Ol Samting We Yu Mas Save Long Saed Blong Fasin Jelas

?WANEM ya fasin jelas? Hem i wan strong filing, we i save mekem se wan man i wari, hem i harem nogud, no i kros. Yumi save jelas, taem i luk olsem se wan man i moa gud long wan wok bitim yumi. Mo tu, yumi save jelas taem wan fren i kasem ol gudfala toktok blong leftemap hem i bitim we yumi kasem. ?Be evri taem we yumi harem se yumi jelas, hem i wan nogud samting?

Man we i jelas, maet hem i no trastem ol man we hem i ting se oli save winim hem. King Sol blong Isrel bifo i gat fasin ya. Fastaem, hem i laekem tumas Deved, we i karem ol tul blong faet blong hem. Mo hem i putumap hem olsem wan lida blong ami. (1 Samuel 16:21; 18:5) Be wan dei, King Sol i harem ol woman oli leftemap Deved wetem ol tok ya: “Sol i bin kilimdaon ol taosen blong hem, mo Deved i kilimdaon plante plante taosen.” (1 Samuel 18:7) Sol i no mas letem samting ya i spolem gudfala fasin fren blong hem wetem Deved. Be, hem i kam kros. “Stat long dei ya, oltaem Sol i luk Deved olsem wan man we hem i no save trastem.”​—1 Samuel 18:9.

Maet man no woman we i jelas i no wantem se wan nogud samting i hapen long narafala. Maet hem i harem nogud nomo from we narafala i karem moa frut long laef blong hem i bitim hem, mo maet hem i wantem gat sem fasin no sem kaen laef olsem narafala ya. Be, i gat wan kaen fasin jelas we i nogud olgeta. Wan man we i gat fasin jelas ya, maet hem i gat wan fasin we i haed se, hem i no wantem mekem i gud long man we i wekemap fasin jelas long hem. Mo maet hem i wantem we wan nogud samting bambae i kasem man ya. Samtaem wan man we i gat nogud jelas ya i no save haedem ol filing blong hem. Ol strong filing ya oli save pusum hem blong mekem wan nogud samting long narafala long klia ples nomo, olsem King Sol we i traem blong kilim Deved i ded. Bitim wan taem, Sol i sakem wan spia “blong traem pinim Deved long wol.”​—1 Samuel 18:11; 19:10.

Be, maet yu ansa se, ‘Mi mi no wan jelas man.’ Ating i tru se, fasin jelas i no stap bos long laef blong yu. Be i gat sam taem we fasin jelas i save tajem yumi evriwan​—ol prapa filing blong jelas blong yumi wanwan mo blong ol narafala. Kwiktaem nomo, yumi save luksave fasin jelas long ol narafala, be maet yumi tekem taem blong luk fasin ya long yumi wan.

‘Jelas Long Narafala We i Gat Moa Jans Bitim Yumi’

Ol store long Tok blong God, Baebol, long saed blong ol sin we ol man oli bin mekem, plante taem oli tokbaot sin ya we man i jelas long narafala we i gat moa jans bitim hem. ?Yu yu rimemba store blong Ken mo Ebel? Tufala pikinini ya blong Adam mo Iv, tufala i givim sakrifaes i go long God. Ebel i mekem samting ya from we hem i wan man blong bilif. (Hibrus 11:4) Hem i bilif se God i naf blong mekem stampa tingting blong hem long saed long wol ya i kamtru. (Jenesis 1:28; 3:15; Hibrus 11:1) Mo tu, Ebel i bilif se bambae God i givim pei long ol man we oli gat bilif, hemia laef long paradaes long wol ya long fyuja. (Hibrus 11:6) Taswe, God i soem se hem i glad long sakrifaes blong Ebel. Sipos Ken i rili laekem brata blong hem, Ebel, bambae hem i glad we God i blesem hem. Be, Ken “i kros tumas.”​—Jenesis 4:5.

God i talem long Ken blong mekem ol gudfala samting, mo long rod ya, hem tu i save kasem blesing. Mo God i givim woning long hem se: “Sipos fasin blong yu i stret, bambae mi mi glad long yu, be fasin blong yu i no stret. Mo from we fasin blong yu i no stret, fasin nogud ya blong yu i olsem wan wael anamol we i stap kolosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.” (Jenesis 4:7) Sore tumas, Ken i no winim fasin kros blong hem we i kamaot long jelas. Fasin ya i lidim hem blong kilim i ded brata blong hem we i stap mekem stret fasin. (1 Jon 3:12) Stat long taem ya kam kasem naoia, ol faet mo ol wo oli bin kilim i ded plante handred milyan man. The World Book Encyclopedia i eksplenem se: “Maet sam stampa risen blong ol faet, hemia se ol man oli wantem moa graon, oli wantem moa mane, oli wantem moa paoa, no oli wantem stap sef.”

Ol trufala Kristin oli no joen long ol faet blong wol ya. (Jon 17:16) Be, sore tumas, samtaem wanwan Kristin oli joen long ol rao. Sipos ol memba blong kongregesena oli tekem saed long wan rao, hem i save kam olsem wan faet wetem toktok, we i spolem plante man. Man we i raetem buk blong Jemes long Baebol, i askem long ol Kristin brata sista blong hem se: “?Wanem stampa blong ol faet mo rao blong yufala?” (Jemes 4:1) Hem i ansarem kwestin ya taem hem i tokbaot fasin blong olgeta blong wantem plante tumas samting, mo hem i ademap se: “Yufala i wantem ol samting blong narafala man,” no “yufala i gat fasin jelas.” (Jemes 4:​2, NW, futnot) Yes, fasin blong wantem plante tumas samting i save lidim man blong wantem ol samting blong narafala man, mo blong jelas long olgeta we i luk olsem se laef blong olgeta i moa gud bitim laef blong hem. From samting ya, Jemes i givim woning blong agensem fasin blong ‘jelas long narafala we i gat moa jans bitim yumi.’​—Jemes 4:5.

Sipos yumi luklukgud long ol samting we oli mekem man i jelas, ?olsem wanem samting ya i save givhan long yumi? Bambae i save halpem yumi blong skelemgud fasin blong yumi, mo blong mekem fasin fren blong yumi wetem ol narafala i kam moa gud. Mo tu, bambae samting ya i halpem yumi blong kasem save moa long ol filing blong narafala, blong no gat fasin agens, mo blong fogivim narafala. Antap olgeta, i save soemaot se ol man oli nidim tumas, rod we Jeova i mekem from lav blong hem, blong sevem ol man mo blong mekem olgeta oli fri long sin we i stap pulum olgeta.​—Rom 7:​24, 25.

Taem Wol i No Moa Gat Fasin Jelas We i Wan Sin

Folem tingting blong man, i luk olsem se i no gat rod blong mekem wol ya i fri long fasin jelas we i wan sin. Wan man blong raetem ol buk, Rom Landau, i talem se: “Bigfala waes we ol man oli kasem long ol yia we oli pas, wetem olgeta tok blong ol man we oli gat bigfala save long ol waes blong wol . . . mo ol man we oli stadi long tingting blong man, oli no givhan long ol man we oli harem nogud from fasin jelas. . . . ?I gat wan dokta we i bin tekemaot fasin jelas long wan man?”

Be Tok blong God i givim hop blong kasem laef we i stretgud olgeta long wan nyufala wol, we i no moa gat fasin jelas we God i no laekem no nogud fasin jelas. Mo tu, bambae i no moa gat ol man we oli gat ol rabis fasin olsem, blong spolem pis blong nyufala wol ya.​—Galesia 5:​19-21; 2 Pita 3:13.

Be, i no olgeta fasin jelas we oli rong. Yes, Baebol i talem se Jeova ‘i wan God we i jelas.’ (Eksodas 34:14) ?Tok ya i minim wanem? ?Mo Baebol i talem wanem long saed blong fasin jelas we i stret? Mo tu, ?olsem wanem wan man i save winim fasin jelas we i no stret? Ridim ol haf we oli kam biaen.

[Futnot]