?Yu Rili Save Laekem God?
GOD i talem se: “Sipos wan man i luk fes blong mi, man ya bambae i ded from.” (Eksodas 33:20) Mo tu, afta long taem we oli raetem Baebol, i no gat wan pruf se wan man i bin toktok wetem God stret. ?Olsem wanem? ?Yu ting se i hadwok blong wokem wan strongfala lav blong wan man we yu neva luk hem no harem voes blong hem? Maet yu ting se i no gat rod nating blong mekem samting ya. ?Yu rili save gat wan nambawan fasin fren we yu laekem tumas Hemia we i wokem heven mo wol?
Yumi no mas ting se i no gat rod blong wokem wan strongfala lav blong God, we i pulum yumi wanwan blong fasgud long hem. Long Dutronome 6:5, Baebol i talem se nesen blong Isrel i kasem oda ya: “Yu mas laekem Jeova, God blong yu long olgeta hat blong yu, long olgeta laef blong yu, mo long olgeta paoa blong yu.” Biaen, Jisas Kraes i talem bakegen loa ya long ol man blong hem, mo i ademap se: ‘Loa ya i hae moa long ol narafala loa, mo i nambawan blong folem.’ (Matyu 22:37, 38) ?Sipos i no gat rod blong wokem wan nambawan fasin fren wetem God, yu ting se Baebol i save talem long yumi blong laekem hem tumas?
Be, ?Jeova i wantem se yumi laekem hem jes from we loa blong hem i talem olsem? No gat. God i wokem faswan man mo woman blong tufala i naf blong laekem hem. Man ya we i wokem Adam mo Iv i no fosem tufala blong gat wan nambawan fasin fren wetem hem. Hem i putum tufala long wan naesfala ples, we i mekem i isi long tufala blong wokem wan dip filing blong lav long hem. Tufala nao i mas jus—tufala i save kam kolosap moa long God, no tufala i save gowe long hem.
Adam mo Iv, tufala i jusum blong rebel. (Jenesis 2:16, 17; 3:6, 7) Be, ol pikinini blong tufala, oli gat jans blong wokem wan nambawan fasin fren wetem Man ya we i wokem olgeta samting.
Wokbaot Wetem Trufala God
Wan eksampel: Baebol i tokbaot Ebraham, se hem i olsem ‘fren’ blong God. (Jemes 2:23) Be i no Ebraham nomo we i frengud wetem God. Baebol i tokbaot plante narafala sinman, we olgeta tu oli soem se oli rili laekem Jeova mo oli ‘wokbaot wetem trufala God.’—Jenesis 5:24; 6:9; Job 29:4; Ol Sam 25:14; Proveb 3:32.
Ol man blong God long taem bifo, oli no bon wetem lav mo strong filing ya blong laekem God. Olgeta ya oli mas wokem lav ya. ?Olsem wanem oli wokem? Oli yusum prapa nem blong hem, Jeova, taem oli singaot long hem. (Eksodas 3:13-15; 6:2, 3) Oli luksave se hem i stap mo hem nomo i God. (Hibrus 11:6) Oli tingting dip oltaem long ol wok blong hem we oli soem lav. (Ol Sam 63:6) Oli prea long God blong talemaot ol dip filing blong olgeta. (Ol Sam 39:12) Oli save long ol gudgudfala fasin blong hem. (Sekaraea 9:17) Oli wokem gudfala fasin ya we oli fraet blong mekem samting we God i kros from.—Proveb 16:6.
?Olsem wanem long yu? ?Yu save kam wan fren blong God mo wokbaot wetem hem? I tru, yu no save luk God mo harem voes blong hem. Nating se i olsem, Jeova i singaot yu blong ‘kam insaed long haos tapolen blong hem,’ hemia i min se blong kam wan fren blong hem. (Ol Sam 15:1-5) Taswe, i gat rod blong yu yu laekem God tumas. ?Be olsem wanem yu save wokem wan strongfala lav mo nambawan fasin fren wetem hem?