesen, be waes fasin i soemaot se mitufala i no save mekem tufala wok ya. Mitufala i rili wantem sua se mitufala i lukaotgud long mama wetem lav. Be wan taem bakegen, mitufala i mas lego wan perel we i nambawan, samting we i sas tumas long mitufala. Olgeta trufala perel long wol mo fasin blong haremgud long olgeta, i smol nomo taem yumi skelem wetem samting we i olsem ol sas ston, hemia wok blong misinari no elda we i visitim ol kongregesen, long ogenaesesen blong Jeova.

Naoia mi mo Rita mitufala i gat bitim 60 yia. Mitufala i haremgud mo glad blong wok wetem wan kongregesen long ples ya, we ol man blong hem oli toktok lanwis blong Spen. Taem mitufala i tingtingbak long ol yia we mitufala i spenem long wok blong Jeova, mitufala i talem tangkyu long hem we hem i putum sam perel we oli sas tumas long han blong mitufala.

[Tok blong pija long pej 23]

Mi mo Rita wetem Paul mo Evelyn Hundertmark (raetsaed) afsaed long wan stad we oli mekem spot ya blong faet wetem buluk long Madrid

[Tok blong pija long pej 24]

Visitim wan kongregesen long wan “piknik” long bus