!Yu No Mas Lego!

“Bambae yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.”​—GALESIA 6:9.

1, 2. (a) ?Wanem ol fasin blong laeon blong lukaot kakae? (b) ?Setan i wantem moa blong kakae hu?

WAN laeon i yusum plante defren fasin blong lukaot kakae blong hem. Samtaem, hem i haed kolosap long wan wora no long saed blong rod we ol anamol oli pas plante long hem, mo i wet blong kasem wan anamol. Be, buk ya, Portraits in the Wild, i talem se samtaem, wan laeon “i jes tekem jans we hem i kasem. Olsem taem hem i luk wan pikinini sebra we i stap slip.”

² Aposol Pita i eksplenem se: “Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.” (1 Pita 5:8) Setan i save se hem i gat smoltaem nomo i stap, taswe hem i mekem laef blong ol man i had moa, i bitim bifo. Hem i mekem olsem blong traem blokem olgeta blong oli no wosip long Jeova. Be, ‘laeon ya we i stap singaot bigfala,’ hem i wantem moa blong kakae ol man blong Jeova. (Revelesen 12:​12, 17) Ol fasin blong hem blong lukaot kakae, oli sem mak long wan laeon. ?Olsem wanem?

3, 4. (a) ?Wanem ol fasin blong Setan blong traem kakae ol man blong Jeova? (b) ?From we laef i “strong tumas” naoia, wanem ol kwestin we yumi save askem?

³ Samtaem, Setan i agensem yumi long fasin haed​—ol man oli ronem yumi no oli agensem yumi blong mekem se yumi lego bilif blong yumi, nao yumi no moa mekem wosip long Jeova. (2 Timote 3:12) Be, olsem wan laeon, samtaem Setan i yusum ol jans we hem i kasem. Hem i wet go kasem we tingting blong yumi i foldaon, no yumi kam taed, nao hem i traem daonem filing blong yumi moa taem yumi harem nogud finis, blong mekem se yumi no moa gohed. !Yumi no mas kam olsem kakae we hem i save kasem isi nomo!

⁴ Yumi stap laef long wan taem we i strong moa, bitim ol narafala taem long histri blong man. Naoia we ‘laef long wol ya i kam strong tumas,’ samtaem yumi save harem se tingting i foldaon, no i hevi tumas. (2 Timote 3:1) ?Ale, yumi save mekem wanem blong no kam taed tumas, nao yumi kam olsem kakae we i isi nomo blong Setan i kasem? ?Yes, olsem wanem yumi save folem advaes ya blong Pol we i kamaot long God, se: “Bambae yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi”?​—Galesia 6:9.

Taem Ol Narafala Oli Mekem Yumi Harem Nogud

5. ?Wanem i mekem se Deved i kam taed, be wanem samting we hem i no mekem?

⁵ Long taem we oli raetem Baebol, ol man, mo olgeta we oli stap tru long God tu, maet oli bin harem se ol samting long laef oli hevi tumas long olgeta. Deved, wan man blong raetem Ol Sam, i talem se: “Mi mi stap harem nogud gogo mi slak from. Evri naet mi stap krae gogo bed blong mi i wetwet long wora blong ae blong mi. Oltaem pilo blong mi i wetwetgud long wora blong ae blong mi.” ?From wanem Deved i harem nogud olsem? Hem i eksplenem se: “Ol enemi blong mi oli stap mekem mi mi krae tumas, we ae blong mi i solap from, nao mi mi no save lukluk nating.” Ol fasin blong ol narafala blong spolem Deved, oli mekem hem i harem i soa long hat blong hem, we wora blong ae blong hem i ron bigwan. Be, ol samting ya we ol narafala oli mekem long Deved, oli no pulum hem blong lego Jeova.​—Ol Sam 6:​6-9.

6. (a) ?Sam tok mo fasin blong narafala oli save mekem wanem long yumi? (b) ?Olsem wanem samfala oli mekem i isi nomo blong Setan i save kakae olgeta?

⁶ I sem mak, maet sam toktok mo fasin blong sam narafala oli mekem hat blong yumi i harem nogud tumas, nao yumi kam slak from. Proveb 12:18 i talem se: “I gat man we i stap tok, we i no tingtinggud fastaem. Tok blong hem i olsem we naef blong faet i stikim man.” Taem hemia we i no tingtinggud i wan Kristin brata no sista, hem i save stikim yumi dip. From we yumi sinman nomo, maet yumi kam kros, mo holem kros longtaem. Samting ya i tru moa sipos yumi harem se narafala i mekem i no stret long yumi no hem i no soem kaen fasin long yumi. Maet yumi faenem se i had blong toktok long man no woman ya. Maet yumi no wantem stap kolosap long hem. From we fasin kros i mekem tingting blong samfala i hevi, ale oli lego mo oli no moa go long ol Kristin miting. Sore tumas, taem oli mekem olsem, oli “givim jans long Setan,” nao hem i tekem jans ya blong kakae olgeta i isi nomo.​—Efesas 4:27.

7. (a) ?Olsem wanem blong no givim jans long Setan taem ol narafala oli mekem tingting blong yumi i foldaon no oli mekem yumi harem nogud? (b) ?From wanem yumi no mas stap kros longtaem?

⁷ ?Olsem wanem yumi save blokem Setan blong i no kasem yumi taem ol narafala oli mekem tingting blong yumi i foldaon no oli mekem yumi harem nogud? Yumi mas traem blong no holem kros. Yumi mas go mekem pis no stretem bisnes ya kwiktaem nomo. (Efesas 4:26) Kolosi 3:13 i givim advaes long yumi se: “Taem wan long yufala i gat sam poen agens long narawan long yufala, tufala i mas fofogivim tufala.” Antap moa, taem wan man i luksave rong blong hem mo i talem se i sore tumas from, i stret nomo we yumi fogivim hem. (Lukluk Ol Sam 32:​3-5 mo Proveb 28:13.) I givhan long yumi tu, sipos yumi tingbaot se blong fogivim narafala, i no minim se yumi agri no ting nating long rong we hem i mekem. Fasin fogif i minim se yumi lego kros. Fasin kros i wan hevi samting blong karem. Hem i save stap long tingting blong yumi oltaem, mo i save tekemaot glad blong yumi. Mo tu, hem i save spolem helt blong yumi. Be, sipos yumi fogivim narafala taem i stret blong mekem olsem, samting ya i save mekem i gud long yumi. !Olsem Deved, yumi no mas lego mo tanem baksaed long Jeova from tok we sam narafala oli talem no samting we oli mekem long yumi!

Taem Yumi Mekem Mastik

8. (a) ?From wanem samfala oli harem samtaem se oli gat poen long fes blong God? (b) ?Yumi stap long wanem denja sipos tingting ya se yumi gat poen long fes blong God i mekem se yumi no moa gohed?

⁸ Jemes 3:2 i talem se: “Plante taem yumi evriwan i mekem i no stret.” Taem yumi mekem mastik, i stret nomo blong harem se yumi gat poen long fes blong God. (Ol Sam 38:​3-8) Filing ya i save kam strong moa, sipos yumi stap traehad blong winim wan slak fasin, be sam samtaem yumi foldaon bakegen.a Wan Kristin we i stap traehad blong winim wan slak fasin olsem, i eksplenem se: “Mi bin kasem filing we mi no moa wantem stap laef, from we mi stap ting se maet mi bin mekem sin ya we God i no save fogivim. Mi harem se i moa gud we mi no moa traehad long wok blong Jeova from we mi no moa save mekem hem i glad.” Taem filing ya se yumi gat poen long fes blong God i winim yumi, nao yumi no moa wantem traehad, hemia i olsem we yumi givim jans long Setan. !Ale, kwiktaem nomo bambae hem i tekem jans ya! (2 Korin 2:​5-7, 11) Maet yumi nidim blong stretem tingting blong yumi long mining blong fasin ya blong gat poen long fes blong God.

9. ?From wanem yumi mas bilif strong long fasin sore blong God?

⁹ Taem yumi mekem sin, i stret nomo blong harem se yumi gat poen long fes blong God. Be samtaem, wan Kristin i gohed blong holem ol filing ya from we hem i ting se hem i no gud inaf blong kasem fasin sore blong God. Wetem lav, Baebol i talem long yumi se: “Sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol sin blong yumi mo i mekem yumi klin long ol fasin blong yumi we i no stret.” (1 Jon 1:9) ?Olsem wanem? ?I gat gudfala risen blong bilif se God i no save mekem olsem long yumi? Rimemba, Jeova i talem long Tok blong hem, se hem i “rere blong fogif.” (Ol Sam 86:​5; 130:​3, 4, NW) Hem i no save gyaman. Bambae hem i folem promes ya long Tok blong hem, sipos yumi kam kolosap long hem, we yumi harem se yumi sore tumas long hat blong yumi.​—Taetas 1:2.

10. Long wan Wajtaoa bifo, ?oli prentem wanem nambawan tok blong leftemap tingting blong yumi taem yumi stap traehad blong winim wan slak fasin?

¹⁰ ?Yu mas mekem wanem sipos yu stap faet agensem wan slak fasin be yu foldaon bakegen? !Yu no mas lego! Sipos yu foldaon long fasin ya bakegen, samting ya i no min se ol hadwok blong yu blong kamgud moa i blong nating nomo. Wajtaoa blong Febuwari 15, 1954, i talem ol nambawan tok blong leftemap tingting, i se: “Yumi [save] harem nogud mo foldaon plante taem long wan nogud fasin blong laef blong yumi bifo, we yumi no bin luksave se i bigwan. Tingting blong yumi i no mas foldaon. Yu no mas ting se yu mekem sin ya we God i no save fogivim. Setan i wantem se yu gat tingting olsem. Taem yu harem nogud mo yu harem se yu gat poen long fes blong God, samting ya i pruvum se yu no bin mekem sin ya we God i no save fogivim. Yu no mas kam taed blong prea oltaem long God wetem tingtingdaon, mo askem hem wetem fulhat blong yu blong i fogivim yu, i mekem yu yu klin mo i halpem yu. Nating se sem slak fasin ya i winim yu plante taem, go kolosap long Jeova olsem wan pikinini we i go kolosap long papa blong hem taem i kasem trabol, mo bambae Hem i givhan long yu from gladhat mo kaen fasin blong hem. Sipos yu rili askem wetem fulhat blong yu, bambae hem i mekem we tingting blong yu i no moa jajem yu.”

Taem Yumi Harem Se Yumi No Mekem Inaf

11. (a) ?Wanem filing we yumi mas gat long saed blong wok blong talemaot Kingdom? (b) ?Wanem filing long saed blong wok blong prij we samfala Kristin oli stap traehad blong winim?

¹¹ Wok blong talemaot Kingdom i wan impoten haf long laef blong wan Kristin, mo taem hem i joen long wok ya, hem i kasem glad. (Ol Sam 40:8) Be sam Kristin oli harem se oli gat poen long fes blong God, from we oli no save mekem moa long wok blong prij. Filing ya i save spolem glad blong yumi, nao yumi no moa gohed. Bambae yumi gat tingting se Jeova i luk yumi olsem we neva yumi mekem inaf. Tingbaot ol filing ya we samfala oli traem blong winim.

Wan Kristin sista, we hem mo hasban blong hem, tufala i stap traehad blong trenemgud trifala pikinini blong tufala, i raetem se: “?Yu yu save hamas haoa yu westem from fasin pua? Mi mas sevem evri samting we mi save sevem. Samting ya i minim se mi mas spenem taem blong lukaot klos long ol sekenhan stoa, ol stoa we oli katem praes blong olting, mo tu mi mas somap ol klos. Mo evri wik, mi spenem wan no tu haoa blong katem ol kad we oli givim raet long ol man blong pem kakae long jip praes, mi putum ol kad ya long stret oda mo mi go salem no jenisim olgeta wetem sam narafala. Samtaem, mi harem se mi gat poen, taem mi mekem ol samting ya. Mi gat tingting se ol taem ya, mi mas spenem long wok blong prij.”

Wan sista we i gat fo pikinini mo hasban blong hem i no stap long trutok, i talem se: “Mi ting se lav blong mi long Jeova i no naf. Taswe mi traehad long wok we mi stap mekem i go long Jeova. Mi traehad tumas, be oltaem, mi harem se mi no mekem inaf. Yu luk, long filing blong mi, mi harem se mi nating nomo, taswe mi no save tingbaot se Jeova bambae i glad long wok we mi mekem long hem.”

Wan Kristin we i no moa save mekem wok blong prij fultaem i talem se: “Mi harem nogud tumas from mi stap tingting se mi brekem promes blong mi blong mekem wok blong Jeova fultaem. !Yu no save tingbaot olsem wanem tingting blong mi i foldaon! Naoia, mi krae yet taem mi tingbaot samting ya.”

12. ?From wanem sam Kristin we oli no save mekem moa long wok blong prij oli harem se oli gat poen long fes blong God?

¹² I stret nomo we man i wantem mekem wok blong Jeova fulwan olsem we hem i naf blong mekem. (Ol Sam 86:12) ?Be from wanem plante oli harem se oli gat poen long fes blong God, taem oli no save mekem moa? I luk olsem se samfala oli gat filing ya from oli harem se oli nating nomo. Maet oli harem olsemia from sam nogud samting we oli kamaot long laef blong olgeta. Sam narafala, oli harem se oli gat poen long fes blong God from rong tingting long saed blong samting we Jeova i askem long yumi. Wan Kristin i talem se: “Mi harem se, sipos mi wok gogo mi no moa gat paoa, mi no mekem inaf yet.” From samting ya, hem i putum ol mak we oli hae tumas. Mo biaen, hem i harem nogud moa from we hem i no naf blong kasem ol mak ya.

13. ?Jeova i wantem we yumi mekem wanem?

¹³ ?Jeova i askem wanem long yumi? Blong talem klia, Jeova i wantem se yumi mekem wok blong hem wetem fulhat blong yumi. Hem i wantem se yumi mekem wanem we yumi naf blong mekem, i dipen long ol samting long laef blong yumi wanwan. (Kolosi 3:23) Be maet samting we yumi wantem mekem i defren olgeta long samting we yumi naf blong mekem. Maet sam samting i blokem yumi, olsem yumi olfala, yumi sik, yumi no strong long bodi, mo ol wok long famle. Be, taem yumi mekem olgeta samting we yumi naf blong mekem, yumi save sua se yumi stap mekem wok blong Jeova wetem ful laef blong yumi. Yes, yumi wok wetem ful laef blong yumi, sem mak olsem wan man we i naf blong mekem fultaem paenia from we helt mo ol samting long laef blong hem oli gud.​—Matyu 13:​18-23.

14. ?Sipos yu wantem se wan man i halpem yu blong traem faenemaot wanem we yu naf blong mekem, yu mas mekem wanem?

¹⁴ ?Nao, olsem wanem blong faenemaot wanem samting we yu yu naf blong mekem? Maet i gud blong tokbaot bisnes ya wetem wan Kristin fren we i bigman long saed blong speret, mo we yu trastem hem. Maet hem i wan elda, no maet hem i wan sista we i mekem wok blong Jeova plante yia finis, we i savegud ol fasin blong yu, ol samting we yu no naf blong mekem, mo ol wok blong yu long famle. (Proveb 15:22) Tingbaot se, God i no luk ol haoa we yu mekem long wok blong talemaot gud nyus olsem samting we i mekem yu yu kam wan nambawan man long tingting blong hem. Long tingting blong Jeova, olgeta man blong hem oli gud tumas. (Hagae 2:7; Malakae 3:​16, 17) Wanem we yu mekem long wok blong prij, maet i antap moa no i daon moa long samting we ol narafala oli mekem. Be Jeova i glad long hem, sipos hem i bes blong yu. Mo yu no nid blong harem se yu gat poen long fes blong God.​—Galesia 6:4.

Taem Yumi Mas Mekem Plante Samting

15. ?Olsem wanem ol elda long kongregesen oli stap mekem plante samting?

¹⁵ Jisas i talem se: “Man we God i givim plante samting long hem, God i wantem blong man ya i mekem plante samting.” (Luk 12:48) I tru, “God i wantem” se olgeta we oli stap wok olsem elda long kongregesen oli mekem plante samting. Olsem Pol, oli givim taem mo paoa blong olgeta blong givhan long kongregesen. (2 Korin 12:15) Oli mas rerem ol tok, visitim ol brata mo sista blong leftemap tingting, mo mekem ol kot komiti. Antap long ol samting ya, oli mas lukaot long prapa famle blong olgeta. (1 Timote 3:​4, 5) Sam elda oli bisi tu blong givhan blong bildim ol Haos Kingdom, wok long ol Komiti Blong Givhan Long Ol Wetnes Long Hospital, mo givhan long ol smol asembli mo ol bigfala asembli. Taem ol man ya oli stap yusum ful laef blong olgeta blong wok strong olsem, ?olsem wanem oli save blokem fasin blong kam taed from ol hadwok ya?

16. (a) ?Jetro i talem wanem gudfala advaes long Moses? (b) ?Wanem fasin i save halpem wan elda blong no fraet blong givim sam wok long ol narafala?

¹⁶ Moses, wan man we tingting blong hem i stap daon, i kam taed blong stretem ol problem blong ol narafala. Nao palika blong hem, Jetro, i talem wan rod we i save wokgud: givim sam wok long ol narafala man we oli nafgud. (Eksodas 18:​17-26; Namba 12:3) Proveb 11:2 i talem se: “Waes i stap wetem ol man we tingting blong olgeta i stap daon.” Blong gat tingting we i stap daon, i minim se yu mas luksave mo akseptem ol samting we yu no naf blong mekem. Man we tingting blong hem i stap daon, hem i rere blong givim wok long ol narafala. Mo hem i no fraet se maet ol samting oli no rongud sipos hem i givim sam wok long ol narafala we oli nafgud.b (Namba 11:​16, 17, 26-29) Defren olgeta, hem i wantem tumas blong halpem ol narafala blong oli gru long saed blong speret.​—1 Timote 4:15.

17. (a) ?Olsem wanem olgeta evriwan long kongregesen oli save mekem se wok blong ol elda i no kam hevi tumas? (b) ?Olsem wanem ol waef blong ol elda oli no tingbaot olgeta fastaem, mo olsem wanem yumi save soem long olgeta se yumi no ting nating long fasin ya we oli mekem?

¹⁷ Olgeta evriwan long kongregesen oli save givhan bigwan blong mekem se wok blong ol elda i no hevi tumas. Taem oli kasem save se ol elda oli mas lukaot long prapa famle blong olgeta tu, bambae oli no askem plante tumas samting long olgeta we i mekem se oli yusum tumas taem mo paoa blong olgeta. Bambae oli no ting nating long fasin blong ol waef blong ol elda we oli no tingbaot olgeta fastaem, be oli rere blong lego taem we oli save spenem wetem hasban blong olgeta, blong hem i givhan moa long kongregesen. Wan mama we i gat tri pikinini mo hasban blong hem i stap wok olsem wan elda, i eksplenem se: “Samting we mi neva toktok smol from, hemia ol wok we mi glad blong mekem raonabaot long haos blong givhan long hasban blong mi, nao hem i save wok olsem wan elda. Mi save se Jeova i stap blesem famle blong mifala bigwan from wok we hem i mekem. Mo mi no kam kros from taem mo paoa we hem i givim. Be i tru se, plante taem, mi nomo mi mas mekem bighaf blong wok blong klinim yad mo stretem ol pikinini blong mitufala, from we hasban blong mi i bisi tumas.” Sore tumas, sista ya i faenem se samfala oli no luksave ol bigfala wok we hem i mas mekem, be oli girap, oli sakem ol tok we oli no kaen nating, olsem, “?From wanem yu no stap mekem wok blong paenia?” (Proveb 12:18) !I nogud blong daonem narafala from samting we hem i no naf blong mekem! !I moa gud blong presem hem from ol gudfala samting we hem i stap mekem!​—Proveb 16:24; 25:11.

From We En i No Kam Yet

18, 19. (a) ?From wanem i no taem naoia blong stop long resis ya blong kasem laef we i no save finis? (b) ?Wanem advaes we aposol Pol i givim long stret taem long ol Kristin long Jerusalem?

¹⁸ Taem wan man blong resis i save se hem i kam kolosap long en blong wan longfala resis, bambae hem i no stop. Maet bodi blong hem i no moa gat paoa​—hem i taed, hem i hot bitim mak, mo hem i tosta. Be taem hem i kolosap tumas long en blong resis, i no taem blong stop. I sem mak, yumi ol Kristin, yumi stap resis blong kasem laef we i no save finis. Mo kolosap nao bambae yumi kasem en blong resis ya. !Naoia i no taem blong stop!​—Skelem wetem 1 Korin 9:24; Filipae 2:16; 3:​13, 14.

¹⁹ Ol Kristin long faswan handred yia oli fesem sem samting. Samwe long yia 61 K.T., aposol Pol i raet long ol Kristin long Jerusalem. Taem i stap pas kwik​—‘ol rabis man we oli stap laef’ long taem ya, ol man Jyu we oli tanem baksaed long trufala wosip, kolosap bambae oli ‘lus.’ Ol Kristin, antap moa olgeta we oli stap long Jerusalem, oli mas lukaotgud, mo oli mas stap tru long God. Oli mas ronwe long taon taem oli luk se ol soldia oli kam plante raonabaot long hem. (Luk 21:​20-24, 32) Ale, tabu speret i pusum Pol blong givim advaes ya long stret taem, se: ‘Yufala i no mas kam taed mo lego.’ (Hibrus 12:3) Long vas ya, aposol Pol i yusum tufala strong tok ya: “kam taed” (kaʹmno) mo “lego” (e·klyʹo·mai). Wan man blong stadi dip long Baebol i talem se, “Aristotle i yusum,” tufala Grik wod ya, “blong tokbaot ol man blong resis we oli slakem bodi blong olgeta mo foldaon afta we oli kasem en blong resis. Ol man we oli ridim [leta blong Pol] oli no finisim resis ya yet. Oli no mas stop, bifo we oli kasem en blong resis ya. Oli no mas kam slak mo foldaon from we oli taed. Wantaem bakegen, hem i mekem olgeta oli tingbaot se oli nidim blong gohed, nating se oli fesem ol hadtaem.”

20. ?From wanem advaes we Pol i givim i stret long taem blong yumi tede?

²⁰ !Advaes ya we Pol i givim i stret long taem blong yumi tede! Taem yumi fesem ol hadtaem we oli stap kam plante moa, maet i gat sam taem we yumi harem olsem wan man blong resis we i kam taed, we ol leg blong hem kolosap oli no moa naf blong karem hem. !Be from we yumi kolosap tumas long en blong resis, yumi no mas stop! (2 Kronikel 29:11) Enemi blong yumi, “laeon we i stap singaot bigfala,” i wantem se yumi stop. Yumi glad tumas se Jeova i mekemrere ol samting we oli givim paoa “long olgeta we oli taed.” (Aesea 40:29) Long nekis haf, bambae yumi tokbaot ol samting ya we Jeova i mekemrere mo olsem wanem yumi save yusum olgeta.

[Ol futnot]

?Wanem Ansa Blong Yu?

◻ ?Olsem wanem blong no lego taem ol narafala oli mekem tingting blong yumi i foldaon no oli mekem yumi harem nogud?

◻ ?Blong mekem se yumi no lego, wanem stret tingting we yumi mas gat long saed blong fasin blong gat poen long fes blong God?

◻ ?Wanem samting we Jeova i wantem se yumi mekem?

◻ ?Olsem wanem tingting daon i save halpem ol elda long kongregesen blong no kam taed?

◻ ?From wanem advaes blong Pol long Hibrus 12:3 i stret long yumi tede?