!Stap Long “Taon Ya We i Olsem Ples Blong Haed” Mo Sevem Laef Blong Yu!

“Hem i mas stap long taon ya we i olsem ples blong haed, go kasem taem we hae pris i ded.”​—NAMBA 35:28.

1. ?Hu ya Man we i gat raet blong givimbak from blad we i ron, mo i no longtaem bambae hem i mekem wanem?

JISAS KRAES, Man ya we Jeova i givim raet long hem blong givimbak, hem i rere blong mekem wok blong hem. I no longtaem, Man ya we i gat raet blong givimbak, wetem ol enjel blong hem, bambae oli girap, oli agensem ol man we oli no tanem tingting blong olgeta, taem oli gat poen long fes blong God from blad blong narafala man. Yes, bambae Jisas i wok olsem Man ya we God i jusum blong kilim ol man nogud oli ded, long “bigfala trabol” we naoia i stap kam kwik. (Matyu 24:​21, 22; Aesea 26:21) Long taem ya, ol man we oli gat poen long fes blong God from oli mekem blad blong narafala i ron, oli no save ronwe long panis blong olgeta.

2. ?Wanem ples nomo we i trufala sefples, mo yumi mas kasem ansa long wanem kwestin?

² !Sipos wan man i wantem stap sef, hem i mas faenem rod naoia blong go long ples we i olsem taon blong haed! !Mo hem i mas resis kwiktaem long rod ya blong sevem laef blong hem! Wan man we oli letem i go insaed long taon ya, hem i mas stap long ples ya, from we hemia nomo i trufala sefples. Be maet yu talem se: ‘Bighaf blong yumi i no bin kilim man i ded samtaem. ?Taswe, yumi rili gat poen long fes blong God from blad blong narafala man we i ron? ?From wanem Jisas i olsem Man we i gat raet blong givimbak? ?Taon ya we i ples blong haed, hem i minim wanem tede? ?Wan man i save aot long taon ya samtaem mo gohed blong stap laef?’

?Yumi Rili Gat Poen Long Fes Blong God From Blad Blong Narafala Man?

3. ?Wanem haf blong Loa blong Moses we i halpem yumi blong luk se olgeta bilyan man long wol oli gat poen long fes blong God from blad we i ron?

³ Taem yumi lukluk i go moa long Loa blong Moses, bambae samting ya i halpem yumi blong luksave se olgeta bilyan man long wol oli gat poen long fes blong God from blad blong narafala. God i tingbaot olgeta man Isrel olsem we oli gat poen, taem wan long olgeta i kilim narafala i ded. Sipos oli faenem wan dedman be oli no save hu i kilim hem i ded, ol jaj oli mas makem hamas kilomita i stap bitwin long ples ya we oli faenem hem mo ol taon we oli stap raonabaot. Olsem nao, oli save faenemaot weswan taon i stap kolosap moa. Nao ol olfala blong taon ya we i luk olsem se i gat poen long fes blong God from blad blong man ya, oli mas brekem nek blong wan yangfala buluk we oli no yusum yet blong wok, long wan graon long medel blong tu hil, we oli no wokem garen long hem yet. Hemia blong mekem se taon ya i no gat poen long fes blong God from blad blong man ya we i ded. Oli mas mekem samting ya long fored blong sam pris long laen blong Livae, ‘from we Jeova i jusum olgeta blong stretem ol trabol olsem taem wan man i kilim narafala.’ Ol olfala blong taon ya oli mas wasem han blong olgeta antap long buluk ya, mo oli mas talem se: “Han blong mifala i no mekem blad ya i ron, mo ae blong mifala i no luk blad ya we i ron. Plis Jeova, yu no askembak blad blong man ya long ol man blong yu, Isrel, we yu sevem olgeta finis. Mo yu no mekem se ol man blong yu, Isrel, oli gat poen long fes blong yu from blad blong man ya we i no mekem rong.” (Dutronome 21:​1-9) Jeova God i no wantem se kantri blong Isrel i kam doti from blad. Hem i no wantem se olgeta man blong hem oli gat poen long fes blong hem from blad we i ron.

4. ?Wanem ripot we i soem se Bigfala Babilon i gat poen long fes blong God from blad we i ron?

⁴ Yes, fol we wan man i gat from i kilim narafala i ded, i save mekem se ful taon no velej i gat fol. Tingbaot bigfala poen we Bigfala Babilon, olgeta gyaman skul long wol, i gat long fes blong God, from ol blad we i mekem i ron. !Yes, oli drong long blad blong ol man blong Jeova! (Revelesen 17:​5, 6; 18:24) Ol skul blong Krisendom oli talem se oli folem Prins blong Pis, be ol bigfala faet, ol inkwisisina blong skul, mo ol krused we oli kilim plante man oli ded, oli mekem se oli gat poen long fes blong God from ol blad ya we oli mekem i ron. (Aesea 9:6; Jeremaea 2:​34) Yes, oli mas karem bighaf blong fol from ol milyan man we oli ded long tufala bigfala faet blong wol long laswan handred yia. From samting ya, olgeta man we oli joen wetem ol gyaman skul ya, mo olgeta man we oli sapotem mo joen long ol faet, oli gat poen long fes blong God tu.

5. ?Olsem wanem sam man oli olsem man we i no minim blong kilim narafala i ded long Isrel?

⁵ Sam man oli minim nomo blong kilim narafala i ded. Samfala, oli kilim man i ded from oli no lukaotgud. Sam narafala, oli joen long faet we i kilim plante man i ded, maet from we ol lida blong skul oli talem se God i wantem olsem. Sam narafala bakegen, oli ronem mo kilim i ded ol man blong God. Nating se yumi no mekem ol nogud fasin ya, be yumi gat fol tu from blad we ol man raonabaot long yumi oli mekem i ron. Hemia from we yumi no bin save samting we God i wantem, mo ol loa blong hem. Yumi i olsem man ya we i no minim, be i ‘kilim i ded narafala man, we tufala i no badfren bifo.’ (Dutronome 19:4) Ol man olsem oli mas askem God blong soem sore long olgeta. Mo oli mas resis, blong go haed long ples we i olsem taon blong haed tede. Sipos no, bambae oli mitim Man we i gat raet blong givimbak, mo bambae hem i kilim olgeta oli ded.

Ol Impoten Wok Blong Jisas

6. ?From wanem yumi save talem se Jisas i olsem stret famle blong olgeta man?

⁶ Long Isrel, man we i gat raet blong givimbak, i mas wan stret famle blong man ya we i ded. Blong givimbak from ol blad we i bin ron long wol, antap moa, from blad blong ol man blong God, Man we i gat raet blong givimbak tede, i mas olsem wan stret famle blong olgeta man. Jisas Kraes nao i stret blong mekem wok ya. Hem i bon olsem wan man we i stretgud olgeta. Taem Jisas i ded, hem i givim laef blong hem we i no gat sin, olsem wan ransom sakrifaes. Mo taem hem i laef bakegen mo i go long heven, hem i givim praes blong sakrifaes ya blong hem i go long God blong sevem ol pikinini blong Adam we oli gat sin mo oli stap ded. Taswe, Kraes i kam Man we i pemaot olgeta man, hem i olsem stret famle blong yumi​—Man we i gat raet blong givimbak from blad we i ron long wol ya. (Rom 5:12; 6:23; Hibrus 10:12) Jisas i olsem wan brata blong ol tabu man we oli folem hem. (Matyu 25:​40, 45; Hibrus 2:​11-17) Hem i stap rul olsem King long heven, taswe hem i kam “Papa blong Olwe” blong olgeta we oli kasem blesing from sakrifaes blong hem. Bambae oli laef foreva aninit long rul blong hem long wol. (Aesea 9:​6, 7) Olsem nao, i stret we Jeova i jusumaot Man ya we i olsem stret famle blong olgeta man, blong hem i kam Man we i gat raet blong givimbak from blad we i ron long wol.

7. ?Jisas i mekem wanem long olgeta man long wok blong hem olsem bigfala Hae Pris?

⁷ Mo tu, Jisas i wan Hae Pris we i no gat sin, hem i kasem traem finis, mo i gat sore. (Hibrus 4:15) Olsem Hae Pris, hem i mekem ol blesing oli kamaot long ol man, from sakrifaes we hem i givim blong tekemaot sin blong olgeta man. Oli jusumaot ol taon ya blong haed, “blong givhan long ol man Isrel, ol man blong narafala kantri mo ol strenja.” (Namba 35:15) Fastaem, bigfala Hae Pris i givim ol blesing we oli kamaot from sakrifaes blong hem, oli go long ol tabu brata blong hem, “ol man Isrel.” Mo naoia, hem i stap givim ol blesing ya long ‘ol man blong narafala kantri’ mo ‘ol strenja’ we oli stap long ples ya we i olsem taon blong haed. Ol “narafala sipsip” ya blong Masta Jisas Kraes, oli gat hop blong laef olwe long wol.​—Jon 10:16; Ol Sam 37:​29, 34.

Ples Blong Haed Tede

8. ?Tede, wanem mining blong taon ya we i olsem sefples blong haed?

⁸ ?Wanem mining blong taon ya we i olsem ples blong haed tede? Hem i no minim wan prapa ples olsem Hebron, wan long ol sikis taon ya blong ol Livaet we oli olsem ples blong haed bifo, mo tu we i ples blong hae pris blong Isrel. Tede, taon ya i minim rod we God i yusum blong sevem yumi, blong yumi no ded from we yumi bin brekem loa blong hem long saed blong blad we i tabu. (Jenesis 9:6) Evri man we i brekem loa ya, nating se hem i minim no i no minim, hem i mas askem God blong fogivim hem, mo i mas bilif fulwan long blad blong Hae Pris, Jisas Kraes. Olsem nao, hem i save kam fri long sin blong hem tru long bilif long blad blong Hae Pris, Jisas Kraes. Ol tabu Kristin we oli gat hop blong go long heven, mo “bigfala hif blong man” we oli gat hop blong laef long wol ya, oli kasem blesing from sakrifaes blong Jisas we i tekemaot sin. Nao i olsem we oli stap long taon ya we i ples blong haed.​—Revelesen 7:​9, 14; 1 Jon 1:7; 2:​1, 2.

9. ?Olsem wanem Sol blong Tasas i brekem loa blong God long saed blong blad, be olsem wanem hem i soem se hem i jenisim fasin blong hem?

⁹ Bifo we aposol Pol i kam wan Kristin, hem i brekem loa long saed blong blad. Long taem ya, nem blong hem Sol blong Tasas. Hem i stap ronem ol man blong Jisas mo i agri fulwan long fasin blong kilim ol Kristin oli ded. Biaen, Pol i talem se: “Be nating. Hem i gat sore long mi, from we mi mi no bilif long hem, nao mi no save ol samting ya we mi stap mekem.” (1 Timote 1:13; Ol Wok 9:​1-19) Sol i tanem tingting blong hem. Mo biaen, ol wok blong hem we oli stanap long bilif oli pruvum samting ya. Be tede, sipos wan man i wantem go insaed long ples we i olsem taon ya blong haed, hem i mas mekem sam samting moa, antap long fasin blong bilif long ransom.

10. ?Olsem wanem blong gat wan tingting we i no jajem yumi, mo yumi mas mekem wanem blong holemtaet tingting ya?

¹⁰ Man we i kilim narafala i ded, be hem i no minim, hem i save stap long wan long ol taon ya we oli olsem sefples long Isrel, sipos hem i pruvum se tingting blong hem i no jajem hem long fored blong God from blad we hem i mekem i ron. Blong mekem se tingting blong yumi i no jajem yumi, yumi mas soemaot bilif blong yumi long sakrifaes blong Jisas, tanem tingting from ol sin blong yumi, mo jenisim ol fasin blong yumi. Yumi mas prea long God, tru long Kraes, blong givim laef blong yumi i go long Hem, mo yumi mas tekem baptaes blong soemaot samting ya. Olsem nao, yumi stap askem God blong mekem we tingting blong yumi i no moa jajem yumi long fored blong hem from ol sin blong yumi. (1 Pita 3:​20, 21) Taem tingting blong yumi i no moa jajem yumi long fes blong Jeova, yumi save fren wetem hem long fasin we i no gat samting i blokem. I gat wan rod nomo blong holemtaet wan tingting we i no jajem yumi. Hemia blong folem ol loa blong God mo mekem wok ya we hem i givim long yumi insaed long taon ya we i olsem sefples. Samting ya i sem mak long ol man we oli ronwe oli go stap long ol taon blong haed bifo. Oli mas obei long Loa mo mekem wok blong olgeta. Tede, bigfala wok blong ol man blong Jeova i blong talemaot Kingdom. (Matyu 24:14; 28:​19, 20) Taem yumi mekem wok ya, yumi givhangud long ol narafala man insaed long ples we i olsem taon blong haed tede.

11. ?Yumi mas blokem wanem tede sipos yumi wantem stap sef long taon ya blong haed?

¹¹ Sipos yumi aot long taon ya we i olsem ples blong haed, yumi save ded. Hemia from we i no longtaem, Man we i gat raet blong givimbak, bambae i agensem olgeta we oli gat poen long fes blong God from blad we i ron. Naoia, i no taem blong go afsaed long taon ya we yumi stap sef long hem, no long eria we i denja tumas kolosap long en blong graon blong hem. Sipos yumi no moa bilif long sakrifaes ya we Hae Pris i mekem blong tekemaot ol sin, i olsem we yumi go afsaed long taon ya we i sefples blong haed. (Hibrus 2:1; 6:​4-6) Mo tu, yumi no save stap sef sipos yumi tekem ol fasin blong wol, mo yumi no joen fulwan long ogenaesesen blong Jeova, mo yumi no moa obei long ol stret rul blong Papa blong yumi long heven.​—1 Korin 4:4.

Kam Fri Long Taon We i Olsem Ples Blong Haed

12. ?Ol man tede we fastaem oli gat poen long fes blong God from blad we i ron, oli mas stap long taon ya we i olsem sefples go kasem wetaem?

¹² Long Isrel, man we i kilim narafala i ded, be hem i no minim, hem i mas stap long taon we i olsem ples blong haed “go kasem we hae pris i ded.” (Namba 35:28) ?Ale, tede, ol man we fastaem oli gat poen long fes blong God from blad we oli mekem i ron, oli mas stap long ples we i olsem taon blong haed go kasem wetaem? Go kasem we oli no moa nidim ol wok blong Hae Pris, Jisas Kraes blong givhan long olgeta. Pol i talem se: “Hem i save sevem olgeta we oli joen long hem blong kam long God.” (Hibrus 7:​25) Go kasem taem we ol man oli no moa gat sin no enikaen fol long fes blong God from blad we i ron, bambae oli nidim ol wok blong Hae Pris blong mekem se God i save agri long olgeta.

13. ?Tede, hu ya “ol man Isrel,” mo oli mas stap long “taon we i olsem ples blong haed” go kasem wetaem?

¹³ Tingbaot se ol taon we oli olsem ples blong haed bifo, oli blong halpem “ol man Isrel,” ol man blong narafala kantri mo ol strenja. Tede, “ol man Isrel,” i minim ol man Isrel long saed blong speret. (Galesia 6:16) Oli mas stap insaed long taon ya we i olsem ples blong haed, long olgeta yia we oli stap laef long wol ya. ?From wanem? From we oli no stretgud olgeta, taswe oli nidim yet sakrifaes blong Hae Pris we i stap long heven. Be taem ol tabu Kristin ya oli ded mo oli laef bakegen long speret bodi long heven, oli no moa nidim sakrifaes blong Hae Pris blong tekemaot sin. Oli lego blong olwe bodi blong man we i gat poen long fes blong God from blad we i ron. Long saed blong ol tabu man ya we oli laef bakegen, i olsem we hae pris i ded long taem ya, from oli no moa nidim wok blong hem blong tekemaot sin blong olgeta mo lukaot long olgeta.

14. ?Wanem narafala samting i mekem se olgeta we oli gat hop blong go long heven oli mas stap long taon ya we i olsem sefples tede?

¹⁴ Olgeta we oli go long heven blong ‘rul wetem Kraes,’ fastaem oli gat bodi blong man nomo. Taswe, oli mas stap long ples ya we i olsem taon blong haed mo holemstrong bilif blong olgeta, go kasem we oli finisim laef blong olgeta long wol. Taem oli ded, bambae oli lego bodi blong man blong olwe. (Rom 8:17; Revelesen 2:10) Sakrifaes blong Jisas i blong olgeta ya nomo we oli laef olsem man. Taswe, long saed blong ol man Isrel blong speret, Hae Pris i ded taem oli laef bakegen olsem ol speret man we oli “joen long laef blong God” foreva long heven.​—2 Pita 1:4.

15. ?Hu ya ‘ol man blong narafala kantri’ mo ‘strenja’ long taem blong yumi, mo bambae bigfala Hae Pris i mekem wanem blong olgeta?

¹⁵ ?Long saed blong ‘ol man blong narafala kantri’ mo ‘ol strenja’ tede, wetaem bambae Hae Pris i ded, blong mekem se oli save aot long taon ya we i olsem sefples? Ol memba blong bigfala kampani ya, oli no save kamaot long taon ya we i olsem sefples, stret afta long bigfala trabol. ?From wanem? From we oli no stretgud olgeta. Bodi blong olgeta i gat sin yet, mo oli nidim blong stap aninit long Hae Pris, blong i lukaot long olgeta. Taem oli gohed blong letem hem i tekemaot sin blong olgeta long wan taosen yia we hem i king mo pris, sloslou bambae oli kam stretgud olgeta. Afta long samting ya, taem Setan wetem ol rabis enjel blong hem oli kam fri blong smoltaem, bambae Jisas i givim olgeta oli go long God blong kasem laswan traem, we bambae i pruvum blong olwe sipos oli ol man blong fasgud long God. Taem oli winim traem ya, bambae Jeova i glad long olgeta, nao bambae hem i talemaot se oli stret man long fes blong hem. Olsem nao, bambae oli kasem mak we oli stretgud olgeta.​—1 Korin 15:28; Revelesen 20:​7-10.b

16. ?Wetaem bambae ol man we oli laef tru long bigfala trabol oli no moa nidim wok blong Hae Pris blong tekemaot ol sin?

¹⁶ Ale, ol man we oli laef tru long bigfala trabol, oli mas holemtaet wan tingting we i no jajem olgeta. Oli save mekem olsem sipos oli stap long ples we i olsem taon blong haed go kasem en blong Rul blong Kraes blong Wan Taosen Yia. Nao long taem ya we oli kam stretgud olgeta, bambae oli no moa nidim wok blong Hae Pris blong tekemaot sin, mo bambae oli no moa stap aninit long kea blong hem. Long saed blong olgeta, bambae Jisas i ded olsem Hae Pris. Hem i no moa nidim blong givhan long olgeta blong kam klin tru long blad blong sakrifaes blong hem. Long taem ya, bambae oli aot long taon ya we i olsem sefples blong haed.

17. ?From wanem ol man we oli laef bakegen long Rul blong Wan Taosen Yia oli no nidim blong go stap insaed long taon we i olsem sefples?

¹⁷ ?Olsem wanem long ol dedman we oli laef bakegen long Wan Taosen Yia Rul blong Jisas? ?Oli mas go insaed long taon ya we i olsem sefples mo stap long ples ya go kasem we hae pris i ded? No gat. Taem oli ded, i olsem we oli kasem panis blong sin blong olgeta finis. (Rom 6:​7; Hibrus 9:27) Nating se i olsem, bambae Hae Pris i halpem olgeta blong kam stretgud olgeta. Sipos oli winim laswan traem afta long Rul blong Wan Taosen Yia, bambae God i talem se oli stret man we oli save laef blong olwe long wol. Be, eni man we i no folem ol rul blong God mo i no holemstrong long Hem, bambae hem i kasem jajmen mo i lus.

18. ?Wanem samting long saed blong wok blong Jisas olsem King mo pris we bambae i stap wetem olgeta man blong olwe?

¹⁸ Ol hae pris blong ol man Isrel oli ded. Be Jisas we ‘i hae pris, olsem Melkisedek bifo, bambae i holem wok ya oltaem gogo i no save finis.’ (Hibrus 6:​19, 20; 7:3) Taswe taem wok blong Jisas blong givhan long ol man olsem Hae Pris i finis, samting ya i no min se laef blong hem i finis. Gudfala samting we i kamaot from wok blong hem olsem King mo Hae Pris, bambae i stap wetem olgeta man blong olwe. Mo bambae ol man oli gat kaon long hem blong olwe, from ol samting ya we hem i mekem blong givhan long olgeta. Mo tu, bambae Jisas i lidim ol man blong mekem klin wosip long Jeova gogo i no save finis.​—Filipae 2:​5-11.

Ol Nambawan Samting We Yumi Lanem

19. ?Ol taon we oli olsem sefples oli lanem yumi long wanem samting long saed blong fasin blong agensem narafala mo lav?

¹⁹ Yumi save lanem plante samting from ol taon ya we God i givim olsem ples blong haed. Eksampel, wan man we i kilim narafala i ded from i no laekem hem nating, oli no letem hem i stap long taon ya. (Namba 35:​20, 21) Taswe, long taon ya we i olsem sefples tede, ?olsem wanem wan man i save letem fasin blong agensem brata blong hem i kam fulap long hat blong hem? Aposol Jon i raetem se: “Man we i nogud long brata blong hem, i stap agensem hem, hem i man blong kilim man. Mo yufala i save finis, ol man blong kilim man oli no gat laef ya we i no save finis i stap long olgeta.” Taswe, yumi mas gohed blong “laeklaekem yumi, from we fasin ya blong laekem tumas ol man, hem i kamaot long God.”​—1 Jon 3:15; 4:7.

20. ?Ol man we oli laef long taon we i olsem sefples tede, oli mas mekem wanem sipos oli no wantem we Man blong givimbak i kilim olgeta oli ded?

²⁰ Long taem bifo, man we i kilim narafala i ded, be hem i no minim, hem i mas stap insaed long taon ya we i sefples mo hem i no mas go afsaed long graon blong hem. Sipos no, man we i gat raet blong givimbak i save kilim hem i ded. ?Olsem wanem long olgeta we oli stap long taon ya we i olsem sefples tede? Sipos oli no wantem ded long han blong bigfala Man we i gat raet blong givimbak, oli no mas aot long taon ya. Yes, oli mas lukaot se oli no letem sam samting i pulum olgeta blong go kolosap long en blong taon ya. Oli mas lukaotgud blong no letem lav blong wol blong Setan i gru long hat blong olgeta. Blong mekem olsem, oli mas prea mo traehad oltaem. Laef blong olgeta i dipen long samting ya.​—1 Jon 2:​15-17; 5:19.

21. ?Tede, ol man we oli laef long taon we i olsem sefples, oli stap mekem wanem wok we i karem plante blesing?

²¹ Bifo, ol man we oli stap long taon we i sefples blong haed from oli no minim blong kilim narafala i ded, oli mas kam ol gudfala man blong wok. I sem mak tede, ol tabu “man Isrel” oli soem gudfala eksampel, olsem ol man blong tekem kakae long garen mo ol man blong talemaot Kingdom. (Matyu 9:​37, 38; Mak 13:10) Ol Kristin we oli gat hop blong laef long wol, we oli olsem ‘ol man blong narafala kantri’ mo ‘ol strenja’ long taem bifo, oli gat jans blong joen wetem ol tabu man we oli stap yet long wol, blong mekem wok ya blong sevem laef blong ol man. !Mo wok ya i karem bigfala blesing! Man we i gat raet blong givimbak from blad we i ron, bambae i no kilim i ded olgeta we oli stap wok strong long taon ya we i olsem sefples tede. Be bambae oli kasem ol blesing blong olwe from wok blong hem olsem bigfala Hae Pris blong God. ?Bambae yu stap long taon ya we i olsem sefples mo kasem laef we i no save finis?

[Ol Futnot]

?Bambae Yu Ansa Olsem Wanem?

◻ ?From wanem yumi save talem se olgeta bilyan man long wol oli gat poen long fes blong God from blad we i ron?

◻ ?Wanem tufala wok we Jisas i mekem blong givhan long olgeta man?

◻ ?Tede, wanem mining blong taon ya we i sefples, mo olsem wanem wan man i save go stap long hem?

◻ ?Wetaem bambae ol man oli fri blong aot long taon ya we i olsem sefples?

◻ ?Yumi save lanem wanem nambawan samting from ol taon ya we oli olsem sefples blong haed?

[Tok Blong Pija Long Pej 16]

?Yu yu save ol impoten wok we Jisas Kraes i mekem?