Ripot Long Wok Blong Kingdom

“Ol Tok We Yu Yu Putum Oli Tru Olgeta”

SMOLTAEM bifo we Moses i ded, hem i talem long ol man Isrel blong obei long olgeta loa blong Jeova evriwan. Hem i talem se: “Letem olgeta tok we mi stap talem long yufala tede olsem woning, oli kasem hat blong yufala, nao bambae yufala i givim oda long ol pikinini blong yufala blong oli lukaotgud blong folem olgeta tok blong loa ya. Ol tok ya oli no olsem ol tok olbaot nomo, be oli save sevem laef blong yufala.”​—Dutronome 32:46, 47.

Plante handred yia biaen, man blong raetem Sam i tokbaot olsem wanem olgeta tijing blong God oli impoten. Hem i talem se: “Be yu, Hae God, oltaem yu stap kolosap moa long mi, mo ol tok we yu yu putum oli tru olgeta.” (Ol Sam 119:151) Long faswan handred yia, Jisas hem wan i tokbaot “evri tok we God i talem,” olsem samting we i gud tumas. (Matyu 4:4) Mo God i lidim aposol Pol blong raetem se, ‘olgeta tok ya blong Baebol oli kamaot long God fastaem, mo ol tok ya i gud blong tijim ol man.’​—2 Timote 3:​16.

I klia se, Jeova God i wantem we ol man blong hem oli tinghevi long olgeta tok we hem i givim long yumi long Baebol. I no gat wan haf blong Baebol we yumi save talem se i no impoten. Hemia nao tingting blong ol Wetnes blong Jeova long saed blong Tok blong God. Store ya we i kam long aelan blong Morisas, i soemaot samting ya.

Masta D​—— i stap long wan smol velej longwe long taon, mo hem i mekem wok blong naet gad. Longtaem finis, man ya i traem faenem stret rod blong wosipim God. Long naet, taem hem i stap mekem gad, hem i ridim Baebol. Ale sloslou, hem i flatem fulwan Baebol. Hem i lanem se nem blong God hem i Jeova​—wan nem we i kamaot plante taem long Baebol blong hem we i stap long lanwis Hindi. Hem i intres moa long buk blong Revelesen.

Ale, hem i stap tingbaot sipos i gat wan skul we i rili folem Baebol fulwan. Hem i luksave se olgeta skul raonabaot long hem, oli folem sam haf nomo blong Baebol. Sam skul oli agri long Hibru haf blong Baebol mo oli sakemaot Kristin Grik haf blong hem. Sam narafala skul oli no tinghevi nating long Hibru haf blong Baebol, oli ting se Kristin Grik haf nomo i stret long laef blong yumi.

Wan dei, Masta D​—— i luk wan man mo woman we tufala i stap wokbaot long ren, mo hem i singaotem tufala blong kam haed long haos blong hem. Tufala ya oli Wetnes blong Jeova. Woman i stap holem buk ya, Revelesen​—!Kolosap i Kasem Nambawan En Blong Hem!a Wantaem nomo, Masta D​—— i askem buk ya. Tufala Wetnes ya oli ting se profet tok blong Revelesen i hadwok tumas blong hem i kasem save long hem, taswe oli soemaot wan narafala buk long hem. Be Masta D​—— i wantem Revelesen buk nomo.

Taem hem i kasem buk ya, hem i ridim kwiktaem nomo. Nao hem i agri blong stadi Baebol wetem ol Wetnes blong Jeova. I no longtaem, hem i sapraes blong luk se ol Wetnes oli tinghae long fulwan Baebol. Ale, hem i joen long ol miting blong ol Wetnes blong Jeova long Haos Kingdom. Long ol miting ya, oli stadigud long Hibru haf mo Kristin Grik haf blong Baebol tugeta. Naoia, hem i wan man blong talemaot Kingdom, mo wan memba blong Kristin kongregesenb we i baptaes finis.

[Ol futnot]