Ol Kristin Wetnes We Oli Man Blong Heven
‘Yumi ya, yumi man blong heven, yumi gat raet insaed long ples ya.’—FILIPAE 3:20.
1. ?Wanem nambawan tingting we Jeova i gat long saed blong sam man?
SAM man long wol ya, bambae oli rul olsem ol king mo pris long heven. Bambae oli rul antap long ol enjel tu. (1 Korin 6:2, 3; Revelesen 20:6) !Hemia wan trutok we i mekem yumi sapraes tumas! Be, Jeova i talem se bambae i mas olsem. Mo bambae hem i yusum Pikinini blong hem, Jisas Kraes, wan nomo we hem i gat, blong mekem samting ya. ?From wanem Man ya we i Wokem yumi i mekem samting ya? ?Mo, ol save long saed ya i mas gat wanem paoa long wan Kristin tede? I gud yumi luk olsem wanem Baebol i ansarem ol kwestin ya.
2. ?Jon Baptaes i talem se bambae Jisas i mekem wanem nyufala samting, mo nyufala samting ya i joen wetem wanem?
2 Taem Jon Baptaes i stap rerem rod blong Jisas, hem i talem se bambae Jisas i mekem wan nyufala samting. Baebol i talem se: “[Jon] i talemaot long olgeta, i se ‘Biaen long mi i gat wan man i stap kam we i hae moa long mi. Mi mi no stret, mi no naf blong tekemaot sandel blong hem. Mi mi stap baptaesem yufala long wora, be hem bambae i baptaesem yufala long tabu speret.’” (Mak 1:7, 8) Bifo long taem ya, i no bin gat wan man we i baptaes long tabu speret. Hemia wan nyufala plan we i joen wetem tabu speret. Mo hem i joen wetem stampa tingting blong Jeova, we Hem i rere blong soemaot, hemia blong rerem sam man blong rul long heven.
“Bon Bakegen”
3. ?Wanem ol nyufala samting long saed blong Kingdom blong heven we Jisas i eksplenem long Nikodimas?
3 Taem Jisas i stap storeyan wetem wan Farisi long wan ples we tufala nomo i stap, hem i mekem stampa tingting blong God long bisnes ya i kam klia moa. Wan naet, Farisi ya, Nikodimas, i kam luk Jisas, nao Jisas i talem long hem, i se: “Sipos man i no bon bakegen blong i kam nyufala man, bambae hem i no save luk [kingdom blong God].” (Jon 3:3) From we Nikodimas i wan Farisi, hem i mas stadi finis long Hibru haf blong Baebol. Taswe, hem i save sam samting long saed blong bigfala trutok blong Kingdom blong God. Profet tok blong Daniel i talem se, bambae oli givim Kingdom ya long “wan man we i olsem pikinini blong man,” mo long “olgeta ya we oli tabu man blong God ya we i Antap Olgeta.” (Daniel 7:13, 14, 27) Kingdom ya bambae i “smasem mo i finisim” ol narafala kingdom, mo hem bambae i stanap olwe. (Daniel 2:44) Maet, Nikodimas i ting se ol profet tok ya bambae oli kamtru long nesen blong ol man Jyu. Be Jisas i talem se, blong luk Kingdom ya, man i mas bon bakegen. Nikodimas i no kasem save. Taswe Jisas i gohed, i se: ‘Sipos man i no bon long wora mo long tabu speret, hem i no save go insaed long kingdom blong God.’—Jon 3:5.
4. Long saed blong olgeta we oli bon from tabu speret, ?olsem wanem fasin fren blong olgeta wetem Jeova i jenis?
4 Jon Baptaes i bin tokbaot baptaes long tabu speret. Nao Jisas i ademap se, man we i go insaed long Kingdom blong God, hem i mas bon long tabu speret. Taem ol man mo woman we oli gat sin oli bon long spesel fasin ya, oli statem wan fasin fren wetem Jeova we i spesel tumas. Hem i tekem olgeta olsem pikinini blong hem. Yumi ridim se: “Olgeta we oli glad long [Jisas], oli bilif long hem, hem i givim raet long olgeta blong oli kam pikinini blong God. Be taem olgeta ya oli kam pikinini blong God, hemia i no olsem we pikinini i bon oltaem long blad blong papa mo mama blong hem, we man mo woman, tufala i wantem tufala, no we man i wantem se i gat pikinini blong hem. Olgeta ya oli pikinini blong God from we hem i wantem i olsem.”—Jon 1:12, 13; Rom 8:15.
Ol Pikinini Blong God
5. ?Wetaem ol trufala disaepol blong Jisas oli baptaes long tabu speret, mo wanem narafala wok we tabu speret i mekem long taem ya?
5 Taem Jisas i toktok wetem Nikodimas, tabu speret i bin kamdaon long Jisas finis, i makemaot hem blong kam king long Kingdom blong God long fyuja. Mo God i bin talemaot klia long fored blong ol man se Jisas i Pikinini blong Hem. (Matyu 3:16, 17) Long Pentekos long yia 33 K.T., Jeova i makemaot sam moa man olsem Pikinini blong hem long saed blong speret. Ol trufala disaepol blong Jisas, we oli hivap long Jerusalem, long wan rum antap long wan haos, oli baptaes long tabu speret. Long semtaem ya, oli bon bakegen from tabu speret, nao oli kam pikinini blong God long saed blong speret. (Ol Wok 2:2-4, 38; Rom 8:15) Mo tu, tabu speret i makemaot olgeta blong bambae oli go long heven long fyuja. Hemia i olsem faswan mak we tabu speret i putum long olgeta, olsem wan saen blong soem se oli sua long hop ya blong go long heven.—2 Korin 1:21, 22.
6. ?Wanem stampa tingting blong Jeova long saed blong Kingdom blong heven, mo from wanem i stret we sam man blong wol ya oli joen long Kingdom ya?
6 Olgeta ya, oli ol faswan sinman we God i jusum olgeta blong go insaed long Kingdom. Hemia i min se, afta we oli ded mo oli laef bakegen, bambae oli go joen long grup ya we i olsem Kingdom blong heven, we bambae oli rul antap long ol man mo ol enjel. Tingting blong Jeova se, bambae Kingdom ya i mekem haenem blong hem i tabu, mo i leftemap hae rul blong hem long fored blong olgeta samting long heven mo long wol. (Matyu 6:9, 10; Jon 12:28) !I stret nomo we sam man oli joen long Kingdom ya! Setan i yusum man, taem hem i stanemap faswan kwestin agensem hae rul blong Jeova long garen blong Iden. Mo naoia, tingting blong Jeova se bambae ol man oli givhan blong ansarem kwestin ya. (Jenesis 3:1-6; Jon 8:44) Aposol Pita i raet i go long ol man we God i jusum olgeta blong rul long Kingdom ya, i se: “I gud yumi talem tangkyu long God we hem i God mo Papa blong Jisas Kraes, Masta blong yumi. God ya, hem i sore tumas long yumi, nao from samting ya, hem i mekem yumi olsem we yumi bon bakegen, yumi gat nyufala laef. Samting ya, hem i mekem taem hem i mekem Jisas Kraes i laef bakegen long ded. Oraet, nao from we yumi olsem ol nyufala man, tingting blong yumi i stap strong long Jisas Kraes, mo i stap kam strong moa oltaem long hem. Mo yumi save, bambae yumi kasem ol gudfala samting ya we God i putum oli tabu, oli stap, oli blong ol man blong hem. Ol gudfala samting ya, oli blong yufala, mo oli no save kam nogud, oli no save kam rotin, oli no save lus, from we God i stap lukaotgud long olgeta long heven.”—1 Pita 1:3, 4.
7. ?Olgeta we oli baptaes long tabu speret, oli gat wanem spesel fasin fren wetem Jisas?
7 From we God i jusum ol Kristin ya mo i tekem olgeta olsem ol pikinini blong hem, oli kam olsem ol brata blong Jisas Kraes. (Rom 8:16, 17; 9:4, 26; Hibrus 2:11) Jisas nao i Laen ya we God i promes long Ebraham. Taswe, ol tabu Kristin ya, oli namba tu haf blong Laen ya, we bambae i givim blesing long ol man we oli gat bilif. (Jenesis 22:17, 18; Galesia 3:16, 26, 29) ?Wanem blesing? Hemia jans blong kam fri long sin mo blong frengud wetem God bakegen, mo blong mekem wok blong hem naoia mo blong olwe. (Matyu 4:23; 20:28; Jon 3:16, 36; 1 Jon 2:1, 2) Ol tabu Kristin long wol ya, oli lidim ol man we hat blong olgeta i stret oli go long blesing ya, taem oli talemaot brata blong olgeta long saed blong speret, Jisas Kraes, mo Papa, Jeova God, we i tekem olgeta olsem pikinini blong hem.—Ol Wok 1:8; Hibrus 13:15.
8. ?Olsem wanem bambae God i “soemaot” ol pikinini blong hem we tabu speret i makemaot?
8 Baebol i talem se God bambae i “soemaot” ol pikinini ya blong hem, we tabu speret i makemaot olgeta. (Rom 8:19) From we oli joen wetem Jisas blong rul long Kingdom, bambae oli joen long wok blong spolem wol blong Setan. Afta, tru long wan taosen yia, bambae oli givhan blong mekem ol blesing blong ransom sakrifaes oli go long ol man. Olsem nao, ol man oli kasem laef ya we i stretgud olgeta, we Adam i lusum. (2 Tesalonaeka 1:8-10; Revelesen 2:26, 27; 20:6; 22:1, 2) Olgeta samting ya oli joen wetem fasin ya we God i soemaot ol pikinini ya blong hem. Hem i wan samting we ol man we oli gat bilif oli wantem tumas blong luk.
9. ?Olsem wanem Baebol i tokbaot grup blong ol tabu Kristin raonabaot long wol?
9 Grup blong ol tabu Kristin raonabaot long wol i olsem ‘kongregesen blong ol fasbon, we nem blong olgeta i stap long heven finis.’ (Hibrus 12:23) Olgeta ya, oli ol faswan man blong kasem blesing from ransom sakrifaes blong Jisas. Mo tu, oli olsem “bodi blong Kraes.” Tok ya i soem se oli frengud wetem olgeta wanwan mo wetem Jisas. (1 Korin 12:27) Pol i raetem se: “Bodi blong man, hem i wan nomo, be i gat plante haf blong hem oli stap. Ol haf ya oli no sem mak, be oli joengud blong mekem bodi i wan nomo. Nao long Kraes i olsem nomo. Yumi evriwan, we fastaem yumi man Isrel, no yumi hiten man, yumi slef no yumi friman, be naoia, yumi olsem wan bodi nomo. Yumi baptaes finis, mo long baptaes ya, speret ya we i wan nomo, hem i joenem yumi evriwan long bodi ya finis. Mo God i givim sem speret ya nomo long yumi evriwan, blong yumi gat laef long hem.”—1 Korin 12:12, 13; Rom 12:5; Efesas 1:22, 23; 3:6.
“Isrel Blong God”
10, 11. ?Long faswan handred yia, from wanem i nidim wan nyufala Isrel, mo hu olgeta we oli mekemap nyufala nesen ya?
10 Long ol 1,500 yia bifo we Jisas i kam, olsem Mesaea ya we God i promes long hem, ol prapa man Isrel oli spesel nesen blong Jeova. Nating se oli kasem plante woning, nesen ya i no stap tru long God. Taem Jisas i kamtru, nesen ya i no wantem hem. (Jon 1:11) From samting ya, Jisas i talem long ol lida blong skul blong ol man Jyu se: “Bambae [God] i tekemaot kingdom blong hem long han blong yufala, nao bambae hem i givim long wan nesen we i stap karem ol frut blong hem.” (Matyu 21:43, NW) Blong kasem laef, i impoten tumas we yumi luksave “nesen [ya] we i stap karem ol frut blong [Kingdom].”
11 Nyufala nesen ya, hem i kongregesen blong ol tabu Kristin, we i stat long Pentekos long yia 33 K.T. Ol faswan memba blong hem, oli ol man Jyu we oli kam disaepol blong Jisas, nao oli wantem hem olsem King blong olgeta long heven. (Ol Wok 2:5, 32-36) Be, oli kam memba blong nyufala nesen ya blong God, i no from we oli man Jyu, be from we oli bilif long Jisas. Olsem nao, nyufala Isrel ya blong God, hem i wan samting we i spesel—wan nesen long saed blong speret. Taem bighaf blong ol man Jyu oli no wantem Jisas, God i singaot ol man Sameria mo biaen, ol Jentael, blong oli kam ol memba blong nyufala nesen ya. Baebol i kolem nyufala nesen ya se, “Isrel blong God.”—Galesia 6:16.
12, 13. ?Olsem wanem i kam klia se nyufala Isrel ya, i no jes sam man long skul blong ol man Jyu we oli mekem wan krangke grup blong folem wan man?
12 Long Isrel bifo, taem olgeta we oli no man Jyu oli joen blong wosip wetem ol man Jyu, oli mas obei long Loa blong Moses. Mo ol man oli mas sakomsaes blong soemaot samting ya. (Eksodas 12:48, 49) Sam Kristin we oli man Jyu, oli harem se long Isrel blong God, olgeta we oli no man Jyu oli mas mekem sem mak. Be, tingting blong Jeova i defren. Tabu speret i lidim aposol Pita i go long haos blong Konilyas, we hem i wan Jentael. Taem Konilyas mo famle blong hem oli bilif long tok blong Pita, oli kasem tabu speret—nating se oli no baptaes yet long wora. Samting ya i soem klia se Jeova i agri long ol Jentael ya, blong oli kam olsem ol memba blong Isrel blong God, be Hem i no talem long olgeta se oli mas stap aninit long Loa blong Moses.—Ol Wok 10:21-48.
13 Sam man blong bilif oli faenem i had blong agri long samting ya. Nao smoltaem biaen, ol aposol mo ol elda long Jerusalem oli mas tokbaot bisnes ya fulwan. Ol memba blong hed kampani ya, oli lesin long ol store we oli soem olsem wanem tabu speret i bin wok long olgeta we oli no man Jyu, we oli bilif long Jisas. Dip stadi long Baebol i soem long olgeta se samting ya i fulumap profet tok we i kamaot long God. (Aesea 55:5; Emos 9:11, 12) Oli mekem wan stret disisen: Ol Kristin we oli no man Jyu, oli no gat nid blong stap aninit long Loa blong Moses. (Ol Wok 15:1, 6-29) Olsem nao, Isrel long saed blong speret i rili wan nyufala nesen. Hem i no jes sam man long skul blong ol man Jyu, we oli mekem wan krangke grup blong folem wan man.
14. ?Taem Jemes i kolem Kristin kongregesen se “ol twelef laen we oli stap wanwan olbaot long wol,” hem i minim wanem?
14 Folem samting ya, taem disaepol Jemes i raet i go long ol tabu Kristin long faswan handred yia, hem i sanem leta ya i go long “ol twelef laen blong ol man Isrel, we [oli] stap wanwan olbaot long wol.” (Jemes 1:1; Revelesen 7:3-8) Ol man we oli blong nyufala Isrel, oli no joen long sam spesel laen. Isrel long saed blong speret i no seraot long 12 laen, olsem ol prapa man Isrel. Be, leta blong Jemes we i kamaot long God, i soem se long lukluk blong Jeova, Isrel blong God i jenisim fulwan ol 12 laen blong ol prapa man Isrel. Sipos wan prapa man Isrel i kam memba blong nyufala nesen, prapa laen blong hem—nating sipos hem i long laen blong Juda no Livae—i no impoten.—Galesia 3:28; Filipae 3:5, 6.
Wan Nyufala Kontrak
15, 16. (a) ?Olsem wanem Jeova i tingbaot ol memba blong Isrel blong God, we oli no man Jyu? (b) ?Wanem samting i mekem se nyufala Isrel i save stanap?
15 !Long lukluk blong Jeova, ol memba blong nyufala nesen ya, oli trufala man Jyu long saed blong speret, nating sipos oli no prapa man Isrel! Aposol Pol i eksplenem se: “Prapa fasin blong man Isrel, hem i no samting we ol man oli save luk long ae blong olgeta. Mo prapa sakomsaes, hem i no samting blong bodi blong man nomo. Prapa fasin blong man Isrel, hem i samting we i kamaot long tingting blong man. Mo prapa sakomsaes, hem i samting blong tingting blong man, we speret blong God i mekem long hem, i no wan samting we Loa ya we oli raetem finis i save mekem. Mo bakegen, ol prapa man Isrel, hemia i no olgeta we ol man nomo i stap leftemap nem blong olgeta. Hemia olgeta ya we God nomo i stap leftemap nem blong olgeta.” (Rom 2:28, 29) Plante Jentael, oli obei taem God i singaot olgeta blong kam memba blong Isrel blong Hem. Samting ya i fulumap wan profet tok blong Baebol. Eksampel, profet Hosea i raetem se: “Bambae mi sore long woman ya we i no gat man i sore long hem, mo bambae mi talem long ol man we oli no man blong mi se: ‘Yufala i man blong mi.’ Mo olgeta bambae oli talem se: ‘Yu yu God blong mifala.’”—Hosea 2:23; Rom 11:25, 26.
16 Sipos ol man Isrel long saed blong speret oli no stap aninit long Loa blong Moses, ?wanem samting i mekem se oli save kam memba blong nyufala nesen ya? Tru long Jisas, Jeova i mekem wan nyufala kontrak wetem nesen ya long saed blong speret. (Hibrus 9:15) Taem Jisas i stanemap Memoriol blong ded blong hem, long Naesan 14, long yia 33 K.T., hem i pasem bred mo waen long ol 11 aposol we oli stap tru long hem. Nao hem i talem se waen ya i saen blong “blad blong kontrak.” (Matyu 26:28, NW; Jeremaea 31:31-34) Long Gospel blong Luk, Jisas i talem se kap ya blong waen i saen blong “nyufala kontrak.” (Luk 22:20, NW) Tok ya blong Jisas i kamtru, taem tabu speret i kamdaon long dei blong Pentekos nao Isrel blong God i stat. Ale, God i tekemaot Kingdom long han blong ol prapa man Isrel, mo i givim long nyufala nesen ya long saed blong speret. Naoia, i no ol prapa man Isrel, be nyufala nesen ya, wetem ol wetnes blong God we oli stap insaed long hem, we i kam olsem man blong wok blong God.—Aesea 43:10, 11.
“Nyufala Jerusalem”
17, 18. ?Wanem ol gudfala blesing we buk blong Revelesen i talem se oli stap rere long ol tabu Kristin?
17 !Ol nambawan blesing oli stap rere long olgeta we oli gat jans blong go long heven! !Mo yumi glad tumas blong save ol samting blong sapraes we oli stap rere long olgeta! Buk blong Revelesen i soem long yumi sam nambawan samting long saed blong laef we bambae oli kasem long heven. Eksampel, long Revelesen 4:4, yumi ridim se: “Raonabaot long bigfala jea blong [Jeova], i gat twantefo narafala jea, oli stap, we oli bigfala tu, nao long ol jea ya i gat twantefo elda oli stap sidaon long olgeta. Olgeta ya, klos blong olgeta i waet, mo oli putum hat olsem hat blong king we oli wokem long gol.” Ol 24 elda ya, hemia ol tabu Kristin. Oli laef bakegen long ded, mo naoia oli stap long heven olsem we Jeova i bin promes long olgeta. Hat blong olgeta we i olsem hat blong king mo bigfala jea blong olgeta i mekem yumi tingbaot wok blong olgeta olsem king. !Mo tu, tingbaot nambawan blesing we oli gat, blong mekem wok kolosap long bigfala jea blong Jeova!
18 Long Revelesen 14:1, yumi luk wan narafala samting long saed blong olgeta, se: “Nao mi luk, mo antap long bigfala hil ya Saeon, i gat Smol Sipsip blong God i stap stanap. Mo i gat wan handred fotefo taosen man oli stap wetem hem, we i gat nem blong Smol Sipsip ya wetem nem blong Papa blong hem i stap finis long fes blong olgeta.” Long vas ya, yumi luk stret namba blong ol tabu man ya—hemia 144,000. Yumi luksave olgeta olsem ol king, from we oli stap stanap wetem King blong Jeova we i tekem jea blong hem finis, “Smol Sipsip ya,” Jisas Kraes. Mo oli stap long Hil ya Saeon long heven. Hil ya Saeon long wol, hem i ples we Jerusalem, taon blong king blong Isrel, i stap long hem. Hil ya Saeon long heven, i minim haenem blong Jisas mo ol man we bambae oli rul wetem hem, we oli mekemap Jerusalem long heven.—2 Kronikel 5:2; Ol Sam 2:6.
19, 20. (a) ?Bambae ol tabu Kristin oli kam memba blong wanem grup long heven? (b) ?Jeova i tekem hamas yia blong jusum ol man we bambae oli kam ol man blong heven?
19 Folem samting ya, Baebol i givim wan narafala nem long ol tabu man ya we oli stap long gudfala laef blong olgeta long heven. Nem ya, hemia ‘Nyufala Jerusalem.’ (Revelesen 21:2) Jerusalem blong wol, hem i “ples blong Hae King,” mo tu, hem i ples we haos blong God i stap long hem. (Matyu 5:35) Nyufala Jerusalem long heven, hem i grup blong ol king we oli mekemap Kingdom. Naoia, Hae Rula, Jeova, mo King we hem i putumap, Jisas, tufala i rul tru long Kingdom ya. Mo tu, olgeta insaed long Kingdom ya, oli mekem wok blong pris, taem ol rij blesing oli kamaot long bigfala jea blong Jeova blong tekemaot sik blong olgeta man. (Revelesen 21:10, 11; 22:1-5) Long wan narafala vison, Jon i harem ol voes, oli singaot ol trufala tabu Kristin we oli laef bakegen, se ‘woman blong Smol Sipsip.’ !Nambawan pijatok ya i soem olsem wanem bambae oli haremgud blong stap kolosap long Jisas oltaem, mo blong obei long hem! Tingbaot bigfala glad long heven taem laswan long olgeta i kasem gudfala laef ya long heven we i olsem pei blong hem. !Nao ‘mared blong Smol Sipsip ya’ i save kamaot! Long taem ya, bambae grup ya blong ol king long heven i kasem fulnamba blong hem.—Revelesen 19:6-8.
20 Yes, ol nambawan blesing oli stap rere long olgeta ya we aposol Pol i tokbaot olsem, se: ‘Yumi ya, yumi man blong heven, yumi gat raet insaed long ples ya.’ (Filipae 3:20) Blong kolosap tu taosen yia we i pas, Jeova i stap jusum ol pikinini blong hem long saed blong speret, mo i stap rerem olgeta blong kasem gudfala laef long heven. Plante pruf oli soem se kolosap nao bambae wok ya blong jusum mo rerem ol man ya i finis. Be i gat moa samting yet we bambae oli kamaot biaen, olsem vison blong Jon long Revelesen japta 7 i soemaot. Ale, naoia yumi wantem save long wan narafala grup blong ol Kristin. Bambae yumi tokbaot grup ya long nekis stadi.
?Yu Yu Rimemba?
◻ ?Wanem ol defren wok we tabu speret i mekem long olgeta we oli gat hop blong kasem gudfala laef long heven?
◻ ?Wanem nambawan fasin fren we ol tabu Kristin oli gat wetem Jeova mo wetem Jisas?
◻ ?Baebol i yusum wanem tok blong eksplenem kongregesen blong ol tabu Kristin?
◻ ?Wanem samting i mekem se Isrel blong God i save stanap?
◻ ?Wanem ol nambawan blesing long heven we oli stap rere long ol tabu Kristin?
[Tok blong pija long pej 10]
Jeova i tekem kolosap tu taosen yia, blong jusum olgeta we bambae oli rul long Kingdom blong heven