Ol Man Blong Talemaot Pis Blong God Oli Kam Wanples

WAN Kristin elda blong Yunaeted Stet i talem se: “Olgeta distrik asembli we mifala i bin go long olgeta oli leftemap tingting blong mifala. Be, i no gat tok blong eksplenem asembli blong yia ya. !Evri dei, taem mifala i kambak long haos, mifala i traem tingbaot wanem tok i save kamaot long nekis dei, we i nambawan bitim samting we mifala i harem finis. !Mo i tru se, long nekis dei ol tok oli nambawan tumas!”

Sipos yu bin go long Distrik Asembli ya “Ol Man Blong Talemaot Pis Blong God,” yu tu bambae yu agri wetem toktok blong man ya we i glad tumas. Ol wanwan dei blong asembli ya, oli pulum tingting blong yumi i go long wan haf blong wok we ol Wetnes blong Jeova oli mekem olsem ol man blong karem mesej blong God. Bambae yumi lukluk bakegen long program blong trifala dei ya.

“Hemia We i Talemaot Pis . . . i Naes Tumas”

Hemia stampa tok blong faswan dei blong asembli ya. Hem i stanap long Aesea 52:7. Long taem ya we laef i strong tumas, plante man blong God oli gohed blong mekem wok blong Hem, nating se laef blong olgeta i had tumas. Man we i mekem tok ya “Ol Man We Oli Wok Strong Blong Talemaot Pis Oli Storeyan Long Yumi,” i askem kwestin long sam long olgeta ya we oli stap holemstrong long God. Store blong olgeta wanwan i leftemap tingting blong ol man we oli lesin, mo i mekem ol man ya oli bilif moa se Jeova i save mekem olgeta tu oli strong, mo hem i save givim ‘paoa ya we i bigfala tumas i blong God, i no blong man,’ blong halpem olgeta blong stanap strong tru long ol hadtaem.​—2 Korin 4:7.

Samting we Jeova i wantem ol man blong mekem, i no strong tumas. (1 Jon 5:3) Samting ya i kamaot klia long laswan tok long moning. Long en blong tok ya, oli soemaot wan nyufala buk we i gat 32 pej, nem blong hem, ?Wanem Samting We God i Wantem Yumi Blong Mekem? Buk ya we i blong givhan long ol man blong stadi long Baebol, mo we i gat ol naesfala pija long hem, bambae i mekem wan impoten wok blong halpem plante moa man blong kasem save long ol stampa tingting blong God. Sam tok long saed blong fasin blong yusum nyufala buk ya i stap long laswan haf we bambae yumi stadi long hem long Wajtaoa ya, mo long pej 16 mo 17 tu.

Tok ya “Stanap Strong Longtaem Long Ol Wok We Oli Gud,” i makem se Jeova i savegud ol traem we yumi stap kasem. Fasin blong stanap strong longtaem i minim se yumi gohed nomo we yumi no lusum hop. Jeova i givim Tok blong hem, speret blong hem, mo ogenaesesen blong hem blong givhan long yumi. Blong mekem wok blong prij, yumi nidim fasin blong stanap strong longtaem. Be tu, wok blong prij i halpem yumi blong stanap strong longtaem, from we hem i mekem bilif blong yumi i stap laef oltaem. Naoia, we yumi stap kolosap finis long en blong resis, yumi no mas letem ol problem blong yumi oli slakem strong tingting blong yumi blong wok, from we God bambae i sevem ol man ya nomo we oli stanap strong go kasem en.​—Matyu 24:13.

Stampa tok blong asembli ya, “Wok Blong Yumi Olsem Ol Man Blong Talemaot Pis Blong God,” i pulum tingting i go long taem ya we ol man Jyu oli aot long kalabus long Babilon, mo oli stanemap trufala wosip bakegen long Jerusalem long yia 537 B.K.T.a Man we i givim tok ya i eksplenem se, hemia i olsem wan pija blong soemaot samting we Kingdom blong God bambae i mekem long ful wol, i no longtaem. (Ol Sam 72:7; Aesea 9:7) Wok blong yumi naoia i blong talemaot gud nyus blong Kingdom ya, mo blong mekem laef blong yumi i laenap wetem mesej ya. Lav we yumi gat long God mo long ol man raonabaot long yumi, i mas pusum yumi blong gohed long wok ya oltaem, we yumi no kam slak.​—Ol Wok 5:​42.

Wan bigfala samting long Fraede, hemia tok we i gat tu haf blong hem, “Lukaot Long Ol Trap We Oli Haed Long Ol Pleplei.” Tede, plante myusek, sinema, video, store long televisin, pleplei long video, buk, magasin, mo komik buk, oli stanap long tingting blong ol rabis speret. Taswe, yumi mas “agens long ol fasin we i nogud,” mo “holemstrong ol fasin we i gud.” (Rom 12:9) Yes, yumi mas gat tingting ya se ol rabis pleplei oli nogud tumas, mo yumi mas ronwe long olgeta. Yumi mas tingting long ol samting we oli klingud, we oli mekem yumi haremgud, mo ol fasin we man i save ona long olgeta. (Filipae 4:8) Ol buk mo ol narafala samting we ogenaesesen blong Jeova i givim blong halpem yumi blong stadi, oli pulum tingting blong yumi i go long ol gudfala save we i mekem yumi strong, mo oli trenem yumi blong luksave wanem samting i stret mo wanem samting i no stret blong mekem. (Hibrus 5:​14) Yumi mas holemtaet ol samting ya olsem we yumi holemtaet wan kenu long solwora we i raf tumas.

Afta long samting ya, i gat tok ya “Agensem Setan​—No Letem Hem i Winim Yu.” Smoltaem bifo we ol man Isrel oli go insaed long Promes Lan, plante taosen blong olgeta oli foldaon long trap ya blong mekem nogud long saed blong seks. Finehas i no letem ol nogud fasin oli spolem trufala wosip. Hem i tekem strong aksin agensem ol man we oli mekem i nogud, mo Jeova i glad tumas long fasin blong hem blong fasgud long God. (Namba 25:​1-​13) Setan i wantem tumas blong mekem se yumi wanwan i no naf blong go insaed long nyufala wol blong God. Taswe, olsem Finehas, yumi mas agensem Setan we i stap traehad blong mekem yumi foldaon. Nating se yumi mared no yumi stap yumi wan nomo, yumi mas ‘ronwe long fasin ya blong slip olbaot.’​—1 Korin 6:​18.

“Leftemap Mo Fasgud Long Stret Tok Blong Baebol,” hemia laswan tok blong faswan dei blong asembli ya. Plante man blong tanem Baebol i go long ol narafala lanwis, oli jenisim no karemaot sam haf blong Baebol. Eksampel, blong no spolem tingting blong ol grup we oli sapotem raet blong ol woman, olgeta we oli tanem Baebol ya The New Testament and Psalms: An Inclusive Version, oli no tokbaot God olsem Papa, be oli talem se hem i Papa-Mama. Mo oli no talem se Jisas i “Pikinini boe blong man,” be oli talem nomo se hem i “Wan we i laef long wol ya.” Defren olgeta long samting ya, New World Translation i folemgud olfala lanwis we oli raetem Baebol long hem fastaem. From samting ya, hem i mekem tingting blong yumi i klia long plante save insaed long Baebol. Man we i givim tok ya i talem eksampel ya: “From ol stret tok we New World Translation i yusum, yumi bin luksave se yumi mas jenisim plan blong ol kongregesenb mo putumap ol elda, blong folem plan blong Kristin kongregesen long faswan handred yia.” Yumi soemaot se yumi fasgud long Tok blong God taem yumi ridim evri dei, mo taem yumi folem ol advaes blong hem. Man we i mekem tok ya i talem tu se: “Yumi soemaot se yumi leftemap mo fasgud long Tok blong God taem yumi wok strong blong talemaot Tok ya long ol narafala, mo taem yumi yusumgud Baebol blong tijim ol narafala. Yumi neva mas twistim no bitim mak long ol samting we Baebol i talem, blong mekem ol tok blong hem oli laenap wetem tingting blong yumi.”

‘Pis Blong God i Bigfala Moa, i Bitim Save Blong Yumi Olgeta’

Tok ya we i stanap long Filipae 4:7, hem i stampa tok blong namba tu dei blong asembli ya. Bighaf blong ol tok we i kamaot, i soemaot stret tingting we yumi mas gat long saed blong wok blong prij we yumi mekem, famle blong yumi, promes blong yumi blong givim laef blong yumi long God, mo ol narafala haf blong laef.

Afta long storeyan long vas blong dei, i gat wan tok we i gat tri haf blong hem, nem blong hem, “Ol Man Blong Karem Gud Nyus Blong Pis.” Yumi stap talemaot wan mesej blong pis, mo yumi mas talemaot mesej ya long fasin we i soemaot pis. (Efesas 6:​15) Mak blong yumi i blong winim hat blong ol man, i no blong winim wan rao wetem olgeta. Trening mo ol buk we ogenaesesen blong Jeova i givim long yumi, oli halpem yumi blong mekem olsem. Yumi no mas letem tingting blong yumi i kam slak taem samfala oli no kea mo oli no intres. Be, yumi mas gohed blong “traehad long evri rod.” Yumi mas gat wan gudfala program blong prapa stadi blong yumi wanwan, yumi mas go long olgeta miting, mo joen long wok blong prij. (2 Timote 2:​15) Mo tu, yumi no mas fogetem blong mekem i gud long ol narafala, antap moa, long olgeta we oli joen wetem yumi long bilif. (Galesia 6:​10) Tru tumas, blong traehad long evri rod, i no minim se yumi wok bitim mak gogo yumi foldaon. No gat. Jeova i glad long samting we wanwan man oli naf blong mekem, folem save we oli gat mo ol narafala wok long laef blong olgeta.

Ol man blong God oli givim taem, paoa, mo ol samting blong olgeta blong mekem wok blong Kingdom i gohed moa. Tok ya “Gladhat Blong Givim Presen Insaed Long Ogenaesesen Blong Jeova,” i soemaot se, from we plante moa sipsip oli stap obei long mesej blong Kingdom, i nidim plante moa mesin blong wokem ol buk, plante moa haos blong mekem miting, mo ol haos blong hedkwota. Presen mane we yumi givim i mekem se ogenaesesen i gat olgeta samting we hem i nidim blong givhan long wok blong prij long olgeta ples blong wol. Mo tu, fasin blong givim i karem ona long Jeova mo i mekem man we i givim presen ya i glad. Taswe, yumi ol Kristin, yumi no mas fogetem impoten haf ya blong wosip blong yumi.​—2 Korin 8:​1-7.

Laswan tok blong moning hem i tok blong baptaes​—oltaem hemia wan bigfala samting long ol asembli blong ol Wetnes blong Jeova. !Yumi glad tumas blong luk ol man ya we oli jes givim laef blong olgeta long Jeova, nao oli folem fasin blong Jisas mo tekem baptaes long wora! (Matyu 3:​13-​17) Olgeta man we oli folem rod ya, oli bin kasem edukesen long saed blong stampa samting we i givim bigfala waes bitim ol narafala samting​—hemia Baebol. Mo tu, olgeta ya oli faenem finis trufala mining blong laef, mo oli kasem blesing blong pis we i kamaot from we oli save se oli stap mekem samting we i stret.​—Eklesiastis 12:13.

Gudfala advaes i kamaot long tok ya, “Letem Fasin Luksave i Lukaotgud Long Yu.” Fasin luksave i impoten tumas taem yumi mekem bisnes. Yumi no mas mekem ol prapa bisnes blong yumi insaed long Haos Kingdom, mo yumi no mas yusum ol narafala Kristin blong traem winim mane from olgeta. (Skelem wetem Jon 2:​15, 16.) Yumi nidim fasin luksave tu, taem yumi putum mane blong sapotem wan bisnes, karem mane blong narafala we yumi mas pembak, mo taem yumi givim mane long narafala we hem i mas pembak. Man we i mekem tok ya i talem se: “Samfala Kristin oli bin harem nogud tumas taem bisnes we oli mekem wetem wan narafala Kristin i foldaon, mo samfala oli bin kam slak long saed blong speret tu from we oli hareap tumas blong folem wan plan blong winim mane, we oli no suagud long hem fastaem.” I no rong blong wan Kristin i mekem bisnes wetem wan narafala Kristin, be i waes blong lukaotgud. Mo tu, taem tufala man ya oli agri blong mekem bisnes tugeta, i gud we oltaem oli raetem ol poen blong kontrak long pepa.

Tok ya “God i Wokem Tufala, Wan i Man Mo Wan i Woman,” i soemaot tingting blong God long saed blong man mo woman. Long ol yia we oli pas finis, i gat ol narakaen tingting oli kamaot long saed blong stret wok mo fasin blong man mo woman. Man we i givim tok ya i talem se: “Plante man oli mekem mastik, oli ting se man i mas gat fasin blong rul strong antap long woman, hem i mas raf mo bitim mak long fasin blong soem paoa blong hem. Long samfala kantri, wan man i neva mas krae long fored blong plante man, mo tu, taem hem i stap hem wan nomo. Hemia samting blong sem nomo. Be, Jon 11:35 i talem se, taem bigfala hif blong man i stanap kolosap long ston we oli berem Lasros long hem, ‘Jisas, hem i krae.’” ?Olsem wanem long ol woman? Plante taem, ol man oli ting se wan gudfala woman, hemia wan we bodi mo fes blong hem i naes. Be man we i givim tok ya i askem se: “Sipos wan woman i naes be hem i no waes, mo hem i wantem rao oltaem, jikim narafala, no hem i gat flas tingting, ?yumi save talem se hem i rili naes, mo hem i rili wan gudfala woman?” (Skelem wetem Proveb 11:22; 31:26.) Long toktok, fasin, mo klos, ol Kristin man mo woman oli traehad blong folem ol rul blong Baebol. Man we i givim tok ya i talem se: “I isi blong gat respek long wan man we i soemaot ol frut blong tabu speret, mo i isi blong laekem tumas wan woman we i mekem olsem.”​—Galesia 5:​22, 23.

Afta long samting ya, i gat wan tok we i gat tu haf blong hem, “God Blong Pis i Stap Tingbaot Yu.” Plante Kristin oli gat ol wari long saed blong mane. Be, Jeova i promes se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Nating se i gat hadtaem long saed blong mane, samfala oli soemaot se oli trastem promes ya taem oli joen long wok blong haftaem no fultaem paenia. Sam narafala we oli no save paenia naoia, oli putum Kingdom fastaem long ol narafala samting, taem oli tekem evri jans blong givim wetnes. (Matyu 6:​33) !Olgeta traehad ya oli nambawan! Ogenaesesen blong Jeova i givim plante buk, blong givhan long yumi long wok blong prij mo blong halpem yumi blong winim ol problem. Sipos yumi soemaot tangkyu from olgeta samting long saed blong speret we Jeova i givim, bambae hem i blesem yumi wetem pis long taem ya we yumi kasem hadtaem long saed blong mane.​—Ol Sam 29:11.

Long en blong laswan tok blong dei ya, “Lukaot Pis Blong God Insaed Long Famle,” ol man long asembli oli glad blong kasem nyufala buk ya, The Secret of Family Happiness. Man we i mekem tok ya i talem se: “Yumi wanwan i mas stadigud long buk ya, mo wetem famle tu. Olgeta advaes blong hem oli stanap long Baebol. Traehad blong folem ol advaes ya, mo bambae yu sua blong kasem moa pis mo glad long famle blong yu.”

“Yufala i Mas Traehad Blong Holem Pis Ya, Blong Stap Wan Kampani Nomo”

Stampa tok ya we i stanap long Efesas 4:​3, i stretgud long laswan dei blong asembli ya. Olgeta Wetnes blong Jeova, we oli kamaot long olgeta kantri blong wol, oli kasem tijing blong God. Taswe, oli laekem pis. Oli folem eksampel blong Jisas mo “traehad blong holem pis ya, blong stap wan kampani nomo oltaem.”

Tok ya we i gat tri haf blong hem, “Makemaot Ol Trufala Man Blong Karem Mesej,” i tokbaot pis ya we i stap insaed long ogenaesesen blong God. I gat plante gyaman profet long Isrel bifo. Be, ol trufala man blong karem mesej blong God​—olsem ol profet ya Aesea, Esikel, mo Jeremaea​—oli talemaot ol profet tok we oli tru, olsem Jerusalem bambae i lus, ol man Isrel bambae oli kalabus, mo biaen, bambae oli kamfri. Semfala samting i stap kamaot tede. I gat fulap gyaman man blong talemaot mesej insaed long politik mo ol gyaman skul. Be, Jeova i stanemap ol Wetnes blong hem blong talemaot stampa tingting blong hem long saed blong wol blong naoia. Stat long 1919, Jeova i pusum ol man blong hem blong wok strong moa blong talemaot mesej blong hem. !Olgeta ya oli defren bigwan long ol gyaman man blong talemaot mesej long Krisendom!c Yumi mas gohed blong wok strong long wok ya, gogo kasem taem we Jeova i talem se wok ya i finis.

Tok ya “Lesin Mo Obei Long Tok Blong God,” i soemaot se Baebol hem i stampa samting we i moagud bitim olgeta narafala samting, blong lidim yumi, leftemap tingting blong yumi, mo givim hop long yumi. (Aesea 30:20, 21; Rom 15:4) Wol blong naoia i agri long enikaen nogud fasin nomo. Taswe, i impoten moa naoia bitim olgeta taem bifo, blong lesin long ol advaes we i kamaot long Tok blong God mo ogenaesesen blong hem. Jeova i savegud ol slak fasin blong yumi, mo long Tok blong hem, hem i makemaot klia wanem rod yumi mas folem blong kasem blesing. Taem yumi save se Jeova i stap sapotem yumi, samting ya i mekem tingting blong yumi i strong blong gohed blong mekem olgeta samting we hem i askem yumi blong mekem.

Tok ya i mekem tingting blong ol man we oli lesin, i rere blong lukluk drama we i kam biaen. Ol man we oli plei long drama, oli putum klos olsem ol man blong bifo. Nem blong drama ya, “?From Wanem Yumi Mas Respektem Tiokratik Oda?” Pleplei ya i stanap long store blong Gideon long Baebol. Hem i makemgud wan impoten lesen long yumi​—yumi mas folem ol advaes blong God, mo i nogud yumi traem putum prapa tingting blong yumi long ples blong ol advaes blong hem, mo i nogud yumi traem faenem wan narafala rod blong mekem se yumi no nidim blong folem ol tiokratik rul.

Pablik tok hemia, “!Trufala Pis i Kamtru Nao!​—?Wanem Stampa Blong Hem?” Pis we God i promes blong givim, i go moa i bitim eni samting we wol ya i save tingbaot. Man we i givim tok ya i talem se: “Trufala pis i minim se yumi gat pis evri dei. Pis blong God i minim wan wol we i no moa gat sik, soa, sore, mo ded.” Baebol i talem se Jeova i stap “mekem ol faet oli finis long olgeta ples long wol.” (Ol Sam 46:9) ?Olsem wanem bambae hem i mekem samting ya? Bambae hem i karemaot stampa blong ol faet, Setan. (Revelesen 20:​1-3) Samting ya bambae i mekem rod blong ol man we tingting blong olgeta i stap daon, blong oli ‘tekem graon ya i blong olgeta mo haremgud long pis mo plante samting.’​—Ol Sam 37:11.

Afta long tok we i stanap long Wajtaoa stadi blong wik ya, i gat laswan tok blong asembli ya. Nem blong hem, “Gohed Olsem Ol Man Blong Talemaot Pis Blong God.” Tok ya we i wekemap tingting blong ol man, i soemaot klia se wok blong prij we yumi mekem i defren olgeta long ol narafala wok, mo hem i impoten tumas. Naoia i no taem blong kam slak, westem taem, mo gobak blong folem ol gyaman tingting. Yumi gat olgeta samting we yumi nidim​—mesej blong God, tabu speret, mo plante samting we tiokratik ogenaesesen blong hem i givim long yumi wetem lav. !Taswe, yumi ol man blong Jeova, yumi mas gohed oltaem olsem ol man blong karem mesej blong pis blong God!

[Ol futnot]

[Bokis/Foto blong pija long pej 9]

Wan Gudfala Samting Blong Givhan Long Ol Famle

Olgeta we oli stap long namba tu dei blong Distrik Asembli ya “Ol Man Blong Talemaot Pis Blong God,” oli glad tumas blong kasem nyufala buk ya The Secret of Family Happiness. Buk ya i gat plante advaes blong Baebol we i save givhan long ol famle we oli laekem God.

Wan elda long Konetikut, Yunaeted Stet, i talem se: “Long Jun 15, mifala i kasem Family Happiness buk. Long Jun 16, mi ridim finis stret haf blong buk ya. Long Jun 17, mifala i mekem faswan famle stadi long buk ya. !Hem i rili leftemap tingting blong mifala! Long sem dei ya, mi finis blong ridim buk ya. I sua se olgeta man we oli yusum gudfala buk ya bambae oli tingbaot hem olsem samting we i nambawan tumas. Ol tok blong buk ya we oli klia mo stret long taem blong yumi, oli soemaot bakegen se ‘slef we i stret mo waes’ i stap givim ‘kakae long stret taem blong hem,’ mo se slef ya i luksave ol nid blong yumi long taem ya we i fulap long ol traem.”​—Matyu 24:45-​47.

[Tok blong pija long pej 7]

Ol yangfala mo ol olfala tu oli wantem save wanem samting we God i wantem yumi blong mekem