Jeova i Tekem Plante Pikinini Blong Hem Oli Go Joen Long Gudfala Laef Long Heven
‘Taem God i tekem plante pikinini blong hem oli go joen long gudfala laef long heven, i stret nomo we hem i mekem Man ya we Hem i Yusum blong sevem olgeta, i kam stretgud olgeta tru long ol traem we hem i kasem.’—HIBRUS 2:10.
1. ?From wanem yumi save sua se stampa tingting blong Jeova long saed blong ol man bambae i kamtru?
JEOVA i wokem wol ya blong i kam prapa ples blong ol man we oli stretgud olgeta, mo blong oli stap long hem gogo i no save finis. (Eklesiastis 1:4; Aesea 45:12, 18) Be, faswan papa blong yumi, Adam, i sin, mo from samting ya, olgeta pikinini blong hem oli kasem sin mo ded. Nating se i olsem, stampa tingting blong God long saed blong ol man, bambae i kamtru from Laen we hem i stanemap folem promes blong hem, hemia Jisas Kraes. (Jenesis 3:15; 22:18; Rom 5:12-21; Galesia 3:16) Lav we Jeova i gat long ol man i pusum hem blong givim ‘stret pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) Mo lav i pusum Jisas tu, blong ‘givim laef blong hem olsem wan ransom, blong pemaot plante man oli gofri.’ (Matyu 20:28) ‘Ransom ya blong pemaot plante man,’ i mekem se ol man oli save kasembak raet mo hop we Adam i bin sakemaot, mo i givim jans long olgeta blong kasem laef we i no save finis.—1 Timote 2:5, 6; Jon 17:3.
2. ?Long Dei Blong Stretem Sin long Isrel bifo, oli mekem wanem samting we i pija blong wok we ransom sakrifaes blong Jisas i mekem?
2 Dei Blong Stretem Sin, we ol man Isrel oli mekem lafet blong hem wan taem evri yia, i olsem wan pija blong samting we ransom sakrifaes blong Jisas bambae i mekem long ol man. Long dei ya, hae pris i kilim wan buluk fastaem, olsem wan sakrifaes blong tekemaot sin. Blong givim blad blong anamol ya i go long God, hem i karem i go long tabu Bokis, we i stap insaed long Tabu Ples we i Tabu Tumas, long haos tapolen, mo biaen, long haos prea. Hem i mekem samting ya blong tekemaot sin blong hem wan, ol famle blong hem, mo laen blong Livae. Long sem fasin, Jisas Kraes i givim praes blong blad blong hem i go long God, blong tekemaot sin blong ol tabu “brata” blong hem fastaem. (Hibrus 2:12; 10:19-22; Levitikas 16:6, 11-14) Long Dei Blong Stretem Sin, hae pris i kilim wan nani tu, olsem wan sakrifaes blong tekemaot sin. Hem i karem blad blong nani ya i go long Tabu Ples we i Tabu Tumas, blong tekemaot sin blong ol 12 laen blong Isrel we oli no ol pris. Long sem fasin, Hae Pris Jisas Kraes i givim blad blong hem blong tekemaot sin blong olgeta man we oli soemaot bilif, nating se oli no ol pris blong hem.—Levitikas 16:15.
Go Joen Long Gudfala Laef Long Heven
3. Folem tok blong Hibrus 2:9, 10, ?God i mekem wanem long ol 1,900 yia we oli pas finis?
3 Blong 1,900 yia finis, God i stap mekem wan nambawan wok long saed blong ol “brata” blong Jisas. Aposol Pol i raetem se: ‘God i glad blong givhan long ol man, nao from samting ya, hem i mekem Jisas i stap daon moa long ol enjel blong smoltaem, blong bambae i save ded blong sevem ol man. Jisas i harem nogud long bodi blong hem, gogo i ded, nao from samting ya, yumi luk we God i leftemap hem, i givim haenem long hem. Taem God i tekem plante pikinini blong hem oli go joen long gudfala laef long heven, i stret nomo we hem i mekem Man ya we Hem i Yusum blong sevem olgeta, i kam stretgud olgeta tru long ol traem we hem i kasem.’ (Hibrus 2:9, 10) Man we God i Yusum blong Sevem olgeta, hemia Jisas Kraes. Taem hem i stap long wol ya olsem wan man, hem i lanem fasin obei from ol hadtaem we hem i kasem. (Hibrus 5:7-10) Jisas i faswan we tabu speret i makemaot hem blong i kam wan speret pikinini blong God.
4. ?Wetaem mo olsem wanem God i makemaot Jisas olsem speret Pikinini blong hem?
4 Jeova i yusum tabu speret, no paoa blong hem, blong makemaot Jisas olsem wan speret Pikinini blong hem, olsem nao, hem i save tekem Jisas i go joen long gudfala laef long heven. Taem Jisas mo Jon Baptaes nomo i stap, Jon i draonem Jisas fulwan long wora, blong soemaot se Jisas i givim hem wan i go long God. Gospel blong Luk i talem se: ‘Long taem ya we Jon i stap mekem baptaes yet long olgeta man, Jisas tu i tekem baptaes long hem. Nao taem Jisas i stap prea, skae i open. Nao tabu speret i tekem bodi olsem wan sotleg, nao i kamdaon long Jisas. Nao God i tok long hem, i se “Yu yu Pikinini blong mi we mi mi laekem yu tumas. Tingting blong mi i harem gud tumas long yu.” ’ (Luk 3:21, 22) Taem tabu speret i kamdaon long Jisas, Jon i luk samting ya, mo hem i harem voes blong Jeova tu we i talem klia se hem i glad long Jisas olsem Pikinini blong Hem we i laekem hem tumas. Long taem ya, Jeova i yusum tabu speret blong makemaot Jisas olsem faswan long ‘plante pikinini blong hem we bambae i tekem olgeta oli go joen long gudfala laef long heven.’
5. ?Hu ya ol faswan man we oli kasem blesing from sakrifaes blong Jisas, mo wanem stret namba blong olgeta?
5 Ol “brata” blong Jisas, oli ol faswan man blong kasem blesing from sakrifaes blong Jisas. (Hibrus 2:12-18) Aposol Jon i luk olgeta long wan drim, taem oli kasem gudfala laef long heven finis. Oli stap long Hil ya Saeon long heven, wetem Smol Sipsip ya, hemia Masta Jisas Kraes we i laef bakegen long ded. Mo tu, Jon i talemaot stret namba blong olgeta, i se: “Mi luk, mo antap long bigfala hil ya Saeon, i gat Smol Sipsip blong God i stap stanap. Mo i gat wan handred fotefo taosen man oli stap wetem hem, we i gat nem blong Smol Sipsip ya wetem nem blong Papa blong hem i stap finis long fes blong olgeta. . . . God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya. Neva gyaman tok i kamaot long maot blong olgeta, mo oli no gat wan samting nating i stap long olgeta blong mekem olgeta oli doti long fes blong God.” (Revelesen 14:1-5) Taswe, fulnamba blong ol ‘pikinini blong God we oli kasem gudfala laef long heven,’ hemia 144,001—Jisas wetem ol speret brata blong hem.
‘Oli Bon Long God’
6, 7. ?Hu ya olgeta ya we ‘oli bon long God,’ mo samting ya i mekem wanem long olgeta?
6 Ol man we Jeova i makemaot olgeta wetem tabu speret, ‘oli bon long God.’ Aposol Jon i raet i go long ol man olsem, i se: ‘Man we i bon long God, hem i no moa mekem sin oltaem, from we sid blong Hem [Jeova] we i karem frut, i stap long hem. Nao hem i no moa save mekem sin oltaem, from we hem i bon long God.’ (1 Jon 3:9) ‘Sid blong God we i karem frut,’ hemia tabu speret. Speret ya i joen wetem trutok blong God blong mekem se ol 144,000 man wanwan oli “bon bakegen” wetem hop blong laef long heven.—1 Pita 1:3-5, 23.
7 Taem Jisas i bon long wol ya, hem i Pikinini blong God finis, olsem we stret man ya Adam i “pikinini blong God.” (Luk 1:35; 3:38) Be, afta we Jisas i tekem baptaes, Jeova i talem sam impoten tok, i se: “Yu yu Pikinini blong mi we mi laekem yu tumas. Tingting blong mi i harem gud long yu.” (Mak 1:11) Ol tok ya we i kamaot long semtaem we tabu speret i kamdaon long Jisas, oli soemaot klia se God i mekem Jisas i kam speret Pikinini blong Hem. I olsem we Jisas i “bon bakegen” long taem ya, wetem raet blong kasem laef long heven bakegen, olsem wan speret Pikinini blong God. Ol 144,000 speret brata blong hem, oli “bon bakegen” tu. (Jon 3:1-8; lukluk Wajtaoa, Novemba 15, 1992, pej 3-6.) God i makemaot olgeta wetem tabu speret mo i givim wok long olgeta blong talemaot gud nyus, olsem hem i mekem long Jisas.—Aesea 61:1, 2; Luk 4:16-21; 1 Jon 2:20.
Pruf Se Tabu Speret i Makemaot Olgeta
8. (a) ?I gat wanem pruf blong soem se God i makemaot Jisas wetem tabu speret? (b) ?I gat wanem pruf blong soem se God i makemaot ol faswan disaepol wetem tabu speret?
8 I gat samting we man i bin lukluk mo harem blong pruvum se God i makemaot Jisas wetem tabu speret. Jon Baptaes i luk tabu speret i kamdaon long Jisas, mo i harem tok blong God we i talem se Man ya we God i jusumaot hem blong kam Mesaea, i wan speret pikinini blong hem. ?Be olsem wanem ol disaepol blong Jisas biaen, oli save se tabu speret i makemaot olgeta? Long dei we Jisas i go antap long heven, hem i talem se: ‘Bifo, Jon i mekem baptaes long wora, be bambae i no longtaem, God i mekem baptaes long yufala long tabu speret.’ (Ol Wok 1:5) Long dei blong Pentekos, 33 K.T.,a ol disaepol blong Jisas oli ‘baptaes long tabu speret.’ Tabu speret i kamdaon long olgeta, nao “i gat wan noes i kamaot long skae, we i olsem wan bigfala win i blu,” mo ‘wan samting olsem faea we i laet’ i kam kasem evri disaepol. Samting we i mekem ol man oli sapraes moa, hemia se ol disaepol ‘oli stat toktok long ol lanwis blong ol narafala man, olsem we speret ya i givim paoa long olgeta blong oli save toktok olsem.’ Taswe, ol man oli luk mo oli harem pruf, blong soem se rod blong kasem gudfala laef long heven olsem ol pikinini blong God, i open long ol man we oli folem Kraes.—Ol Wok 2:1-4, 14-21; Joel 2:28, 29.
9. ?I gat wanem pruf blong soem se God i makemaot sam man Sameria, Konilyas, mo sam narafala long faswan handred yia, wetem tabu speret?
9 Smoltaem biaen, man ya blong talemaot gud nyus, Filip, i prij long Sameria. Plante man Sameria oli bilif long tok blong hem mo oli tekem baptaes. Be oli no luk sam pruf blong soemaot se God i makemaot olgeta olsem ol pikinini blong hem. Taem aposol Pita mo Jon i prea mo putum han blong tufala long ol man ya we oli bilif, long taem ya nomo ‘oli kasem tabu speret’ long wan fasin we ol man oli save luk. (Ol Wok 8:4-25) Hemia i olsem pruf se God i makemaot ol man Sameria ya we oli bilif, wetem tabu speret, blong oli kam ol pikinini blong hem. Long sem fasin, long 36 K.T., Konilyas mo sam narafala Hiten man oli bilif long trutok blong God. Ale, Pita mo sam narafala Kristin man Jyu we oli wokbaot wetem Pita, ‘oli sapraes tumas long samting ya, we olgeta oli hiten man, be God i givim tabu speret long olgeta olsem bigfala presen blong hem long olgeta. Oli suagud from we oli stap harem ol man ya oli stap toktok long ol narafala lanwis, oli stap leftemap nem blong God.’ (Ol Wok 10:44-48) Plante Kristin long faswan handred yia, oli kasem ‘ol presen we tabu speret i givim long olgeta,’ olsem fasin ya blong toktok long narafala lanwis. (1 Korin 14:12, 32) Olsem nao, ol man ya oli luk klia pruf se tabu speret i bin makemaot olgeta. ?Be olsem wanem ol Kristin long ol yia biaen bambae oli save sipos tabu speret i makemaot olgeta no nogat?
Tabu Speret i Givim Wetnes
10, 11. Folem tok blong Rom 8:15-17, traem eksplenem olsem wanem tabu speret i givim wetnes long tingting blong ol man se bambae oli joen wetem Kraes long heven.
10 Olgeta 144,000 tabu Kristin evriwan, oli kasem klia pruf se tabu speret blong God i stap long olgeta. Long saed ya, Pol i raetem se: ‘Speret ya i blong mekem yumi i kam pikinini blong God. Long paoa blong speret ya, yumi stap singaot God se “!Abba, Papa!” Speret ya i givim wetnes long tingting blong yumi blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we God i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting ya. Bambae yumi save joen wetem hem long gudfala laef long heven, sipos yumi harem nogud olsem we hem i bin harem nogud.’ (Rom 8:15-17) Ol tabu Kristin oli gat wan spesel tingting long saed blong Papa blong olgeta long heven, wan strong filing se oli pikinini blong hem. (Galesia 4:6, 7) Oli suagud se God i makemaot olgeta blong oli kam ol speret pikinini blong hem we bambae oli joen wetem Kraes long Kingdom blong heven. Tabu speret blong Jeova nao i mekem spesel wok ya long olgeta.
11 Long paoa blong tabu speret, tingting no strong filing blong ol tabu man ya i pusum olgeta blong joenem ol samting we Baebol i talem long saed blong laef long heven, i go long prapa laef blong olgeta. Eksampel, taem oli ridim tok blong Baebol long saed blong ol speret pikinini blong Jeova, wantaem nomo oli luksave se ol tok ya i stret long olgeta. (1 Jon 3:2) Oli save se oli bin ‘tekem baptaes blong joen long Jisas Kraes’ mo long ded blong hem. (Rom 6:3) Oli bilif strong se oli speret pikinini blong God, we bambae oli ded mo laef bakegen blong kasem gudfala laef long heven, olsem Jisas i kasem.
12. ?Speret blong God i putum wanem long tingting blong ol tabu Kristin?
12 Fasin ya we tabu speret i makemaot olgeta olsem ol pikinini blong God, i no wan tingting we oli wokem jes from we oli wantem tumas blong kam olsem. No gat. Olgeta ya we tabu speret i makemaot olgeta, oli no wantem go long heven blong ronwe long had laef we oli gat long wol ya. (Job 14:1) Defren olgeta, tabu speret blong Jeova i putum insaed long ol man ya we oli rili ol tabu man, wan hop mo tingting long saed blong fyuja we ol narafala man oli no gat. Olgeta ya oli save se bambae i nambawan blong kasem laef blong olwe we i stretgud olgeta long paradaes long wol ya, we oli save stap glad wetem ol famle mo fren blong olgeta. Be, laef olsem i no faswan samting we oli wantem long hat blong olgeta. Tingting blong olgeta i stap strong tumas long laef long heven, mekem se oli rere blong lego hop blong laef long wol ya wetem ol samting we oli joen long hem.—2 Pita 1:13, 14.
13. ?Seken Korin 5:1-5 i talem se Pol i “wantem tumas” blong kasem wanem samting, mo hemia i soemaot wanem long saed blong ol man we God i makemaot olgeta wetem tabu speret?
13 From we hop blong laef long heven we God i givim long olgeta ya i strong tumas, oli gat filing olsem Pol, we i raetem se: ‘Bodi ya we mifala i gat long wol ya, hem i olsem haos tapolen we mifala i stap long hem, hem bambae i save lus. Be mifala i savegud se bambae mifala i gat narafala bodi blong mifala i stap long heven, we hem i olsem wan haos we God i putumrere finis blong mifala. Haos ya i no gat man i wokem, mo hem i blong stap oltaem, gogo i no save finis. Naoia mifala i stap harem nogud, mifala i stap pulum win blong mifala, from we mifala i wantem tumas blong stap long nyufala haos ya we i blong heven. Sipos mifala i stap long nyufala haos ya, bambae mifala i no moa stap olsem we mifala i neked. Hemia, mifala i gat prapa bodi blong mifala. Taem mifala i stap yet long haos tapolen ya blong mifala long wol ya, mifala i stap harem nogud tumas, mifala i stap pulum win blong mifala from. I no from we mifala i wantem lusum bodi ya we i blong wol. Be mifala i wantem blong bodi ya we i blong heven, bambae i kam kavremap mifala, blong bambae fasin blong laef blong hem i jenisim ol samting ya blong ded, we i blong bodi ya blong wol. God nomo ya i mekem mifala i rere, blong hem bambae i jenisim mifala olsem. Mo hem i givim tabu speret blong hem finis long mifala, we i olsem saen blong soemaot we ol promes blong hem bambae oli kamtru long mifala.’ (2 Korin 5:1-5) Pol i “wantem tumas” blong laef bakegen long heven, olsem wan speret man we bodi blong hem i no save kam nogud samtaem. Hem i yusum pijatok blong haos tapolen blong tokbaot bodi blong man. Wan haos tapolen i no olsem wan gudfala haos. Haos tapolen i no strong, i save foldaon, mo i no save stap longtaem. Ol Kristin we oli kasem tabu speret olsem wan saen blong promes ya se bambae oli laef long heven, oli stap long wol ya long wan bodi blong mit mo blad we bambae i ded. Be oli stap tingbaot nomo, “haos we God i putumrere finis” blong olgeta, hemia speret bodi we i no save ded no kam nogud samtaem. (1 Korin 15:50-53) Olsem Pol, oli talem wetem fulhat blong olgeta se: “Mifala i no fraet, tingting blong mifala i strong. Mo sipos mifala i save aot long bodi blong mifala [long wol ya] blong go mekem ples blong mifala wetem Masta blong yumi long heven, bambae mifala i glad moa.”—2 Korin 5:8.
Oli Joen Long Tu Spesel Kontrak
14. Taem Jisas i stanemap lafet blong Memoriol, ?hem i tokbaot wanem kontrak fastaem, mo kontrak ya i mekem se ol man Isrel long saed blong speret oli save kasem wanem?
14 Ol Kristin we tabu speret i makemaot olgeta, oli sua se oli joen long tu spesel kontrak. Jisas i tokbaot wan long tufala kontrak ya jes bifo we hem i ded, taem hem i yusum bred we i no gat is long hem, wetem waen, blong stanemap lafet blong Memoriol blong ded blong hem. Hem i talem long saed blong waen ya, se: ‘Kap ya i minim nyufala kontrak blong God, we blad blong mi, we bambae i ron from yufala, hem bambae i mekem i stanap.’ (Luk 22:20; 1 Korin 11:25) ?Wanem tufala grup we oli joen long nyufala kontrak ya? Jeova God mo ol man Isrel long saed blong speret—hemia olgeta we Jeova bambae i tekem olgeta oli go blong joen long gudfala laef long heven. (Jeremaea 31:31-34; Galesia 6:15, 16; Hibrus 12:22-24) Blad blong Jisas we i ron taem hem i ded, i mekem nyufala kontrak ya i wok. Nao tru long kontrak ya, Jeova i jusumaot wan grup blong man long olgeta nesen blong oli karem nem blong hem, mo i mekem ol tabu Kristin ya oli joen long ‘laen’ blong Ebraham. (Galesia 3:26-29; Ol Wok 15:14) Nyufala kontrak i mekem se olgeta man Isrel long saed blong speret oli save laef bakegen long bodi we i no save kam nogud samtaem, blong kasem gudfala laef long heven. Hemia ‘wan kontrak we i no save finis samtaem,’ taswe ol blesing blong hem bambae oli gohed olwe. Long fyuja, bambae yumi jes luk sipos kontrak ya i mekem sam narafala wok long Wan Taosen Yia we Kraes i rul, mo biaen.—Hibrus 13:20.
15. Folem tok blong Luk 22:28-30, ?ol man blong Jisas we tabu speret i makemaot olgeta oli bin joen long wanem narafala kontrak, mo wetaem?
15 ‘Plante pikinini ya’ we Jeova bambae ‘i tekem olgeta oli joen long gudfala laef long heven,’ olgeta wanwan oli joen long wan kontrak long saed blong Kingdom long heven tu. Jisas i tokbaot kontrak ya we hem i mekem wetem ol faswan man blong hem, i se: ‘Yufala ya, yufala i bin stapgud wetem mi long olgeta samting we oli kam blong traem mi. Nao olsem we Papa blong mi i mekem wan kontrak wetem mi long saed blong wan kingdom, mi tu mi mekem wan kontrak wetem yufala, se yufala i save sidaon wetem mi long kingdom ya blong kakae mo dring long tebel blong mi. Mo long taem ya, bambae yufala tu i sidaon long ol jea blong king blong jajem ol twelef laen blong Isrel.’ (Luk 22:28-30) Kontrak ya long saed blong Kingdom i stat wok long Pentekos long 33 K.T., taem tabu speret i kamdaon long ol disaepol blong Jisas. Kontrak ya bitwin Kraes mo ol king we oli rul wetem hem, bambae i gohed blong olwe. (Revelesen 22:5) Ale, ol Kristin we tabu speret i makemaot olgeta, oli suagud se oli joen long tufala kontrak ya, nyufala kontrak, mo kontrak blong Kingdom. Taswe, long Lodsapa, smol grup blong ol tabu man we oli stap yet long wol ya, olgeta nomo oli kakae bred we i pija blong stret bodi blong Jisas. Mo olgeta nomo oli dring waen we i pija blong stret blad blong Jisas, we i ron taem Jisas i ded blong mekem nyufala kontrak i stanap.—1 Korin 11:23-26; lukluk Wajtaoa (Engglis mo Franis), Febuwari 1, 1989, pej 17-20.
Hem i Singaot Mo Jusumaot Olgeta, Mo Oli Holemstrong Long Hem
16, 17. (a) Blong go joen long gudfala laef long heven, ?olgeta 144,000 man oli mas mekem wanem? (b) ?Hu ya “ol ten king,” mo oli stap mekem wanem long ‘ol brata’ blong Kraes long wol ya?
16 Faswan samting we ransom sakrifaes blong Jisas i mekem, hem i openem rod blong God i save singaot 144,000 man oli go long heven, mo blong i save jusumaot olgeta wetem tabu speret blong hem. I tru se, blong go joen long gudfala laef long heven, oli mas ‘traehad moa blong mekem se fasin ya blong God blong singaot mo jusumaot olgeta, i karem frut long laef blong olgeta.’ Mo oli mas holemstrong long hem gogo oli ded. (2 Pita 1:10; Efesas 1:3-7; Revelesen 2:10) Smol namba blong ol tabu man ya we oli stap yet long wol, oli stap holemstrong long God nating se “ol ten king,” we oli pija blong ol politik paoa blong wol, oli stap agensem olgeta. Wan enjel i talem se: ‘Bambae [ol ten king ya] oli faet long Smol Sipsip blong God. Be Smol Sipsip ya, hem i Masta blong ol masta mo King blong ol king. God i singaot ol man blong hem, hem i jusumaot olgeta, mo olgeta oli stap holemstrong long hem. Nao Smol Sipsip ya wetem ol man ya blong hem bambae oli faet long ol ten king ya, oli winim olgeta.’—Revelesen 17:12-14.
17 Ol rula blong wol ya oli no save faetem Jisas, we i “King blong ol king,” from we hem i stap long heven. Be, oli agensem ol ‘brata’ blong hem we oli stap yet long wol ya. (Revelesen 12:17) Fasin agens ya bambae i finis long faet blong God, Amageden. Long faet ya, “King blong ol king” wetem ‘ol brata’ blong hem—olgeta we ‘God i singaot mo jusumaot olgeta, mo we oli stap holemstrong long hem’—oli sua blong win. (Revelesen 16:14, 16) Go kasem taem ya, ol Kristin we tabu speret i makemaot olgeta, oli gat plante wok blong mekem. ?Oli stap mekem wanem naoia, bifo we Jeova i tekem olgeta oli go joen long gudfala laef long heven?
[Futnot]
a K.T. i minim Kristin Taem.
?Wanem Ansa Blong Yu?
◻ ?God i tekem hu i go ‘joen long gudfala laef long heven’?
◻ ?I minim wanem se wan man i ‘bon long God’?
◻ ?Olsem wanem ‘tabu speret i givim wetnes long tingting’ blong sam Kristin?
◻ ?Ol man we tabu speret i makemaot olgeta oli joen long wanem tufala kontrak?
[Tok blong pija long pej 15]
Long Pentekos 33 K.T., i gat prufblong soem se rod blong kasemgudfala laef long heven i open