Ritae Long Wok—?Wan Doa We i Open Blong Mekem Moa Tiokratik Wok?

RITAE LONG WOK​—long tingting blong plante man, samting ya i minim se naoia oli no moa gat ol trabol blong wok we i bin mekem olgeta oli wari mo oli harem nogud longtaem finis. Plante man we oli bin fas long wan program blong wok we i mekem olgeta oli taed mo oli bisi tumas, oli tingbaot taem blong ritae long wok, olsem wan doa we i open blong letem olgeta oli spel blong plante yia, mo blong oli fri lelebet blong mekem samting we oli wantem. Be, plante taem, doa ya we i open i lidim olgeta blong les mo blong kam slak blong mekem wan samting. Taem wan man i pleplei mo i spel oltaem nomo, hem i no save haremgud. Hem i harem se hem i no stap mekem wan gudfala samting olsem hem i bin mekem taem hem i stap wok.

Long saed blong ol Wetnes blong Jeova, taem blong ritae long wok i olsem wan ‘doa we i open blong mekem wan gudfala wok.’ (1 Korin 16:9) Taem man i kam olfala, hem i kasem sam problem long helt, mo i gat sam samting we hem i no moa naf blong mekem. Nating se i olsem, sam olfala oli faenem se wetem help blong Jeova, oli save mekem moa long wok blong hem. Tingbaot store blong sam olfala Kristin long Netalan. Long sevis yia blong 1995, long ol 1,223 paenia (ol man we oli talemaot Kingdom fultaem), i gat 269 we oli gat 50 yia no we oli olfala moa. Long grup ya blong ol 269 paenia, i gat 81 we oli gat 65 yia no oli olfala moa.

Samfala oli save mekem wok blong paenia sipos oli gohed blong stap bisi olsem oli bin bisi long wok blong olgeta bifo. (Skelem wetem Filipae 3:​16.) Wan Kristin we i ritae long wok blong hem, nem blong hem Karel, i tingtingbak, nao i talem se: “Taem mi wok bifo, mi stat long 30 menet lusum 7 long moning. Ale, taem mi ritae long wok, mi mekem disisen blong gohed blong folem semfala program. Evri dei, long seven klok long moning, mi stat prij long rod long fored blong ples we tren i stap stop long hem.”

Taem yu gat wan gudfala plan, samting ya tu i save halpem yu. (Proveb 21:5) Eksampel, samfala oli bin hivimap inaf mane blong gohed blong sapotem olgeta long wok blong prij. Sam narafala oli mekem disisen blong no spenem plante mane mo oli faenem wan haftaem wok nomo. Tingbaot Theodore mo Ann. Taem tufala i mared, tufala i stap mekem wok blong paenia, gogo kasem taem we tufala i gat pikinini, nao tufala i mas stop long wok ya. !Be tingting blong tufala i stap strong long wok blong paenia! Taem tufala gel blong tufala oli stap gruap, oltaem tufala i leftemap tingting blong tufala blong mekem wok blong paenia. Be, samting we i moa impoten, Theodore mo Ann tufala i soemaot gudfala eksampel, taem tufala i joen long wok blong haftaem paenia plante taem. Taem tufala gel ya oli kam bigwan, Theodore mo Ann oli katem taem blong olgeta long wok, blong oli gat moa taem blong joen long wok blong prij.

Afta we tufala gel blong tufala oli go stap long narafala ples mo oli joen long fultaem wok blong paenia, Ann i statem wok blong paenia bakegen. Wan dei, hem i traehad blong pulum Theodore blong lego wok blong hem. Hem i talem se: “Yumitu save mekem wok blong paenia tugeta.” Theodore i talemaot disisen blong hem long masta blong hem long wok. Hem i sapraes taem masta blong hem i talem se hem i save gohed blong wok haftaem nomo. Masta ya i se: “Mi save se yu wantem wok fultaem blong masta blong yu we i stap antap [long heven].” Naoia, Theodore mo Ann tufala i glad tumas blong paenia tugeta.

Samfala oli statem wok blong paenia from sam samting we i kamaot long laef blong olgeta. Wan olfala man mo woman blong hem, tufala i lusum gel blong tufala wetem smol bubu gel blong tufala, wantaem nomo. Samting ya i mekem tufala i tingting strong olsem wanem tufala i stap yusum ol yia blong laef we tufala i gat yet. (Eklesiastis 7:2) Tufala i no letem filing blong harem nogud i winim tufala, be tufala i joen long wok blong prij fultaem. !Naoia tufala i bin gohed eit yia long wok ya!

Yes, i rili nidim strong tingting blong stap gohed long wok blong prij fultaem. Tingbaot Ernst mo woman blong hem, Riek, we tufala i statem wok blong paenia taem ol pikinini blong tufala oli kam bigwan mo oli no moa stap long haos blong tufala. Smoltaem afta, wan bisnesman we i savegud Ernst, i wantem givim wan gudfala wok long hem. Be, Ernst i talem long hem se: “!Masta blong mifala i moagud bitim eni narafala masta, mo mifala i no wantem lego hem!” From we Ernst mo woman blong hem tufala i gohed blong wok blong “masta ya,” Jeova, tufala i kasem jans blong mekem sam narafala nambawan wok. Tufala i mekem wok blong visitim ol kongregesena blong bitim 20 yia, mo tufala i gohed yet long wok blong paenia. ?Tufala i sore we tufala i jusum blong lego plante samting blong mekem wok ya? No gat. I no longtaem i pas, tufala ya i bin raetem se: “Sipos Jeova i wantem, afta tri manis bambae mitufala i mekem lafet blong makem 50 yia we mitufala i mared, we ol man oli kolem se golden anivesari. Be, mifala i bilif fulwan se ol yia we oli sas moa, olsem gol, hemia ol yia we mifala i mekem wok blong paenia.”

!Plante man oli faenem se taem doa i open blong mekem moa long wok blong prij, samting ya i givim moa glad tu long olgeta! Wan brata we i stat paenia tu wik afta we hem i kasem 65 yia, i talem se: “Mi no gat wan taem long laef blong mi we i fulap long ol blesing, olsem ol ten yia ya we mi paenia.” Wan man mo woman blong hem we tufala i mekem wok blong paenia blong bitim seven yia, oli talem se: “?Wan man mo woman we oli olfala olsem mitufala mo we laef blong olgeta i sem mak long laef blong mitufala, bambae tufala i save mekem wanem samting we i moagud? Plante taem mifala i luk sam olfala olsem mitufala taem mifala i stap prij​—oli stap long haos nomo, oli kam fatfat, olfala, mo oli slak. Wok blong prij i mekem mitufala i stap strong long bodi mo long tingting tu. Mitufala i stap tugeta oltaem. Mitufala i laf oltaem mo haremgud long laef.”

I tru se, i no olgeta olfala evriwan we laef blong olgeta i stret blong mekem wok blong paenia. Be ol Kristin ya oli save sua se Jeova i glad long olgeta samting we oli naf blong mekem long wok blong hem. (Skelem wetem Mak 12:​41-​44.) Eksampel, wan sista we i handikap, i stap nomo long wan spesel hospital blong ol olfala. !Be, wan doa i open blong hem i mekem wok! Wan dokta i askem long hem olsem wanem hem i stap yusum plante taem we hem i gat. Hem i talem se: “Mi mi talem long hem se mi no gat naf taem. Dokta i no kasem save long samting ya. Ale, mi talem long hem se olgeta dei blong mi oli fulap long ol gudfala wok. Mi no harem nogud blong stap mi wan oltaem, be mi traem faenem olgeta we oli rili harem nogud blong stap olgeta nomo. Mi traem talemaot long olgeta, samting we God bambae i mekem long olgeta man, i no longtaem.” Hem i eksplenem laef blong hem olsem: “Yufala i save se wan olfala we i gat kolosap 80 yia i no save mekem plante samting. Taswe, yufala i mas prea from mi, blong bambae mi save lidim plante moa man oli kam long Jeova.”

?Yu yu kasem yia we yu yu rere blong ritae long wok? Doa i save open long wan laef we i isi we i pulum yu blong spel nomo, be hemia i no doa we i open long ol blesing long saed blong speret. Tingtinggud long laef blong yu mo prea long saed ya. Maet yu yu naf blong gotru long doa we i lidim yu blong mekem moa long wok blong Jeova.

[Futnot]

[Tok blong pija long pej 25]

Ritae long wok i save lidim yu blong mekem moa long wok blong prij