?Yumi Mas Prea Long God Long Wanem Fasin?
TAEM wan disaepol i askem Jisas blong tijim hem blong prea, Jisas i no traem blong haedem samting ya long hem. Long Luk 11:2-4, Jisas i ansa se: “Taem yufala i prea, yufala i talem se ‘Papa, nem blong yu i tabu. Letem kingdom blong yu i kam. Plis, evri dei yu givim kakae long mifala i naf blong wan dei. Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala. Yu no letem ol samting oli kam traem mifala tumas.’ ” (Catholic Douay Version) Plante man oli kolem prea ya se, Prea blong Masta. Prea ya i lanem yumi long plante samting.
Faswan samting se, faswan wod—Papa—i soem long yumi hu man yumi mas prea long hem. Makemgud we Jisas i no talem se i oraet blong prea long wan narafala man, pija, “tabu man,” no long Jisas hem wan. Tingbaot, God i bin talem bifo se: “Bambae mi mi no givim haenem blong mi long wan narafala, mo bambae mi mi no letem ol toktok blong presem mi i go long ol pija we man i wokem.” (Aesea 42:8, Dy) Ol prea we oli no go long Papa blong yumi long heven, be oli go long wan narafala samting no man, God i no save lesin long olgeta, nating se wosip ya i rili kamaot long hat blong man. Baebol i givim nem ya “Man blong harem prea” long Jeova God nomo.—Ol Sam 65:2.
Maet samfala oli talem se “ol tabu man” oli tekem prea blong olgeta i go long God nomo. Be Jisas i tijim se: “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem. Nao sipos yufala i askem samting long nem blong mi, wanem samting, be bambae mi mi mekem, blong nem blong Papa blong mi i save go antap moa from ol wok blong mi, mi Pikinini blong hem.” (Jon 14:6, 13) Olsem nao, Jisas i sakemaot tingting ya se wan “tabu man” i save tekem ol prea oli go long God. Mo tu, traem luk samting we aposol Pol i talem long saed blong Kraes: “Hem i no ded from yumi nomo—hem i laef bakegen long ded, hem i stap stanap long raet saed blong God, i stap toktok long God oltaem from yumi.” “Hem bambae i laef oltaem, mo bambae i stanap oltaem long fes blong God blong toktok from olgeta we oli kam long God tru long hem.”—Rom 8:34; Hibrus 7:25, Catholic Jerusalem Bible.
Nem We Yumi Mas Mekem i Tabu
Nekis tok long prea blong Jisas i olsem: “Mekem nem blong yu i tabu.” Sipos wan man i no save nem blong God mo i no yusum nem ya, ?olsem wanem hem i save mekem nem blong God i tabu, hemia i min se givim ona long nem blong God olsem wan samting we i spesel? Long “Oltesteman,” bitim 6,000 taem we oli kolem God long prapa nem blong hem, Jeova.
Wan futnot blong Eksodas 6:3 long Douay Version Baebol blong ol Katolik, i talem long saed blong nem blong God se: “Sam man long taem blong yumi, oli yusum tok ya Jeova . . . , olsem stret rod blong talem nem [blong God] long Hibru hanraet. Be from we ol man oli no moa yusum nem ya longtaem finis, yumi no moa save trufala fasin blong talem nem ya.” From samting ya, New Jerusalem Bible blong ol Katolik i yusum Yahweh. Sam man blong hae save oli laekem moa blong yusum Yahweh. Be longtaem finis i kam, ol man oli stap yusum “Jeova” olsem stret rod blong talem nem blong God long Engglis lanwis. Ol narafala lanwis oli gat prapa fasin blong olgeta blong talem nem blong God. Bigfala samting se, yumi mas yusum nem blong God, nao yumi save mekem nem ya i tabu. ?Skul blong yu i tijim yu blong yusum nem ya Jeova taem yu prea?
Ol Samting We i Stret Blong Prea From
Jisas i gohed moa, i tijim ol disaepol blong hem blong prea olsem se: “Letem kingdom blong yu i kam.” Gospel blong Matyu i ademap ol tok ya se: “Mekem ol samting we yu yu wantem oli kamaot long wol ya, olsem we oli kamaot finis long heven.” (Matyu 6:10, Dy) Kingdom blong God i wan gavman we Jisas Kraes i rula blong hem. (Aesea 9:6, 7) Profet tok blong Baebol i soem se i no longtaem, bambae gavman ya i tekem ples blong olgeta gavman blong man, mo bambae i mekem pis i kamaot long olgeta ples long wol. (Ol Sam 72:1-7; Daniel 2:44; Revelesen 21:3-5) From samting ya, oltaem ol trufala Kristin oli tokbaot Kingdom ya long prea blong olgeta. ?Skul blong yu i tijim yu blong mekem olsem?
I gud blong save samting ya tu: Jisas i soem se yumi save prea from ol prapa wari long laef blong yumi. Hem i talem se: “Plis, evri dei yu givim kakae long mifala i naf blong wan dei. Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala. Yu no letem ol samting oli kam traem mifala tumas.” (Luk 11:3, 4, Dy) Ol tok ya blong Jisas i minim se yumi save askem God blong halpem yumi long ol samting long laef blong yumi evri dei. Yumi save prea long Jeova long saed blong olgeta samting we oli mekem yumi wari, no oli mekem tingting blong yumi i trabol. Fasin blong prea oltaem long God i halpem yumi blong luksave se yumi dipen long hem. Olsem nao, yumi luksave moa ol samting we hem i mekem long laef blong yumi. I gud long yumi tu blong askem God blong fogivim ol rong blong yumi. Taem yumi mekem olsem, yumi luksave moa ol slak fasin blong yumi—mo yumi fogetem moa ol mastik blong ol narafala. I stret tu, olsem Jisas i talem, we yumi prea long God blong i no letem ol samting oli traem yumi tumas, antap moa, taem ol fasin blong wol ya oli stap kam moa nogud. Sipos yumi prea olsem, bambae yumi traehad blong blokem mo blong no joen long ol samting we oli save pulum yumi blong mekem i nogud.
I klia se Prea blong Masta i talem plante samting long yumi long saed blong fasin blong prea we God i glad long hem. ?Be Jisas i minim se yumi mas lanem prea ya mo talem bakegen mo bakegen?
Sam Moa Advaes Long Saed Blong Prea
Jisas i givim sam moa tijing long saed blong prea. Long Matyu 6:5, 6, yumi ridim se: “Taem yu prea, i nogud yu folem fasin blong olgeta ya we oli gat tu tingting. Olgeta ya oli laekem tumas blong stanap blong prea insaed long ol haos blong prea, mo afsaed long ol open ples, blong ol man oli save luk olgeta. . . . Be taem yu yu prea, i gud yu go yu wan insaed long rum blong yu, yu satem doa, nao yu prea long Papa ya blong yu we i stap long ples ya we ol man oli no save luk. Nao Papa blong yu we i save luk ol samting we ol man oli no save luk, hem bambae i givim pei long yu from.” Ol tok ya oli tijim yumi se yumi no mas prea blong soem yumi, we yumi wantem ol man blong luk yumi, no yumi wantem leftemap yumi long fored blong ol man. ?Yu yu stap talemaot olgeta samting long hat blong yu long Jeova taem yu stap yu wan, olsem Baebol i talem?—Ol Sam 62:8.
Jisas i givim woning ya se: “Taem yufala i prea, i nogud yufala i stap talem plante tok olsem we ol hiten man oli stap mekem. Ol hiten man ya oli ting se ol god blong olgeta bambae oli harem olgeta from we oli talem plante toktok.” (Matyu 6:7, JB) I klia se Jisas i no agri long ol prea we man i lanem baehat—mo ol prea we man i ridim long wan buk. Mo tu, ol tok blong hem oli soem se i no stret blong yusum rosari.
Wan prea buk blong Katolik i talem tok ya se: “Prea ya we i beswan, hemia wan we i kamaot long prapa tingting blong yumi, taem yumi prea blong talem tangkyu no blong askem help, taem yumi harem nogud, no taem yumi stap ona long God evri dei.” Ol prea blong Jisas oli kamaot long tingting blong hem, hem i no lanem olgeta baehat. Eksampel, ridim prea blong Jisas we i stap long Jon japta 17. Prea ya i laenapgud wetem Prea blong Masta. Hem i makem strong tingting blong Jisas blong wantem se nem blong Jeova i kam tabu olgeta. Prea blong Jisas i kamaot long tingting blong hem, mo hem i talem wetem fulhat blong hem.
Ol Prea We God i Harem
Sipos yu bin lanem blong talem ol prea baehat, blong prea long “ol tabu man” no long ol pija, no blong yusum olting blong skul olsem rosari blong prea, maet fastaem yu fraet blong folem fasin blong prea we Jisas i soem. Blong folem fasin we Jisas i yusum blong prea, yu mas savegud God—nem blong hem, ol stampa tingting blong hem, mo ol fasin blong hem. Mo blong mekem samting ya, yu mas stadigud long Baebol. (Jon 17:3) Ol Wetnes blong Jeova oli rere mo oli glad blong halpem yu long saed ya. !Yes, oli bin halpem plante milyan man raonabaot long wol blong “testem mo luk we Jeova i gud”! (Ol Sam 34:8, NW) Moa yu save God, moa bambae yu wantem blong presem hem long prea. Mo taem yu kam kolosap moa long Jeova long prea we i givim dip ona long hem, bambae yu frengud moa wetem hem.
From samting ya, Baebol i talem long ol man we oli wosip long God long trufala fasin se: “Oltaem yufala i mas stap prea.” (1 Tesalonaeka 5:17) Yu mas sua se ol prea blong yu oli rili laenap wetem Baebol, mo wetem ol tijing we Jisas Kraes i givim long saed ya. Long rod ya, yu save sua se bambae God i glad long ol prea blong yu.
[Tok blong pija long pej 7]
Moa yumi save Jeova, moa yumi wantem prea long hem wetem hat blong yumi