?From Wanem Yumi Mas Fraetgud Long Trufala God Naoia?

“Yu mas fraetgud long trufala God mo yu mas folem ol loa blong hem. From we hemia nao olgeta wok we man i mas mekem.”​—EKLESIASTIS 12:13.

1, 2. ?From wanem i stret blong gat gudfala fasin blong fraet long God?

GUDFALA fasin blong fraet long God, we i stanap long fasin ona, hem i gud long man. Yes, plante fasin fraet oli mekem trabol long filing blong yumi, oli spolem glad blong yumi. Be, fasin blong fraetgud long Jeova God, i mekem i gud long yumi.​—Ol Sam 112:1; Eklesiastis 8:12.

² Man we i Wokem yumi, hem i save samting ya. From lav we hem i gat long ol samting we hem i wokem, hem i talem long evriwan blong fraetgud long hem mo wosip long hem. Yumi ridim se: “Nao mi luk i gat wan narafala enjel i stap flae antap long skae, i stap talemaot gud nyus ya we i blong oltaem nomo, i no save finis. Enjel ya i stap talemaot gud nyus ya long olgeta man long wol, long olgeta blong evri kala mo laen mo lanwis mo kantri. Hem i stap singaot bigfala, i talem se ‘Yufala i mas [fraetgud] long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwora mo springwora, mo yufala i mas foldaon long fes blong hem blong presem hem.’”​—Revelesen 14:​6, 7.

3. ?Man we i Wokem olgeta samting i mekem wanem long faswan papa mo mama blong yumi?

³ Yumi no mas fogetem Man we i Wokem olgeta samting, Stampa blong laef, from we yumi mo wol ya i blong hem. (Ol Sam 24:1) Jeova i soemaot bigfala lav blong hem taem i givim laef long ol pikinini blong hem long wol ya, mo i wokem wan nambawan ples blong oli stap long hem​—wan naesfala paradaes. Be, man i mas mekem sam samting blong holem nambawan presen ya. I olsem we God i putum presen ya long han blong man blong i lukaot long hem. Faswan papa mo mama blong yumi, tufala i mas lukaotgud long ples blong tufala. Tufala i mas mekem i kam bigwan, gogo kasem we tufala i fulumap wol mo bos long olgeta samting we oli stap long hem. Tufala i gat blesing mo wok blong lukaot long ol anamol, ol pijin, mo ol fis​—olgeta laef samting we oli stap long wol ya wetem tufala ya mo ol pikinini blong tufala. Bambae man i mas talemaot long God olsem wanem hem i lukaot long bigfala wok ya we God i putum long han blong hem.

4. ?Ol man oli mekem wanem long ol samting we God i wokem?

⁴ !Wol ya i naes tumas taem God i jes mekem! !Be traem luk ol samting we man i stap mekem blong spolem naesfala ples blong hem! Man i no respektem nating se naesfala wol ya i blong God. From samting ya, hem i mekem i kam doti tumas. Fasin ya blong man blong mekem wol i doti i kam bigwan tumas, mekem se plante defren kaen anamol, pijin, mo fis, oli stap long denja we oli save lus olgeta. God blong yumi we i gat stret fasin mo lav, bambae i no letem samting ya i gohed blong olwe. I olsem we wol ya i stap singaot long God blong hem i givim panis long ol man ya we oli stap spolem wol, wan panis we plante man oli fraet tumas long hem. Be, ol man we oli gat respek mo oli trastem God, oli glad blong save samting we bambae i hapen. Bambae Jeova i sua blong givim panis, mo bambae wol i sua blong kamgud bakegen. I tru, hemia i gud nyus blong ol man long wol ya we hat blong olgeta i stret.

5, 6. ?Bambae Jeova i mekem wanem from ol trabol we ol man oli bin mekem long ol samting we Hem i wokem?

⁵ ?Olsem wanem God bambae i mekem jajmen blong hem i kamtru? Bambae hem i yusum Jisas Kraes, we naoia hem i King long Kingdom blong God long heven. Bambae Jeova i yusum Pikinini ya blong hem long heven blong finisim doti fasin, mo ol fasin rebel blong naoia. (2 Tesalonaeka 1:​6-9; Revelesen 19:11) Long rod ya, bambae God i mekem ol man we oli fraetgud long hem oli haremgud. Mo, long semtaem, bambae hem i sevem wol blong yumi mo mekem i stapgud.

⁶ ?Bambae samting ya i hapen olsem wanem? Baebol i tokbaot wan bigfala trabol we i stap kam, we bambae i finis long faet blong Amageden. (Revelesen 7:14; 16:16) Hemia nao jajmen we God bambae i mekem agens long ol doti fasin blong wol ya mo ol man we oli stap mekem wol i kam doti. ?Olsem wanem? ?Bambae i gat sam man we oli stap laef biaen long jajmen ya? !Yes! Hemia i no ol man we oli gat wan fasin fraet we i no stret long saed blong God, mo i mekem olgeta oli harem nogud. Be hemia olgeta we oli fraetgud long God, from we oli gat respek mo dip ona long hem. Olgeta nao bambae God i sevem olgeta.​—Proveb 2:​21, 22.

Fasin Blong Soem Paoa We i Mekem Man i Sek

7. ?From wanem God i stanap long saed blong ol man Isrel long taem blong Moses?

⁷ Samwe long 1,500 yia bifo long Kristin Taem, Jeova God i mekem wan bigfala samting blong sevem ol man we oli wosip long hem. Mo samting ya i pija blong bigfala samting we bambae hem i mekem long fyuja. Ol man Ijip wetem bigfala ami blong olgeta oli fosem ol man Isrel, we oli stap long Ijip, blong wok slef. Mo tu, oli traem blong kilimaot laen blong ol man Isrel. Rula blong ol man Ijip, Fero, i givim oda blong kilim i ded olgeta pikinini boe blong ol man Isrel we oli jes bon. God i winim Ijip taem hem i mekem ol man Isrel oli fri long strong politik paoa ya. Yes, oli fri, taem oli aot long wan nesen we i doti from fasin blong wosip long plante god.

8, 9. ?Moses mo ol man Isrel oli mekem wanem afta we God i stanap long saed blong olgeta?

⁸ Eksodas japta 15 i tokbaot filing blong ol man Isrel taem oli fri long Ijip. Taem yumi stadigud long store ya, hem i halpem yumi blong luk olsem wanem God i save mekem ol Kristin oli fri long ol doti fasin long saed blong speret mo bodi we oli stap long wol naoia. I gud yumi tingbaot sam vas blong Eksodas japta 15, blong lanem from wanem yumi mas jusum blong fraetgud long trufala God, Jeova. Yumi stat long vas 1 mo 2:

⁹ “Nao Moses wetem ol laen blong Isrel oli sing long wan sing blong presem Hae God. Sing ya i talem se ‘Bambae mi mi sing blong presem [Jeova], from we hem i wingud long faet ya, nao nem blong hem i go antap. Hem i sakem finis ol hos wetem ol man blong olgeta oli go long solwora. Hae God ya, hem i strong blong blokem mi, mo hem nao i sevem mi.’”

10. ?Wanem i hapen jes bifo we God i spolem ol ami blong Ijip?

¹⁰ Plante man raonabaot long wol oli savegud store ya we i soem olsem wanem Jeova i tekemaot ol man Isrel, i mekem oli fri long Ijip. Hem i mekem ol trabol i kam long strongfala nesen ya, gogo kasem we Fero i letem ol man Isrel oli gofri. Be afta, ol ami blong Fero oli ronem ol man ya we oli no stap karem ol tul blong faet, mo oli ting se bambae oli blokem olgeta long so blong Red Si. I luk olsem se bambae ol man Isrel oli lusum nyufala fasin fri blong olgeta kwiktaem. Be Jeova i gat wan narafala tingting. Hem i wokem wan merikel, i mekem solwora i seraot long tu haf, mo ol man blong hem oli wokbaot oli gokros long drae graon we oli sef nomo. Taem ol man Ijip oli folem olgeta, God i mekem wora blong Red Si i kambak, i kavremap olgeta mo i draonem Fero mo ol ami blong hem.​—Eksodas 14:​1-31.

11. ?Wanem risal i kamaot from samting we God i mekem agens long ol man Ijip?

¹¹ Taem Jeova i spolem ol ami blong Ijip, samting ya i mekem hem i hae moa long fored blong ol man we oli wosip long hem, mo i mekem se plante man oli save nem blong hem. (Josua 2:​9, 10; 4:​23, 24) Yes, nem blong hem i kam hae, antap long ol gyaman god blong Ijip, we oli no gat paoa, mo oli no naf blong sevem ol man we oli stap wosip long olgeta. Fasin blong ol man Ijip blong trastem ol god blong olgeta, ol man blong wol ya, mo ol ami, i mekem olgeta oli harem nogud tumas. (Ol Sam 146:3) !Yumi no sapraes se ol man Isrel oli glad tumas blong singsing presem God, blong soem se oli gat gudfala fasin blong fraet long God ya we i laef, we i save sevem ol man blong hem wetem bigfala paoa!

12, 13. ?Yumi lanem wanem long fasin ya we God i win long Red Si?

¹² I sem mak, yumi mas luksave se long taem blong yumi, i no gat wan gyaman god, no wan strong nesen wetem ol nyuklia tul blong faet blong hem, we i gat paoa olsem Jeova. Hem i naf blong sevem ol man blong hem, mo bambae hem i sua blong sevem olgeta. “Taem hem i gat tingting blong mekem wan samting long ami blong heven, no long ol man long wol, hem i mekem stret olsem we hem i wantem. Mo i no gat wan man we i save blokem han blong hem, no i save talem long hem se: ‘?Yu yu stap mekem wanem ya?’” (Daniel 4:35) Taem yumi kasem mining blong ol tok ya fulwan, samting ya bambae i pusum yumi tu blong sing blong presem hem wetem glad.

¹³ Singsing ya blong presem Jeova from we hem i win long Red Si, i gohed se: ‘Jeova i wan strong man blong faet. Jeova i nem blong hem.’ Taswe, Man ya blong Faet we i no gat wan man i save winim hem, i no wan samting we i no gat wan nem mo we i stap long tingting blong man nomo. !Hem i gat wan nem! Hem i ‘Man we i stap mekem ol samting oli kamtru,’ Bigfala Man we i Wokem olgeta samting, Hemia we ‘nem blong hem Jeova, . . . we i Hae King blong olgeta ples long wol.’ (Eksodas 3:14; 15:​3-5; Ol Sam 83:18) Maet yu agri se i moa waes sipos ol man Ijip bifo oli bin soem fasin fraet we i stret mo respek long God ya we i gat Olgeta Paoa, bitim we oli traem faet agensem hem.

14. ?Olsem wanem samting we i hapen long Red Si i soem se i impoten blong fraetgud long God?

¹⁴ Man we i Mekem plan blong wol ya, Hemia we i Wokem solwora, hem i bos fulwan long olgeta bigfala wora blong wol ya. (Eksodas 15:8) Hem i bos long win tu, mo hem i bin yusum paoa ya blong mekem samting we man i no naf blong mekem. Hem i seraotem solwora, mo i pusum tufala haf blong hem i gobak, blong mekem rod blong ol man blong hem oli save gokros. Traem tingbaot samting ya: plante milyan tan blong solwora oli stanap stret long tufala saed olsem stonwol, ale i mekem wan sef rod blong ol man Isrel oli pas long hem. Yes, olgeta we oli soem gudfala fasin fraet long God, God i lukaotgud long olgeta. Biaen, wantaem nomo, Jeova i lego ol wora ya i kam kavremap olgeta ples blong hem bakegen, i draonem ol ami blong Fero wetem ol tul blong faet blong olgeta. !Hemia wan nambawan fasin blong God blong soem se paoa blong hem i save winim ol god we oli no naf blong mekem wan samting, mo i save winim paoa blong ol ami tu! Yes, Jeova nao i Man ya we yumi mas fraet long hem, ?i tru no?​—Eksodas 14:​21, 22, 28; 15:8.

Soemaot Fasin Blong Fraetgud Long God

15. ?Taem yumi tingtinggud long ol bigfala wok blong God blong sevem man, samting ya i mas pusum yumi blong mekem wanem?

¹⁵ Sipos yumi bin laef tru long taem ya wetem Moses, yumi sua se filing blong yumi bambae i pusum yumi blong singsing olsem: ‘Jeova, ol narafala god long wol ya, be i no gat wan long olgeta we i olsem yu. Yu yu gud tumas, yu yu tabu tumas. Yu yu stap mekem ol merikel mo ol bigbigfala wok. Yu nao we ol man oli mas fraet long yu mo singsing blong presem yu. I no gat narafala god nating we i olsem yu.’ (Eksodas 15:11) Stat long taem ya i kam kasem naoia, long ol handred yia we oli pas, plante man oli bin talem sem tingting ya bakegen. Long laswan buk blong Baebol, aposol Jon i tokbaot wan grup blong ol trufala tabu man blong God, se: “Oli stap sing long sing ya we Moses, man blong God bifo i sing long hem mo we Smol Sipsip blong God i sing long hem.” ?Wanem bigfala singsing ya? ‘Jeova God, yu yu gat Olgeta Paoa, ol wok blong yu oli bigfala tumas, oli hae tumas. Yu yu King blong olgeta kantri, mo ol fasin blong yu oli stretgud, oli tru. ?Hu man i no save fraet long yu, Jeova, mo hu man i no save leftemap nem blong yu? Yu nomo, fasin blong yu i tru oltaem.’​—Revelesen 15:​2-4.

16, 17. ?Wanem nambawan samting we yumi luk se i stap kamaot tede?

¹⁶ Taswe tede tu, i gat sam man we oli kam fri, nao oli wosip long God wetem fasin tangkyu from ol samting we hem i wokem, mo tu from ol loa blong hem. Plante man blong olgeta nesen oli kam fri finis long saed blong speret, nao oli no moa joen long ol doti fasin blong wol ya, from we oli luksave ol stret rul blong God mo oli folem olgeta. Evri yia, plante handred taosen man oli ronwe long ol nogud fasin blong wol ya, oli kam insaed long ogenaesesen blong ol man blong wosip long Jeova, we i klin mo i stret. I no longtaem, jajmen blong God we i olsem faea, bambae i kam agensem ol gyaman skul, mo bambae i spolem ol narafala haf blong rabis wol ya tu. Afta long taem ya, bambae ol man ya oli laef foreva long wan nyufala wol we i gat stret fasin nomo long hem.

¹⁷ Folem Revelesen 14:​6, 7, naoia, ol man oli stap harem wan woning mesej blong jajmen, we ol enjel oli stap lidim ol Wetnes blong Jeova blong talemaot. Las yia, long bitim 230 kantri, kolosap faef milyan Wetnes oli talemaot gud nyus blong Kingdom blong God mo dei blong hem blong jajem ol man. Blong tijim ol narafala olsem wanem blong kasem laef, oltaem ol Wetnes oli visitim ol man long haos blong olgeta, mo mekem ol fri Baebol stadi wetem olgeta. Taswe, evri yia, plante handred taosen man oli kasem naf save blong mekem se oli save fraetgud long God, givim laef blong olgeta long Hem, mo tekem baptaes. !Yumi glad tumas se ol man ya oli bin lanem blong fraetgud long trufala God!​—Luk 1:​49-51; Ol Wok 9:31; skelem wetem Hibrus 11:7.

18. ?Wanem i soem se ol enjel oli stap lidim yumi long wok blong prij?

¹⁸ ?I tru se ol enjel oli joen long wok ya blong prij? !Yes, i klia se, plante taem ol enjel oli bin lidim ol Wetnes blong Jeova oli go long wan haos! !Insaed long haos ya, i gat wan man we i harem nogud, maet i stap prea, from i wantem tumas blong kasem help long saed blong speret! Eksampel, tu Wetnes blong Jeova wetem wan smol pikinini, oli stap talemaot gud nyus long wan aelan blong Karibin. Kolosap long medel dei, tufala Wetnes ya, oli mekem disisen blong stop. Be pikinini ya i wantem tumas blong oli go long nekis haos. Taem hem i luk se tufala Wetnes we tufala i bigman oli no wantem folem tingting blong hem, hem i go hem wan mo i kilkilim doa. Wan yangfala woman i openem doa. Taem tufala Wetnes we oli bigman, oli luk samting ya, oli go mo toktok long woman ya. Hem i singaot olgeta oli go insaed long haos, i eksplenem se stret long taem ya we hem i harem se wan man i stap kilkilim doa, hem i stap prea long God blong i sanem sam Wetnes i kam blong tijim hem long Baebol. Oli mekem plan blong mekem Baebol stadi wetem hem.

19. ?Yumi save tokbaot wanem samting olsem blesing we i kamaot from fasin blong fraetgud long God?

¹⁹ Taem yumi stap gohed blong talemaot jajmen mesej blong God, yumi stap tijim ol stret rul blong hem tu. Taem ol man oli mekem ol rul ya oli wok long laef blong olgeta, oli kasem blesing long saed blong bodi mo long saed blong speret. Eksampel, Baebol i tok agensem klia ol nogud fasin long saed blong seks. (Rom 1:​26, 27, 32) Tede, plante man long wol, oli tanem baksaed long ol rul blong God. ?Wanem frut i stap kamaot? Ol mared oli stap brok. Stronghed fasin i stap go antap. Ol sik we oli kamaot from rabis fasin long saed blong seks, oli kasem fulap man long ol yia 1900, mo oli stap go long plante nyufala ples. Yes, ol nogud fasin long saed blong seks nao i mekem sik ya AIDS, we ol man oli fraet tumas long hem, i kasem plante man. Be fasin blong fraetgud long God wetem respek, i stap lukaotgud long ol trufala man blong wosip.​—2 Korin 7:1; Filipae 2:12; lukluk tu long Ol Wok 15:​28, 29.

Ol Frut Blong Naoia From Fasin We Man i Fraetgud Long God

20. ?Wanem i soem se ol narafala man oli save long gudnem blong ol Wetnes blong Jeova?

²⁰ Ol man we oli fraetgud long God mo oli folem ol rul blong hem, oli stap kasem plante blesing. Tingbaot wan samting we i soem se, naoia plante moa man oli luksave trutok ya se, ol Wetnes blong Jeova oli wan kampani blong ol Kristin brata mo sista we oli folem ol gudfala fasin mo oli gat pis. Sam Wetnes we oli go long wan intenasnal asembli long Saot Amerika, oli stap long wan hotel. Long wan naet, ol man we oli no Wetnes oli yusum sem hotel ya blong mekem wan miting, we presiden blong kantri ya i toktok long hem. Ale, ol man we oli mekem gad long presiden oli stap hareap blong putum presiden long eleveta.a Nao wan woman we hem i wan Wetnes, i no luksave man ya we i stap long eleveta, ale hem tu i go insaed long eleveta. !Ol gad oli sek! Taem Wetnes ya i kasem save long mastik we hem i bin mekem, hem i talem sore. Hem i soemaot baj blong hem blong asembli blong soem se hem i wan Wetnes, mo i talem se hem i no save mekem trabol long presiden. Ale, wan gad i smael mo i talem se: “Sipos evri man i olsem ol Wetnes blong Jeova, bambae i no nidim ol gad olsem mifala.”​—Aesea 2:​2-4.

21. ?Wanem ol rod we ol man tede oli save folem?

²¹ Ol man olsem nao we Jeova i stap hivimap olgeta, mo i stap rerem olgeta blong ‘pastru long bigfala trabol’ we bambae i finisim ol nogud fasin blong wol ya. (Revelesen 7:​9, 10, 14) Man i no save laef tru long taem ya from laki nomo, no gat. Man we i wantem stap laef, hem i mas fraetgud long Jeova, luksave hem olsem stret Rula, mo givim laef i go long Hem. Be trutok i stap se, bighaf blong ol man bambae oli no wokem fasin fraet ya we i save sevem laef blong olgeta. (Ol Sam 2:​1-6) Plante pruf i soemaot se Rula we Jeova i jusumaot, Jisas Kraes, hem i stap rul olsem King stat long impoten yia 1914. Samting ya i minim se taem we ol wanwan man oli gat yet blong wokem mo soemaot fasin fraetgud long Jeova, kolosap i finis. Nating se i olsem, Man we i Wokem yumi i stap givim jans long ol wanwan man, mo samfala we oli gat hae nem tu, blong oli obei long tok ya, se: “Ol king. Yufala i mas harem tok ya we mi talem, se yufala i mas lukaot. Ol lida blong wol. Yufala i mas lanem mining blong samting ya. Yufala i mas wok blong Hae God, we yufala i onagud long hem. I gud yufala i fraet long hem, nao yufala i bodaon long hem. Sipos no, kros blong hem bambae i kam kwiktaem, nao wantaem nomo, bambae yufala i ded. Olgeta man we oli stap go long hem blong hem i lukaotgud long olgeta, oli save haremgud.”​—Ol Sam 2:​7-12.

22. ?Wanem fyuja blong ol man we oli fraetgud long God naoia?

²² I gud sipos yumi stap wetem olgeta we bambae oli presem Man we i Wokem yumi olsem Man we i sevem yumi. !Be samting ya i minim se yumi mas fraetgud long trufala God naoia! (Skelem wetem Ol Sam 2:11; Hibrus 12:28; 1 Pita 1:17.) Yumi mas gohed blong lanem ol stret rul blong hem mo obei long olgeta. Sing blong Moses mo Smol Sipsip, we i stap long Revelesen 15:​3, 4, bambae i kasem bigfala mak blong hem, taem Jeova i finisim rabis fasin blong wol ya, mo i stat blong mekem ol man mo wol ya we i stret ples blong man i kam klin long ol trabol blong sin. Biaen, bambae yumi singsing wetem olgeta hat blong yumi, se: ‘Jeova God, yu yu gat Olgeta Paoa, ol wok blong yu oli bigfala tumas, oli hae tumas. Yu yu King blong olgeta kantri, mo ol fasin blong yu oli stretgud, oli tru. ?Hu man i no save fraet long yu, Jeova, mo hu man i no save leftemap nem blong yu?

[Futnot]

?Yu Yu Tingbaot?

◻ ?From wanem i stret nomo we yumi gat gudfala fasin fraet long Jeova?

◻ ?Samting we God i mekem long Red Si i soem wanem?

◻ ?Wanem ol blesing we oli kamaot from fasin blong gat respek, mo fraetgud long Jeova?

◻ ?Wanem fyuja blong ol man we oli fraetgud long God naoia?