Filip Wan Ivanjelis We i Wok Strong

BAEBOL i tokbaot plante man mo woman we fasin blong bilif blong olgeta i stret blong yumi folem. Tingbaot Filip, wan Kristin blong faswan handred yia we i mekem wok blong misinari. Hem i no wan aposol, be hem i givhan bigwan long wok ya blong talemaot mesej blong Kingdom. Yes, from samting ya ol man oli kolem hem se “ivanjelis ya Filip.” (Ol Wok 21:8) ?From wanem oli kolem Filip long nem ya? ?Mo eksampel blong hem i tijim wanem long yumi?

Baebol i tokbaot Filip, smoltaem afta long Pentekos 33 K.T. Long taem ya, ol man Jiu we oli stap yusum lanwis blong ol man Gris, oli stat toktok smol agensem ol man Jiu we oli stap yusum lanwis Hibru. Oli stat toktok smol, from we evri dei, taem we ol man oli seraot ol mane mo kakae, oli no lukaotgud long ol wido long saed blong olgeta. Blong stretem bisnes ya, ol aposol oli jusumaot “seven man . . . we oli pruvum finis se oli naf.” Filip i wan blong ol man ya.​—Ol Wok 6:​1-6, NW.

Baebol long Bislama i tanem tok ya “we oli pruvum finis se oli naf,” olsem se “we oli gat gud nem long fes blong ol man.” Yes, taem ol aposol oli jusumaot seven man ya, oli bin luk finis long laef blong olgeta ya se oli bigman long saed blong spirit. Tede, i sem mak long saed blong ol Kristin elda. Wan brata we i kam elda i no kasem wok ya kwiktaem nomo. (1 Timoti 5:​22) Fastaem, hem i mas man we “ol man we oli no Kristin oli save talem se, ‘Man ya i wan gudfala man.’ ” Be, hem i mas wan man we ol narafala Kristin brata tu, oli save se hem i gat kwaet fasin mo stret tingting.​—1 Timoti 3:​2, 3, 7; Filipae 4:5.

I sua se Filip i mekem gudfala wok long Jerusalem. Smoltaem biaen, ol man oli stat mekem bigfala trabol agensem ol Kristin, mo from samting ya ol Kristin oli stap wanwan olbaot long plante ples. Olsem ol narafala Kristin ya, Filip tu i mas aot long Jerusalem. Be, hem i no stopem minista wok blong hem. I no longtaem, hem i bisi bakegen long wok blong prij long wan niufala teritori​—hemia Sameria.​—Ol Wok 8:​1-5.

Hem i Statem Wok Blong Prij Long Ol Niufala Teritori

Jisas i talemaot se bambae ol disaepol blong hem oli prij “long Jerusalem, mo long olgeta ples long Judia mo Sameria, gogo . . . [oli] finisim olgeta ples long wol.” (Ol Wok 1:8) Filip i mekem tok ya i kamtru taem hem i prij long Sameria. Ol man Jiu oli stap lukluk ol man Sameria olsem rabis nomo. Be Filip i no tingting olsem. Hem i mekem i stret long olgeta olsem we hem i mekem long ol narafala man. Mo, from samting ya, hem i kasem blesing. Ale, plante man Sameria oli baptaes, wetem Saemon tu, we bifo hem i wan kleva.​—Ol Wok 8:​6-​13.

Biaen, enjel blong Jeova i lidim Filip i go long wan rod we i aot long Jerusalem i pas long draeples, i go kasem Gasa. Long rod ya, Filip i luk wan haeman blong Itiopia i stap sidaon long kat blong hem we hos i pulum. Man ya i stap ridim profet tok blong Aesea. Ale, Filip i ron i kam klosap long kat blong man ya mo i stat storeyan wetem hem. Nating se man Itiopia ya i wan proselaeta we i gat save long God mo long Baebol, be hem i gat tingting daon mo i talem se hem i nidim help blong kasem save fulwan tok ya we hem i stap ridim. Nao, hem i askem long Filip blong jyam i kam long kat blong hem blong sidaon wetem hem. Ale, Filip i givim witnes long hem. Nao, oli kam long wan ples we i gat wan wota i stap. Man Itiopia i askem se: “?Wanem nao i blokem mi blong mi no save baptaes?” Long taem ya, Filip i baptaesem hem, mo man Itiopia ya i glad tumas, i folem rod blong hem i go. Ating niufala disaepol ya i talemaot gud nius taem hem i gobak long kantri blong hem.​—Ol Wok 8:​26-​39.

?Yumi save lanem wanem from stori blong Filip we i prij long ol man Sameria mo long haeman ya blong Itiopia? Yumi neva mas ting se kantri, no kala, no haenem blong wan man, i mekem se man ya bambae i no save akseptem trutok. I moa gud yumi talemaot mesej blong Kingdom long “olkaen man.” (1 Korin 9:​19-​23, NW) Sipos yumi traehad blong mekem samting ya, Jeova i save yusum yumi long wok blong ‘pulum ol man blong olgeta ples long wol, oli kam man blong hem,’ bifo we en blong rabis wol ya i kam.​—Matiu 28:19, 20.

Sam Narafala Blesing We Filip i Kasem

Afta we Filip i prij long haeman ya blong Itiopia, hem i go long Asdod. Long ples ya “hem i stap gotru long olgeta taon blong talemaot gud nius ya blong Jisas, gogo hem i kasem Sisaria.” (Ol Wok 8:​40) Long faswan handred yia, plante hiten man oli stap long Asdod mo Sisaria. Taem Filip i go long not blong Sisaria, hem i prij long ol ples we i gat moa man Jiu i stap hem, hemia long Lida mo Jopa. Maet hemia risen from wanem, biaen, i gat sam disaepol long ol ples ya.​—Ol Wok 9:​32-​43.

Laswan taem we Baebol i tokbaot Filip, hemia 20 yia biaen. Taem Pol i mekem namba tri misinari trep blong hem, hem i goso long Toleme. Luk, we i mekem trep ya wetem Pol, i talem se: “Long nekis dei, mifala i aot bakegen, mifala i kam kasem taon ya Sisaria, nao mifala i goso. Long ples ya, mifala i go long haos blong ivanjelis ya Filip.” Long taem ya, Filip “i gat fo gel blong hem we oli no mared yet, mo we oltaem oli stap talemaot tok we God i givim long olgeta.”​—Ol Wok 21:​8, 9.

I luk olsem se Filip i mekem ples blong hem long Sisaria. Be hemia i no min se hem i no moa gat tingting blong misinari. Luk i kolem hem “ivanjelis ya.” Plante taem, tok ya i minim wan man we i livim haos blong hem blong talemaot gud nius long ol ples we i no gat man i prij long hem yet. Mo tu, Filip i gat fo gel we oli stap talemaot tok blong God, samting ya i soem se oli folem gudfala eksampel blong papa blong olgeta.

Ol Kristin papa mama blong tede oli mas rimemba se ol faswan disaepol blong olgeta, hemia ol pikinini blong olgeta. Sam papa mama oli lego ol spesel wok long saed blong spirit, from we oli mas sapotem famle blong olgeta. Be, nating se i olsem, ol papa mama ya oli mekem olsem Filip. Oli gohed blong mekem wok blong God wetem fulhat blong olgeta, mo oli givim wan gudfala eksampel long ol pikinini blong olgeta.​—Efesas 6:4.

Filip mo famle blong hem oli gat jans blong tekem Pol mo ol fren blong hem oli kam long haos blong olgeta. !Samting ya i rili leftemap tingting blong olgeta evriwan! Maet hem i long ol taem olsem we Luk i lesin long ol stori blong Filip. Nao biaen hem i raetemdaon ol stori ya long buk blong Ol Wok japta 6 mo 8.

Jeova God i yusum Filip fulwan blong mekem wok blong Kingdom i gohed moa. Filip i gat strong tingting, mekem se hem i naf blong talemaot gud nius long ol ples we i no gat man i go long hem yet. Mo hem i givim wan gudfala tingting long saed blong spirit long ol pikinini blong hem. ?Yu yu wantem haremgud mo kasem blesing olsemia? Sipos yes, i gud we yu folem gudfala eksampel blong ivanjelis ya Filip.

[Futnot]