“!Yu Yu Stret Blong Kam Wan Paenia!”

1. ?Wanem tingting blong wan sista long saed blong wok blong paenia?

¹ Kathe B. Palm i wan sista we i mekem wok blong paenia plante yia. Hem i lego ol samting we hem nomo i wantem, nao hem i go prij long kantri blong Jili long Saot Amerika. Hem i finisim evri ples long kantri ya. Sista ya i talem se: “Mi no save faenem wan narafala wok we i mekem mi mi harem gud olsem wok blong paenia. Mi kasem fulap blesing long wok ya.” Ol brata sista we oli stap tingbaot gudfala laef we man i gat long wok blong paenia, maet samtaem oli talem long yu tu se: “!Yu yu stret blong kam wan paenia!”

2. ?From wanem wok blong Jeova i mekem yumi harem gud tumas?

² Wan Fasin Blong Laef We i Givim Glad: Jisas, we hem i Eksampol blong yumi, i harem gud tumas blong mekem samting we Papa blong hem i wantem. (Jon 4:34) Taswe, hem i no stap giaman taem i tijim ol man blong hem, se sipos oli joen oltaem long wok blong Jeova, bambae oli glad tumas. Yumi tu, yumi harem gud taem yumi bisi long wok we Jeova i glad long hem. Mo sipos yumi yusum taem, paoa, mo olting blong yumi moa blong halpem ol narafala, glad blong yumi bambae i kam bigwan moa.—Wok 20:31, 35.

3. ?Taem yumi prij moa, wanem janis we yumi gat we i givim bigfala glad long yumi?

³ Sipos yumi spenem moa taem long wok blong prij, bambae yumi gat plante moa janis blong statem ol Baebol stadi wetem ol man mo gohed blong tijim olgeta. Hemia i save givim bigfala glad long yumi. Taem yumi prij plante, yumi kamgud moa long fasin blong storian mo tijim ol man. Mo maet yumi luk se i gat frut blong wok blong yumi, nating se fastaem i luk olsem se i no gat plante man long teritori blong yumi we oli intres. Taem yu paenia wan yia finis, yu save go long Skul Blong Ol Paenia. Afta, yu save yusum ol nambawan trening we yu kasem long skul ya, long wok blong prij. (2 Tim. 2:15) Sipos yumi gat strong tingting blong gohed nomo, maet wan dei, ol sid blong trutok we yumi stap planem bambae oli karem frut.—Pri. 11:6.

4. ?Ol yangfala we klosap nao bambae oli finis long skul, oli mas stap tingbaot wanem?

⁴ Ol Yangfala: Yu we yu stap long haeskul yet, ?yu stap tingbaot wanem we bambae yu mekem long ol yia we oli kam biaen? Taem yu stap skul, program blong yu i fulap long ol wok blong skul. Be afta we yu finis long skul, ?bambae yu yusum taem blong yu olsem wanem? I gud yu prea long saed blong wok blong paenia, mo traehad blong kam wan fultaem paenia, i bitim we yu wok fultaem blong kasem mane. Bambae yu lanem plante gudfala fasin, taem yu prij long ol man we oli gat ol defren kaen laef, yu winim ol trabol we oli blokem yu, yu lanem blong bos long yu wan, mo yu kam wan gudfala tija. Ol samting we yu lanem oli save halpem yu long ful laef blong yu.

5. ?Olsem wanem ol papa mama mo olgeta long kongregesen oli save pulum ol narafala blong mekem wok blong paenia?

⁵ Ol papa mama, ?yufala i stap givhan long ol pikinini blong yufala, blong oli jusum wok blong fultaem paenia? Ol tok blong yufala mo gudfala eksampol blong yufala oli save givhan bigwan long olgeta, blong oli putum Kingdom i stap fasples long laef blong olgeta. (Mat. 6:33, NW) Ray i stat blong paenia taem hem i finis long hae skul. Hem i tingtingbak long taem ya, i se: “Oltaem mama blong mi i stap talem se wok blong paenia i beswan rod blong harem gud long laef.” Olgeta evriwan long kongregesen oli save pulum ol narafala blong mekem wok blong paenia, sipos oli toktok gud long saed ya mo wok wetem ol paenia. Jose, we i stap long Spen, i talem se: “Kongregesen we mi bin stap long hem i tinghae long wok blong paenia, olsem beswan wok we ol yangfala oli save mekem. Ol tok blong ol brata mo sista we i soemaot se oli tinghae long wok ya, wetem ol samting we oli mekem blong givhan long mi, i mekem i moa isi long mi blong stat long wok blong paenia.”

6. ?Sipos yu no harem se yu wantem paenia, yu yu save mekem wanem?

⁶ Winim Ol Samting We Oli Blokem Yu: Be maet yu talem se, ‘Mi no harem se mi wantem mekem wok blong paenia.’ Sipos yu stap tingting olsemia, yu mas prea long Jeova long saed ya. Yu save talem long hem se, ‘Mi no save sipos wok blong paenia i stret long mi, be mi mi wantem mekem samting we yu yu glad long hem.’ (Sam 62:8; Prov. 23:26) Biaen, yu mas traem luksave rod we Jeova i lidim yu long hem, tru long Tok blong hem mo ogenaesesen blong hem. Plante fultaem paenia oli bin “traem” wok blong haftaem paenia fastaem. Bigfala glad we oli kasem long wok ya i pulum olgeta blong joen long wok blong fultaem paenia.—Sam 34:8.

7. ?Olsem wanem yu save winim tingting ya se yu no naf blong mekem 70 aoa evri manis long wok blong prij?

⁷ Maet yu ting se yu no naf blong mekem 70 aoa evri manis long wok blong prij. I gud yu toktok wetem ol paenia we laef blong olgeta i klosap sem mak long yu. (Prov. 15:22) Biaen, traem raetemdaon ol defdefren program blong luk weswan nao i stret long yu. Ating bambae yu sapraes blong luk se yu stap westem plante taem long ol samting we oli no impoten. Be sipos yu yusum taem ya long wok blong prij, bambae yu luk we i no strong blong kasem ol aoa blong yu.—Efes. 5:15, 16.

8. ?From wanem i gud we sam samtaem yumi lukluk bakegen long laef blong yumi?

⁸ Lukluk Gud Long Laef Blong Yu: Plante samting long laef blong yumi wanwan oli save jenis. Sam samtaem i gud blong lukluk bakegen long laef blong yumi. Tingbaot: ?Yu yu stap kam klosap long taem ya we bambae yu ritae? Wan brata we i ritae bifo long stret taem blong hem, nem blong hem Randy, i talem se: “Jus ya we mi mi mekem blong ritae bifo long stret taem blong mi, i mekem se mi wetem woman blong mi, mitufala i save stat long wok blong fultaem paenia. Antap long hemia, mitufala i gat janis blong muv i go long wan narafala ples we i gat moa nid. Mi mi kasem plante blesing from jus ya we mi mekem. Be blesing we i bigwan moa, hemia se tingting blong mi i stap kwaet, i no stikim mi.”

9. ?Ol man mo woman we oli mared, oli mas tingbaot wanem?

⁹ Sam man mo woman we oli mared oli lukluk gud long laef blong olgeta, nao oli luk se i no nid blong tufala evriwan i wok fultaem blong kasem mane. I tru, maet ol famle olsem oli mas jenisim fasin blong laef blong olgeta, from we mane blong olgeta i smol moa naoia. Be ol blesing we oli kasem bambae oli bigwan moa i bitim samting we oli lego. Jes afta we woman blong John i finis long fultaem wok, blong mekem moa long wok blong prij, John i talem se: “Mi mi harem gud tumas taem mi tingbaot se woman blong mi i stap yusum olgeta taem blong hem evri dei long wok blong Jeova.”

10. ?Wanem i save pulum ol Kristin blong tingbaot wok blong paenia?

¹⁰ Soemaot Lav Mo Bilif: Jeova i givim wan wok long yumi we i moa impoten i bitim ol narafala wok we yumi save mekem, hemia wok blong prij. I no longtaem, bambae olfala wol ya i lus, mo Jeova bambae i sevem olgeta ya nomo we oli stap singaot hem long nem blong hem. (Rom 10:13) Sipos yumi lavem hem tumas mo yumi wantem talem tangkiu long hem from ol samting we hem i mekem long yumi, bambae yumi wantem obei long tok we Pikinini blong hem i talem, se yumi mas prij strong. (Mat. 28:19, 20; 1 Jon 5:3) Mo tu, sipos yumi bilif tru se yumi stap long ol las dei, bambae yumi wantem mekem bes blong yumi long wok blong prij long smoltaem we i stap yet, i bitim we yumi stap mekem ol bisnes long wol ya.—1 Kor. 7:29-31.

11. ?Yumi mas harem olsem wanem sipos wan brata no sista i talem long yumi se yumi stret blong kam wan paenia?

¹¹ Yumi no mekem wok blong fultaem paenia blong folem wan plan nomo we ogenaesesen blong Jeova i stanemap. Yumi mekem wok ya from we yumi onagud long God. Taswe sipos wan brata no sista i talem long yu se yu yu stret blong kam wan paenia, yu mas harem gud long tok blong hem. Yu mas prea mo tingting gud blong faenemaot sipos yu save joen wetem ol narafala paenia long wok ya we i givim bigfala glad.

[Tok blong pija long pej 4]

Ol papa mama, ?yufala i stap givhan long ol pikinini blong yufala blong jusum wok blong fultaem paenia?

[Tok blong pija long pej 5]

Jeova i givim wan wok long yumi we i moa impoten i bitim ol narafala wok we yumi save mekem, hemia wok blong prij.