Oli Mekem Samting We Jeova i Wantem

Filip i Baptaesem Wan Haeman Blong Itiopia

WAN man Itiopia i stap ron long kat we hos i pulum. Hem i stap yusum taem blong hem long waes fasin. Hem i stap rid wetem bigfala voes. Hemia wan samting we plante man oli mekem long faswan handred yia, taem oli stap go long wan trep long narafala ples. Man ya, hem i “wan haeman blong kwin blong ol man Itiopia.” Hem i “namba wan man blong lukaot long mane blong woman ya, we narafala nem blong hem, Kandes.”a I olsem we hem i minista blong faenans. Haeman ya i stap ridim Tok blong God blong traem kasem save long hem.​—Ol Wok 8:​27, 28.

Man blong talemaot gud nyus, Filip, i stap ron kolosap. Wan enjel i lidim hem i kam long ples ya. Nao wan voes i talem long hem, i se: “Yu gokros, yu go stap kolosap long kat ya.” (Ol Wok 8:​26, 29) Yumi save se Filip i stap tingbaot kwestin ya, ‘?Hu ya man ya? ?Hem i stap ridim wanem? ?From wanem wan enjel i lidim mi mi kam long hem?’

Taem Filip i stap ron kolosap long kat blong man ya, hem i harem man Itiopia i stap ridim ol tok ya se: “Hem i olsem wan sipsip we oli tekem blong kilim blong kakae. Hem i olsem wan pikinini blong sipsip nomo, we taem oli stap katemaot hea blong hem, hem i no save krae. Hem i no talem wan tok blong hem nating. Olgeta oli mekem sem long hem, mo taem oli jajem hem, oli mekem i no stret long hem. I no gat man i save talem se hem i gat pikinini blong hem, from we olgeta oli katem laef blong hem long wol ya, i sotfala nomo.”​—Ol Wok 8:​32, 33.

Kwiktaem nomo, Filip i save wanem tok we man ya i stap ridim. Hemia wan haf blong hanraet blong Aesea. (Aesea 53:​7, 8) Man Itiopia ya i stap traem blong kasem save long samting we hem i stap ridim. Nao Filip i stat storeyan wetem hem, i askem se: “?Olsem wanem? ?Yu yu save mining blong tok ya we yu stap ridim, no yu no save?” Man Itiopia i ansa se: “?Bambae mi mi save olsem wanem, sipos i no gat man blong talemaot mining blong hem long mi?” Nao, hem i askem long Filip blong jyam antap, i kam sidaon wetem hem long kat.​—Ol Wok 8:​30, 31.

“?I Gat Sam Samting i Stap Blokem Mi Yet, Se Mi No Save Baptaes?”

Man Itiopia i talem long Filip, i se: “Plis yu talem long mi. ?Hu man ya we profet ya i stap tokbaot? ?Hem i stap tokbaot hem nomo, no i stap tokbaot wan narafala man?” (Ol Wok 8:​34) Yumi no sapraes se tingting blong man Itiopia i fasfas, from we longtaem finis i kam, tok ya “sipsip,” no “man blong wok,” long profet tok blong Aesea, i bin stap olsem wan tok haed. (Aesea 53:11) !Poen ya i mas kam kliagud long man Itiopia, taem Filip i storeyan long hem long “gud nyus blong Jisas”! Smoltaem biaen, man Itiopia i talem se: “Yu luk. Hemia wan wora i stap. ?I gat sam samting i stap blokem mi yet, se mi no save baptaes?” Ale, stret long taem ya mo long ples ya, Filip i baptaesem hem.​—Ol Wok 8:​35-​38.

?Olsem wanem? ?Man ya, hem i kwik tumas blong tekem baptaes? !No gat! Man Itiopia ya, hem i wan proselaet long Isrel.b Taswe, hem i stap wosip long Jeova finis, mo hem i gat save long Baebol. Hem i save tu long ol profet tok long saed blong Mesaea. Be, hem i no kasem save fulwan. Taem man Itiopia ya i kasem impoten save ya long saed blong wok blong Jisas Kraes, hem i kasem save long samting we God i wantem hem blong mekem, mo hem i rere blong obei. I stret we hem i tekem baptaes.​—Matyu 28:18-​20; 1 Pita 3:​21.

Biaen, ‘speret blong Jeova i tekemaot Filip i go.’ Hem i go mekem wan wok long wan narafala ples. Man Itiopia ya “i stap go long rod blong hem bakegen, we i stap harem i gud tumas long tingting blong hem.”​—Ol Wok 8:​39, 40.

Samting We Yumi Lanem

Yumi ol man blong Jeova tede, yumi gat wok blong halpem ol wanwan man we hat blong olgeta i stret, blong oli lanem trutok blong Baebol. Plante oli gat gudfala risal, taem oli talemaot gud nyus long wan trep, no long wan narafala taem we oli tekem jans blong prij. From wok blong talemaot Kingdom, evri yia, plante handred taosen man oli baptaes blong soem se oli givim laef blong olgeta long Jeova God.

I tru, ol nyuwan oli no mas hareap tumas blong tekem baptaes. Fastaem oli mas kasem stret save long saed blong Jeova God mo Pikinini blong hem, Jisas Kraes. (Jon 17:3) Biaen, oli mas tanem tingting from ol sin blong olgeta, lego ol rabis fasin mo jenisim laef blong olgeta blong mekem i laenap wetem ol rul blong God. (Ol Wok 3:​19) I tekem taem blong mekem ol samting ya, antap moa sipos ol rong tingting mo fasin oli stap longtaem finis long laef blong olgeta. I tru se, ol nyuwan oli mas tingtinggud long ol samting we oli mas livim, taem oli kam Kristin disaepol. Be tu, oli save tingbaot ol bigfala blesing we bambae oli kasem taem oli givim laef blong olgeta long Jeova God. (Skelem wetem Luk 9:​23; 14:25-​33.) Ol Wetnes blong Jeova oli glad tumas blong givhan long ol nyuwan ya, blong joen long ogenaesesen we God i stap yusum blong mekem ol samting we hem i wantem. (Matyu 24:45-​47) Olsem man Itiopia ya, ol nyuwan ya bambae oli glad tumas blong lanem ol samting we God i wantem, mo blong obei.

[Ol futnot]

[Bokis blong pija long pej 8]

?From Wanem Oli Talem Se Wan Man We Oli Mekem Natamap Long Hem?

Long store ya long Ol Wok japta 8, Baebol i kolem man Itiopia ya se ‘man we oli mekem natamap long hem.’ Be, Loa blong Moses i talem se wan man we oli mekem natamap long hem, hem i no save kam insaed long kongregesen.c Taswe, long ples ya, tok ya i no minim se oli mekem natamap long prapa bodi blong hem. (Dutronome 23:1) Grik tok blong talem “natamap” i save minim wan man we i gat hae ples. Olsem nao, man Itiopia ya, hem i wan haeman blong kwin blong ol man Itiopia.

[Futnot]