Jelas From Klin Wosip Blong Jeova
“Jeova, we nem blong hem Jelas, hem i wan God we i gat fasin jelas.”—EKSODAS 34:14, NW.
1. ?Wanem ya nambawan fasin blong God, mo olsem wanem fasin ya i joen wetem fasin jelas blong hem?
JEOVA i tokbaot hem wan olsem “wan God we i gat fasin jelas.” Maet yu wantem save from wanem i olsem, from we tok ya “jelas” i mekem yumi tingbaot fasin we i no stret. Tru tumas, bigfala fasin blong God hemia lav. (1 Jon 4:8) Taswe, yumi save se enikaen fasin jelas we hem i gat, i blong mekem i gud long man nomo. Bambae yumi luk we fasin jelas blong God i impoten blong mekem pis mo fasin joengud i stap long olgeta ples blong heven mo wol.
2. ?Wanem sam narafala mining blong Hibru tok ya we i minim “fasin jelas”?
2 Wan tok long Hibru lanwis we i minim “fasin jelas,” i kamaot bitim 80 taem long Hibru haf blong Baebol. Kolosap stret haf blong ol vas ya oli tokbaot Jeova God. Man ya G. H. Livingston i eksplenem se: “Taem oli tokbaot fasin jelas blong God, hem i no wan kaen jelas we i minim wan filing we i no stret. Defren olgeta, hem i minim se Jeova i talem strong long ol man se oli mas wosip long Hem nomo.” (The Pentateuch in Its Cultural Environment) Taswe, samtaem New World Translation i tanem Hibru tok ya i kam, “talem strong se oli mas ona long hem nomo.” (Esikel 5:13) Sam narafala wod we oli yusum blong eksplenem Hibru tok ya, hemia ‘strong filing’ no ‘strong tingting.’—Ol Sam 79:5; Aesea 9:7.
3. ?Olsem wanem fasin jelas i save mekem gudfala samting i kamaot samtaem?
3 God i wokem man wetem fasin we hem i save harem se hem i jelas. Be, taem man i foldaon long sin, samting ya i mekem se fasin jelas blong hem i kam nogud. Nating se i olsem, fasin jelas we man i gat, i save stap olsem wan paoa we i pusum hem blong mekem sam gudfala samting. Hem i save pulum wan man blong lukaotgud long wan narafala we hem i laekem tumas, blong bambae hem i no kasem trabol. Antap moa, ol man oli save soemaot fasin jelas long stret rod, taem oli stanap strong from Jeova mo from wosip blong hem. (1 King 19:10) Blong givim stret mining blong fasin ya blong jelas from Jeova, samtaem oli tanem Hibru tok ya i kam “no letem narafala i traem winim” hem.—2 King 10:16.
Pikinini Buluk We Oli Wokem Long Gol
4. ?Wanem oda we i joen wetem fasin jelas ya we i stret, i stap olsem wan impoten haf blong Loa blong God long ol man Isrel?
4 Wan eksampel long saed blong fasin jelas we i stret, i kamaot afta we ol man Isrel oli kasem Loa long Hil blong Sinae. Plante taem, oli bin kasem woning ya se oli no mas wosipim ol god we man nomo i wokem. Jeova i bin talem long olgeta se: “Mi, Jeova, mi God blong yu, mo mi mi wan God we mi askem strong blong ol man oli wosip long mi nomo [no, “wan God we i jelas (gat strong tingting); wan God we i no save letem narafala i traem winim mi”].” (Eksodas 20:5, NW, futnot; skelem wetem Eksodas 20:22, 23; 22:20; 23:13, 24, 32, 33.) Jeova i mekem wan kontrak wetem ol man Isrel, we hem i promes blong blesem olgeta mo karem olgeta i go long Promes Lan. (Eksodas 23:22, 31) Mo ol man oli talem se: ‘Bambae mifala i obei long Jeova, mifala i mekem evri samting we hem i talem.’—Eksodas 24:7.
5, 6. (a) Taem ol man Isrel oli stap fored long Bigfala Hil blong Sinae, ?oli mekem wanem bigfala sin? (b) ?Olsem wanem Jeova mo ol man blong wosip we oli stap tru long hem, oli soemaot fasin jelas we i stret long Sinae?
5 Nating se i olsem, i no longtaem biaen, ol man Isrel oli mekem sin agensem God. Long taem ya, oli stap long fored blong Bigfala Hil ya Sinae. Moses i stap antap long hil ya blong plante dei finis, blong kasem sam moa loa long God. Nao ol man oli fosem brata blong Moses, Eron, blong mekem wan god blong olgeta. Eron i folem tingting blong olgeta nao i mekem wan aedol blong wan pikinini buluk wetem ol gol we ol man ya oli givim long hem. Oli talem se aedol ya i pija blong Jeova. (Ol Sam 106:20) Long nekis dei, oli mekem ol sakrifaes oli go long god ya mo oli “stap mekem wosip long hem.” Biaen, oli ‘mekem lafet mo haremgud nomo.’—Eksodas 32:1, 4, 6, 8, 17-19.
6 Moses i kamdaon long bigfala hil taem ol man Isrel oli stap mekem lafet. Taem hem i luk rabis fasin blong olgeta, hem i singaot strong se: ‘?Hu i stap yet long saed blong Jeova?’ (Eksodas 32:25, 26) Ol pikinini blong Livae oli kam stanap fored long Moses. Nao hem i givim oda long olgeta blong tekem ol naef blong faet blong olgeta, mo kilim i ded olgeta man blong wosipim aedol ya, we oli stap mekem bigfala lafet. Ol man Livae ya oli soemaot fasin jelas from klin wosip blong God, taem oli kilim i ded 3,000 brata blong olgeta we oli mekem sin ya. Nao Jeova i mekem panis ya i kam strong moa taem i mekem wan sik i kasem olgeta man we oli laef i stap yet. (Eksodas 32:28, 35) Biaen, God i talem bakegen oda ya se: ‘I tabu blong yufala i mekem wosip long ol narafala god, from we Jeova, we nem blong hem Jelas, hem i wan God we i gat fasin jelas.’—Eksodas 34:14.
Bal Blong Peo
7, 8. (a) ?Olsem wanem plante man Isrel oli foldaon long nogud fasin blong wosip long aedol, long saed blong Bal blong Peo? (b) ?Wanem samting i pulum Jeova blong mekem panis we hem i putum long olgeta i finis?
7 Fote yia biaen, taem nesen blong Isrel i rere blong go insaed long Promes Lan, plante naesfala woman blong Moab mo Midian, oli pulum ol man Isrel blong kam mo blong haremgud long kaen fasin blong olgeta. Ol man ya oli mas tanem baksaed blong olgeta long fasin ya blong frengud wetem olgeta ya we oli stap mekem wosip long ol gyaman god. (Eksodas 34:12, 15) Be, oli ron olsem ‘ol buluk we oli ron i kam blong man i kilim olgeta i ded.’ Oli slip wetem ol woman ya mo oli joen wetem olgeta blong mekem wosip long Bal blong Peo.—Proveb 7:21, 22; Namba 25:1-3.
8 Jeova i sanem wan panis i kam, blong kilim i ded olgeta we oli joen long wosip blong seks ya we i blong sem nomo. Mo tu, God i givim oda long ol man Isrel we oli no joen long rabis fasin ya, blong oli kilim i ded ol brata blong olgeta we oli bin mekem nogud. Wan long olgeta jif blong Isrel, we nem blong hem Simri, i wantem soem fasin agens blong hem long klia ples, ale hem i karem wan woman blong Midian i kam long haos tapolen blong hem blong slip wetem hem. Taem pris ya Fineas we i fraetgud long God, i luk samting ya, wantaem nomo, hem i kilim i ded tufala ya we oli stap mekem rabis fasin. Samting ya i stopem panis ya, mo God i talemaot se: “Fineas . . . i mekem kros blong mi agensem ol man Isrel i gowe. Hem i soemaot semfala fasin jelas mo kros we i pusum mi. From samting ya, mi no kilim i ded olgeta man Isrel from fasin jelas blong mi.” (Namba 25:11, The New English Bible) Nating se nesen ya i no lus olgeta, be kolosap 23,000 man Isrel oli ded. (1 Korin 10:8) Oli lusum jans we oli stap tingting long hem longtaem finis, blong go insaed long Promes Lan.
Wan Lesen We i Givim Woning Long Yumi
9. ?Wanem samting i kasem ol man Isrel mo Juda from we oli no gat fasin jelas from klin wosip blong Jeova?
9 Sore tumas, i no longtaem ol man Isrel oli fogetem ol lesen ya. Oli no soemaot se oli jelas from klin wosip blong Jeova. ‘Oli stap mekem wosip long ol aedol. Oli stap mekem God i jelas.’ (Ol Sam 78:58) From samting ya, Jeova i letem ol ami blong Asiria oli kam long 740 B.K.T.,a ale oli tekem ten laen blong Isrel oli go kalabus. Tufala narafala laen blong Juda we oli stap, oli kasem semkaen panis taem ol ami oli spolem stampa taon blong olgeta, Jerusalem, long yia 607 B.K.T. Plante man oli ded, mo olgeta we oli no ded, oli go kalabus long Babilon. !Hemia wan eksampel we i givim bigfala woning long olgeta Kristin tede!—1 Korin 10:6, 11.
10. ?Wanem samting bambae i hapen long olgeta man we oli no wantem tanem tingting blong olgeta from fasin blong wosip long aedol?
10 Wan long evri tri man long wol ya—samwe 1,900 milyan man—oli talem se oli Kristin. (1994 Britannica Book of the Year) Plante long olgeta ya, oli joen long ol jyos we oli yusum ol pija, aedol, mo ol kros long wosip blong olgeta. Bifo, Jeova i no letem ol man blong hem oli laef, taem oli mekem hem i jelas tru long fasin ya blong wosip long ol aedol. Sem mak nao, bambae hem i no save letem ol man ya we oli talem se oli Kristin, oli laef, from we oli yusum ol samting olsem aedol long wosip blong olgeta. Jisas Kraes i talem se: “God, hem i speret, mo olgeta we oli mekem wosip long hem oli mas mekem long trutok we i stap kamaot long tingting blong olgeta.” (Jon 4:24) Baebol i givim woning long ol Kristin tu, se oli mas lukaotgud blong oli no foldaon long wosip blong ol aedol. (1 Jon 5:21) Ol man blong wosipim ol aedol we oli no wantem tanem tingting blong olgeta, hemia sam long ol man ya we oli no save go insaed long Kingdom blong God.—Galesia 5:20, 21.
11. ?Olsem wanem maet wan Kristin i save folem fasin blong wosip long aedol nating se hem i no bodaon long wan aedol, mo wanem samting bambae i halpem yumi blong stap longwe long fasin ya we i olsem wosip long ol aedol? (Efesas 5:5)
11 Nating se wan trufala Kristin i neva save bodaon long wan aedol, hem i mas stap longwe long enikaen samting we God i luk olsem wan aedol, we i doti, mo we i olsem wan sin. Wan eksampel, Baebol i givim woning se: “Yufala i mas kilimaot ol fasin ya blong yufala, we oli blong laef ya long wol nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya, we man i stap wantem evri samting, hemia i olsem nomo we hem i stap mekem wosip long ol narafala god. From ol fasin ya, God bambae i jajem ol man we oli no save obei long hem, i givim panis long olgeta.” (Kolosi 3:5, 6) Blong obei long ol tok ya, yumi no mas joen nating long ol rabis fasin long saed blong seks. Blong mekem olsem, yumi mas stap longwe long olkaen pleplei mo sinema we oli save pulum yumi blong wantem mekem ol doti fasin long saed blong seks. Ol trufala Kristin oli no folem ol fasin olsem. Oli jelas from klin wosip blong God.
Sam Narafala Eksampel Blong Fasin Jelas Blong God
12, 13. ?Olsem wanem Jisas i givim wan nambawan eksampel long fasin blong stap jelas from klin wosip blong God?
12 Man we i soemaot nambawan eksampel blong fasin jelas from klin wosip blong God, hemia Jisas Kraes. Long faswan yia blong minista wok blong hem, hem i luk sam griri man we oli stap mekem bisnes long yad blong haos blong God. Ol man Jyu we oli kam long ol narafala ples, maet oli nidim blong jenisim mane blong olgeta blong mekem se i stret blong pem takis long haos wosip. Mo tu, oli nidim blong pem sam anamol mo pijin, blong givim olsem sakrifaes folem Loa blong God. Olkaen bisnes olsem, oli mas mekem afsaed long yad blong haos prea. Samting we i moa nogud se, ol bisnesman ya oli putum praes we i hae tumas long ol samting we oli salem, blong oli save wingud from ol samting we ol brata blong olgeta oli nidim blong pem blong yusum long wosip. Jisas i kam fulap long fasin jelas from klin wosip blong God, nao i karem wan wip, i ronemaot ol sipsip mo buluk. Mo tu, hem i kafsaedem ol tebel blong ol man blong jenisim mane, nao i talem se: “Yufala i no mekem haos blong Papa blong mi i kam olsem ples blong maket nomo.” (Jon 2:14-16) Olsem nao, Jisas i mekem ol tok blong Ol Sam 69:9 i kamtru se: “Mi mi wantem tumas we evri samting long haos blong yu oli stret gud. Oltaem tingting ya i stap wok insaed long mi olsem faea we i stap laet [“fasin jelas,” Byington].”
13 Tri yia biaen, bakegen Jisas i luk sam griri bisnesman we oli stap mekem bisnes long haos blong Jeova. ?Jisas i ronemaot olgeta namba tu taem? Fasin ya we hem i jelas from klin wosip blong God i strong long taem ya, olsem long taem we hem i jes statem minista wok blong hem. Hem i ronemaot olgeta man we oli stap salem mo pem ol samting. Mo hem i talem tok we i strong moa blong soem from wanem hem i mekem olsem, i se: “Oli raetem long Baebol we God i talem se ‘Haos blong mi, bambae ol man oli talem hem se Haos blong prea blong olgeta man.’ Be yufala i tanem hem finis i kam ples blong haed blong ol man blong stil.” (Mak 11:17) !Hemia wan nambawan eksampel long fasin blong holemtaet oltaem fasin jelas we God i agri long hem!
14. ?Olsem wanem fasin jelas we Jisas i gat from klin wosip i mas gat paoa long yumi?
14 Fasin blong Masta Jisas Kraes we naoia i kasem paoa long heven finis, i no jenis. (Hibrus 13:8) Long taem blong yumi, hem i stap jelas yet from klin wosip blong Papa blong hem, olsem taem we hem i bin stap long wol. Yumi luksave samting ya long ol mesej we Jisas i sanem long ol seven kongregesen long buk blong Revelesen. Bighaf blong ol mesej ya oli stretgud long taem blong yumi naoia, long ‘dei blong Masta.’ (Revelesen 1:10; 2:1 kasem 3:22) Long wan vison, aposol Jon i luk Jisas Kraes we i kasem paoa long heven finis, mo “ae blong hem i olsem faea we i laet.” (Revelesen 1:14) Samting ya i soemaot se i no gat wan samting we i save haed, taem Kraes i stap skelem olgeta kongregesen blong mekem sua se oli stap klin mo stretgud blong mekem wok blong Jeova. Ol Kristin tede oli mas tingbaot woning we Jisas i talem agensem fasin blong traem wok blong tu masta wantaem—God mo ol sas samting. (Matyu 6:24) Jisas i talem long ol memba blong kongregesen blong Laodisia, we oli stap ronem ol sas samting, i se: ‘From we yufala i hafhaf nomo, olsem we yufala i no hot gud, yufala i no kol gud, bambae mi finis long yufala, olsem we mi traot; nao yufala i kamaot long maot blong mi. Yufala i mas wok strong mo tanem tingting blong yufala from ol sin blong yufala.’ (Revelesen 3:14-19) Tru long ol tok mo gudfala eksampel, ol elda blong kongregesen oli mas halpem ol narafala man blong bilif, blong oli no foldaon long trap blong wantem tumas ol sas samting. Mo tu, ol elda oli mas lukaotgud blong no letem ol rabis fasin blong wol ya we ol man blong hem oli tingbaot seks oltaem, oli kam insaed long kongregesen. Mo tu, ol man blong God oli no save letem fasin blong Jesebel i kam insaed long kongregesen.—Hibrus 12:14, 15; Revelesen 2:20.
15. ?Olsem wanem aposol Pol i folem fasin blong Jisas long saed blong fasin jelas from wosip blong Jeova?
15 Aposol Pol i folemgud eksampel blong Kraes. Blong lukaotgud long ol Kristin we oli jes baptaes, mo blong mekem sua se ol fasin we oli no stret long saed blong speret oli no kasem olgeta, hem i talem se: ‘Mi mi jelas long yufala wetem fasin jelas we i kamaot long God.’ (2 Korin 11:2) Bifo we Pol i raetem tok ya, fasin jelas we hem i gat from klin wosip i bin pusum hem blong talem long semfala kongregesen ya, blong sakemaot wan man we hem i mekem nogud long saed blong seks mo we i no wantem tanem tingting blong hem, from we fasin blong hem i save pulum ol narafala. Advaes ya we God i pusum Pol blong talem long taem ya, i stap givhan bigwan long plante elda tede, we oli stap traehad blong lukaotgud long ol 75,500 kongregesen blong ol Wetnes blong Jeova raon long wol, blong oli stap klin.—1 Korin 5:1, 9-13.
Fasin Jelas Blong God i Mekem i Gud Long Ol Man Blong Hem
16, 17. (a) Taem God i panisim Juda bifo, ?ol nesen raonabaot oli mekem wanem? (b) Afta 70 yia we Juda i stap kalabus, ?olsem wanem Jeova i soemaot se hem i jelas from Jerusalem?
16 Taem God i letem ol man Juda oli go kalabus long Babilon blong panisim olgeta, ol man oli jikim olgeta. (Ol Sam 137:3) Fasin blong ol man Idom blong no laekem nating ol man blong God, we i kamaot from fasin jelas, i pusum olgeta blong halpem ol man Babilon blong mekem trabol long ol man blong God. Mo Jeova i luk samting ya. (Esikel 35:11; 36:15) Olgeta we oli no ded, oli tanem tingting blong olgeta from ol sin blong olgeta taem oli stap kalabus, mo afta we 70 yia i pas, Jeova i karem olgeta i gobak long ples blong olgeta.
17 Fastaem, laef blong ol man blong Juda i had tumas. Taon blong Jerusalem mo haos prea blong hem, ol man oli spolem finis. Ol nesen raonabaot, oli agensem olgeta we oli traehad blong bildim haos prea bakegen. (Esra 4:4, 23, 24) ?Wanem tingting blong Jeova long saed blong fasin ya blong olgeta? Baebol i talem se: “Hemia nao ol tok blong Jeova blong ol ami: ‘Mi mi jelas long Jerusalem mo long Saeon wetem strong fasin jelas. Mi mi kros long ol nesen ya we laef blong olgeta i isi, wetem bigfala fasin kros. From we mi, mi bin kros smol nomo, be olgeta ya, oli givhan blong mekem bigfala trabol i kamaot.’ From samting ya, hemia nao samting we Jeova i talem, ‘Bambae mi mi gobak bakegen long Jerusalem mo soem fasin sore. Bambae oli bildim haos blong mi long hem,’ hemia ol tok blong Jeova blong ol ami.” (Sekaraea 1:14-16) Folem promes ya, oli bildim bakegen haos prea mo taon blong Jerusalem.
18. ?Wanem i bin hapen long ol trufala Kristin long Faswan Bigfala Faet Blong Wol?
18 Ol trufala Kristin kongregesen oli fesem semkaen trabol long ol yia biaen long 1900. Long taem blong Faswan Bigfala Faet Blong Wol, Jeova i stretem ol man blong hem, from we, long sam fasin, oli bin joen long faet ya. (Jon 17:16) God i letem ol lida blong politik oli agensem olgeta ya, mo ol lida blong Krisendom oli haremgud long trabol ya we i kasem olgeta. Yes, ol lida blong skul oli lidim ol man blong politik blong putum tabu long wok blong ol Baebol Studen, hemia nem we ol Wetnes blong Jeova oli karem long taem ya.—Revelesen 11:7, 10.
19. ?Olsem wanem Jeova i soem fasin jelas from wosip blong hem stat long 1919?
19 Be, Jeova i soemaot se hem i jelas from wosip blong hem. Long 1919, hem i stanemap bakegen ol man blong hem we oli tanem tingting blong olgeta from ol sin blong olgeta, mo hem i glad long olgeta bakegen. (Revelesen 11:11, 12) From samting ya, namba blong ol man blong presem Jeova i kam antap bigwan, stat long 4,000 long 1918 go kasem bitim 5 milyan tede. (Aesea 60:22) I no longtaem, bambae fasin jelas blong Jeova from klin wosip blong hem, i kamaot long sam narafala rod we oli klia moa.
Ol Wok Blong Soem Fasin Jelas Blong God Long Fyuja
20. ?I no longtaem bambae God i mekem wanem blong soemaot fasin jelas blong hem from klin wosip?
20 Long plante handred yia finis, ol jyos blong Krisendomb oli folem sem rod we ol man Jyu we oli lego trufala wosip oli bin folem, mo oli mekem jelas blong Jeova i kam antap. (Esikel 8:3, 17, 18) I no longtaem, bambae Jeova God i mekem wan wok, bambae hem i putum wan strong tingting long hat blong sam memba blong Yunaeted Nesen. Samting ya bambae i pulum ol politik nesen ya blong spolemgud Krisendom mo ol narafala gyaman skul. (Revelesen 17:16, 17) Ol man blong mekem trufala wosip, bambae oli laef tru long bigfala jajmen ya we God bambae i mekem i kamaot. Bambae oli agri long ol tok we olgeta long heven oli talem se: “!Yumi presem God! . . . Woman ya blong rod [olgeta gyaman skul] we i nogud we i nogud, we i stap mekem wol i kam nogud long ol rabis fasin blong hem [ol gyaman tijing mo fasin blong sapotem politik we i fulap long ol kruked fasin], God i jajem hem finis, i givim panis long hem finis. God i givimbak long hem finis, from ol man blong hem, from we woman ya i kilim olgeta oli ded.”—Revelesen 19:1, 2.
21. (a) ?Setan mo ol man blong hem bambae oli mekem wanem afta we olgeta gyaman skul oli lus evriwan? (b) ?Bambae God i mekem wanem long olgeta?
21 ?Wanem samting bambae i hapen afta we olgeta gyaman skul oli lus evriwan? Bambae Setan i pulum ol lida blong politik blong mekem wan plan blong agensem olgeta man blong Jeova long wol. ?Trufala God bambae i tingting olsem wanem long samting ya we Setan bambae i mekem blong traem finisim trufala wosip long ful wol? Esikel 38:19-23 i talem se: “From strong filing blong mi [fasin jelas], from kros blong mi we i hot olsem faea, bambae mi [Jeova] mi mas toktok. . . . Mo bambae mi mi jajem hem [Setan], bambae mi panisim hem wetem sik mo wetem blad. Bambae mi mekem wora i ron bigfala mo ol bigbigfala ston blong aes bambae oli folfoldaon, bambae mi mekem faea mo salfa i kamdaon long heven long ol ami blong hem mo long ol man we oli kampani blong hem. Mo tru, bambae mi mi mekem we nem blong mi i kam hae we i hae, i tabu. Mo bambae mi mekem we plante nesen we oli lukluk ol wok blong mi oli mas save se mi mi mekem ol wok ya. Mo bambae oli save se mi mi Jeova.”—Lukluk Sefanaea 1:18; 3:8.
22. ?Olsem wanem yumi save soemaot se yumi jelas from klin wosip blong Jeova?
22 !Yumi haremgud blong save se, wetem fasin jelas, Bigfala Rula blong heven mo wol i stap lukaotgud long ol man we oli wosip long hem long trufala fasin! From dip fasin tangkyu long kaengud fasin blong Jeova God, yumi mas jelas long saed blong klin wosip blong Hem. Wetem strong tingting, yumi mas gohed blong talemaot gud nyus, mo wetem fasin blong trastem Jeova fulwan, yumi wet long bigfala dei ya we bambae Hem i mekem nambawan nem blong hem i hae we i hae mo i tabu.—Matyu 24:14.
[Ol futnot]
a B.K.T. i minim Bifo Kristin Taem.
b Ol skul we oli gyaman se oli Kristin.
Ol Poen Blong Tingting Dip Long Olgeta
◻ ?Fasin blong jelas long Jeova i minim wanem?
◻ ?Yumi lanem wanem long ol samting we i hapen long Isrel bifo?
◻ ?Olsem wanem yumi save stap longwe long fasin blong mekem Jeova i jelas?
◻ ?Olsem wanem God mo Kraes oli bin soemaot fasin jelas from klin wosip?
[Bokis blong pija long pej 12]
Man We i Gat Lav i No Save Jelas
MAN blong stadi Baebol long ol yia 1800, Albert Barnes, i tokbaot fasin blong jelas long narafala we i gat moa jans, i se: “Hem i wan rabis fasin we i kamaot long ol man moa bitim ol narafala rabis fasin, mo i soemaot klia se ol fasin blong man oli stap kam nogud tumas.” Hem i gohed blong talem se: “Eni man we hem i naf blong faenemaot trufala stampa blong olgeta faet mo rao mo ol plan blong ol man blong wol—ol plan mo tingting blong ol man we oli talem se oli Kristin tu, ol plan mo tingting we oli spolem olgeta long saed blong skul mo we oli pulum olgeta blong gat tingting blong wol—bambae hem i sapraes blong faenemaot se plante blong ol samting ya oli stanap long nogud fasin jelas. Yumi harem nogud from we sam narafala man oli gat moa samting bitim yumi; yumi wantem ol samting blong narafala man, nating se yumi no gat raet long ol samting ya; ol tingting ya oli save lidim yumi blong folem plante defren rod we oli no stret blong spolem glad we ol narafala ya oli kasem from ol samting ya, no blong traem kasem ol samting ya blong yumi wan, no blong traem soemaot se olgeta ya oli no gat plante samting olsem oli stap talem. . . . long rod ya, speret blong nogud fasin jelas we i stap insaed long yumi bambae i haremgud.”—Rom 1:29; Jemes 4:5.
Nao Barnes i talem sam defren toktok we yumi intres long hem long saed blong man we i gat lav, we i “no save jelas.” (1 Korin 13:4, King James Version) Hem i raetem se: “Man we i gat lav i no jelas long ol narafala man from we oli haremgud; hem i glad tumas we oli stapgud; mo taem fasin glad blong olgeta i kam bigwan moa . . . , hemia we i gat lav . . . i no save traem spolem glad ya; hem i no save mekem olgeta oli sem from we oli glad; hem i no save tok agensem fasin glad we oli gat; hem i no save toktok smol no soemaot se hem i harem nogud from we hem i no gat spesel jans olsem olgeta ya. . . . Sipos yumi laekem tumas ol narafala—sipos yumi glad tumas we oli hapi, ale bambae yumi no save jelas long olgeta.”
[Tok blong pija long pej 10]
Fineas i jelas from klin wosip blong Jeova