Wan Kwestin

?Meri we biaen i kam mama blong Jisas, i gat bel finis taem hem i go visitim wan famle blong hem, hemia Elisabet?

Yes, hem i gat bel finis.

Long Luk japta 1, yumi ridim fastaem, se Elisabet i gat bel. Hemia woman blong pris ya Sekaraea, we i bonem Jon (Baptaes). “Long sikis manis blong Elisabet i gat bel,” enjel Gabriel i go luk Meri, blong talemaot long hem se bambae hem i gat bel, mo bambae hem i bonem “Pikinini blong God ya we i Antap Tumas.” (Luk 1:​26, 30-33) ?Be wetaem nao Meri i gat bel?

Store blong Luk i gohed blong talem se, Meri i wokbaot i go blong luk wan famle blong hem, Elisabet, we i gat bel i stap. Taem tufala woman ya oli mitim tufala, pikinini we i stap long bel blong Elisabet (Jon) i muf. Elisabet i tokbaot ‘pikinini ya we Meri bambae i bonem,’ mo i singaotem Meri se “mama blong Masta blong mi.” (Luk 1:​39-44) Taswe yumi save talem se, Meri i gat bel finis, taem hem i go luk Elisabet.

Long Luk 1:56 yumi ridim se: ‘Meri, hem i stap kolosap tri manis wetem Elisabet, nao biaen hem i gobak long ples blong hem.’ Vas ya i no talem wanem dei stret hem i mekem samting ya. Hem i talem ‘kolosap tri manis,’ we i minim se Elisabet i gat naen manis finis blong hem.

Afta we Meri i givhan long Elisabet long ol laswan manis we hem i gat bel, hem i gobak long haos blong hem long Nasaret. Ating Meri i luksave se taem Elisabet i bonem pikinini boe blong hem (hemia Jon), maet bambae i gat plante man we i kam visitim olgeta, mo sam famle tu oli save kam. Maet wan yangfala woman we i gat bel be i no mared, i save sem long fored blong ol man ya. ?Meri i gat bel long hamas manis taem hem i aot blong kambak long Nasaret? From we Meri i stap wetem Elisabet ‘kolosap tri manis,’ maet hem i long en blong namba tri manis, no stat blong namba fo manis blong hem, taem hem i gobak long Nasaret.