I Gud Sipos Jeova i Save Tinghae Long Yu From Ol Fasin We Yu Talemaot Long Hem
“Plis, O God blong mi, yu rimemba samting ya . . . taem mi talemaot ol fasin blong mi long fes blong yu. . . . Plis yu rimemba mi, O God blong mi, from ol gudfala samting we mi bin mekem.”—NEHEMAEA 13:22, 31.
1. ?Wanem samting i stap halpem olgeta we oli givim laef blong olgeta long God finis, blong oli save talemaot ol gudfala fasin nomo long fes blong Jeova?
OL MAN blong Jeova oli gat olgeta samting we oli nidim, blong mekem se oli save talemaot ol gudfala fasin nomo long fes blong hem. ?From wanem? From we, oli stap long ogenaesesen blong God long wol ya, mo oli stap frengud wetem Hem. Hem i bin talemaot long olgeta, ol samting we bambae hem i mekem, mo hem i yusum tabu speret blong hem blong givhan long olgeta, mo blong givim fasin luksave long saed blong speret long olgeta. (Ol Sam 51:11; 119:105; 1 Korin 2:10-13) From we Jeova i givim olgeta spesel samting ya long olgeta, hem i askem wetem lav long ol man blong hem long wol ya, blong oli talemaot long hem ol samting long saed blong olgeta, olsem ol fasin blong olgeta, mo ol samting we oli stap mekem long paoa blong hem mo wetem help blong tabu speret blong hem.
2. (a) ?From wanem samting, Nehemaea i save talemaot ol gudfala fasin nomo long fes blong God? (b) ?Wanem laswan tok we Nehemaea i putum long buk blong hem long Baebol?
2 Wan man we i bin talemaot ol gudfala fasin long fes blong God, hemia Nehemaea, man blong wok blong King Atakseses (Longimanus) blong Pesia. (Nehemaea 2:1) Nehemaea i kam rula blong ol man Jyu mo hem i bildim bakegen stonwol blong Jerusalem, nating se hem i fesem plante enemi mo denja. Wetem strong tingting long saed blong trufala wosip, hem i stanemap Loa blong God bakegen, mo hem i soemaot se hem i kea long ol man we oli harem nogud aninit long han blong ol raf man. (Nehemaea 5:14-19) Nehemaea i pusum ol man Livae blong oltaem oli jekemap sipos oli stap klin long fored blong God, mo blong oli stap gad long ol get, mo blong oli kipim dei blong Sabat i stap tabu. Taswe hem i save prea se: “Plis, O God blong mi, yu rimemba samting ya tu, taem mi talemaot ol fasin blong mi long fes blong yu. Plis yu sore long mi wetem bigfala lav mo kaen fasin we yu gat.” Mo tu, i stret nomo we Nehemaea i finisim buk we God i pusum hem blong raetem long Baebol, wetem ol tok ya: “Plis yu rimemba mi, O God blong mi, from ol gudfala samting we mi bin mekem.”—Nehemaea 13:22, 31.
3. (a) ?Eksplenem wanem samting nao yu ting se i save makem wan man we i gud? (b) Taem yumi tingbaot fasin blong Nehemaea, ?samting ya i save pusum yumi blong askem wanem kwestin long yumi wan?
3 Wan man we i mekem i gud, hem i mekem ol nambawan fasin mo ol gudfala wok we oli givhan long ol narafala. Nehemaea, hem i wan man olsemia. Hem i fraet long God olsem we i givim bigfala ona long hem, mo tingting blong hem i strong gud blong leftemap trufala wosip. Mo tu, hem i gat tangkyu from jans we hem i gat blong mekem wok blong God, mo hem i save talemaot ol gudgudfala fasin long fes blong Jeova. Taem yumi tingbaot ol fasin blong hem, maet samting ya i pusum yumi blong askem long yumi wan se, ‘?Wanem tingting blong mi long saed blong ol jans mo wok we God i givim long mi? ?Mi mi stap talemaot wanem kaen fasin long fes blong Jeova God mo Jisas Kraes?’
Save i Mekem Se Yumi Mas Talemaot Ol Fasin Blong Yumi Long God
4. ?Wanem oda we Jisas i givim long ol man blong hem, mo olgeta we ‘oli stret blong kasem laef blong olwe’ oli mekem wanem?
4 Jisas i givim wok ya long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta . . . mo yufala i mas tijim olgeta blong oli folem olgeta tok ya we mi mi givim finis long yufala.” (Matyu 28:19, 20) Blong pulum ol man oli kam man blong Kraes, oli mas tijim olgeta. Ale, olgeta ya we oli kasem tijing mo we oli ‘stret blong kasem laef blong olwe,’ oli mas tekem baptaes, olsem Jisas i bin mekem. (Ol Wok 13:48; Mak 1:9-11) Filing ya we oli wantem folem olgeta tok we Jisas i givim long olgeta, i kamaot long hat blong olgeta. Taem oli kasem stret save long saed blong Tok blong God, mo oli mekem save ya i wok long laef blong olgeta, oli kasem mak we oli rere blong givim laef blong olgeta i go long God.—Jon 17:3.
5, 6. ?Wanem mining blong Jemes 4:17? Givim wan eksampel blong soemaot mining blong vas ya.
5 Sipos save blong yumi long saed blong Baebol i dip moa, ale faondesen blong bilif blong yumi i strong moa. From samting ya, God i askem moa long yumi. Jemes 4:17 i talem se: “Man we i save wanem fasin i stret blong mekem, be i no mekem, hem i mekem sin ya.” I klia se tok ya i joen stret wetem samting we disaepol Jemes i jes talem, long saed blong man we i tok flas bitim we hem i dipen fulwan long God. Sipos wan man i luksave se hem i no naf long prapa paoa blong hem blong mekem wan samting we i save stanap blong olwe, mo se hem i nidim Jeova oltaem blong halpem hem, be samting we hem i mekem i no laenap wetem tingting ya, ale hem i mekem sin. Be ol tok blong Jemes i save minim sin ya tu, we man i no mekem wan samting nating. Eksampel, long parabol blong Jisas long saed blong ol sipsip mo nani, hem i jajem ol nani, i no from we oli mekem ol rabis fasin, be from we oli no givhan nating long ol brata blong Kraes.—Matyu 25:41-46.
6 Wan man we i stap stadi Baebol wetem ol Wetnes blong Jeova, i no stap gohed gud long saed blong speret. Samting ya i kamaot from we hem i no wantem lego fasin blong smok, nating we hem i luksave se fasin ya i no stret. Wan elda i askem hem blong ridim Jemes 4:17. Afta we elda ya i tokbaot mining blong vas ya, hem i talem se: “Nating se yu yu no baptaes yet, be yu tu yu mas talemaot long fes blong God ol fasin blong yu, mo yu mas karem frut blong disisen we yu mekem.” Yumi glad se man ya i lesin long tok ya, i lego fasin blong smok, mo smoltaem biaen, hem i kam naf blong tekem baptaes blong soemaot se hem i givim laef blong hem long Jeova God.
Talemaot Long God Olsem Wanem Yumi Mekem Minista Wok Blong Yumi
7. ?Wanem wan rod blong soemaot se yumi gat tangkyu from “save blong God”?
7 Hat blong yumi i mas wantem tumas blong mekem Man ya we i Wokem yumi, i glad. Wan rod blong soemaot tangkyu from “save blong God,” hemia blong folem oda we Pikinini blong hem, Jisas Kraes, i bin givim, blong go pulum ol man blong oli kam man blong hem. Mo tu, hemia wan rod blong soemaot lav blong yumi long God mo long ol man raonabaot long yumi. (Proveb 2:1-5; Matyu 22:35-40) Yes, save blong yumi long saed blong God i mekem se yumi mas talemaot ol fasin blong yumi long fes blong Hem. Mo yumi mas tingbaot ol narafala man olsem we oli save kam ol man blong Kraes.
8. ?From wanem yumi save talem se Pol i harem se hem i mas talemaot long God olsem wanem hem i stap mekem minista wok blong hem?
8 Aposol Pol i save se sipos man i agri mo i obei long gud nyus wetem fulhat blong hem, bambae hem i save kasem laef. Be, sipos hem i sakemaot gud nyus ya, hem i save kasem panis blong ded. (2 Tesalonaeka 1:6-8) Taswe, hem i harem se God bambae i askem hem blong talemaot long fes blong Hem olsem wanem hem i mekem minista wok blong hem. Yes, Pol mo ol narafala disaepol oli tinghae long minista wok blong olgeta, taswe oli lukaotgud se ol man oli no kasem tingting se oli winim mane from wok ya. Mo tu, hat blong Pol i pusum hem blong talem se: “Mi mi no gat raet blong tok flas from we mi stap talemaot gud nyus blong Kraes. Hemia i wok blong mi we mi mas mekem. Sipos mi no moa talemaot gud nyus ya, hemia bigfala trabol blong mi ya, bambae mi harem nogud tumas from.”—1 Korin 9:11-16.
9. ?Wanem impoten kaon we olgeta Kristin oli mas pembak?
9 From we yumi givim laef blong yumi long Jeova blong mekem wok blong hem, ‘wok blong talemaot gud nyus, hemia i wok we yumi mas mekem.’ Yumi kasem oda blong talemaot mesej blong Kingdom. Yumi agri blong mekem wok ya taem yumi givim laef blong yumi long God. (Skelem wetem Luk 9:23, 24.) Mo tu, yumi gat wan kaon blong pembak. Pol i talem se: “From we mi harem olsem we mi gat bigfala kaon blong mi we mi mas pemaot, se mi mas givhan long olgeta man, long ol man blong taon, wetem ol man blong bus, mo long ol man we oli gat save, wetem ol man we oli no save samting. From samting ya, mi mi wantem tumas blong talemaot gud nyus ya long yufala tu, long Rom.” (Rom 1:14, 15) Pol i gat kaon from we hem i save se hem i mas prij, blong givim jans long olgeta man blong oli harem gud nyus mo oli kasem laef. (1 Timote 1:12-16; 2:3, 4) Taswe hem i wok had blong obei long oda blong mekem wok ya, nao long rod ya, bambae hem i no moa gat kaon long ol man raonabaot long hem. Yumi ol Kristin, yumi tu i gat wan kaon blong pembak. Mo tu, wok blong talemaot Kingdom hem i nambawan rod blong soemaot lav blong yumi long God, long Pikinini blong hem, mo long ol man raonabaot long yumi.—Luk 10:25-28.
10. Wanem rod we samfala oli yusum blong mekem moa long minista wok?
10 Wan rod blong mekem se God i agri long minista wok blong yumi, i blong yusum ol save mo fasin blong yumi, blong mekem moa long minista wok. Eksampel: Long ol yia we oli jes pas, namba blong ol man we oli aot long ol defren kantri blong kam stap long Briten, i kam antap bigwan. Blong kasem ol man ya wetem gud nyus, i gat bitim 800 paenia (ol man blong talemaot Kingdom fultaem) mo plante handred narafala Wetnes we oli lanem ol defren lanwis. Samting ya i givhan bigwan blong mekem wok blong prij i gohed moa. Wan paenia we i stap tijim wan grup long lanwis blong Jaena, i talem se: “Mi mi neva tingting se wan dei bambae mi tijim lanwis blong mi long ol narafala Wetnes, blong bambae oli save serem trutok wetem ol man long lanwis ya. !Hemia i rili mekem mi mi haremgud!” ?Yu yu save mekem moa long minista wok long wan rod olsemia?
11. ?Wanem i kamaot taem wan Kristin i tekem jans blong givim wetnes?
11 I sua se, sipos wan man i stap draon, bambae yumi traehad long evri rod blong sevem man ya. Ol man blong Jeova tu, oli wantem tumas blong yusum ol save mo fasin blong olgeta, blong wetnes long evri jans we oli gat. I no longtaem tumas i pas, wan Wetnes i sidaon kolosap long wan woman long bas, mo i tokbaot Baebol wetem hem. Woman ya i glad tumas long olgeta samting we hem i harem, nao hem i askem plante kwestin. Taem bas i kasem ples we Wetnes ya i mas godaon, woman ya i plis long hem blong no godaon, be blong kam long haos blong hem, from we hem i gat plante moa kwestin blong askem. Wetnes ya i agri. ?Wanem i kamaot from? Wetnes i statem wan Baebol stadi wetem woman ya, mo sikis manis biaen, woman ya i kam wan pablisa blong Kingdom we i no baptaes yet. I no longtaem, woman ya i stap mekem sikis Baebol stadi wetem ol man raonabaot long hem. !Hemia i rili wan gudfala blesing we i kamaot from we Wetnes ya i yusum ol save mo fasin blong hem long wok blong Kingdom!
12. ?Olsem wanem yumi save yusumgud ol save mo fasin we yumi gat long minista wok?
12 Taem yumi yusum ol buk long wok blong prij, olsem buk ya Save Blong Lidim Yu Long Laef We i No Save Finis, we i gat 192 pej long hem, samting ya i save halpem yumi blong yusumgud ol save mo fasin we yumi gat olsem ol minista. Long Epril 1996, Raeting Komiti blong Hed Kampani blong ol Wetnes blong Jeova, i talem se bambae oli prentem buk ya Save long bitim 140 lanwis. Mo long taem ya, oli prentem 30,500,000 kopi blong buk ya finis long 111 lanwis. Oli raetem buk ya blong halpem ol Baebol studen blong kasem naf save long Tok blong God mo ol stampa tingting blong hem, blong oli save givim laef blong olgeta long Jeova mo tekem baptaes. Naoia, ol pablisa blong Kingdom bambae oli no moa mekem Baebol stadi wetem wan studen blong plante yia. Taswe, bambae oli save mekem stadi wetem plante moa man, mo bambae oli save joen moa long wok blong prij long ol haos wanwan, mo long ol narafala fasin blong prij. (Ol Wok 5:42; 20:20, 21) Oli luksave se oli mas talemaot long fes blong God olsem wanem oli mekem minista wok blong olgeta. Taswe, oli pulum tingting blong ol man i go long ol woning we God i givim. (Esikel 33:7-9) Be bigfala tingting blong olgeta i blong givim ona long Jeova, mo blong halpem plante man blong save gud nyus long sot taem we i stap yet, bifo we rabis wol ya i lus.
Olsem Wan Famle, Talemaot Ol Gudfala Fasin Long Fes Blong God
13. ?From wanem ol famle we oli obei long God oli mas mekem famle Baebol stadi oltaem?
13 Ol man wanwan mo ol famle we oli joen long trufala Kristin skul, oli mas talemaot olgeta fasin blong olgeta long God. From samting ya, oli mas ‘gohed kwik blong kam bigman’ long saed blong speret, mo oli mas “stanap strong long bilif.” (Hibrus 6:1-3; 1 Pita 5:8, 9) Eksampel, olgeta we oli stadi long buk ya Save mo oli tekem baptaes, oli mas gohed blong kasem moa save blong Baebol. Blong mekem olsem, oli mas kam oltaem long ol miting, mo oli mas ridim Baebol mo ol narafala Kristin buk. Mo tu, ol famle we oli obei long God oli mas mekem wan famle stadi oltaem, from we hemia wan impoten rod blong ‘stap wekap, stanap strong long bilif, gat fasin olsem bigman long saed blong speret, mo kasem paoa.’ (1 Korin 16:13) Sipos yu yu hed blong famle, yu nao yu gat wok blong mekem long fes blong God, from we yu mas meksua se famle blong yu i stap kasem plante kakae long saed blong speret. Gudfala kakae long saed blong bodi i givim gud helt long man, mo long sem fasin, yu mo famle blong yu i nidim fulap gudfala kakae long saed blong speret oltaem, blong mekem ‘fasin blong bilif i kam strong moa.’—Taetas 1:13.
14. ?Wanem i kamaot taem wan gel Isrel i givim wetnes from ol gudfala tijing we hem i kasem?
14 Sipos i gat pikinini long famle blong yu, bambae God i tinghae long yu sipos yu tijimgud olgeta long ol samting long saed blong speret. Olkaen tijing olsemia bambae i givhan long olgeta, olsem we i bin givhan long wan smol gel Isrel we ol man Siria oli tekem hem olsem slef long taem blong profet Elaesa. Hem i kam haosgel blong waef blong wan jif blong ami blong Siria, Neman, we i gat sik ya leprosi. Nating se gel ya i smol nomo, hem i talem long misis blong hem se: “!I gud sipos masta blong mi i go luk profet ya we i stap long Sameria! Profet ya i naf blong mekem sik blong hem leprosi, i kamgud bakegen.” From gudfala toktok blong gel ya, Neman i go long Isrel, mo biaen, i folem advaes blong Elaesa blong swim seven taem long Jodan Reva, mo i kam klin long sik ya leprosi. Mo tu, Neman i kam wan man blong wosip long Jeova. !Ating samting ya i rili mekem smol gel ya i glad tumas!—2 King 5:1-3, 13-19.
15. ?From wanem i impoten we ol papa mama oli givim gudfala trening long saed blong speret long ol pikinini blong olgeta? Givim wan eksampel.
15 I no isi blong tijim ol pikinini blong fraetgud long God, long wol ya we i stap long paoa blong Setan, mo we ol man oli no tinghevi nating long ol gudfala fasin. (1 Jon 5:19) Be, bubu woman blong Timote, we nem blong hem Loes, mo mama blong hem, Yunis, oli tijimgud hem long Baebol, stat long taem we hem i smol nomo. (2 Timote 1:5; 3:14, 15) Stadi long Baebol wetem ol pikinini blong yu, karem olgeta oli go long ol Kristin miting oltaem, mo karem olgeta oli go long wok blong prij wetem yu. Ol samting ya, oli olsem haf blong fasin blong trenem olgeta, we bambae yu mas talemaot long fes blong God. Wan Kristin long Wels, we naoia i gat bitim 80 yia, i tingbaot se long ol yia biaen 1920, hem i stap wokbaot 10 kilomita antap long hil (trep ya i mekem 20 kilomita evriwan blong go mo kambak bakegen) wetem papa blong hem, blong givimaot ol pepa long saed blong Baebol long olgeta man long nekiswan velej long narasaed bigfala hil ya. Sista ya i talem wetem bigfala tangkyu, se: “Long ol taem ya nao we mitufala i wokbaot, papa blong mi i mekem trutok i godaon dip long hat blong mi.”
Ol Elda Oli Mas Talemaot Ol Samting Long God—?Olsem Wanem?
16, 17. (a) ?Ol olfala man long Isrel bifo, we oli bigman long saed blong speret, oli kasem wanem bigfala wok? (b) Taem yumi skelem taem blong yumi wetem Isrel bifo, ?from wanem ol Kristin elda oli mas mekem moa wok tede?
16 Waes man ya Solomon i talem se: “Waet hea i naes olsem hat blong King blong flasem hed blong man, sipos man ya i stap folem wei blong stret fasin.” (Proveb 16:31) Be i no yia blong man nomo we i mekem se man ya i naf blong karem bigfala wok long kongregesena blong ol man blong God. Ol olfala man long Isrel bifo we oli strong long saed blong speret, oli karem wok olsem jaj mo haeman, we oli jajem man long stret fasin, mo oli mekem se i gat pis mo oda oltaem, mo oli lukaot se ol man oli stap strong long saed blong speret. (Dutronome 16:18-20) Samting ya i sem mak insaed long Kristin kongregesen. Be from we wol ya i stap kam kolosap moa long en blong hem, ol elda oli gat moa wok blong mekem. ?From wanem?
17 Ol man Isrel oli wan ‘nesen we God i jusumaot,’ mo hem i mekem olgeta oli fri long Ijip bifo. Stat long taem we oli kasem Loa tru long man we God i yusum blong toktok long olgeta, Moses, ol pikinini blong olgeta oli bon insaed long wan nesen we i blong God finis, mo we i savegud olgeta loa blong Jeova. (Dutronome 7:6, 11) Be tede, i no gat wan man we i bon insaed long wan nesen we i blong God finis. Mo i no gat plante we oli gruap long ol famle we oli ona long God mo we oli savegud trutok blong Baebol. Ol man we oli jes stat “folem trutok oltaem long laef blong olgeta,” oli nidim blong kasem moa tijing, blong mekem laef blong olgeta i laenapgud wetem ol rul blong Baebol. (3 Jon 4) !Taswe, ol elda oli gat wan bigbigfala wok blong mekem, taem oli ‘holemtaet ol stret toktok,’ mo givhan long ol man blong Jeova!—2 Timote 1:13, 14.
18. ?Wanem kaen help we ol elda long kongregesen oli mas rere blong givim, mo from wanem?
18 Wan yangfala pikinini we i stap lanem blong wokbaot, i save foldaon plante taem. Hem i harem se hem i no sefgud, mo i nidim papa mo mama blong givhan mo leftemap tingting blong hem blong gohed. Long sem fasin, wan man we i givim laef blong hem long Jeova finis, i save foldaon long saed blong speret. Aposol Pol tu i faenem se hem i nidim blong faet strong blong mekem samting we i stret mo i gud long fored blong God. (Rom 7:21-25) Ol man blong lukaot long sipsip blong God oli nidim blong givhan wetem lav, long olgeta Kristin we oli bin mekem sin, be we oli rili sore mo oli tanem tingting blong olgeta from sin ya. Taem ol elda oli visitim wan woman we i givim laef blong hem long Jeova finis, be hem i bin mekem wan bigfala sin, woman ya i talem long fored blong man blong hem we hem tu i givim laef blong hem finis long God, se: “!Mi save finis se bambae yufala i sakemaot mi long kongregesen!” Be, hem i krae bigwan taem hem i harem se ol elda oli wantem save olsem wanem oli save givhan long famle blong hem, blong oli kam strong bakegen long saed blong speret. Ol elda ya oli save se oli mas talemaot long God olsem wanem oli mekem wok blong olgeta, taswe oli glad blong givhan long sista blong olgeta we hem i tanem tingting blong hem from sin ya.—Hibrus 13:17.
Gohed Blong Talemaot Ol Fasin We Oli Gud Long Fes Blong God
19. ?Olsem wanem yumi save gohed blong talemaot ol gudfala fasin nomo long fes blong God?
19 Ol elda blong kongregesen mo ol narafala man blong God, oli mas gohed oltaem blong talemaot ol fasin we oli gud long fes blong Jeova. Yumi save mekem olsem sipos yumi folemgud Tok blong God mo mekem ol samting we Hem i wantem. (Proveb 3:5, 6; Rom 12:1, 2, 9) Yumi rili wantem mekem i gud long ol brata mo sista blong yumi long saed blong bilif. (Galesia 6:10) Be, i gat plante kakae i stap yet long garen, mo i gat smol man nomo oli stap blong pikimap kakae ya. (Matyu 9:37, 38) Taswe, yumi mas mekem i gud long ol narafala man tu, tru long hadwok blong yumi blong talemaot mesej blong Kingdom. Bambae Jeova i tinghae long yumi sipos yumi folem promes we yumi bin mekem taem yumi givim laef blong yumi long Hem, mo sipos yumi mekem samting we hem i wantem, mo yumi holemstrong long wok blong talemaot gud nyus.
20. ?Yumi lanem wanem taem yumi tingtinggud long Nehemaea?
20 Taswe, yumi mas gohed blong wok strong long wok blong Masta. (1 Korin 15:58) I gud sipos yumi tingbaot Nehemaea, we i bildim stonwol blong Jerusalem bakegen, i stanemap Loa blong God, mo i wok strong blong leftemap trufala wosip. Hem i prea se bambae Jeova God i rimemba hem from ol gudfala wok we hem i bin mekem. I gud we yu tu yu gat semkaen fasin blong onagud long Jeova, mo bambae hem i save tinghae long yu from ol gudfala fasin we yu talemaot long fes blong hem.
[Futnot]
a Wan grup blong man we oli joen wanples blong wosip.
?Wanem Ol Ansa Blong Yu?
◻ ?Nehemaea i soemaot wanem eksampel?
◻ ?From wanem nao, save we yumi gat i mekem se yumi mas talemaot ol fasin blong yumi long fes blong God?
◻ ?Olsem wanem yumi save talemaot ol gudfala fasin long fes blong Jeova, long saed blong minista wok blong yumi?
◻ ?Blong talemaot ol gudfala fasin long fes blong God, ol famle oli mas mekem wanem?
◻ ?Olsem wanem ol Kristin elda oli talemaot ol fasin blong olgeta long fes blong God?
[Tok blong pija long pej 18]
Olsem Pol, yumi save talemaot ol gudfala samting nomo long fes blong God, long saed blong wok blong talemaot Kingdom
[Tok blong pija long pej 19]
?Ol pikinini blong yu oli strong long bilif olsem smol gel Isrel long haos blong Neman?