Wok Wetem Fasin Blong Stap Tru Long Ogenaesesen Blong Jeova

“Man we i stap tru long yu, bambae yu yu stap kolosap long hem.”​—2 SAMUEL 22:26.

1, 2. ?Wanem sam eksampel blong fasin blong stap tru we yumi save luk long kongregesen?

LET long naet, wan elda i stap mekemrere wan tok blong givim long Kristin miting. Hem i glad sipos hem i save stop mo spel. Be hem i gohed blong wok, i lukaot ol store mo pijatok long Baebol, we oli save kasem hat mo leftemap tingting blong olgeta long kongregesen.a Long naet blong miting, wan papa mama long sem kongregesen ya, tufala i taed, tufala i glad sipos tufala i save stap spel long haos nomo. Be wetem longfala tingting, tufala i mekemrere ol pikinini blong tufala mo oli go long miting. Afta long miting, wan grup blong ol Kristin oli storeyan long saed blong tok blong elda ya. Wan sista i wantem talem se brata ya i bin spolem filing blong hem wan taem. Be hem i no mekem olsem, hem i tokbaot wan poen we hem i laekem long tok blong brata ya. ?Yu yu luk samting we i sem mak long ol store ya?

² Hemia fasin blong stap tru. Elda ya i wok wetem fasin blong stap tru, blong givhan long ol man blong God. From we papa mama ya i gat fasin ya blong stap tru, tufala i go long ol miting blong kongregesen. Sista ya i sapotem ol elda wetem fasin blong stap tru. (Hibrus 10:24, 25; 13:17; 1 Pita 5:2) Yes, long olgeta haf blong laef, yumi luk se ol man blong God oli gat strong tingting blong wok wetem fasin blong stap tru long ogenaesesen blong Jeova.

3. ?From wanem i impoten tumas blong stap tru long ogenaesesen blong Jeova long wol ya?

³ Taem Jeova i lukluk i kamdaon long rabis wol ya, hem i no faenem plante man we oli gat fasin ya blong stap tru. (Maeka 7:2) !Ating hat blong hem i fulap long glad taem hem i luk se ol man blong hem oli gat fasin ya blong stap tru! Yes, fasin blong yu blong stap tru i mekem hem i haremgud tumas. Be, fasin ya blong yu bambae i mekem faswan rebel ya Setan i kros tu, from we i pruvum se hem i man blong gyaman stret. (Proveb 27:11; Jon 8:​44) Yu mas luksave se Setan bambae i traem spolem fasin blong yu blong stap tru long Jeova mo long ogenaesesen blong Hem long wol ya. Bambae yumi lukluk sam rod we Setan i stap yusum blong mekem olsem. Nao bambae yumi save luk moa klia olsem wanem blong stap tru go kasem en.​—2 Korin 2:​11.

Lukluk Ol Slak Fasin Nomo i Save Spolem Fasin Blong Stap Tru

4. (a) ?From wanem i isi blong lukluk ol slak fasin blong olgeta we oli lidim yumi? (b) ?Olsem wanem Kora i soem se hem i no stap tru long ogenaesesen blong Jeova?

⁴ Taem wan brata i gat bigfala wok insaed long kongregesen, ating i isi moa blong luk ol slak fasin blong hem. !I isi tumas blong daonem brata blong yumi from ‘wan smosmol pis wud we i stap long ae blong hem, be yumi no luk bigfala timba we i stap long ae blong yumi’! (Matyu 7:​1-5) Sipos yumi stap lukluk ol slak fasin blong narafala oltaem, samting ya i save spolem fasin blong yumi blong stap tru. Blong soemaot samting ya, tingbaot olsem wanem Kora i defren long Deved. Kora i karem plante bigfala wok, mo ating hem i bin stap tru long God blong plante yia finis, be biaen, hem i traem kam hae moa long ol narafala. Hem i stat harem nogud long Moses mo Eron, tufala kasen brata blong hem, from we tufala i stap lidim olgeta. Nating se Moses i gat tingtingdaon i bitim ol narafala man, Kora i stat lukaot ol slak fasin blong hem. Ating hem i faenem sam. Be ol slak fasin ya oli no wan gudfala risen blong Kora i no moa stap tru long ogenaesesen blong Jeova, olsem hem i bin mekem. Hem i lusum laef blong hem long fored blong ol man long kongregesen.​—Namba 12:3; 16:11, 31-​33.

5. ?From wanem maet Deved i bin harem se hem i wantem rebel agensem Sol?

⁵ Deved we i wok aninit long King Sol, i defren. Fastaem Sol i wan gudfala king, be hem i kam nogud. Deved i nidim bilif, fasin blong stanap strong, mo waes, blong laef tru long ol fasin agens blong Sol we i jelas. Taem Deved i gat jans blong givimbak, hem i talem se, ‘folem tingting blong Jeova, hem i no save’ mekem wan samting we i soem se hem i no stap tru long man ya we Jeova i putumap hem.​—1 Samuel 26:11.

6. Nating se yumi luk ol slak fasin mo ol rong blong ol elda, ?yumi neva mas mekem wanem?

⁶ Taem i luk olsem se samfala we oli lidim yumi oli no mekem gudfala disisen, oli tok strong, no oli mekem i moa gud long wan man i bitim narawan, ?yumi toktok smol agensem olgeta, mo mekem fasin blong toktok agens i kamaot insaed long kongregesen? ?Yumi no moa go long ol Kristin miting blong soem se yumi no agri wetem brata ya? !No gat! Olsem Deved, yumi neva letem ol slak fasin blong narafala i pusum yumi blong no moa stap tru long Jeova mo ogenaesesen blong hem.​—Ol Sam 119:165.

7. ?Wanem sam nogud fasin we oli kamaot long haos prea long Jerusalem, mo wanem filing blong Jisas long saed ya?

⁷ Jisas Kraes i nambawan eksampel blong man we i stap tru oltaem. Profet tok i talem se hem i wan man we i ‘stap tru’ long Jeova. (Ol Sam 16:10) Be, taem ol man oli yusum haos prea long Jerusalem long nogud fasin, ating i no isi long Jisas blong stap tru long fasin blong wosip long haos prea ya. Jisas i save se wok blong hae pris mo ol sakrifaes, oli pija blong minista wok mo ded blong hem. Mo hem i save se i impoten tumas we ol man oli lanem plante samting taem oli stap lukluk ol wok ya long haos prea. Taswe Jisas i kros tumas, mo hem i gat raet blong kros, taem hem i luk se haos prea i kam olsem wan “ples blong haed blong ol man blong stil.” Tu taem, hem i yusum paoa we God i givim long hem blong ronemaot ol man nogud long haos prea ya.b​—Matyu 21:12, 13; Jon 2:​15-​17.

8. (a) ?Olsem wanem Jisas i soem se hem i stap tru long fasin blong wosip long haos prea? (b) ?Olsem wanem yumi save soem se yumi glad blong wosipim Jeova wetem klin ogenaesesen blong hem?

⁸ Nating se i olsem, Jisas i stap tru long fasin blong wosip long haos prea. Stat taem hem i pikinini, hem i go long ol lafet long haos prea, mo plante taem, hem i tijim ol man long ples ya. Hem i pem takis blong haos prea tu​—nating se hem i no nidim blong mekem olsem. (Matyu 17:24-​27) Jisas i presem wan widowoman we i pua, from we hem i putum olgeta ‘mane we i blong pem kakae blong hem’ i go long bokis blong mane long haos prea. Smoltaem biaen, Jeova i sakemaot haos prea ya blong olwe. Be go kasem taem ya, Jisas i stap tru long fasin blong wosip long haos prea ya. (Mak 12:41-​44; Matyu 23:38) Tede, ogenaesesen blong God long wol ya i moagud bigwan i bitim fasin blong wosip blong ol man Jyu wetem haos prea blong olgeta. I tru se, ogenaesesen ya tede i no stretgud olgeta. Taswe, sam samtaem i gat sam jenis i kamaot. Be ogenaesesen ya i no fulap long nogud fasin, mo Jeova God bambae i no sakemaot hem mo putum wan narafala samting long ples blong hem. Yumi neva mas letem ol slak fasin we yumi luk long ol man long ogenaesesen ya oli mekem yumi harem nogud tumas, no pusum yumi blong lukaot ol mastik mo toktok smol agens long hem. I moa gud we yumi folem fasin blong Jisas blong stap tru oltaem.​—1 Pita 2:​21.

Ol Prapa Slak Fasin Blong Yumi

9, 10. (a) ?Olsem wanem wol blong Setan i yusum ol slak fasin blong yumi blong pulum yumi blong no moa stap tru long God? (b) ?Sipos wan man i mekem wan bigfala sin, hem i mas mekem wanem?

⁹ Mo tu, Setan i save yusum ol slak fasin blong yumi blong traem leftemap fasin blong no stap tru. Wol blong Setan i gat paoa long ol slak fasin blong yumi, blong traem pulum yumi blong mekem samting we i nogud long tingting blong Jeova. Sore tumas, evri yia, plante taosen man oli foldaon long ol nogud fasin long saed blong seks. Samfala oli mekem fasin ya blong no stap tru i kam mowas, taem oli folem wan dabol laef. Oli stap gyaman se oli ol Kristin we oli gat strong bilif, be oli stap gohed blong mekem nogud. Wan yangfala woman we i ridim ol store long saed ya long “Ol Yangfala Oli Askem . . .” long Wekap! i raetem se: “Ol store ya oli olsem laef blong mi stret.” Long fasin haed, hem i stap fren wetem ol yangfala we oli no laekem Jeova. ?Wanem samting i kamaot from? Hem i raetem se: “Laef blong mi i kam nogud olgeta, mo ol elda oli mas stretem mi from nogud fasin we mi mekem long saed blong seks. Mi spolem fasin fren blong mi wetem Jeova, mo papa mama blong mi mo ol elda oli no moa trastem mi.”c

Lukluk Wekap! blong Desemba 22, 1993; Janewari 8, 1994; mo Janewari 22, 1994 (Engglis mo Franis).

¹⁰ Ol elda oli givhan long yangfala woman ya, nao hem i stat wok bakegen wetem fasin blong stap tru long Jeova. Be, sore tumas, plante narafala oli kasem trabol we i bigfala moa, mo samfala oli neva kambak insaed long kongregesen. !I moagud blong stap tru mo agensem ol samting blong rabis wol ya we oli save pulum yumi! Lesin long ol woning we Wajtaoa mo Wekap! i givim long saed blong ol rabis fren blong wol mo ol nogud pleplei. Yu no mas foldaon long ol nogud fasin we oli soem se yu no moa stap tru. Be sipos samting ya i hapen, yu mas neva gyaman se yu stap mekem i stret nomo. (Ol Sam 26:4) I moagud blong kasem help. Ol Kristin papa mama oli stap blong givhan long yu.​—Jemes 5:​14.

11. ?From wanem i rong we yumi ting se yumi nogud nating, mo wanem eksampel long Baebol i save givhan long yumi blong stretem tingting blong yumi?

¹¹ Ol slak fasin blong yumi oli save mekem wan narafala denja long yumi. Samfala we oli lego fasin blong stap tru long God mo mekem wan nogud samting, oli no moa traehad blong mekem Jeova i haremgud. Tingbaot se, Deved i mekem sam bigfala sin. Be, longtaem afta we Deved i ded, Jeova i tingbaot hem yet olsem wan man we i bin holemstrong long hem. (Hibrus 11:32; 12:1) ?From wanem? From we hem i neva stop blong traehad blong mekem Jeova i haremgud. Proveb 24:16 i talem se: “Wan stret man i save foldaon seven taem, be bambae hem i girap bakegen.” Maet yumi foldaon long sam smosmol sin taem yumi stap traehad blong winim wan slak fasin, yes, maet samting ya i hapen plante taem. Be i sua se, Jeova i save luk yumi yet olsem wan stret man sipos yumi gohed blong “girap” evri taem​—i minim se yumi tanem tingting blong yumi wetem fulhat blong yumi, mo yumi mekem wok blong Hem bakegen wetem fasin blong stap tru long Hem.​—Skelem wetem 2 Korin 2:7.

!Ol Fasin Blong No Stap Tru We Yumi No Save Luk!

12. Long saed blong ol Farisi, ?olsem wanem strong fasin mo fasin blong fas long ol loa i lidim olgeta blong no stap tru long God?

¹² Fasin blong no stap tru i save haed tu. !Maet yumi ting se hem i fasin blong stap tru! Eksampel, ating ol Farisi long taem blong Jisas oli ting se oli gat fasin blong stap tru long God.d Be, oli gat strong fasin mo oli mekem i strong tumas long ol narafala. Taswe, oli no luksave se wan man we i stap tru long God i defren long wan man we i strong blong folem ol loa blong man. (Skelem wetem Eklesiastis 7:​16.) Long rod ya, oli no stap tru long ol narafala man, oli no stap tru long bigfala tingting biaen long Loa we oli talem se oli stap tijim ol man long hem, mo oli no stap tru long Jeova hem wan. Jisas i defren, hem i stap tru long bigfala tingting biaen long Loa, we i stanap long lav. Taswe, hem i leftemap tingting blong ol man mo givim paoa long olgeta, olsem ol profet tok long saed blong Mesaea oli bin talemaot.​—Aesea 42:3; 50:4; 61:​1, 2.

13. (a) ?Olsem wanem ol Kristin papa mama oli save lego fasin blong stap tru? (b) ?From wanem ol papa mama oli no mas daonem, agensem, mo mekem i strong tumas long ol pikinini taem oli stretem olgeta?

¹³ Eksampel blong Jisas long saed ya i save givhan long ol Kristin we oli gat wok blong lidim narafala. Ol papa mama we oli gat fasin blong stap tru long God, oli save se oli mas stretem ol pikinini blong olgeta. (Proveb 13:24) Be oli meksua se oli no mekem ol yangfala blong olgeta oli harem nogud, from we oli stretem olgeta long fasin we i strong tumas taem oli kros, no from we oli stap daonem olgeta oltaem. Sipos wan pikinini i harem se hem i neva save mekem papa mama blong hem i glad, no se skul blong papa mama blong hem i mekem se tufala i stap lukaot ol rong blong hem mo daonem hem oltaem, hem i save harem nogud, mo biaen i save lego trufala bilif.​—Kolosi 3:​21.

14. ?Olsem wanem ol Kristin man blong lukaot long sipsip oli save stap tru long ol sipsip ya?

¹⁴ Long sem fasin, ol Kristin elda mo ol elda we oli goraon blong visitim ol kongregesen, oli luk ol problem mo denja we ol man blong God oli fesem. Nao oli givim advaes long stret taem olsem ol man blong lukaot long sipsip we oli stap tru long God. Oli meksua se oli save olgeta samting long saed blong wan bisnes fastaem, mo oli lukaotgud blong mekem ol advaes blong olgeta i stanap long Baebol mo long ol buk blong Sosaeti. (Ol Sam 119:105; Proveb 18:13) Mo tu, oli save se ol sipsip oli stap dipen long olgeta blong mekem oli strong mo givim kakae long olgeta long saed blong speret. Taswe, oli traehad blong folem Jisas Kraes, Gudfala Man blong lukaot long ol sipsip. Evri wik long ol Kristin miting, oli gohed blong tijim ol sipsip wetem fasin blong stap tru long God​—oli no daonem olgeta be oli givim paoa long olgeta mo mekem bilif blong olgeta i kam strong moa.​—Matyu 20:28; Efesas 4:​11, 12; Hibrus 13:20, 21.

15. ?Olsem wanem samfala long faswan handred yia oli soem se oli stap tru long ol samting we oli no stret?

¹⁵ Wan narafala fasin blong no stap tru long God we maet yumi no luksave, hemia sipos yumi stap tru long wan samting we i no stret. Fasin blong stap tru we Baebol i tokbaot, i minim se yumi no stap tru long wan narafala samting bitim we yumi stap tru long Jeova God. Long faswan handred yia, plante man Jyu oli strong bitim mak blong folem Loa blong Moses mo fasin blong wosip blong ol man Jyu. Be, stret taem blong Jeova i kamtru blong tekemaot blesing blong hem long stronghed nesen ya, mo putum i go long ol man Isrel long saed blong speret. Smol nomo blong ol man Jyu oli stap tru long Jeova mo agri long bigfala jenis ya. Samfala we oli wantem holemtaet fasin blong ol man Jyu, nating se oli trufala Kristin, oli gobak long samting we i olsem ‘masta blong olgeta bifo, i no gat paoa nating, mo i no save givim wan samting nating long olgeta.’ Hemia Loa blong Moses we Kraes i bin finisim.​—Galesia 4:9; 5:​6-​12; Filipae 3:​2, 3.

16. ?Taem sam jenis oli kamaot, ol man we oli stap tru long Jeova oli mekem wanem?

¹⁶ Ol man blong Jeova long taem blong yumi oli defren, oli soem fasin blong stap tru long Hem taem i gat jenis i kamaot. Sam samting oli stap jenis taem laet blong trutok i kam klia moa. (Proveb 4:​18) I no longtaem i pas, ‘slef we i stret mo waes’ i givhan long yumi blong stretem tingting blong yumi long saed blong mining blong tok ya, “ol man we oli stap laef naoia” long Matyu 24:​34, mo long saed blong taem we jajmen bambae i kamtru long “ol sipsip” mo “ol nani” olsem Matyu 25:31-​46 i tokbaot. Mo tu, hem i stretem tingting blong yumi long saed blong ol wok we gavman i askem yumi blong mekem we i no joen wetem ami. (Matyu 24:45) I sua se ol man blong apostasie bambae oli glad tumas sipos plante Wetnes blong Jeova oli holemtaet tingting blong bifo long ol poen ya, mo oli no wantem gohed moa long saed blong speret. Be samting ya i no hapen. ?From wanem? From we ol man blong Jeova oli stap tru long Hem.

17. ?Olsem wanem ol fren mo famle blong yumi oli save traem fasin blong yumi blong stap tru long God?

¹⁷ Maet fasin ya blong stap tru long samting we i no stret, i save kamaot tu long prapa laef blong yumi wanwan. Taem wan gudfala fren no wan memba blong famle blong yumi i jusum blong brekem ol rul blong Baebol, maet yumi no moa save se yumi mas stap tru long hu. Prapa filing blong yumi i pulum yumi blong stap tru long famle blong yumi. !Be yumi neva mas stap tru long ol fren mo famle bitim we yumi stap tru long Jeova! (Skelem wetem 1 Samuel 23:16-​18.) Yumi no mas givhan long olgeta we oli mekem bigfala sin blong oli haedem sin ya, no tekem saed blong olgeta agensem ol elda we oli stap traehad blong ‘stretem olgeta long kwaet fasin.’ (Galesia 6:1) Sipos yumi mekem olsem, yumi no stap tru long Jeova, ogenaesesen blong hem, mo fren ya we yumi laekem hem tumas. Tingbaot, sipos yumi traem blokem fasin stretem we wan man i nidim from wan rong we hem i bin mekem, yumi stap blokem lav we Jeova i stap soemaot long man ya. (Hibrus 12:​5-7) Tingbaot tu se, “ol kil we wan man i kasem from wan fren we i laekem hem, oli soem se fren ya i rili kea long hem.” (Proveb 27:6) !Sipos yumi tok stret wetem lav mo givim advaes we i stanap long Tok blong God long wan gudfala fren we i mekem wan rong, ating flas fasin blong hem bambae i kasem kil, be biaen, advaes ya i save sevem laef blong hem!

Fasin Blong Stap Tru i No Save Lus Long Ol Hadtaem

18, 19. (a) ?Ehab i wantem wanem samting we i blong Nebot, mo from wanem Nebot i no wantem givim samting ya long hem? (b) From samting we i hapen biaen, ?i stret blong talem se maet i moagud sipos Nebot i no bin stap tru long God? Eksplenem.

¹⁸ Sam samtaem, Setan i save go stret agensem fasin blong yumi blong stap tru long God. Tingbaot Nebot. Taem King Ehab i traem fosem hem blong salem garen blong hem, Nebot i ansa se: “Folem tingting blong Jeova long bisnes ya, mi mi no save givim graon ya long yu, from we mi mi kasem graon ya long ol olfala bubu blong mi.” (1 King 21:3) Nebot i no stap mekem stronghed. Hem i stap tru long Loa blong Moses, we i talem se wan man Isrel i no mas salem wan graon we hem i bin kasem long ol bubu blong hem. (Levitikas 25:23-​28) !I sua se Nebot i save we rabis king ya i save kilim hem i ded, from we Ehab i letem waef blong hem Jesebel i kilim i ded plante long ol profet blong Jeova finis! Be, Nebot i stanap strong.​—1 King 18:4.

¹⁹ Sam samtaem, blong holemtaet fasin blong stap tru, yumi mas rere blong lusum samting. Jesebel wetem sam “man we oli nogud nating,” oli folem wan rabis plan blong mekem i luk olsem we Nebot i bin mekem wan rabis samting. Ale, oli kilim Nebot mo ol pikinini blong hem oli ded from. (1 King 21:​7-​16; 2 King 9:​26) ?Hemia i min se, maet i moagud sipos Nebot i no bin stap tru long God? !No gat! Nebot i wan long plante man mo woman we oli bin stap tru long God mo from samting ya, oli ‘laef i stap’ long tingting blong Jeova naoia. Oli stap slip nomo long gref go kasem taem we bambae oli girap bakegen long ded.​—Luk 20:38; Ol Wok 24:15.

20. ?Olsem wanem hop i save givhan long yumi blong stap tru long God?

²⁰ Semfala promes ya i givim paoa long ol man we oli stap tru long Jeova tede. Yumi save se maet yumi mas lusum sam bigfala samting long wol ya blong stap tru long God. Jisas Kraes i lusum laef blong hem blong stap tru long God, mo hem i talem long ol man blong hem se samting olsem i save hapen long olgeta. (Jon 15:20) Hop long saed blong fyuja i givim paoa long hem, mo semfala samting i stap givim paoa long yumi. (Hibrus 12:2) Taswe, yumi save stap tru long God long enikaen hadtaem mo fasin agens we yumi kasem.

21. ?Jeova i mekem wanem promes long ol man we oli stap tru long hem?

²¹ Tede, smol nomo blong yumi i kasem trabol we i go stret agensem fasin blong yumi blong stap tru long God. Be maet ol man blong God oli fesem moa fasin agens bifo we en i kam. ?Olsem wanem yumi save sua se bambae yumi holemtaet fasin blong stap tru long God? Yumi save sua, sipos yumi stap tru long God naoia. Jeova i givim wan bigfala wok long yumi​—blong prij mo tijim ol man long saed blong Kingdom blong hem. Yumi mas gohed long impoten wok ya wetem fasin blong stap tru. (1 Korin 15:58) Bambae yumi rere moa blong fesem ol traem we oli bigwan moa, sipos yumi no letem ol slak fasin blong yumi mo ol narafala oli spolem fasin blong yumi blong stap tru long ogenaesesen blong Jeova naoia, mo sipos yumi lukaotgud blong no foldaon long ol fasin blong no stap tru we oli haed, olsem fasin ya blong stap tru long ol samting we oli no stret. Nomata wanem samting i hapen, yumi save sua se Jeova bambae i stap tru oltaem long ol man we oli stap tru long hem. (2 Samuel 22:26) !Yes, bambae hem i lukaotgud long ol man we oli stap tru long hem!​—Ol Sam 97:10.

[Ol futnot]

?Bambae Yu Yu Ansa Olsem Wanem?

◻ ?Olsem wanem blong no letem ol slak fasin blong narafala i lidim yumi blong no moa stap tru?

◻ ?Olsem wanem ol prapa slak fasin blong yumi oli save lidim yumi blong no moa stap tru?

◻ ?Olsem wanem yumi save agensem fasin blong stap tru long samting we i no stret?

◻ ?Wanem i save halpem yumi blong stap tru long God long ol hadtaem?

[Bokis blong pija long pej 9]

Wok Long Betel Wetem Fasin Blong Stap Tru Long God

Aposol Pol i raetem se: “Yufala i mas mekem olgeta samting long fasin we i stret gud, we ol man oli glad long hem.” (1 Korin 14:40) Pol i save se blong wan kongregesen i rongud, hem i mas ron long fasin we i “stret gud,” no folem stret oda. Sem mak tede, ol elda oli mas mekem ol disisen long saed blong ol plan insaed long kongregesen, olsem, hu bambae oli go long ol defren buk stadi, ol miting blong prij, mo olsem wanem kongregesen i stap wokem teritori blong hem. Sam samtaem, ol plan ya oli save traem fasin blong yumi blong stap tru long God. God i no givim loa long saed blong olgeta samting ya, mo ol elda oli no save mekem samting we olgeta man wanwan oli wantem.

?Yu yu faenem se i hadwok samtaem blong stap tru long sam plan we ol elda oli putumap insaed long Kristin kongregesen? Sipos yes, maet i gud blong tingbaot Betel. Nem ya Betel i wan Hibru wod we i minim “Haos blong God.” Hem i nem blong ol 104 hedkwota blong Watch Tower Sosaeti, wetem hedkwota long Yunaeted Stet tu.* Ol man we oli slip mo wok long Betel, oli wantem se ples ya i soemaot ona mo fasin blong fraetgud long Jeova. From samting ya, olgeta evriwan oli nidim fasin blong stap tru long God.

Plante man we oli kam luk Betel, oli tokbaot olsem wanem ples ya i klingud mo i gat oda. Ol man long ples ya oli folem wan stret plan blong wok, mo oli glad. Toktok, fasin mo lukluk blong olgeta i soem se oli bigman long saed blong Kristin fasin, we oli bin trenem tingting blong olgeta blong jajem olgeta folem ol rul blong Baebol. Olgeta memba blong famle blong Betel oli folemgud ol rul long Tok blong God.

Mo tu, Hed Kampani i givim wan smol buk long olgeta, nem blong hem, Dwelling Together in Unity. Long kaen fasin, buk ya i eksplenem ol rod we bigfala famle olsem i mas folem blong wokgud tugeta. (Ol Sam 133:1) Hem i tokbaot ol rum blong slip, kakae, klin fasin, klos, fasin blong mekem hea, mo sam narafala samting olsemia. Ol memba blong famle blong Betel oli gat fasin blong stap tru long God, taswe oli ona mo obei long ol rul ya, nating se maet prapa tingting blong olgeta i defren lelebet. Oli no tingbaot smol buk ya olsem wan bigfala lis blong ol rul mo loa, be olsem ol gudfala advaes blong halpem olgeta blong joengud mo wokgud tugeta. Ol man blong lukaot long ol defren wok oli stap tru long God, taswe oli folemgud ol advaes ya we i stanap long Baebol, mo oli yusum hem long wan gudfala fasin, blong leftemap tingting blong ol narafala long Betel mo mekem olgeta oli strong blong gohed long tabu wok blong olgeta.

* Ol faktri, ofis, mo haos ya, oli no mekemap bigfala tempel no haos blong God long saed blong speret. Haos blong God long saed blong speret, hemia plan blong hem long saed blong klin wosip. (Maeka 4:1) From samting ya, haos prea ya i no wan trufala haos long wol ya.

[Bokis blong pija long pej 10]

Man We i Stap Tru Long God Mo Man We i Fas Long Ol Loa Nomo

Long 1916, Encyclopædia of Religion and Ethics i talem se, “yumi save luk long ol yia we oli pas finis mo long ol defren ples, se man we i stap tru long God i defren long man we i fas long ol loa nomo.” Buk ya i eksplenem se: “Ol man we oli fas long ol loa, oli no brekem wan rul. Oli folemgud ol samting we ol man oli bin raetemdaon, mo we oli save ridim. Ol man we oli stap tru long God oli mekem samting ya tu, be . . . oli mekem moa. Oli putum fulwan tingting blong olgeta i stap long wok blong olgeta. Oli mekem tingting blong olgeta i laenap wetem bigfala risen biaen long samting we oli stap mekem.” Semfala buk ya i gohed blong talem se: “Blong stap tru long God i no minim nomo se yumi obei long loa. . . . Man we i stap tru long God i defren long man we i obei long ol loa nomo, from we hem i wok wetem fulhat mo maen blong hem . . . Hem i no mekem ol nogud fasin, les blong mekem samting we God i wantem, no yusum eskyus ya se hem i no gat save, ol samting ya we oli olsem sin.”