Ol Yangfala We Oli Tingbaot Bigfala Man We i Wokem Olgeta

“Taem yu yu yang yet, yu mas tingbaot Bigfala Man we i Wokem yu.”—EKLESIASTIS 12:1.

1. ?Wanem tok blong wan yangfala we i gat 11 yia i soemaot se hem i tingbaot Bigfala Man we i wokem hem olsem wan man we i rili laef i stap?

!I GUD tumas blong luk ol yangfala we oli soemaot long toktok mo fasin blong olgeta se, long tingting blong olgeta, Jeova God i olsem wan man we i rili laef i stap, we oli tinghae long hem mo oli wantem mekem hem i glad! Wan boe we i gat 11 yia, i talem se: “Taem mi stap mi wan mo mi lukluk i go afsaed long windo, mi luk olsem wanem ol samting we Jeova i wokem oli nambawan tumas. Ale, mi traem mekem pija long tingting blong mi, long saed blong laef long naesfala Paradaes long fyuja, mo we long taem ya bambae mi save holem ol anamol.” (Aesea 11:​6-9) Hem i gohed moa i se: “Taem mi stap mi wan, mi prea long Jeova. Mi save se bambae hem i no kam kros long mi, se mi stap toktok tumas long hem. Mi save se hem i stap lukluk mi oltaem.” ?Yu yu tingbaot Man ya we i Wokem yumi olsem wan man we i rili laef i stap, long sem fasin we smol boe ya i tingbaot Hem?

?God i Rili Wan Trufala Man Long Tingting Blong Yu?

2. (a) ?Olsem wanem yu yu save tingbaot Bigfala Man ya we i wokem yu, olsem wan man we i rili laef i stap? (b) ?Ol papa mama oli save mekem wanem blong halpem pikinini blong olgeta blong luksave se God hem i wan trufala man?

² Blong mekem se Jeova mo ol promes blong hem oli rili tru long yu, fastaem yu mas lanem moa long saed blong hem mo nambawan fyuja we hem i wantem givim long yu, long nyufala wol we Baebol i tokbaot se bambae i fulap long stret fasin nomo. (Revelesen 21:​3, 4) Sipos papa mama blong yu oli bin tijim yu long ol samting ya, yu yu gat gudfala risen blong glad, from we samting ya bambae i givhan long yu blong folem oda ya we tabu speret blong God i pusum wan man blong raetem se: “Yu mas tingbaot Bigfala Man we i wokem yu.” (Eklesiastis 12:1) Wan yangfala gel i tokbaot trening we papa mama blong hem i givim long hem taem hem i smol, se: “Tufala i mekem evri samting long laef i joen wetem Jeova. Hemia nao stampa samting we i mekem se mi mi tingbaot Man ya we i Wokem mi.” Wan narafala yangfala woman i talem se: “Bambae mi talem tangkyu blong olwe long papa mama blong mi, from we tufala i tijim mi se Jeova hem i wan trufala man. Tufala i soem long mi olsem wanem blong laekem hem, mo tufala i talem long mi olsem wanem yumi save glad taem yumi mekem wok blong hem fultaem.”

3, 4. ?Wanem samting i save halpem yu blong tingbaot Jeova olsem we hem i rili laef i stap?

³ Be, plante man oli faenem i hadwok blong tingbaot God olsem wan man we i rili laef i stap, mo we i intres long olgeta. ?Hemia tingting blong yu? Tok blong wan Wajtaoa i bin givhan long wan yangfala blong tingbaot God olsem wan trufala man, i se: “Yumi no save talem stret se bodi blong Jeova God i bigwan olsem wanem.” I tru se, haenem blong God i no dipen long bodi blong hem se i bigwan no i olsem wanem, no gat. Wajtaoa ya i gohed blong talem se: “Samting we i mekem God i rili bigfala, hemia ol fasin we hem i gat.” Yes, hem i holem promes blong hem oltaem, hem i gat sore, lav, mo hem i rere blong fogivim man.a (Eksodas 34:6; Dutronome 32:4; Ol Sam 86:5; Jemes 5:​11) ?Yu yu tingbaot Jeova olsemia? ?Yu tingbaot hem olsem wan fren we yu save trastem hem, mo we yu save joengud wetem hem?​—Aesea 41:8; Jemes 2:​23.

⁴ Jisas i halpem ol faswan man we oli folem hem, blong gat wan gudfala fasin fren wetem God. Taswe, taem aposol Jon i tokbaot laef bakegen long heven, we hem i wantem tumas blong kasem, hem i talem se: ‘Bambae yumi kam olsem God, from we bambae yumi luk hem stret.’ (1 Jon 3:2; 1 Korin 15:44) Yumi save halpem ol yangfala tede blong tingbaot God olsem wan man we i rili laef i stap, wan man we oli naf blong kasem savegud long ol fasin blong hem, nating se oli no save luk hem. Wan yangfala man i talem se: “Papa mama blong mi tufala i halpem mi blong tingbaot Jeova, taem tufala i askem plante kwestin long mi, olsem se, ‘?Yu ting se Jeova bambae i talem wanem long saed ya? ?Yu save eksplenem samting ya long prapa tok blong yu? ?Wanem mining blong samting ya?’” ?Yu yu agri se ol kwestin olsem oli mekem yumi tingbaot fasin fren we yumi gat wetem God?

?Fasin Blong Tingbaot i Minim Wanem?

5. ?Wanem sam eksampel blong Baebol we oli soemaot se blong tingbaot wan man i no jes minim se yumi tingbaot nem blong hem nomo?

⁵ Blong obei long oda ya se, “Tingbaot Bigfala Man we i wokem yu,” i no minim nomo se yumi tingbaot Jeova. I nidim blong gat aksin i go wetem, blong mekem ol samting we hem i glad long olgeta. Taem wan man blong brekem loa i askem long Jisas se, ‘Taem we bambae yu yu kam king, plis yu tingbaot mi bakegen,’ hem i no wantem se Jisas i tingbaot nem blong hem nomo. Hem i wantem se Jisas i tekem aksin, blong mekem hem i laef bakegen. (Luk 23:42) Long sem fasin, taem Josef we i stap kalabus i askem long man blong wok blong Fero blong tingbaot hem long fored blong Fero, hem i wantem se man ya i tekem aksin. Mo taem Job i askem long God se, “Tingbaot mi,” Job i stap askem God blong tekem aksin long fyuja, blong mekem hem i laef bakegen long ded.​—Job 14:13; Jenesis 40:14, 23.

6. ?Olsem wanem Hibru tok we yumi tanem i kam “tingbaot” i joen wetem filing we yumi gat long wan samting no wan man we yumi tingbaot bakegen?

⁶ Wan buk i talem se Hibru tok we oli tanem i kam “tingbaot,” plante taem hem i minim “wan filing insaed long tingting we i tinghae long narafala, mo aksin we i go wetem fasin ya blong tingbaot.” “Filing” ya we i joen wetem fasin blong “tingbaot” wan samting, i kamaot klia long tok we grup blong ol “narafala man” oli talem long draeples, se: “!Mifala i stap tingbaot ol fis we mifala i kakae taem mifala i stap long Ijip!” Job i prea long God blong bambae Hem i tingbaot hem mo mekem i gud long hem. Long sem fasin, Hesekia, Nehemaea, Deved, mo wan man blong raetem Sam we yumi no save nem blong hem, olgeta tu oli askemgud long Jeova blong i tingbaot olgeta bakegen wetem filing, from we oli stap holemstrong long hem.​—Namba 11:4, 5; 2 King 20:3; Nehemaea 5:​19; 13:31; Ol Sam 25:7; 106:4.

7. ?Sipos yumi tingbaot God wetem filing, olsem wanem samting ya bambae i gat paoa long ol fasin blong yumi?

⁷ Taswe maet yumi askem se, ‘?Yumi tingbaot Man ya we i Wokem yumi wetem filing blong lav, mo yumi stap longwe long olgeta samting we oli save mekem hem i harem nogud no i soa?’ Wan yangfala i talem se: “Mama i halpem mi blong luksave se Jeova i gat ol filing. Mo taem mi mi smol nomo, mi luksave se olgeta samting we mi mekem oli save mekem God i haremgud no oli save mekem hem i harem nogud.” (Ol Sam 78:40-​42) Wan narafala i eksplenem se: “Taem mi yangfala, mi save se olgeta samting we mi mi mekem oli save halpem Jeova blong givim ansa long Setan, no oli save mekem Setan i haremgud. Mi mi wantem mekem hat blong Jeova i glad. Samting ya i halpem mi long taem ya mo i gohed blong halpem mi tede.”​—Proveb 27:11.

8. (a) ?Wanem wok i save soemaot se yumi stap tingbaot Jeova wetem filing? (b) ?Ol yangfala we oli waes bambae oli tingbaot wanem kwestin?

⁸ I tru se, long rabis wol ya, i no isi oltaem blong joen fulwan blong mekem ol wok we Jeova i glad long olgeta, mo long rod ya tingbaot Hem. !Be, i gud tumas sipos yu yu save folem fasin blong yangfala Timote blong faswan handred yia​—mo fasin blong plante taosen yangfala tede tu we oli fraetgud long God​—nao yu joen long Kristin wok fultaem olsem wan paenia! (Ol Wok 16:​1-3; 1 Tesalonaeka 3:2) Be, i gud we yu traem ansarem ol kwestin ya se, ?Yu yu naf blong lukaot long yu wan sipos yu joen fultaem long wok blong prij olsem wan paenia? Mo, ?sipos bambae yu mared, yu yu gat gudhan long plante samting mekem se yu naf blong givim ol samting we famle blong yu i nidim? (1 Timote 5:8) Hemia sam impoten kwestin, mo i impoten we yu tingtinggud long olgeta.

Edukesen We i Gat Gudfala Risen Blong Hem

9. ?Ol yangfala oli mas mekem wanem disisen long saed blong edukesen?

⁹ From we naoia laef blong man i fulap tumas long ol big save, i nidim blong skulgud blong kam naf blong kasem wan wok we bambae i sapotem yu long wok blong paenia. Ating yu luksave finis se samfala we oli bin kasem edukesen long yunivesiti, biaen oli mas tekem sam moa kos bakegen from we oli nidim moa save blong faenem wan wok tede. Ale, yufala ol yangfala we i wantem mekem God i glad, ?bambae yufala i skul gogo kasem wanem mak? Oda ya we God i pusum wan man blong raetemdaon, se “tingbaot Bigfala Man we i wokem yu,” i mas stap long tingting blong yu, taem yu mekem disisen ya.

10. ?Wanem beswan edukesen we yumi save kasem?

¹⁰ I sua se bambae yu yu wantem kasem beswan edukesen ya​—hemia edukesen we yu kasem taem yu stadigud long Tok blong God. Plante haeman blong wol tu oli agri se hemia beswan edukesen. Wan man Jemani we i stap raetem ol buk, nem blong hem Johann Wolfgang von Goethe, i talem se: “Taem save blong [ol man] i stap kam bigwan moa, samting ya bambae i openem rod moa tu, blong yusum Baebol olsem stampa mo tul blong givim edukesen.” !Yes, stadi blong Baebol bambae i givhan moa long yu long saed blong laef i bitim olgeta narafala edukesen!​—Proveb 2:​6-​17; 2 Timote 3:​14-​17.

11. (a) ?Wanem wok i impoten moa i bitim eni narafala wok we yumi save mekem? (b) ?From wanem wan yangfala i jusum blong kasem wan gudfala edukesen?

¹¹ From we save long saed blong God i save givim laef long yumi, ale, wok we i impoten moa bitim olgeta narafala wok we yu save mekem tede, hemia blong serem save ya wetem olgeta man. (Proveb 3:​13-​18; Jon 4:​34; 17:3) Be, blong mekemgud wok ya, yu mas kasem edukesen long ol bigfala samting blong laef. Yu mas savegud olsem wanem blong tingting klia, eksplenem ol samting long fasin we i klia, ridgud mo raetgud​—hemia ol samting we yu save lanem long skul. Taswe, yu mas tinghevi long wok blong yu long skul, olsem we wan yangfala gel blong Florida, Yunaeted Stet, i mekem. Gel ya, Tracy, hem i pasem eksam blong hem long haeskul wetem ol mak we oli hae olgeta. Hem i talemaot samting we hem i wantem mekem, i se: “Long olgeta yia we oli pas, oltaem mi tingbaot se long fyuja mi wantem mekem wok blong God blong mi Jeova, fultaem. Mi hop se edukesen blong mi bambae i halpem mi blong kasem mak ya.”

12. ?Sipos yu jusum blong skul moa, edukesen ya i save halpem yu long wanem rod?

¹² ?Yu yu tingting finis se, from wanem nao yu stap skul? ?Faswan risen blong yu i from we yu wantem kam naf blong mekem wok blong Jeova olsem wan man blong hem? Sipos yes, ale yu mas tinghevi long edukesen blong yu, mo traem skelem sipos hem i stap givhan gud long yu blong kasem mak ya no no gat. Afta we yu storeyan wetem papa mama blong yu finis, maet yufala i mekem disisen se bambae yu mas gohed blong skul moa i bitim namba blong yia we loa i talem se yu mas skul. Fasin ya blong gohed smol moa long edukesen blong yu, maet i save halpem yu blong kasem wan gudfala wok blong sapotem yu, we bambae i mekem se yu gat naf taem mo paoa i stap blong joen fulwan long wok blong Kingdom.​—Matyu 6:​33.

13. ?Olsem wanem tu Kristin long Rasia we oli gohed moa blong skul, oli soemaot bigfala mak we oli wantem kasem long laef?

¹³ Samfala we oli go moa long edukesen, oli joen long wok blong prij fultaem, taem oli stap skul yet. Tingbaot Nadia mo Marina, tu yangfala gel long Mosko, Rasia. Tufala tugeta i baptaes long Epril 1994, nao tufala i statem wok blong haftaem paenia. Smoltaem afta long samting ya, tufala i pasem ol eksam blong tufala long haeskul, ale tufala i joen long wan kos we i gohed blong tu yia, blong mekem ol akaon. Long Mei 1995, tufala i joen long wok blong fultaem paenia, mo long semtaem, tufala i gohed blong kasem ol hae mak long kos ya blong akaon we tufala i stap mekem. Mo tu, tugeta, tufala i mekem 14 Baebol stadi evri wik taem tufala i stap skul yet. Tufala gel ya oli hop se edukesen blong tufala long saed blong mekem akaon, bambae i givhan long tufala blong faenem wan wok we hem i naf blong sapotem tufala long wok blong prij fultaem.

14. Nating se yumi jusum blong skul blong hamas yia, ?wanem samting i mas impoten moa bitim ol narafala samting long laef blong yumi?

¹⁴ Sipos yu skul moa bitim namba blong yia we loa i putumap, yu mas tingtinggud long risen from wanem yu mekem olsem. ?Hem i from we yu wantem kasem haenem mo kasem plante sas samting? (Jeremaea 45:5; 1 Timote 6:​17) Sipos no, ?yu yu wantem skul moa blong bambae i givhan long yu blong joen moa long wok blong Jeova? Lydia, wan yangfala gel we i jusum blong gohed wetem edukesen blong hem, i soemaot wan gudfala tingting long saed blong ol samting blong speret. Hem i eksplenem se: “Sam yangfala oli ronem edukesen we i hae moa mo oli letem ol sas samting oli blokem olgeta, nao oli fogetem God. Long saed blong mi, fasin fren blong mi wetem God i impoten moa bitim olgeta narafala samting.” !Hemia i wan nambawan fasin we yumi evriwan i save folem!

15. ?Wanem defdefren kaen edukesen we ol Kristin long faswan handred yia oli bin kasem?

¹⁵ I impoten blong makem se, ol Kristin long faswan handred yia oli gruap long plante defren kaen edukesen. Eksampel, tufala aposol ya Pita mo Jon, ol man oli talem se tufala i ‘no gat nem, mo tufala i no skulgud,’ from we tufala i no skul long ol bigfala skul blong ol rabae. (Ol Wok 4:​13) Defren olgeta, aposol Pol i kasem edukesen we i sem mak olsem edukesen long ol yunivesiti tede. Be, Pol i no yusum edukesen ya blong leftemap hem wan. Edukesen ya i stap olsem wan gudfala tul we hem i save yusum, blong givhan long hem blong prij long enikaen man nomo. (Ol Wok 22:3; 1 Korin 9:​19-​23; Filipae 1:7) Long sem fasin, Manaen, we i bin ‘kasem edukesen long King Herod we i king long Galili,’ hem i wan long ol man we oli lidim kongregesen blong Antiok long taem bifo.​—Ol Wok 13:1.

?From Wanem Yu Mas Yusumgud Mane Blong Yu?

16. (a) ?From wanem i save kam hadwok moa blong tingbaot Bigfala Man we i wokem yumi taem yumi gat kaon blong pem? (b) ?Olsem wanem wan pijatok blong Jisas i soemaot se i impoten blong tingtinggud fastaem bifo we yumi spenem mane?

¹⁶ Sipos yu no yusum mane blong yu long waes fasin, maet bambae i hadwok moa blong mekem ol samting we God i glad long olgeta, we oli soem se yu tingbaot Man ya we i Wokem yu. Hemia from we, sipos yu gat kaon, i olsem we yu wok blong wan narafala masta nao. Baebol i eksplenem se: “Sipos yu karem mane long narafala man, yu yu kam slef blong man ya.” (Proveb 22:7, Today’s English Version) Wan pijatok blong Jisas i soemaot se i impoten tumas blong tingtinggud bifo we yumi spenem mane. Jisas i talem se: “?Hu man long yufala we i wantem wokem wan bigfala haos we i hae, be i no sidaon fastaem blong kaontem praes blong olgeta samting blong hem, blong luk we mane blong hem bambae i naf no i no naf? Sipos man i no makemgud fastaem, bambae hem i save putum faondesen, be i no save finisim haos ya. Nao olgeta we oli luk hem bambae oli laf long hem.”​—Luk 14:28, 29.

17. ?From wanem plante taem i hadwok blong blokem fasin blong spenem mane olbaot nomo?

¹⁷ Taswe, long waes fasin, bambae yu folem rul blong Baebol long laef blong yu, se yu no mas ‘gat kaon long sam man. Wan samting nomo we i olsem kaon blong yumi, hemia we yumi mas laeklaekem yumi.’ (Rom 13:8) Be, i hadwok blong no gat kaon taem ol man blong salem ol samting oli stap soem ol nyufala samting we oli jes kamaot, mo oli talem se yumi rili nidim ol samting ya. Wan papa, we i traehad blong halpem ol pikinini blong hem blong jusumgud ol samting we oli pem, i talem se: “Mifala i spenem plante taem blong tokbaot wanem ol samting we yumi nidim, mo wanem ol samting we yumi nomo i wantem blong pem.” Hemia sam samting we skul i no tijim long pikinini. Oli givim smol advaes nomo, no oli no givim advaes nating, long saed blong fasin blong yusumgud mane wetem waes. Wan woman we i wok blong givhan long ol man we oli trabol, i talem se: “Taem yumi kasem stefeket long haeskul, yumi gat plante save long saed blong ol dip matematik, be yumi no save olsem wanem blong sevem mane.” Oraet, ?wanem samting i save halpem yu blong spenem mane long waes fasin?

18. ?Wanem bigfala samting we i save givhan long yumi blong spenem mane long waes fasin, mo from wanem?

¹⁸ Taem yu folem oda ya, “Tingbaot Bigfala Man we i wokem yu,” hemia nao bigfala samting we bambae i halpem yu blong yusum mane blong yu long waes fasin. Hemia from we taem yu obei long oda ya, faswan samting long tingting blong yu i blong mekem Jeova i glad. Mo filing we yu gat long hem i gat paoa long fasin blong yu blong spenem mane. Folem samting ya, bambae yu traehad blong no letem ol samting we yu nomo yu wantem oli blokem yu blong fasgud long God wetem olgeta laef blong yu. (Matyu 16:24-​26) Bambae yu traehad blong mekem ae blong yu i “kliagud,” hemia se, yu stap lukluk i go nomo long Kingdom blong God mo wok blong hem. (Matyu 6:​22-​24) Long rod ya, bambae yu tingbaot advaes ya blong Baebol blong “ona long Jeova wetem ol sas samting blong yu,” olsem wan gudfala jans we yu glad blong tekem.​—Proveb 3:9.

Ol Yangfala We i Stret Blong Folem Eksampel Blong Olgeta

19. ?Olsem wanem ol yangfala blong bifo oli bin tingbaot Bigfala Man we i wokem olgeta?

¹⁹ Yumi glad se plante yangfala, blong bifo mo tede tu, oli tingbaot Man ya we i Wokem olgeta. Yangfala Samuel i holemstrong long wok blong hem long haos tapolen, nating se samfala we oli wok wetem hem oli mekem rabis fasin. (1 Samuel 2:​12-​26) Waef blong Potifa i traehad blong mekem hem i naes blong pulum yangfala Josef blong slip wetem hem, be hem i no naf blong winim yangfala ya. (Jenesis 39:​1-​12) Nating se Jeremaea i “wan smol boe nomo,” hem i no fraet blong prij long ol man we oli agensem hem bigwan. (Jeremaea 1:​6-8) Wan smol gel blong Isrel i no fraet nating blong talem long wan haeman blong ami blong Siria blong go lukaot help long Isrel, long ples ya we hem i save lanem moa long saed blong Jeova. (2 King 5:​1-4) Yangfala Daniel mo ol fren blong hem oli holemtaet bilif blong olgeta, taem oli kasem traem long saed blong ol loa blong God we oli putum tabu long sam kaen kakae. Mo ol yangfala ya, Sedrak, Mesak, mo Abednigo oli letem ol man oli sakem olgeta long wan hol blong faea, i bitim we oli lego fasin fasgud long God mo bodaon long wan aedol.​—Daniel 1:​8, 17; 3:​16-18; Eksodas 20:5.

20. ?Olsem wanem plante yangfala oli tingbaot Bigfala Man we i wokem olgeta tede?

²⁰ Tede, bitim 2,000 yangfala we oli gat 19 kasem 25 yia, oli wok long hedkwota blong ol Wetnes blong Jeova long wol, we i stap long Nyu Yok, Yunaeted Stet. Olgeta ya oli wan smolhaf nomo blong plante taosen yangfala long fulwol, we oli stap tingbaot Bigfala Man ya we i wokem olgeta. Olsem Josef long taem bifo, oli no save lego ol klin fasin blong olgeta. Plante oli obei long God bitim ol man, taem oli kasem traem we oli mas jusum hu nao bambae oli obei long hem. (Ol Wok 5:​29) Long 1946 long Polan, oli kilim nogud Henryka Zur, we i gat 15 yia, taem hem i no wantem mekem saen long fored blong wan aedol blong jyos. Wan long ol man we oli stap kilim hem, i talem se: “Yu save bilif long eni samting we yu wantem insaed long yu. Jes mekem saen blong kros blong Katolik nomo.” From we gel ya i no wantem, oli pulum hem i go long bus, mo oli sutum hem i ded. !Hem i ded we tingting blong hem i stap strong long promes blong laef we i no save finis!b

21. ?I waes blong obei long wanem tok we i singaot yumi, mo wanem i save kamaot sipos yumi mekem olsem?

²¹ !Ating hat blong Jeova i glad tumas taem hem i luk ol yangfala we oli bin tingbaot hem long ol handred yia we oli pas! ?Bambae yu yu obei long tok blong hem we i singaot yu blong, “Tingbaot Bigfala Man ya we i wokem yu”? !Tru ya, i stret nomo we yu yu tingbaot hem! Tingting evri dei long olgeta samting we hem i mekem finis blong yu, mo we bambae i mekem yet, mo obei long tok blong hem we i singaot yu blong mekem olsem: “Pikinini blong mi, yu mas waes, mo yu mas mekem hat blong mi i glad, blong bambae mi save ansa long hem we i stap jikim mi.”​—Proveb 27:11.

[Ol futnot]

?Yu Yu Save Tingbaot?

◻ ?Olsem wanem yumi save halpem ol yangfala blong tingbaot God olsem we hem i rili laef i stap?

◻ ?I minim wanem blong tingbaot Bigfala Man ya we i wokem yu?

◻ ?Yumi mas kasem edukesen blong wanem risen?

◻ ?From wanem i impoten blong yusum mane blong yumi long waes fasin?

◻ ?Hu ya ol yangfala we i stret blong yu folem eksampel blong olgeta?

[Tok blong pija long pej 17]

?Yu yu tingting finis se from wanem nao yu stap skul?

[Tok blong pija long pej 18]

?Yu yu stap lanem blong yusum mane blong yu long waes fasin?