Kristin Fasin Blong Tekem Narafala i Kam Long Haos Blong Yumi, Long Wol Ya We i Seraot
‘I stret nomo blong yumi tekem ol man olsem oli kam long haos blong yumi, blong yumi save joen wetem olgeta long wok blong talemaot trutok.’—3 JON 8.
1. ?Wanem sam nambawan presen we Man ya we i Wokem Olgeta Samting i givim long ol man?
“OL MAN oli no gat wan gudfala samting aninit long san bitim we oli kakae mo oli dring mo oli haremgud, mo samting ya i mas stap wetem olgeta long hadwok we oli mekem long olgeta dei blong laef blong olgeta, we trufala God i givim long olgeta aninit long san.” (Eklesiastis 8:15) Long ol tok ya, Hibru man ya we i pulum ol man oli kam wanples, i talem long yumi se Jeova God i wantem se olgeta man we hem i wokem, oli haremgud mo oli glad. Be tu, hem i talem wanem we oli save mekem blong oli haremgud mo oli glad olsem. Long olgeta yia we oli pas finis, i luk olsem se oltaem i gat wan samting we olgeta man long evri ples oli wantem, hemia blong haremgud mo gat gudtaem.
2. (a) ?Olsem wanem ol man oli spolem laef ya we Jeova i wantem se oli gat? (b) ?Wanem samting i kamaot from?
2 Tede yumi laef long wan wol we ol man oli ronem ol samting blong mekem olgeta oli haremgud nomo, oli bisi oltaem wetem ol pleplei mo gudtaem nomo. Olsem we Baebol i talemaot finis, bighaf blong ol man oli “tingbaot olgeta nomo, . . . oli wantem tumas ol samting we oli stap harem gud long hem, i winim we oli stap laekem God.” (2 Timote 3:1-4) Be, i tru tumas se fasin ya i defren olgeta long samting we Jeova God i wantem fastaem. Taem fasin ya blong ronem gudtaem i kam bigfala samting long laef blong man, no taem hem i yusum ful laef blong hem blong mekem ol samting nomo we hem i save haremgud from, hem i no save kasem trufala fasin blong haremgud, mo ‘evri samting oli nating nomo, i olsem we hem i stap ronem win.’ (Eklesiastis 1:14; 2:11) From samting ya, wol ya i fulap long ol man we oli harem se oli stap olgeta nomo mo we oli harem nogud, mo samting ya i stampa blong plante problem we oli kamaot long medel blong ol man tede. (Proveb 18:1) Ol man oli no moa trastem ol narafala man mo oli seraot from defren kala blong skin, laen, haenem, no from we samfala oli rij mo samfala oli pua.
3. ?Olsem wanem yumi save faenem trufala glad mo fasin blong haremgud?
3 Ol samting bambae oli defren olgeta sipos olgeta man oli folem fasin we Jeova i stap mekem long ol narafala man—!kaengud fasin, gladhat blong givim presen, mo fasin blong singaotem narafala man i kam! Hem i soemaot klia se rod blong kasem trufala glad, i no blong traehad blong kasem olgeta samting we yumi nomo i wantem. Be, hemia nao rod: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Blong faenem trufala glad mo fasin blong haremgud, yumi mas winim ol samting we oli stap blokem yumi mo ol samting we oli mekem yumi seraot, ol samting we oli save stap olsem wan fenis raon long yumi. Mo yumi mas traehad blong soem lav long ol narafala we oli stap mekem wok blong Jeova, olsem yumi. I impoten we yumi folem advaes ya se: ‘I stret nomo blong yumi tekem ol man olsem oli kam long haos blong yumi, blong yumi save joen wetem olgeta long wok blong talemaot trutok.’ (3 Jon 8) Sipos yumi tekem olgeta we i stret blong tekem, oli kam long haos blong yumi, go kasem mak we yumi naf blong mekem, samting ya i save karem blesing long tu rod—hem i save givhan long yumi we yumi soem fasin ya mo long man we i kasem tu. Ale, ?hu olgeta ya we i stret blong yumi ‘tekem olgeta oli kam long haos blong yumi’?
‘Lukaot Long Ol Pikinini We Oli No Gat Papa Mo Ol Widowoman’
4. ?Wanem bigfala jenis i kamaot long laef blong plante famle tede mo long laef blong sam man blong Jeova tu?
4 Tede, i no gat plante famle we oli joengud mo i no gat plante man mo woman we oli hapi long mared blong olgeta. Namba blong ol divos we oli kam antap bigwan, mo bigfala namba blong ol woman raon long wol we oli stap olgeta nomo wetem pikinini blong olgeta, i jenisim bigwan tingting long saed blong famle laef we i stap longtaem finis i kam. From samting ya, plante man we oli joen wetem ol Wetnes blong Jeova long ol yia we oli jes pas, oli stap long ol famle we oli seraot olsem. Sam long olgeta ya oli divos no oli seraot long hasban no waef blong olgeta, mo samfala oli stap long ol famle we papa hem wan no mama hem wan i lukaot long olgeta. Mo tu, olsem Jisas i bin talemaot, trutok we hem i tijim i mekem plante famle oli seraot.—Matyu 10:34-37; Luk 12:51-53.
5. ?Jisas i talem wanem samting we i save leftemap tingting blong olgeta we oli stap long ol famle we oli seraot?
5 Hat blong yumi i haremgud tumas taem yumi luk ol nyuwan ya we oli mekem disisen blong stanap long saed blong trutok. Mo plante taem yumi leftemap tingting blong olgeta wetem promes ya blong Jisas, se: “Man we i livim haos blong hem, no brata no sista blong hem, no papa no mama blong hem, no pikinini blong hem, no graon blong hem, from we i man blong mi, no from we i man blong gud nyus blong mi, hem bambae i no save sot long ol samting ya. Tru mi talem long yufala, long wol ya bambae hem i save kasem wan handred taem antap bakegen, wanem samting we hem i livim, olsem haos, no brata no sista no mama no papa no pikinini no graon blong hem. Be ol man bambae oli mekem trabol long hem tu. Be long nyufala wol ya we bambae i kam, hem bambae i gat laef we i no save finis.”—Mak 10:29, 30.
6. ?Olsem wanem yumi save kam olsem ol ‘brata, sista, mama, mo pikinini’ blong ol ‘pikinini we oli no gat papa, mo ol widowoman’ we oli stap long medel blong yumi?
6 Be, ?hu olgeta ‘brata mo sista mo mama mo pikinini’ ya? Wan man i save luk wan bigfala hif blong man long Haos Kingdom, maet wan handred man no moa, mo wanwan long olgeta i singaotem ol narawan se brata mo sista. Be, samting ya nomo i no save mekem hem i harem se oli rili ol brata, sista, mama, mo pikinini blong hem. No gat. Tingbaot samting ya: Disaepol Jemes i talem se sipos yumi wantem se Jeova i agri long wosip blong yumi, yumi mas ‘givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta, mo yumi mas holem laef blong yumi i stap klin we ol samting blong wol ya oli no save mekem yumi doti.’ (Jemes 1:27) Samting ya i minim se yumi no mas letem ol fasin blong wol we man i flas from we hem i rij, no man i gat haenem moa bitim narafala, i blokem yumi blong soemaot sore long ol ‘pikinini we oli no gat papa mo ol widowoman.’ Be, yumi mas soem se yumi wantem kampani wetem olgeta mo yumi mas tekem olgeta oli kam long haos blong yumi.
7. (a) ?Wanem tingting i mas stap biaen long fasin blong tekem ol ‘pikinini we oli no gat papa, mo ol widowoman’ oli kam long haos blong yumi? (b) ?Hu bakegen oli save soemaot Kristin fasin ya blong tekem narafala i kam long haos blong olgeta?
7 Fasin blong tekem ol ‘pikinini we oli no gat papa mo ol widowoman’ oli kam long haos blong yumi, i no minim oltaem se yumi givim ol samting we olgeta oli nidim long saed blong bodi. Sam famle we papa hem wan no mama hem wan i lukaot long olgeta, no we famle i no joengud from we samfala oli gat defren skul, maet oli no gat hadtaem long saed blong mane. Be, gudfala kampani, fasin blong joen wetem sam narafala famle, kampani wetem ol man we oli gat ol defdefren yia, mo serem ol gudfala samting long saed blong speret—hemia nao sam samting long laef we oli sas tumas. Taswe, yumi mas rimemba se i no nidim wan bigfala rij lafet we i gat plante spesel samting long hem. Samting we i impoten, hemia filing blong lav mo fasin blong joengud. !Taswe, i gud tumas we sam samtaem ol ‘pikinini we oli no gat papa, mo ol widowoman,’ oli save tekem sam narafala Kristin oli kam long haos blong olgeta tu!—Skelem wetem 1 King 17:8-16.
?I Gat Sam Strenja Long Medel Blong Yumi?
8. ?Wanem jenis i stap kamaot long plante kongregesen blong ol Wetnes blong Jeova tede?
8 Yumi laef long wan taem we fulap man oli stap muf i go long ol narafala kantri. Wan buk, World Press Review, i talem se: “Bitim 100 milyan man long wol oli stap laef long ol kantri we i no kantri blong olgeta. Mo 23 milyan narafala man oli mas muvaot long prapa ples blong olgeta mo go long wan narafala ples long kantri blong olgeta.” From samting ya, long plante ples, antap moa long ol bigfala taon, plante kongregesena blong ol man blong Jeova we fastaem bighaf blong olgeta oli blong wan kala no kantri nomo, naoia oli fulap long plante man we oli kam long ol narafala kantri blong wol. Maet samting ya i tru long ples blong yu tu. Be, ?yumi mas gat wanem tingting long olgeta we ol man blong wol oli kolem olgeta se oli “defren” no oli “ol strenja,” we lanwis, kastom, mo fasin blong laef blong olgeta i defren long yumi?
9. ?Wanem tingting long saed blong ol “strenja” mo “ol man blong narafala kantri” we oli stap joen wetem Kristin kongregesen, i save mekem yumi foldaon long wan bigfala trap?
9 Blong talem klia, yumi no mas letem fasin blong no laekem ol strenja i pusum yumi blong gat tingting ya se, yumi gat moa raet blong kasem trutok i bitim olgeta ya we oli kam long wan kantri we i narakaen no we i blong ol hiten man. Mo yumi no mas harem olsem se ol nyuwan ya oli no gat raet blong yusum ol Haos Kingdom no ol narafala ples blong wosip. Aposol Pol i talem long ol Kristin man Jyu long faswan handred yia, we oli gat tingting olsem, se i no gat wan man we i save talem se hem i gat raet blong kasem wan samting. From kaengud fasin blong God nomo, yumi gat jans blong kasem laef. (Rom 3:9-12, 23, 24) Yumi mas glad se naoia kaengud fasin blong God i stap kasem plante man we bifo, from sam samting, oli no bin gat jans blong harem gud nyus. (1 Timote 2:4) ?Olsem wanem yumi save soemaot se yumi laekem olgeta tru?
10. ?Olsem wanem yumi save soem long ol “strenja” we oli stap wetem yumi, se yumi gat trufala fasin blong tekem narafala i kam long haos blong yumi?
10 Yumi save folem advaes blong Pol se: “Yufala i mas glad blong tekem yufala, blong yufala i joen gud long wan kampani, olsem we Kraes i glad blong tekem yufala blong yufala i joen gud long hem. Fasin ya i stap leftemap nem blong God.” (Rom 15:7) Taem yumi luksave se plante man long ol narafala kantri no laen oli no gat isi laef mo plante samting, ale, yumi mas soemaot kaengud fasin mo fasin kea, olsem we yumi naf blong mekem. Yumi mas welkamem olgeta blong oli kampani wetem yumi, mo yumi mas mekem long olgeta olsem we ‘yumi stap mekem long ol manples blong yumi,’ mo ‘laekem olgeta, olsem we yumi stap laekem yumi wan.’ (Levitikas 19:34) Ating i no isi blong mekem olsem, be bambae yumi winim sipos yumi tingbaot advaes ya: “Yufala i mas no moa folem fasin blong wol ya, be yufala i mas mekem tingting blong yufala i kam nyuwan blong jenisim fasin blong yufala. Ale bambae yufala nomo i luksave ol samting we God i wantem, we ol samting ya oli gud, oli mekem man i glad, mo oli stret gud olgeta.”—Rom 12:2, NW.
Serem Samting Wetem Ol Tabu Man
11, 12. ?Wanem spesel fasin kea we sam man blong Jeova oli kasem long (a) Isrel bifo, mo long (b) faswan handred yia?
11 Sam narafala man we i stret blong yumi tingbaot olgeta mo yumi tekem olgeta oli kam long haos blong yumi, hemia ol Kristin we oli bigman long saed blong speret, mo we oli wokhad blong givhan long yumi long saed blong speret. Long Isrel bifo, Jeova i mekem sam spesel rod blong ol pris mo ol Livaet, blong oli save kasem ol samting we oli nidim. (Namba 18:25-29) Long faswan handred yia, ol Kristin tu oli kasem advaes se oli mas lukaotgud long olgeta we oli stap mekem ol spesel wok blong halpem olgeta. Tok blong 3 Jon vas 5 kasem 8 i soemaot bigfala lav we i mekem se ol faswan Kristin oli joengud tumas.
12 Olfala aposol Jon i tinghae long kaengud fasin we Gaeas i soemaot, taem hem i tekem ol brata we oli wokbaot longwe blong visitim kongregesen, oli kam long haos blong hem. Ol brata ya, olsem Demitrias—we ating hem nao i bin karem leta blong Jon i go—oli ol strenja we Gaeas i no save olgeta bifo. Be, hem i glad blong tekem olgeta oli kam long haos blong hem, from we “oli stap wokbaot from wok blong Kraes nomo.” Jon i tokbaot samting ya se: ‘I stret nomo blong yumi tekem ol man olsem oli kam long haos blong yumi, blong yumi save joen wetem olgeta long wok blong talemaot trutok.’—3 Jon 1, 7, 8.
13. ?Hu olgeta we oli stap long medel blong yumi tede, we i stret blong yumi ‘tekem olgeta oli kam long haos blong yumi’?
13 Tede, insaed long ogenaesesen blong Jeova, i gat plante man we oli stap hadwok tumas blong givhan long fulwan kampani blong ol brata. I gat ol elda we oli goraon blong visitim ol kongregesen, we oli yusum taem mo paoa blong olgeta evri wik blong givhan long ol wanwan kongregesen blong oli kam strong. I gat ol misinari, we oli lego famle mo ol fren blong olgeta blong prij long ol narafala kantri longwe. I gat olgeta we oli wok long ol Betel no ol hedkwota, mo oli no kasem pei from. Oli stap sapotem wok blong prij long olgeta kantri blong wol. Mo tu, i gat ol paenia, we oli spenem bighaf blong taem mo paoa blong olgeta long wok blong prij. Olgeta evriwan ya oli wokhad, i no blong kasem haenem no plante samting blong olgeta, be from we oli laekem tumas olgeta Kristin brata mo Jeova. I gud we yumi folem eksampel blong olgeta ya we oli givim ful laef blong olgeta i go long God. Mo, i stret tu we ‘yumi tekem ol man olsem oli kam long haos blong yumi.’
14. (a) ?Olsem wanem yumi kam ol Kristin we oli moagud taem yumi tekem olgeta we oli stap tru long God oli kam long haos blong yumi? (b) ?From wanem Jisas i talem long Meri se hem i jusumaot “stret samting”?
14 Taem yumi ‘tekem ol man olsem oli kam long haos blong yumi,’ aposol Jon i soemaot se, yumi ‘joen wetem olgeta long wok blong talemaot trutok.’ Long sam rod, fasin ya i save mekem se yumi kam ol Kristin we oli moagud. Hemia from we wan long ol Kristin wok, hemia fasin blong mekem i gud long ol Kristin brata mo sista blong yumi. (Proveb 3:27, 28; 1 Jon 3:18) I gat sam narafala blesing tu. Taem Meri mo Mata tufala i tekem Jisas i go long haos blong tufala, Mata i wantem mekem i gud long Jisas nao hem i mekemrere “plante samting” blong hem. Meri i soemaot kaen fasin long wan rod we i defren. Hem i “sidaon long floa kolosap long leg blong Masta blong yumi, i stap lesin long ol tok blong hem,” mo Jisas i toktokgud long hem se hem i jusumaot “stret samting.” (Luk 10:38-42) Plante taem, sipos yumi spenem wan naet long kampani blong olgeta we oli stap plante yia finis long trutok, fasin blong toktok mo storeyan wetem olgeta, hemia nao samting we yumi haremgud moa long hem.—Rom 1:11, 12.
Ol Spesel Taem Blong Joen Wanples
15. ?Wanem sam spesel taem we ol man blong Jeova oli save joen wanples mo haremgud?
15 Nating se ol trufala Kristin oli no folem plante kastom, holide mo lafet blong wol, i gat sam spesel taem we oli joen wanples blong haremgud long kampani blong olgeta. Eksampel, Jisas i bin joen long wan lafet blong mared long Kena, mo hem i givhan blong mekem ol man long lafet ya oli haremgud, taem hem i mekem faswan merikel blong hem long ples ya. (Jon 2:1-11) Long sem fasin, tede, ol man blong Jeova oli gat gudtaem tugeta long sam spesel lafet olsem, mo sipos oli mekem ol lafet ya folem stret fasin, samting ya i save mekem olgeta oli moa gud. Be, ?wanem samting nao i stret blong mekem long taem olsem?
16. ?Wanem sam advaes we yumi save tingbaot long saed blong ol fasin we i stret blong folem long taem blong ol lafet?
16 Taem yumi stadi long Baebol, yumi lanem wanem ol fasin we oli stret blong ol Kristin oli mekem, mo yumi folem ol fasin ya oltaem. (Rom 13:12-14; Galesia 5:19-21; Efesas 5:3-5) Ol lafet, olsem taem blong mared no narafala spesel taem bakegen, oli no givim raet long yumi blong lego ol Kristin rul, no blong mekem sam samting we yumi no stap mekem oltaem. Mo tu, yumi no nidim blong folem kastom blong ol manples blong yumi long ol taem olsem. Plante long ol kastom ya oli stanap long bilif blong ol gyaman skul no long sam gyaman tingting blong man nomo, mo sam narafala oli joen wetem sam fasin we oli no stret nating blong wan Kristin i folem.—1 Pita 4:3, 4.
17. (a) ?Wanem sam samting we oli soemaot se lafet blong mared long Kena hem i folem wan stret plan mo i gat ol man blong lukaot long hem tu? (b) ?Wanem i soemaot se Jisas i agri long lafet ya?
17 Taem yumi ridim Jon 2:1-11, i no hadwok blong luk se lafet ya hem i bigwan mo i gat plante man i kam long hem. Be, Jisas mo ol disaepol blong hem oli go, from we ol man blong lafet ya oli “singaot” olgeta oli go. Oli no go long prapa tingting blong olgeta nomo, nating se maet sam long olgeta oli famle blong man we i mared. Yumi makem tu se i gat “ol man blong wok” mo wan “bos blong lafet” ya, we hem i stap talem long ol man wanem kakae blong putum mo wanem blong mekem. Olgeta samting ya oli soemaot se lafet ya i gat oda long hem, mo i gat ol man we oli lukaot long lafet ya blong mekem sua se hem i rongud. Long en blong store ya, i talem se samting we Jisas i mekem long lafet ya, i “soemaot bigfala paoa blong heven we hem i gat.” ?Yu ting se Jisas i save mekem olsem long wan lafet we i olbaot mo we ol man oli wael olgeta? No gat.
18. ?Yumi mas tingting dip long wanem samting long saed blong olgeta lafet we yumi mekem tugeta?
18 Be, ?olsem wanem nao long ol spesel lafet we maet yumi mekem long haos blong yumi? Yumi mas rimemba se taem yumi singaotem ol narafala oli kam long haos blong yumi, hemia i blong ‘yumi save joen wetem olgeta long wok blong talemaot trutok.’ Taswe, i no naf blong talem nomo se hemia wan lafet blong ol “Wetnes.” Maet yumi save askem kwestin ya se, ?Lafet ya bambae i olsem wan wetnes blong soemaot se yumi hu, mo blong soemaot wanem samting yumi bilif long hem? Yumi neva mas ting se ol lafet olsem oli jans blong go kolosap nomo long ol fasin blong wol ya, we yumi ‘wantem tumas ol rabis samting we tingting blong yumi nomo i wantem, mo ol samting we ae i luk, mo fasin blong flas tumas long ol samting we yumi gat.’ (1 Jon 2:15, 16) Be, ol spesel taem olsem oli mas soemaot klia ol fasin blong yumi olsem ol Wetnes blong Jeova, mo yumi mas meksua se olgeta samting we yumi mekem oli presem mo givim ona long Jeova.—Matyu 5:16; 1 Korin 10:31-33.
‘Tekem Narafala i Kam Long Haos Blong Yumi We Yumi No Tok Smosmol From’
19. ?From wanem yumi mas ‘rere blong tekem narafala i kam long haos blong yumi, we yumi no stap tok smosmol from’?
19 Laef long wol ya bambae i kam moa had mo ol man bambae oli seraot moa yet, taswe yumi mas mekem evri samting we yumi save mekem blong kam kolosap moa long ol trufala Kristin. (Kolosi 3:14) Blong mekem olsem, yumi mas ‘laeklaekem yumi tumas,’ olsem Pita i pusum yumi blong mekem. Biaen, hem i talem wan gudfala rod blong soem lav ya, i se: “Oltaem yufala i mas rere blong tekem yufala i go insaed long haos blong yufala, we i no gat man i stap tok smosmol from.” (1 Pita 4:7-9) ?Yumi rere blong singaot ol brata blong yumi oli kam long haos blong yumi, mo blong wokhad blong soemaot kaengud fasin mo halpem olgeta? ?No yumi stap tok smosmol taem yumi gat jans blong mekem olsem? Sipos yes, yumi stap sakemaot glad we yumi save kasem, mo yumi stap mestem gudfala filing blong haremgud we yumi save gat taem yumi mekem i gud long narafala.—Proveb 3:27; Ol Wok 20:35.
20. ?Wanem ol blesing we yumi save kasem sipos yumi tekem narafala i kam long haos blong yumi nating se wol ya i stap seraot?
20 Sipos yumi wokgud tugeta wetem ol Kristin brata blong yumi, mo yumi soem kaengud fasin long olgeta mo tekem olgeta oli kam long haos blong yumi, bambae yumi kasem fulap blesing. (Matyu 10:40-42) Jeova i promes long ol man olsem, se bambae hem i ‘pulum olgeta oli kam stap aninit long haos tapolen blong hem. Bambae oli no moa hanggri bakegen, oli no moa tosta bakegen.’ Blong stap aninit long haos tapolen blong Jeova, hemia i min se yumi haremgud from we hem i lukaotgud long yumi mo hem i soem kaengud fasin long yumi. (Revelesen 7:15, 16; Aesea 25:6) Yes, i no longtaem, bambae yumi save haremgud blong olwe long gudfala fasin blong Jeova blong singaotem man i kam long hem.—Ol Sam 27:4; 61:3, 4.
[Futnot]
a Wan grup blong man we oli joen wanples blong wosip.
?Yu Yu Save Eksplenem?
◻ ?Yumi no mas fogetem wanem samting sipos yumi wantem faenem trufala glad mo haremgud?
◻ ?Hu ya ol ‘pikinini we oli no gat papa, mo ol widowoman,’ mo olsem wanem yumi save “lukaot” long olgeta?
◻ ?Yumi mas gat wanem tingting long saed blong ol “strenja” mo “ol man blong narafala kantri” we oli stap wetem yumi?
◻ ?Hu olgeta tede we i stret blong yumi givim spesel kea long olgeta?
◻ ?Olsem wanem ol lafet oli mas soemaot stret tingting biaen long fasin blong tekem narafala i kam long haos blong yumi?
[Tok blong pija long pej 16, 17]
Yumi save tekem ol man blong narafala ples, ol pikinini we oli no gat papa, olgeta we oli prij fultaem, mo sam narafala tu, oli kam long haos blong yumi taem yumi mekem lafet