!Yu Luk, Ol Man We Oli Stap Strong Oltaem!

“?Jeova, hu man i no save fraet long yu, mo givim ona long nem blong yu, from we yu nomo yu stap strong oltaem?”​—REVELESEN 15:​4, NW.

1. ?J. F. Rutherford i givim wanem tok long saed blong fasin blong stap strong oltaem we C. T. Russell soemaot?

JOSEPH F. RUTHERFORD, we i kam olsem presiden blong Watch Tower Society afta long C. T. Russell long 1917, i statem sevis blong berem Russell, olsem se: “Charles Taze Russell i stap strong oltaem long God, long Jisas Kraes, mo long ol wok blong kingdom blong Mesaea. Hem i stap strong wetem fulwan laef blong hem​—yes, kam kasem ded blong hem.” Tru tumas, hemia i rili wan nambawan tok we yumi save talem blong givim ona long wan man blong wok blong Jeova God we i holemstrong bilif. I no gat wan narafala tok blong givim ona we i bigwan moa i bitim hemia we yumi talem se, hem i winim ol bigfala traem long fasin blong stap strong oltaem. Yes, hem i stap strong oltaem​—hem i stap strong wetem fulwan laef blong hem.

2, 3. (a) ?From wanem fasin blong stap strong oltaem i wan bigfala traem? (b) ?Hu bakegen i stap agensem ol trufala Kristin we oli stap traehad blong stap strong long God oltaem?

² I no isi nating blong stap strong long God oltaem. ?From wanem? From we fasin blong stap strong long God oltaem i stap faet agensem fasin ya we man i tingbaot hem wan nomo. Ol lida blong Krisendom, oli sam long ol stampa man we oli no stap strong long God nating. Mo tu, tede fasin ya blong no stap strong insaed long mared i kasem plante moa ples i bitim bifo. Fasin blong slip wetem hasban no waef blong narafala i stap olbaot. Fasin blong no stap strong insaed long bisnes tu i kam antap bigwan. Long saed ya, wan man i talem se: “Plante bos mo plante man we oli gat bigfala save long saed blong bisnes oli bilif se tede ol man we oli no gat hed mo oli no waes, olgeta nomo oli stap strong long wok blong olgeta.” Ol man oli ting nating long olgeta we oli “rili stap strong.” Presiden blong wan kampani we i lukaot long sam defren bisnes, i talem se: “Fastaem yu mas stap strong long yu wan nomo.” Be, sipos yumi tokbaot fasin blong stap strong long yumi wan, i olsem we yumi stap daonem mining blong tok ya. I mekem yumi tingbaot samting we Maeka 7:​2 i talem, se: “I no moa gat man long wol ya we i gat fasin blong stap strong oltaem.”

³ Long fasin we i bigwan moa, Setan mo ol rabis enjel blong hem oli stanap agensem yumi. Oli wantem mekem se yumi no stap strong long God. From samting ya Efesas 6:​12 i talem long ol Kristin, se: ‘Olgeta ya we yumi stap faet agens long olgeta, long laef ya blong yumi, oli no man. Yumi stap faet agens long ol haeman, mo ol lida blong ol rabis speret, ol jif blong ol rabis speret we oli stampa blong ol tudak long wol ya, mo ol rabis speret we oli stap olbaot long wol.’ Yes, yumi mas harem woning ya se: “Yufala i mas lukaot gud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.”​—1 Pita 5:8.

4. ?Wanem sam narafala samting we oli mekem se i no isi nating blong stap strong oltaem?

⁴ I gat wan narafala samting we i mekem se i no isi nating blong stap strong oltaem. Hemia fasin blong tingbaot yumi wan, we yumi kasem long papa mama blong yumi. Jenesis 8:​21 i tokbaot samting ya se: ‘Taem man i pikinini nomo, be tingting blong hem i stap finis long ol samting nogud’​—mo hem i tingbaot hem nomo. Yumi evriwan i gat sem problem we aposol Pol i gat. Hem i talem se: “Oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating.”​—Rom 7:​19.

Fasin Blong Stap Strong Oltaem Hem i Spesel

5, 6. ?Yumi save talem se fasin blong stap strong i olsem wanem, mo oli bin talem wanem mining blong hem?

⁵ “Fasin blong stap strong oltaem” i wan tok we i rili spesel. Taswe, buk ya Insight on the Scriptures i talem se: “I luk olsem we i no gat wan stret tok long Engglis blong talem fulwan mining blong tok ya folem Hibru mo Grik lanwis. Be, blong traem givim ful mining blong tok ya, oli joenem wetem fasin blong holem strong mo stap tru, taem oli tokbaot God mo wok blong hem.”a Wan taem, Wajtaoa i tokbaot mining blong “fasin blong stap strong oltaem,” i se: “Fasin blong stap tru, wok, lav, ol samting we man i mas mekem, mo fasin blong givim ona. ?Wanem samting i sem mak long ol defren tok ya? Oli ol defren haf blong talem fasin blong stap strong.” Yes, fasin ya blong stap strong i gat plante defren haf blong hem. I gud blong makem hamas taem long Baebol, oli joenem fasin blong stap strong oltaem wetem stret fasin.

⁶ Hemia sam narafala mining we oli givhan long yumi: ‘Fasin blong stap strong oltaem, hem i wan fasin blong stap tru mo ona we i gohed oltaem mo we man i save dipen long hem, from we hem i no save muf mo i stanap strong agensem ol traem.’ ‘Fasin blong stap strong oltaem i minim se man i stap tru long promes blong hem, i onagud oltaem long ol loa we ol man oli putumap mo ol rul we hem i harem se hem i mas folem. Tok ya i no minim nomo se man i mas stap strong. Hem i minim tu se man i agensem strong ol samting we oli save pulum hem mo mekem hem i lego fasin blong stap strong oltaem.’ Taswe, ol man we oli gohed blong stanap strong nating se oli kasem ol traem, fasin agens, no man i mekem i nogud long olgeta, yumi mas talem se oli man blong “stap strong oltaem.”

7. ?Long wanem rod, fasin blong stap strong i defren long fasin blong stap tru?

⁷ Be long saed ya, maet i gud blong talem wan pijatok blong soem olsem wanem fasin blong stap strong oltaem i defren long fasin blong stap tru. Long wes saed blong Yunaeted Stet, i gat wan spring wora we wora i stap sut aot long hem kolosap evri haoa. Hem i stap mekem olsem oltaem, taswe ol man oli kolem wora ya Ol Fetful (Old Faithful). Baebol i tokbaot sam samting we oli no gat laef, olsem mun, we i stap tru oltaem, from we yumi save dipen long hem. Ol Sam 89:37 i tokbaot mun se, ‘hem i stap oltaem long skae, i stap givim wetnes.’ Ol tok blong God oli stap tru oltaem. Revelesen 21:​5 i talem se: “Man ya we i stap sidaon long bigfala jea blong hem, hem i talem se ‘!Yu luk! Mi mi stap mekem olgeta nyufala samting.’ Nao hem i talem long mi bakegen, i se ‘Yu raetem tok ya, from we tok blong mi i tru, mo ol man oli save bilif long hem.’ ” Ol samting ya we yumi jes tokbaot oli stap tru oltaem, yumi save dipen long olgeta, be oli no gat fasin blong fasgud long wan samting no ol gudfala fasin, olsem fasin blong stap strong oltaem.

Jeova, Nambawan Man We i Stap Strong Oltaem

8. ?Baebol i talem wanem blong makemaot hemia we eksampel blong hem long fasin blong stap strong oltaem i nambawan olgeta?

⁸ I kliagud se, Jeova God i wan nambawan eksampel long fasin blong stap strong oltaem. Hem i stap strong long ol man oltaem, taswe hem i givim Pikinini blong hem blong mekem se ol man oli save kasem laef we i no save finis. (Jon 3:​16) Long Jeremaea 3:​12, yumi ridim se: “Hemia nao tok blong Jeova: ‘Yu kambak long mi, Isrel we i lego trufala wosip. Bambae mi no kam kros long yu, from we mi mi stap strong long yu oltaem.’ ” Revelesen 16⁠:5 i givim moa pruf se Jeova i stap strong oltaem, se: ‘Yu yu stap strong oltaem, yu stap bifo olgeta, mo yu stap naoia.’ Mo bakegen, Ol Sam 145:17, i talem long yumi se: ‘Fasin blong Jeova i stretgud, mo hem i stap strong oltaem long ol wok blong hem.’ Yes, Jeova i rili nambawan long fasin blong stap strong oltaem. Taswe Revelesen 15:4 i talem se: ‘?Hae God, hu man i no save fraet long yu? ?Hu man i no save ona long nem blong yu? Yu nomo yu stap strong oltaem.’ Jeova God i bitim evri man long fasin blong stap strong oltaem.

9, 10. ?Olsem wanem Jeova i soem se hem i stap strong oltaem, taem hem i wok wetem nesen blong Isrel?

⁹ Histri blong nesen blong Isrel i givim plante pruf se Jeova i stap strong oltaem long ol man blong hem. Long taem blong ol jaj, Isrel i lego tru wosip bakegen mo bakegen. Be plante taem, Jeova i sore long olgeta mo i sevem olgeta. (Jajes 2:​15-​22) Long olgeta fo handred yia we Isrel i gat king, Jeova i soemaot se hem i stap strong long nesen ya.

¹⁰ Fasin blong Jeova blong stap strong oltaem i mekem hem i gat longfala tingting long ol man blong hem. Yumi save luk samting ya long 2 Kronikel 36:15, 16 we i talem se: “Jeova, we i God blong ol bubu blong olgeta, i stap sanem ol man blong karem tok blong hem long olgeta. Hem i sanem bakegen, mo bakegen, from we hem i sore long ol man blong hem, mo long haos blong hem. Be olgeta oli laf long ol man ya blong karem tok blong tru God, mo oli tingbaot ol tok blong hem olsem nating nomo, mo oli jikim ol profet blong hem, gogo bigfala kros blong Jeova i kam antap agens long ol man blong hem, mo i no moa gat rod blong oli kamgud bakegen.”

11. ?Fasin blong Jeova blong stap strong oltaem i leftemap tingting blong yumi mo i mekem yumi sua long wanem samting?

¹¹ Jeova i nambawan tumas long fasin blong stap strong oltaem. Taswe, aposol Pol i save raetem tok we i stap long Rom 8:​38, 39, se: “Mi mi save finis we i no gat wan samting nating we i save tekemaot yumi long Kraes we hem i stap laekem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem. I no gat samting blong ples blong God, mo i no gat samting blong ples blong ol dedman, we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i laekem yumi ya tumas, we yumi joen long Jisas Kraes, Masta blong yumi.” Yes, Jeova i talem klia long yumi se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) !Yes, yumi haremgud tumas blong save se Jeova God i stap strong oltaem!

Jisas Kraes, Pikinini Blong God We i Stap Strong Oltaem

12, 13. ?Wanem samting i pruvum long yumi se Pikinini blong God i stap strong oltaem?

1² Bifo mo naoia, Jisas Kraes i stap folemgud nambawan eksampel blong Jeova. Hem i stap strong oltaem, taem hem i fesem ol traem. I stret nomo we aposol Pita i yusum tok blong Ol Sam 16:10 blong tokbaot Jisas Kraes long Ol Wok 2:​27, i se: ‘Bambae yu no save livim sol blong mi long Hades, bambae yu no livim hemia we i stap strong long yu oltaem blong i lus blong olwe.’ Jisas i stret blong karem nem ya se ‘hemia we i stap strong oltaem.’ Long evri samting, hem i stap strong long Papa blong hem mo long Kingdom we God i promes long hem. Fastaem, Setan i yusum ol traem mo ol samting we man i intres long hem, blong traem brekem fasin blong Jisas blong holem strong long God. Be Devel Setan i no win. From samting ya, hem i yusum raf fasin, nao ol man oli kilim Jisas i ded long wan pos. Jisas i neva lego fasin blong hem blong stap strong long Papa blong hem long heven, Jeova God.​—Matyu 4:​1-​11.

¹³ Jisas Kraes i stap strong long ol man blong hem oltaem. Hem i folem promes blong hem we i stap long Matyu 28:​20, se: “Yufala i mas save, bambae mi mi stap wetem yufala oltaem, gogo wol ya i finis.” Blong mekem promes ya i kamtru, hem i bin lidimgud kongregesenb blong hem stat long Pentekos 33 K.T.c i kam kasem tede.

Ol Sinman We Oli Stap Strong Oltaem

14. ?Job i soem wanem eksampel long fasin blong stap strong long God oltaem?

¹⁴ Nao, ?olsem wanem long ol sinman? ?Oli save stap strong long God oltaem? Yumi save luk nambawan eksampel blong Job. Fasin blong Job blong stap strong long God oltaem i kam kliagud, taem Setan i traem hem. ?Job i stap strong long Jeova God, mo i stap mekem wok blong God jes from we hem i wantem kasem sam samting? No gat. Setan i tok flas se hem i save pulum Job i aot long saed blong Jeova sipos hem i mekem Job i kasem trabol. Taem Job i lusum olgeta samting blong hem, olgeta pikinini blong hem, mo i kasem sik, waef blong hem i talem strong long hem se: “!I moagud yu tok nogud long nem blong God, mo yu ded!” Be Job i stap strong long God oltaem from we hem i talem long woman blong hem se: “ ‘Yu yu toktok olsem wan long ol krangke woman we i stap toktok. ?I stret we yumi save akseptem ol gudfala samting long trufala God mo yumi no save akseptem ol nogud samting long hem tu?’ Long ol samting ya, Job i no mekem sin wetem maot blong hem.” (Job 2:​9, 10) Mo tu, Job i talem long ol man ya we oli gyaman se oli kam blong leftemap tingting blong hem, se: “Nating se hem [God] i kilim mi mi ded, be bambae mi mi gohed blong putum tingting blong mi i strong long hem.” (Job 13:15, New International Version) !Yumi no sapraes se Jeova i glad tumas long Job! Taswe, Jeova i talem long Elifas, man Temanaet, se: “Mi mi kros tumas long yu mo tufala fren blong yu, from we yufala i no stap tokbaot mi long fasin we i tru olsem man blong mi Job i stap mekem.”​—Job 42:​7, 10-​16; Jemes 5:​11.

15. ?Wanem pruf long Baebol i soemaot long yumi se plante man blong Jeova God oli gat fasin blong stap strong oltaem?

¹⁵ Olgeta man mo woman blong bilif we Hibrus japta 11 i tokbaot, yumi save talem se oli stap strong long God oltaem. Oli stap tru long God be tu, oli stap strong long hem taem oli fesem ol hadtaem. Olsem nao, yumi ridim se olgeta “oli stap bilif long God, taswe . . . oli blokem ol laeon, blong ol laeon oli no kam kakae olgeta, samtaem oli kilimdaon faea we i laet i strong tumas, mo samtaem oli ronwe long ol man we oli wantem kilim olgeta long naef blong faet . . . Sam man olsem, we oli stap bilif long God, ol man oli stap laf nogud long olgeta, mo oli stap wipim olgeta. Mo sam narafala man olsem, ol man oli fasem olgeta long jen, oli putum olgeta long kalabus. Sam man olsem, ol man oli stonem olgeta long ol bigfala ston gogo oli ded, mo sam narafala, sam man oli tekem so, oli katem bodi blong olgeta long tu pis, blong kilim olgeta. Mo sam narafala, ol man oli kilim olgeta long naef blong faet. Sam narafala man olsem, oli stap wokbaot, we oli no gat klos blong olgeta, oli jes putum ol skin blong sipsip mo nani nomo. Oltaem oli stap trabol gud, mo ol man oli stap ronem olgeta, oli stap mekem i nogud long olgeta.”​—Hibrus 11:33-​37.

16. ?Aposol Pol i givim wanem eksampel long fasin blong stap strong oltaem?

¹⁶ Kristin Grik haf blong Baebol tu i givim nambawan eksampel blong aposol Pol. I stret nomo we hem i talem stret long ol Kristin long Tesalonaeka long saed blong wok blong God we hem i stap mekem, se: ‘Yufala i wetnes blong mifala, mo God tu i wetnes, se fasin ya we mifala i stap strong long yufala we i bilif long Kraes, hem i klin, i stretgud, i no gat man nating we i gat poen agens long mifala.’ (1 Tesalonaeka 2:​10) Long 2 Korin 6⁠:​4, 5, yumi luk sam moa pruf we oli soem se Pol i stap strong long God oltaem. Yumi ridim se: “Long olgeta samting we mifala i mekem, mifala i stap soemaot we mifala i man blong wok blong God. Mifala i gat trabol, mifala i gat hadtaem, mifala i stap harem nogud tumas, be tingting blong mifala i stap gud, i no foldaon. Long sam ples ol man oli wipim mifala, long sam ples oli putum mifala long kalabus, mo long sam ples oli raon long mifala blong ronem mifala. Mifala i hadwok we i bitim mak, we mifala i no gat taem blong slip mo kakae.” Olgeta samting ya oli pruvum se aposol Pol i gat respek long hem wan from we hem i stap strong long God oltaem.

Ol Man We Oli Stap Strong Oltaem Long Taem Blong Yumi

17. ?J. F. Rutherford i talem wanem tok we i soemaot se hem i gat strong tingting blong stap strong oltaem?

¹⁷ Long taem blong yumi, i gat nambawan eksampel we yumi luk finis long faswan paragraf blong stadi ya. Makemgud samting we buk ya Worldwide Security Under the “Prince of Peace,” i talem long pej 146, aninit long smol stampa tok ya “Stap Strong Oltaem Long God Long Kalabus.” Haf ya i talem se: “Presiden blong Watch Tower Society, Joseph F. Rutherford, i soemaot se hem i stap strong long ogenaesesen blong Jeova oltaem taem hem i stap long kalabus. Long Desemba 25, 1918, hem i raetem se: ‘Oli putum mi long kalabus from we mi no wantem agri wetem Babilon, be mi strong blong mekem wok blong Masta blong mi, mo mi tangkyu from samting ya. . . . Mi mi wantem moa se mi stap kalabus mo mi luk se God i glad mo i agri long mi, i bitim we mi agri mo folem wael anamol, mo mi kamaot long kalabus blong fulwol i glad long mi.’ ”d

18, 19. ?Wanem sam nambawan eksampel tede long fasin blong stap strong long God oltaem?

¹⁸ Plante narafala Kristin we oli stanap strong taem ol man oli mekem i nogud long olgeta, oli soem nambawan eksampel long yumi long fasin blong stap strong long God oltaem. Sam long ol Kristin ya, hemia ol Wetnes blong Jeova long Jemani long taem blong rul blong Nasi. Eksampel blong olgeta i klia taem yu lukluk video kaset ya, Purple Triangles, we oli seremaot plante long Engglis lanwis. Mo tu, i gud blong makem eksampel blong plante Wetnes blong Jeova we oli stap strong long God long Afrika, olsem olgeta long Malawi. Long ples ya, wan gad blong kalabus i tokbaot fasin blong ol Wetnes blong stap strong long God oltaem, i se: “Bambae oli neva lego bilif blong olgeta. Namba blong olgeta i stap kam antap nomo.”

¹⁹ Taem ol man oli ridim ol Yearbook of Jehovah’s Witnesses we oli jes kamaot i no longtaem, oli sapraes tumas long fasin blong stap strong long God oltaem we ol trufala Kristin long ol defren ples, olsem long Gris, Mosambik, mo Polan oli soemaot. Plante long olgeta, ol man oli mekem oli harem nogud bigwan. Sam narafala, ol man oli kilim olgeta oli ded. Long Yearbook blong 1992, i gat wan pija long pej 177 we i soem naen Kristin man Itiopia we oli fesem ol traem long fasin blong stap strong long God oltaem, gogo kasem we oli ded from. Yumi ol Wetnes blong Jeova, yumi glad tumas long plante nambawan eksampel we oli givim paoa long yumi blong winim ol traem long fasin blong stap strong long God oltaem, ?i tru no?

20. ?Bambae yumi kasem wanem frut sipos yumi stap strong oltaem?

²⁰ Taem yumi stap strong long God mo winim ol traem mo ol hadtaem, yumi stap bildimap respek we yumi gat long yumi wan. Nao, ?yumi wantem stap strong oltaem long saed blong hu? !Taem yumi winim ol traem long fasin blong stap strong long God oltaem, hemia i min se yumi stap long saed blong Jeova God, mo yumi pruvum se Devel Setan i rabis, mo i wan man blong gyaman stret! Olsem nao, Man we i Wokem yumi, Jeova God, i glad long yumi mo yumi save kasem praes ya blong laef we i no save finis we i fulap long glad. (Ol Sam 37:29; 144:15b) Long nekis stadi bambae yumi tokbaot ol samting we yumi nidim blong winim ol traem long fasin blong stap strong long God oltaem.

[Ol futnot]

?Bambae Yu Ansa Olsem Wanem?

◻ ?From wanem fasin blong stap strong oltaem i wan bigfala traem?

◻ ?From wanem yumi save talem se fasin blong “stap strong oltaem” i wan spesel tok?

◻ ?Baebol i talem wanem eksampel long saed blong ol sinman we oli stap strong long God oltaem?

◻ ?Wanem sam gudfala eksampel long taem blong yumi we oli soem fasin blong stap strong oltaem?

[Tok Blong Pija Long Pej 11]

Charles Taze Russell

[Tok Blong Pija Long Pej 12]

Jisas i rili “hemia we i stap strong” long Jeova oltaem

[Tok Blong Pija Long Pej 13]

Job, nating se hem i wan sinman, i pruvum se hem i stap strong long God oltaem

[Tok Blong Pija Long Pej 14]

Pol i soemaot wan nambawan eksampel long fasin blong stap strong long Jeova oltaem