Jeova i Givim Paoa Long Olgeta We Oli Taed
“Olgeta we oli putum tingting blong olgeta i strong long Jeova, bambae oli kasem paoa bakegen. Bambae i olsem we oli gat wing, olsem ol igel, blong go antap.”—AESEA 40:31.
1, 2. ?Jeova i stap givim wanem long ol man we oli trastem hem, mo wanem samting bambae yumi tokbaot naoia?
IGEL i wan pijin we i strong moa bitim ol narafala pijin. Hem i save flae long wan longfala ples we i no muvmufum wing blong hem nating. “King blong ol Pijin,” golden igel, we ol wing blong hem oli save kavremap tu mita taem oli open, hem i “wan igel we man i save sapraes long hem moa, i bitim ol narafala igel. Hem i save flae i go hae, antap long ol hil mo ol flat ples. [Hem] i save flae plante haoa antap long ol bigfala hil ya, we i no muvmufum wing blong hem nating, mo biaen i save flae i go antap moa gogo i kam olsem wan smol blak mak nomo long skae.”—The Audubon Society Encyclopedia of North American Birds.
2 Aesea i stap tingbaot nambawan fasin blong igel blong flae, taem hem i raetem se: “[Jeova] i stap givim paoa long olgeta we oli taed; mo long hemia we i no gat paoa, hem i givim bigfala paoa long hem. Ol boe bambae oli kam taed mo oli slak, mo ol yangfala man bambae oli foldaon, be olgeta we oli putum tingting blong olgeta i strong long Jeova, bambae oli kasem paoa bakegen. Bambae i olsem we oli gat wing, olsem ol igel, blong go antap. Bambae oli resis, be bodi blong olgeta i no slak. Bambae oli wokbaot, be oli no taed.” (Aesea 40:29-31) !Yumi haremgud tumas blong save se Jeova i stap givim paoa long olgeta we oli trastem hem, blong oli gohed! I olsem we hem i givim long olgeta, ol wing blong igel we i save flae i go hae antap, be i no save taed. Naoia, bambae yumi luk sam long ol rod we Jeova i stanemap, blong givim paoa long olgeta we oli taed.
Paoa Blong Prea
3, 4. (a) ?Jisas i talem long ol disaepol blong hem blong mekem wanem? (b) ?Maet yumi wantem se Jeova i mekem wanem blong ansarem ol prea blong yumi?
3 Jisas i talem long ol man blong hem se, “oli mas prea oltaem mo oli no mas lego fasin blong prea.” (Luk 18:1, NW) Sipos yumi talemaot olgeta samting we i stap long hat blong yumi long Jeova, ?samting ya i save halpem yumi blong kasem paoa bakegen, mo no kam slak taem ol wari blong laef oli hivap tumas? Yes. Be i gat sam samting we yumi no mas fogetem.
4 Yumi no mas bitim mak long samting we yumi wantem Jeova blong mekem, blong ansarem ol prea blong yumi. Wan Kristin we tingting blong hem i foldaon olgeta, i talem biaen se: “Taem yumi kasem ol sik olsem, no ol narafala sik, Jeova i no mekem merikel. Be hem i halpem yumi blong fesem hadtaem ya mo blong kamgud bakegen kasem mak we yumi save kasem long wol ya.” Hem i eksplenem from wanem ol prea blong hem oli mekem hem i haremgud moa, i se: “Mi save askem tabu speret blong Jeova long enitaem nomo, long dei mo long naet.” Taswe, Jeova i no blokem yumi fulwan long ol wari blong laef we oli save kam hevi tumas long yumi. !Be hem i ‘givim tabu speret long olgeta we oli askem long hem’! (Luk 11:13; Ol Sam 88:1-3) Speret ya i save mekem yumi naf blong fesem ol hadtaem mo wari we yumi kasem. (1 Korin 10:13) Sipos i nidim, hem i save givim long yumi, ‘paoa we i bigfala tumas, i blong Hem, i no blong yumi’ blong mekem yumi stanap strong kasem nyufala wol we i kolosap nomo. Long taem ya, Kingdom blong God bambae i tekemaot olgeta trabol we oli stap mekem yumi harem nogud.—2 Korin 4:7.
5. (a) ?Blong ol prea blong yumi oli karem frut, wanem tufala impoten samting we yumi mas mekem? (b) ?Yumi save prea olsem wanem sipos yumi stap traehad blong winim wan slak fasin blong yumi? (c) ?Wanem samting we yumi soemaot long Jeova, taem yumi gohed blong prea oltaem mo talemaot klia ol samting we yumi prea from?
5 Be, sipos yumi wantem kasem frut from ol prea blong yumi, yumi mas prea oltaem, mo talemaot klia ol samting we yumi prea from. (Rom 12:12) Eksampel, sipos yu kam taed from we yu stap traem blong winim wan slak fasin blong yu, i gud we evri moning yu askem long Jeova blong halpem yu tru long dei, blong traehad blong no foldaon long slak fasin ya. Prea from sem samting ya tru long dei, mo evri naet, bifo we yu slip. Sipos yu foldaon bakegen long slak fasin ya, askem long Jeova blong fogivim yu. Be tu, yu mas toktok wetem hem long saed long wanem we i mekem se yu foldaon bakegen, mo samting we yu save mekem blong blokem mastik ya long fyuja. Sipos yu prea oltaem mo talemaot klia ol samting we yu prea from, yu soemaot long ‘Man blong harem prea’ se yu rili wantem winim faet ya.—Ol Sam 65:2; Luk 11:5-13.
6. ?From wanem i stret blong ting se Jeova bambae i harem ol prea blong yumi, nating se yumi harem we yumi no gud inaf blong prea?
6 Be samtaem, olgeta we oli taed, oli harem se oli no gud inaf blong prea. Wan Kristin woman we i gat tingting olsem, i talem biaen se: “Tingting ya i no stret nating, from we i minim se yumi nomo i stap jajem yumi. Be hemia i no wok blong yumi.” Yes, “[God] nomo i save jajem ol man.” (Ol Sam 50:6) Baebol i talem long yumi se, nating we ‘hat blong yumi i save jajem yumi, God i hae moa long hat blong yumi, mo hem i save evri samting.’ (1 Jon 3:20) !Yumi haremgud tumas blong save se taem yumi stap jajem yumi wan se yumi no gud inaf blong prea, Jeova i gat defren tingting! Hem i “save evri samting” long saed blong yumi, ol samting long laef blong yumi, we oli save mekem yumi harem se yumi no gud inaf blong prea. (Ol Sam 103:10-14) Fasin sore mo dip save blong Jeova oli pusum hem blong harem ol prea we oli kamaot long ‘hat we i trabol mo i bendaon finis.’ (Ol Sam 51:17) Hem i no save blokem sora blong hem taem yumi singaot long hem blong halpem yumi. ?From wanem? From we hem i agensem “man we i no wantem harem krae blong wan man we i daon moa.”—Proveb 21:13.
Lav Blong Ol Brata Mo Sista
7. (a) ?Wanem narafala rod we Jeova i stanemap blong givhan long yumi blong kasem paoa bakegen? (b) ?Wanem samting long saed blong ol brata mo sista blong yumi we, taem yumi luksave, oli save mekem yumi kam strong?
7 Wan narafala rod we Jeova i stanemap blong halpem yumi blong kasem paoa bakegen, hemia kampani blong ol Kristin brata mo sista blong yumi. !I wan nambawan blesing blong stap insaed long famle blong ol brata mo sista raonabaot long wol! (1 Pita 2:17) Taem ol wari blong laef oli kam hevi tumas long yumi, lav blong ol brata mo sista blong yumi, i save halpem yumi blong kasem paoa bakegen. ?Olsem wanem? Yumi save kasem paoa, taem yumi luksave se i no yumi nomo we i stap fesem ol traem we oli mekem yumi harem nogud. I klia se i gat sam brata mo sista blong yumi, oli stap fesem semkaen wari mo hadtaem olsem yumi stap fesem. Olgeta tu, oli kasem sem filing olsem yumi. (1 Pita 5:9) I leftemap tingting blong yumi, taem yumi luksave se ol traem we yumi kasem oli no kasem yumi nomo, mo se plante narafala man oli gat sem filing olsem yumi.
8. (a) ?Wanem ol eksampel we oli soem se ol brata mo sista blong yumi oli save leftemap tingting blong yumi bigwan mo givim help we yumi nidim? (b) ?Long wanem rod “wan tru fren” i bin halpem yu mo leftemap tingting blong yu?
8 Long medel blong ol brata mo sista we oli gat lav, yumi save faenem ‘ol tru fren’ we, taem yumi gat trabol mo yumi nidim help, oli save givhan mo leftemap tingting blong yumi. (Proveb 17:17) Plante taem, yumi nidim nomo we wan i toktok long yumi long kaen fasin, no i mekem sam samting we i soemaot se hem i stap tingbaot yumi. Wan Kristin we i stap traehad blong winim ol filing ya we hem i no gud inaf, i talem se: “I gat sam fren we oli kam luk mi, mo oli tokbaot ol gudfala fasin blong mi. Oli mekem olsem blong halpem mi blong sakemaot ol nogud tingting we mi gat agensem mi wan.” (Proveb 15:23) Afta we wan sista i lusum pikinini gel blong hem, fastaem hem i faenem se i had blong singim ol singsing blong Kingdom long ol miting blong kongregesen, antap moa ol singsing we oli tokbaot laef bakegen. Hem i talem se: “Wan taem, wan sista we i stap sidaon long narafala laen blong jea i luk we mi stap krae. Ale, hem i kam kolosap long mi, i putum han blong hem i goraon long mi, mo i sing wetem mi gogo singsing i finis. Mi harem se lav blong mi long ol brata mo sista i kam fulap mo mi glad tumas we mifala i stap go long ol miting long Haos Kingdom. Mi luksave se hemia nao ples we yumi save kasem help.”
9, 10. (a) ?Olsem wanem yumi save givhan blong mekem filing blong lav i kam strong moa long medel blong ol brata mo sista blong yumi? (b) ?Hu ya i nidim moa blong joen wanples wetem ol narafala? (c) ?Yumi save mekem wanem blong halpem olgeta we oli nidim narafala blong leftemap tingting blong olgeta?
9 Yes, wanwan long yumi i mas givhan blong mekem lav we i stap long medel blong ol Kristin brata mo sista i kam fulap. Taswe hat blong yumi i mas ‘go moa’ blong yumi gat lav long olgeta brata mo sista blong yumi. (2 Korin 6:13) !Sore tumas sipos olgeta we oli taed oli harem se ol brata mo sista oli no moa laekem olgeta! Sam Kristin oli talem se oli harem we oli stap olgeta nomo mo se ol narafala oli no tingbaot olgeta. Wan sista we hasban blong hem i agensem trutok, i talem wetem fulhat se: “?Hu i no wantem mo i no nidim ol gudfala fren, ol tok blong leftemap tingting, mo fasin blong joengud wanples long lav? !Plis, talem bakegen long ol brata mo sista blong yumi se, yumi nidim olgeta!” Yes, olgeta we ol samting long laef oli hevi tumas long olgeta, oli nidim moa gudfala fasin joen. Hemia olgeta we hasban no waef blong olgeta i no stap long trutok, hasban no waef i lego olgeta, oli sik oltaem, oli olfala, mo sam narafala samting olsem. ?Sam long yumi i nidim blong tingbaot samting ya bakegen?
10 ?Yumi save mekem wanem blong givhan? I gud yumi go moa long fasin blong soem lav. Taem yumi tekem ol man oli kam long haos blong yumi, yumi no mas fogetem olgeta we oli nidim narafala blong leftemap tingting blong olgeta. (Luk 14:12-14; Hibrus 13:2) Yumi no mas gat tingting se, ol samting long laef blong olgeta bambae i blokem olgeta blong oli no save kam. I gud yumi go askem olgeta. Nao olgeta nomo oli save jusum. Sipos oli no save kam, bambae oli haremgud blong save se narafala i tingbaot olgeta. Maet hemia nomo samting we oli nidim blong kasem paoa bakegen.
11. ?Olgeta we ol trabol blong laef oli hevi tumas long olgeta oli nidim help long wanem rod?
11 Olgeta we ol samting long laef oli hevi tumas long olgeta, maet oli nidim help long sam narafala rod. Eksampel, maet wan mama we i no gat hasban, i nidim we wan brata we i bigman long saed blong speret i soem intres long boe blong hem we i no gat papa. (Jemes 1:27) Maet wan brata no sista we i gat bigfala sik i nidim we narafala i go pem sam samting blong hem long stoa no i mekem sam wok long haos. Maet wan olfala i wantem tumas se narafala i kam storeyan wetem hem, no i nidim narafala blong givhan long hem blong go prij. Taem olgeta ya oli nidim yumi blong longtaem, samting ya ‘i save traem yumi blong luk sipos fasin blong yumi blong laekem ol man, i tru no i no tru.’ (2 Korin 8:8) Yumi no mas stap longwe long olgeta we oli nidim help from yumi gat tingting ya se i tekem tumas taem mo fasin traehad. I moa gud we yumi luksave se oli nidim help, mo yumi givhan long olgeta blong pruvum se yumi gat Kristin lav.
Paoa Blong Tok Blong God
12. ?Olsem wanem Tok blong God i givhan long yumi blong kasem paoa bakegen?
12 Wan man we i no moa kakae, kwiktaem nomo bambae i lusum paoa blong hem mo kam slak. Long sem fasin, wan narafala rod we Jeova i yusum blong givim paoa long yumi blong gohed, hemia taem hem i stap fidimgud yumi long saed blong speret. (Aesea 65:13, 14) ?Wanem ol kakae long saed blong speret we hem i givim? Faswan, hemia Tok blong hem, Baebol. (Matyu 4:4; skelem wetem Hibrus 4:12.) ?Olsem wanem Baebol i save halpem yumi blong kasem paoa bakegen? Taem ol wari mo ol trabol we yumi kasem oli stat blong daonem paoa blong yumi, yumi save kasem paoa bakegen taem yumi ridim store blong ol man mo woman blong bilif long Baebol, ol filing blong olgeta, mo ol traem we oli kasem. ‘Oli gat filing olsem yumi’ nomo, be oli gohed blong soem nambawan eksampel long fasin blong holemstrong long God. (Jemes 5:17; Ol Wok 14:15) Oli fesem ol semkaen hadtaem mo wari olsem yumi. Yumi luk sam eksampel.
13. ?Wanem ol eksampel long Baebol we oli soem se ol filing blong ol man mo woman bifo mo ol samting we oli hapen long laef blong olgeta, oli sem mak long yumi?
13 Nating we Ebraham i bilif se ol dedman bambae oli laef bakegen, hem i harem nogud tumas taem waef blong hem i ded. (Jenesis 23:2; skelem wetem Hibrus 11:8-10, 17-19.) Afta we Deved i tanem tingting blong hem from ol sin we hem i bin mekem, hem i harem se hem i no moa gud inaf blong wosip long Jeova. (Ol Sam 51:11) Moses i harem se hem i no naf. (Eksodas 4:10) Tingting blong Epafrodaetas i foldaon, taem ol narafala oli harem nyus se bigfala sik i blokem hem long ‘wok blong God.’ (Filipae 2:25-30) Pol i mas faet agensem ol slak fasin blong hem. (Rom 7:21-25) Long kongregesen blong Filipae, tufala sista we tabu speret i makemaot, Yuodia mo Sintike, tufala i faenem se i hadwok blong joengud. (Filipae 1:1; 4:2, 3) I leftemap tingting blong yumi taem yumi kasem save se ol man mo woman ya we oli stap tru long God, filing mo ol samting we oli hapen long laef blong olgeta, oli sem mak olsem yumi. !Be oli no lego! Mo Jeova i no lego olgeta.
14. (a) ?Jeova i yusum wanem tul blong halpem yumi blong kasem paoa long Tok blong hem? (b) ?From wanem Wajtaoa mo Wekap! i bin tokbaot ol poen long saed blong fasin joen blong ol man, famle, mo trabol long filing?
14 Blong givhan long yumi blong kasem paoa long Tok blong Hem, Jeova i yusum grup ya we i olsem slef we i stret mo waes, blong gohed oltaem blong givim ‘kakae long stret taem blong hem.’ (Matyu 24:45) Longtaem finis i kam, slef ya we i stret i stap yusum Wajtaoa mo Wekap! blong sapotem ol trutok blong Baebol, mo blong talemaot Kingdom blong God olsem wan samting nomo we i naf blong stretem ol trabol blong man. Long ol yia we oli jes pas, plante haf blong tufala buk ya oli bin givim advaes blong Baebol long ol trabol we oli stap kamaot long taem blong yumi. Oli bin tokbaot fasin joen blong ol man, famle, mo ol traem long saed blong filing we sam long ol man blong God tu oli fesem. ?From wanem oli prentem ol save olsem? I blong halpem ol man we oli stap fesem ol traem ya, blong mekem se Tok blong God i givim paoa mo i leftemap tingting blong olgeta. Be tu, ol haf blong tufala buk ya, oli halpem yumi evriwan blong kasem save moa long trabol we ol narafala brata mo sista blong yumi oli stap fesem. Olsem nao, bambae yumi nafgud blong folem ol tok ya blong Pol, se: “Yufala i mas toktokgud blong leftemap tingting blong olgeta we oli harem nogud oltaem from we tingting blong olgeta i foldaon. Yufala i mas givhan long olgeta we oli slak. Mo yufala i mas gat longfala tingting long evriwan.”—1 Tesalonaeka 5:14, NW.
Ol Elda We Oli Olsem ‘Ples Blong Haed Taem i Gat Bigfala Win’
15. ?Aesea i talem wanem profet tok long saed blong olgeta we oli stap wok olsem elda, mo oli mas mekem wanem blong folem profet tok ya?
15 Jeova i yusum wan narafala rod blong halpem yumi taem yumi kam taed—ol elda long kongregesen. Blong tokbaot olgeta ya, profet Aesea i raetem se: “Bambae olgeta wanwan oli mas pruvum se oli olsem wan ples blong haed long hem taem i gat bigfala win, mo olsem wan sefples taem bigfala ren i foldaon. Bambae oli olsem ol wora we i ron long drae ples, mo olsem sado blong bigfala ston long ples we i hot tumas.” (Aesea 32:1, 2) Ale, wok blong ol elda i blong folem profet tok ya we Jeova i talem long saed blong olgeta. Oli mas “pruvum se” oli man blong leftemap tingting mo blong mekem narafala i haremgud. Mo oli mas rere blong “karem ol baden [no, “ol trabol”, we i minim, “ol hevi samting”] blong ol narafala.” (Galesia 6:2, NW, futnot) ?Olsem wanem oli save mekem samting ya?
16. ?Ol elda oli save mekem wanem blong halpem hemia we i harem se hem i no gud inaf blong prea?
16 Olsem yumi luk finis, maet samtaem wan man we i taed i harem se hem i no gud inaf blong prea. ?Ol elda oli save mekem wanem? Oli save prea wetem man ya mo prea from hem. (Jemes 5:14) Taem elda i prea wetem man no woman ya we i slak mo i askem Jeova blong halpem hem blong kasem save se Jeova mo ol narafala oli laekem hem tumas, samting ya bambae i mekem hem i haremgud. Taem hem i stap lesin long prea blong elda ya we i gat filing mo i kamaot long hat, samting ya i save givhan blong mekem tingting blong hem i kam strong moa. Samting ya i save halpem man no woman ya blong tingting se sipos ol elda oli bilif we Jeova bambae i ansa taem oli prea from hem, ale hem tu i save bilivim samting ya.
17. ?From wanem ol elda oli mas lesingud mo traem putum olgeta long ples blong narafala?
17 Jemes 1:19 i talem se: “Yufala evriwan i mas rere oltaem blong lesin, be yufala i mas no hareap blong tok.” Blong givhan long olgeta we oli taed blong oli kasem paoa bakegen, ol elda oli mas lesingud mo traem putum olgeta long ples blong man ya we oli lesin long hem. Samtaem, maet sam long kongregesen oli stap fesem sam trabol no sam wari we oli no save kamgud long wol ya. Oraet, samting we oli nidim, i no wan rod blong “winim” trabol ya, be oli nidim blong toktok long wan man we i lesingud—wan we i no save talem long olgeta wanem filing oli mas gat, be hem i lesingud, mo i no jajem olgeta.—Luk 6:37; Rom 14:13.
18, 19. (a) ?Sipos wan elda i rere oltaem blong lesin, olsem wanem samting ya i save halpem hem blong no mekem baden blong hemia we i taed i kam hevi moa? (b) ?Wanem frut i save kamaot taem ol elda oli ‘soem filing long ol brata mo sista’ blong olgeta?
18 Ol elda, sipos yufala i rere oltaem blong lesin, bambae yufala i blokem sam mastik we oli save mekem baden blong hemia we i taed i kam moa hevi. Eksampel: ?Olsem wanem sipos wan brata no sista i mestem sam miting no i kam slak long wok blong talemaot gud nyus? ?Yu mas givim advaes long hem se hem i mas mekem moa long wok blong prij no go oltaem long ol miting? Maet yes. ?Be yu yu save evri samting we oli stap hapen long laef blong hem? ?Hem i kasem trabol long saed blong helt? ?I gat sam jenis we oli jes kamaot long ol wok blong hem long famle? ?I gat sam samting long laef no ol wari we oli hevi tumas long hem? Tingbaot se, maet man no woman ya i harem finis se hem i gat bigfala poen long fes blong God, from we hem i no save mekem moa.
19 ?Oraet, olsem wanem yu save halpem brata no sista ya? !Bifo we yu talem tingting blong yu mo givim advaes, yu mas lesin! (Proveb 18:13) Wetem fasin luksave, yu askem sam kwestin we i save ‘pulumaot’ ol filing long hat blong man no woman ya. (Proveb 20:5) Yu no mas ting nating long ol filing ya—yu mas luksave se oli ol trufala filing. Maet hemia we i taed i nidim we yumi talem bakegen long hem se Jeova i kea long yumi, mo we Jeova i kasem save se samtaem ol samting long laef blong yumi oli save blokem yumi. (1 Pita 5:7) Taem ol elda oli soem ‘filing long ol brata mo sista’ blong olgeta olsem, bambae olgeta we oli taed oli ‘faenem se tingting blong olgeta i gat spel.’ (1 Pita 3:8; Matyu 11:28-30) Taem oli faenem se tingting blong olgeta i gat spel, i no nidim wan blong talem long olgeta blong mekem moa. Bambae hat blong olgeta nomo i pusum olgeta blong mekem olgeta samting we oli naf blong mekem long wok blong Jeova.—Skelem wetem 2 Korin 8:12; 9:7.
20. ?From we en blong ol rabis man blong naoia i kolosap tumas, yumi mas gat strong tingting blong mekem wanem?
20 Tru ya, yumi stap laef long wan taem we i strong moa bitim ol narafala taem long histri blong man. Ol wari blong laef long wol ya blong Setan, oli stap kam plante moa, taem yumi stap go kolosap moa long en. Tingbaot se, Setan i stap wet long yumi olsem wan laeon we i stap lukaot kakae. Taem hem i luk se yumi kam taed mo yumi no moa gohed, hem i tekem jans ya nao blong kakae yumi, olsem kakae we i isi nomo blong kasem. !Tangkyu tumas long Jeova we hem i givim paoa long olgeta we oli taed! Yumi mas yusumgud olgeta rod we hem i stanemap blong givim paoa long yumi blong gohed. Yumi mas tingbaot se, i olsem we hem i stap givim long yumi ol strongfala wing blong igel we i save flae i go antap olgeta. From we en blong ol rabis man blong naoia i kolosap tumas, i no taem blong lego long resis blong kasem praes ya—laef we i no save finis.—Hibrus 12:1.
?Wanem Ansa Blong Yu?
◻ ?Wanem samting we yumi save bilif se Jeova bambae i mekem blong ansarem ol prea blong yumi?
◻ ?Long wanem rod yumi save kasem paoa long ol Kristin brata mo sista blong yumi?
◻ ?Olsem wanem Tok blong God i halpem yumi blong kasem paoa bakegen?
◻ ?Ol elda oli save mekem wanem blong halpem olgeta we oli taed blong kasem paoa bakegen?
[Tok Blong Pija Long Pej 17]
Taem yumi stap tekem ol man oli kam long haos blong yumi, yumi no mas fogetem olgeta we oli nidim narafala blong leftemap tingting blong olgeta
[Tok Blong Pija Long Pej 18]
Ol elda oli save askem Jeova blong halpem olgeta we oli taed blong kasem save se ol narafala oli laekem olgeta tumas