Stap Olsem Ol Man Blong Talemaot Pis Blong God

“Samting we i naes tumas long ol hil, hemia leg blong man we i wokbaot, blong . . . talemaot pis.”​—AESEA 52:7.

1, 2. (a) Olsem Aesea 52:7 i talem, ?ol man oli mas talemaot wanem gud nyus? (b) ?Profet tok blong Aesea i minim wanem long ol man Isrel bifo?

!I GAT gud nyus blong talemaot! Hemia nyus blong pis​—⁠trufala pis. Hem i wan mesej long saed blong rod we God i stap yusum blong sevem ol man. Mesej ya i joen wetem Kingdom blong God. Longtaem bifo, profet Aesea i raet blong tokbaot mesej ya. Mo ol tok we hem i raetem oli stap yet blong yumi ridim long Aesea 52:⁠7. Hem i se: “Samting we i naes tumas long ol hil, hemia leg blong man we i wokbaot blong karem gud nyus i kam, man we i talemaot pis, man we i karem gud nyus blong samting we i moa gud, man we i talemaot rod we God i stap yusum blong sevem ol man, man we i stap talem long Saeon se: ‘!God blong yufala i kam king!’ ”

² Jeova i pusum profet blong hem, Aesea, blong raetemdaon mesej ya. Hem i blong leftemap tingting blong ol man Isrel bifo, mo blong leftemap tingting blong yumi tede tu. ?Profet tok ya i minim wanem? Taem Aesea i raetem ol tok ya, ating ol man Asiria oli tekem ol man long kingdom blong Isrel long not, oli go kalabus finis. Biaen, ol man long kingdom blong Juda long saot, olgeta tu oli go kalabus long Babilon. Hemia wan taem we nesen ya i harem nogud tumas, mo ol samting oli olbaot, from we ol man oli no bin obei long Jeova. From samting ya, oli no gat pis wetem God. Olsem Jeova i talem long olgeta, ol sin blong olgeta oli mekem se oli seraot long God blong olgeta. (Aesea 42:24; 59:​2-4) Be, Jeova i yusum Aesea blong talemaot se bambae ol get blong Babilon oli open. Bambae ol man blong God oli fri, we oli save gobak long kantri blong olgeta blong bildim bakegen haos prea blong Jeova. Bambae Saeon i stanap bakegen, mo wosip blong trufala God bambae i gohed bakegen long Jerusalem.​—Aesea 44:28; 52:​1, 2.

3. ?Olsem wanem promes ya se bambae ol man Isrel oli gobak long kantri blong olgeta, hem i wan profet tok long saed blong pis tu?

³ Promes ya blong kam fri, hem i wan profet tok long saed blong pis tu. Taem ol man Isrel oli gobak long kantri we Jeova i bin givim long olgeta, samting ya i pruvum fasin sore blong God, mo i soem se oli tanem tingting blong olgeta from sin. Samting ya i soem se oli gat pis wetem God.​—Aesea 14:1; 48:17, 18.

“!God Blong Yufala i Kam King!”

4. (a) ?Long wanem fasin yumi save talem se ‘Jeova i kam king’ long 537 B.K.T.? (b) ?Long ol yia biaen long taem ya, olsem wanem Jeova i lidim ol samting blong givhan long ol man blong hem?

⁴ Taem Jeova i mekem ol man Isrel oli fri long 537 B.K.T.,a i stret nomo blong talemaot mesej ya i go long Saeon: “!God blong yufala i kam king!” I tru, Jeova i ‘King blong olwe.’ (Revelesen 15:3) Be taem hem i mekem ol man blong hem oli fri, hem i soemaot hae rul blong hem long wan nyufala fasin. Hem i soem klia se paoa blong hem i bitim gavman blong man we i stap rul long taem ya, we i strong moa long ol narafala gavman bifo long hem. (Jeremaea 51:56, 57) Jeova i yusum tabu speret blong hem blong spolem sam narafala rabis plan agensem ol man blong Hem tu. (Esta 9:​24, 25) Bakegen mo bakegen, Jeova i mekem plante defren samting blong pulum ol king blong Midia mo Pesia blong folem tingting blong Hem, olsem hae king blong olgeta. (Sekaraea 4:6) Ol samting blong sapraes we oli kamaot long taem ya, store blong olgeta i stap long Baebol, long buk blong Esra, Nehemaea, Esta, Hagae, mo Sekaraea. !Mo taem yumi tingtingbak long ol store ya, samting ya i mekem bilif blong yumi i strong!

5. ?Aesea 52:⁠13 kasem 53:12 i poen i go long wanem impoten taem?

⁵ Be, samting we i hapen long 537 B.K.T. mo biaen, i olsem stat nomo blong wan bigfala samting. Jes afta long profet tok blong Aesea japta 52, we i soem se bambae ol man Isrel oli gobak long kantri blong olgeta, Aesea i tokbaot Mesaea we bambae i kam. (Aesea 52:13 kasem 53:12) Bambae Jeova i yusum Mesaea, we pruf i soem se hem i Jisas Kraes, blong givim wan mesej blong kam fri mo mesej blong pis, we i impoten moa bitim samting we i hapen long 537 B.K.T.

Nambawan Man We Jeova i Yusum Blong Talemaot Pis

6. ?Hu ya nambawan man we Jeova i yusum blong talemaot mesej blong pis? ?Mo wanem wok hem i talem se bambae hem i mekem?

⁶ Jisas Kraes i nambawan man we Jeova i yusum blong talemaot mesej blong pis. Hem i Waes Tok blong God, spesel Man blong Talemaot Tok blong Jeova. (Jon 1:​14) Folem samting ya, samtaem afta we Jisas i baptaes long Jodan Reva, hem i go insaed long haos prea long Nasaret, i stanap mo i ridim long bigfala voes, wan haf blong Aesea japta 61, we i tokbaot wok we hem i kam blong mekem. Tok ya i mekem i klia se, samting we God i sanem hem blong talemaot, i joen wetem fasin blong “kam fri” mo “kamgud” bakegen, mo wetem jans blong ol man blong mekem Jeova i glad long olgeta. Be, Jisas i mekem moa i bitim we hem i talemaot wan mesej blong pis. God i sanem hem tu blong putum faondesen blong pis we i no save finis.​—Luk 4:​16-​21.

7. ?Yumi kasem wanem frut taem yumi mekem pis wetem God tru long Jisas Kraes?

⁷ Taem Jisas i bon, ol enjel oli kamtru long ol man blong lukaot long sipsip kolosap long Betlehem, oli stap presem God, oli talem se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.” (Luk 2:​8, 13, 14) Yes, ol man we God i glad long olgeta from we oli bilif long rod we God i mekem tru long Pikinini blong hem, bambae oli gat pis. ?Samting ya i minim wanem? I minim se, nating we ol man oli bon wetem sin, oli save kam klin long fes blong God, we hem i glad long olgeta. (Rom 5:1) Tingting blong olgeta i save stap kwaet, i gat pis, we oli no save kasem long wan narafala rod. Long stret taem we God i makemaot, bambae ol man oli kam fri long ol trabol we sin blong Adam i mekem long olgeta, olsem sik mo ded. Bambae i no moa gat blaenman, man we sora i fas, mo man we i no save wokbaot. Fasin ya we man i kam kros from we bodi blong hem i no moa gat paoa, mo i harem nogud from we tingting blong hem i trabol tumas, bambae oli finis blong olwe. Bambae ol man oli save haremgud long laef we i stretgud olgeta, blong olwe.​—Aesea 33:24; Matyu 9:​35; Jon 3:​16.

8. ?Hu ya ol man we oli save kasem pis blong God?

⁸ ?Hu ya olgeta we oli save kasem pis blong God? Hemia olgeta we oli soem bilif long Jisas Kraes. Aposol Pol i raetem se, ‘God i glad blong mekem rod long Kraes blong tekem olgeta samting oli kam joengud long hem bakegen, tru long blad blong Kraes we i ron long pos.’ Aposol ya i gohed, se “olgeta samting long heven”​—⁠hemia olgeta we bambae oli rul wetem Kraes long heven​—⁠bambae oli joengud long God bakegen. Mo ‘olgeta samting long wol’ tu​—⁠hemia olgeta we oli kasem blesing blong gat jans blong laef foreva long wol ya taem i kam Paradaes fulwan​—⁠bambae oli joengud long God bakegen. (Kolosi 1:​19, 20) Olgeta evriwan, oli save gat wan nambawan fasin fren wetem God, from we oli bin yusum praes blong sakrifaes blong Jisas, mo from we oli obei long God wetem fulhat blong olgeta.​—Skelem wetem Jemes 2:​22, 23.

9. (a) ?Pis wetem God i gat paoa long wanem narafala fasin fren? (b) Blong putum pis blong olwe long olgeta ples, ?Jeova i givim wanem paoa long Pikinini blong hem?

⁹ !Yumi nidim tumas blong gat pis wetem God! Sipos yumi no gat pis wetem God, yumi no save gat trufala pis we i stap longtaem, long olgeta fasin fren we yumi gat wetem ol narafala. Pis wetem Jeova, hemia nao faondesen blong trufala pis long wol ya. (Aesea 57:19-21) I stret nomo we Jisas Kraes i Prins blong Pis. (Aesea 9:6) Hem i man ya we Jeova i yusum blong mekem rod blong man i save frengud bakegen wetem Hem. Mo tu, hem i man ya we Jeova i givim paoa blong rul long hem. (Daniel 7:​13, 14) Long saed blong frut blong rul blong Jisas olsem prins antap long ol man, Jeova i promes se: “Bambae i gat pis, we i no save finis samtaem.”​—Aesea 9:7; Ol Sam 72:7.

10. ?Olsem wanem Jisas i soem eksampel long fasin blong talemaot mesej blong God long saed blong pis?

¹⁰ Olgeta man oli nidim mesej blong God long saed blong pis. Jisas hem wan i soem wan gudfala eksampel, taem hem i wok strong blong talemaot pis ya. Hem i mekem olsem kolosap long haos prea long Jerusalem, long saed blong ol hil, long rod, long woman Sameria kolosap long wan wel, mo long haos blong ol man. Long olgeta ples we i gat man long hem, Jisas i tekem jans blong talemaot pis mo Kingdom blong God.​—Matyu 4:​18, 19; 5:​1, 2; 9:9; 26:55; Mak 6:​34; Luk 19:​1-​10; Jon 4:​5-​26.

Kasem Trening Blong Biaen Long Kraes

11. ?Jisas i trenem ol disaepol blong hem blong mekem wanem wok?

¹¹ Jisas i tijim ol disaepol blong hem blong talemaot mesej blong God long saed blong pis. Olsem Jisas, we hem i ‘tru wetnes blong Jeova we i no save tanem tok blong hem,’ oli luksave se wok blong olgeta tu i blong givim wetnes. (Revelesen 3:​14; Aesea 43:10-​12) Oli lukluk i go long Kraes olsem Lida blong olgeta.

12. ?Olsem wanem Pol i soem se wok blong talemaot gud nyus i impoten tumas?

¹² Aposol Pol i tokbaot from wanem wok blong prij i impoten tumas, i se: ‘Baebol i talem se “Olgeta ya we oli bilif long hem, bambae oli no save sem.” ’ Samting ya i minim se man we i bilif long Jisas Kraes olsem Bigfala Man we Jeova i yusum blong sevem ol man, bambae i no save sem. Mo nating se man i kamaot long wanem laen no kantri, samting ya i no save blokem hem, from we Pol i gohed se: ‘Tok ya i kavremap olgeta man, i nating we sam oli man Isrel, mo sam oli man Gris, from we i gat wan Masta nomo blong olgeta evriwan, mo hem i stap mekem i gud tumas long olgeta we oli stap singaot long hem. Mo hemia i olsem tok ya we Baebol i talem, i se “Olgeta evriwan we oli singaot long nem blong Jeova, hem bambae i sevem olgeta.” ’ (Rom 10:11-​13) ?Be olsem wanem ol man bambae oli save long saed blong jans ya?

13. ?I nidim wanem blong mekem se ol man oli harem gud nyus? ?Mo olsem wanem ol Kristin long faswan handred yia oli mekem samting ya?

¹³ Pol i tokbaot nid blong gat ol man blong talemaot gud nyus, taem hem i askem sam kwestin we ol wanwan man blong Jeova oli mas tingbaot. Aposol ya i askem se: “?Be sipos God i no sanem ol man oli go blong talemaot nyus blong hem, bambae ol man oli save go olsem wanem? ?Mo sipos man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem? Mo sipos oli no bilif long hem, bambae oli save singaot long God olsem wanem?” (Rom 10:14, 15) Store blong Kristin skul afta we hem i jes stanap, i soem klia se ol man, woman, yangfala mo olfala, oli folem eksampel we Kraes mo ol aposol blong hem oli soem. Oli wok strong blong talemaot gud nyus. Oli folem eksampel blong Jisas, oli prij long ol man long evri ples we oli faenem olgeta. Oli no wantem mestem wan man, taswe oli prij long ol pablik ples, mo tu, long olgeta haos wanwan.​—Ol Wok 17:17; 20:20.

14. ?Olsem wanem i tru se ‘leg’ blong ol man we oli wokbaot blong talemaot gud nyus i ‘naes tumas’?

¹⁴ I tru, i no evriwan we oli mekem i gud long ol Kristin man ya blong talemaot gud nyus. Nating se i olsem, tok blong Aesea 52:7 we Pol i talem bakegen, i kamaot tru nomo. Afta we hem i askem kwestin ya, ‘?Sipos God i no sanem ol man oli go blong talemaot nyus blong hem, bambae ol man oli save go olsem wanem?’ hem i se: ‘Taswe Baebol i talem se: “!Samting we i naes tumas long ol hil, hemia leg blong man we i wokbaot blong talemaot gud nyus long saed blong ol gudfala samting!” ’ Bighaf blong yumi i no ting se leg blong yumi i naes tumas, no i nambawan. ?Taswe, vas ya i minim wanem? Leg nao i stap karem man i go blong talemaot gud nyus long ol narafala. Ol leg ya oli rili minim man ya. Ol aposol mo disaepol blong Jisas long faswan handred yia, oli talemaot gud nyus long plante man. Mo yumi save sua se, long lukluk blong ol man ya, ol faswan Kristin ya oli naes tumas. (Ol Wok 16:13-​15) Samting we i moa impoten, oli gud tumas long lukluk blong God.

15, 16. (a) ?Olsem wanem ol faswan Kristin oli soem se oli ol trufala man blong talemaot pis? (b) ?Wanem i save givhan long yumi blong gohed long wok blong prij long sem fasin olsem ol Kristin long faswan handred yia?

¹⁵ Ol man blong Jisas oli karem wan mesej blong pis, mo oli talemaot mesej ya long fasin we i soem pis. Jisas i givim oda ya long ol man blong hem se: “Taem yufala i go samples, nao yufala i go stap long wan haos, fastaem yufala i mas prea from olgeta se ‘Pis blong God bambae i stap wetem yufala long ples ya.’ Nao sipos i gat man i stap we i man blong pis, prea blong yufala blong pis bambae i gat frut long hem. Be sipos i no gat, bambae prea blong yufala blong pis i gat frut long yufala bakegen.” (Luk 10:​5, 6) Long kastom blong ol man Jyu, oli yusum wod ya Sha·lohmʹ, no “pis,” blong talem halo. Be, oda blong Jisas i gat moa mining bitim hemia. Ol tabu disaepol blong Kraes oli olsem ol “man blong karem tok” blong hem, mo oli talem long olgeta man se: ‘Plis, yufala i no moa enemi blong God, yufala i kam fren blong hem.’ (2 Korin 5:​20) Folem oda blong Jisas, oli talemaot Kingdom blong God long olgeta man, mo oli tokbaot wanem samting Kingdom ya i save mekem long ol wanwan man. Olgeta we oli lesin oli kasem blesing. Olgeta we oli sakemaot mesej ya oli mestem blesing.

¹⁶ Ol Wetnes blong Jeova oli stap talemaot gud nyus long sem fasin tede. Olgeta oli no stampa blong gud nyus ya we oli stap karem i go long olgeta man. Gud nyus ya i kamaot long Man we i sanem olgeta. Wok blong olgeta i blong karem gud nyus ya i go. Ol man we oli lesin long gud nyus ya, oli gat jans blong kasem ol nambawan blesing. Ol man we oli sakemaot gud nyus ya, oli stap sakemaot rod blong gat pis wetem Jeova God mo Pikinini blong hem, Jisas Kraes.​—Luk 10:16.

Ol Man We Oli Gat Pis Long Wol We i No Gat Pis

17. ?Taem yumi mitim ol man we oli tok nogud long yumi, yumi mas gat wanem fasin, mo from wanem?

¹⁷ Nating se ol man oli wantem gud nyus ya no nogat, i impoten we ol man blong Jeova oli tingbaot oltaem se, oli ol man blong talemaot pis blong God. Maet ol man blong wol oli rao strong mo oli stap faerap long kros, sakem ol strong mo rabis tok long ol narafala we oli mekem olgeta oli kros. Maet bifo, sam long yumi i mekem olsem. Be, sipos yumi tekem nyufala laef finis mo yumi no moa joen long ol fasin blong wol, bambae yumi no folem fasin blong ol man ya. (Efesas 4:​23, 24, 31; Jemes 1:​19, 20) Nating se ol narafala oli mekem olsem wanem, bambae yumi folem advaes ya: “Oltaem, long saed blong yufala, yufala i mas traehad tumas blong yufala i gat pis wetem olgeta man.”​—Rom 12:18.

18. ?Olsem wanem yumi mas ansa sipos wan haeman blong gavman i tok strong long yumi, mo from wanem?

¹⁸ Maet samtaem, wok ya blong talemaot gud nyus i mekem se yumi mas stanap long fored blong ol haeman blong gavman. Blong soem paoa blong olgeta, maet oli ‘talem long yumi’ blong eksplenem from wanem yumi mekem sam kaen fasin, mo from wanem yumi no joen long sam kaen wok. Maet oli wantem save from wanem yumi talemaot mesej we yumi stap talemaot​—⁠wan mesej we i soemaot klia ol gyaman skul mo we i tokbaot en blong ol rabis fasin blong wol ya. Respek we yumi gat long eksampel blong Kraes, bambae i pusum yumi blong ansa long kwaet fasin mo wetem bigfala respek. (1 Pita 2:​23; 3:​15) Plante taem, ol haeman ya oli agensem yumi from we ol lida blong skul no sam man we oli hae moa long olgeta, oli stap pusum olgeta. Ansa we yumi talem long kwaet fasin, i save givhan long olgeta blong luksave se wok blong yumi i no blong mekem trabol long olgeta, no blong spolem pis blong ol man long ples blong yumi. Ansa olsem ya i mekem se, sipos ol man ya oli lesin, bambae oli gat respek long yumi, oli wantem givhan long yumi mo gat pis wetem yumi.​—Taetas 3:​1, 2.

19. ?Ol Wetnes blong Jeova oli neva joen long wanem samting?

¹⁹ Ol man long olgeta ples blong wol oli save se ol Wetnes blong Jeova oli no joen long ol faet mo rao blong wol ya. Oli no stap joen long ol faet blong wol, we oli kamaot from kala blong man, skul, mo politik. (Jon 17:14) Tok blong God i talem se yumi mas “ona long gavman.” Taswe, yumi no save gat tingting blong joen long ol trabol we ol man ples oli mekem, blong agensem ol disisen blong gavman. (Rom 13:1) Ol Wetnes blong Jeova oli neva joen long enikaen grup we i wantem traem kafsaedem gavman. Oli tingbaot ol rul we Jeova i putum long ol Kristin man blong hem. !Taswe, oli no tingting nating blong joen long faet we i mekem blad blong narafala i ron, no blong joen long enikaen raf fasin! Ol trufala Kristin oli no jes tokbaot pis nomo, be oli mekem laef blong olgeta i laenap wetem samting we oli talemaot.

20. ?Bigfala Babilon i bin mekem wanem kaen fasin long saed blong pis?

²⁰ Ol man blong ol skul blong Krisendom,b oli defren olgeta long ol trufala Kristin. Oli no soem se oli man blong talemaot mesej blong pis. Ol skul blong Bigfala Babilon​—⁠hemia ol skul blong Krisendom mo ol hiten skul tu​—⁠oli agri wetem, sapotem, mo oli lidim tu ol faet blong ol nesen. Mo tu, oli pusum ol man blong ronem mo kilim i ded ol trufala man blong Jeova. From samting ya, Revelesen 18:24 i tokbaot Bigfala Babilon, i se: “Bigfala taon ya Babilon, hem i kasem panis from we oli faenem we blad blong ol profet mo blad blong ol man blong God i stap long hem. Yes, oli faenem we blad blong olgeta man we ol man oli kilim olgeta, be i stap long ples ya Babilon.”

21. ?Plante man we hat blong olgeta i stret oli mekem wanem taem oli luk we fasin blong ol man blong Jeova i defren long fasin blong ol man blong gyaman skul?

²¹ Trufala skul i defren olgeta long ol skul blong Krisendom mo ol narafala skul blong Bigfala Babilon. Hem i gat paoa we i gud long ol man mo we i mekem ol man oli joengud. Jisas Kraes i talem long ol trufala man blong hem se: “From we yufala i stap laeklaekem yufala, bambae olgeta man oli luksave se yufala i man blong mi.” (Jon 13:35) Lav ya i mekem se ol trufala Kristin ya oli no seraot from we oli blong ol defren kantri, from we oli haeman no oli man nating, from we oli rij no oli pua, mo from kala blong olgeta, hemia ol samting we naoia, ol narafala man oli stap seraot from. Plante milyan man long wol oli luk lav ya, nao oli talem long ol tabu man blong Jeova, se: “Bambae mifala i go wetem yufala, from we mifala i harem se God i stap wetem yufala.”​—Sekaraea 8:​23.

22. ?Yumi gat wanem tingting long saed blong wok blong wetnes we yumi mas mekem yet?

²² Yumi ol man blong Jeova, yumi glad tumas long frut we i bin kamaot. Be wok blong yumi i no finis yet. Taem wan man blong wokem garen i brekem graon mo i planem sid finis, hem i no spel. Hem i gohed blong wok, antap moa, long taem blong pikimap kakae long garen. Blong karem olgeta kakae long garen, man i mas wok strong blong longtaem. Mo naoia, bitim olgeta taem bifo, i gat plante moa kakae long garen, hemia ol man we oli wantem wosip long trufala God. Naoia i taem blong bigfala glad. (Aesea 9:3) I tru, yumi mitim sam man we oli agens mo oli no intres long mesej blong yumi. Maet wanwan blong yumi i stap traehad blong winim wan bigfala sik, hadtaem long famle, no hadtaem long saed blong mane. Be lav we yumi gat long Jeova i pusum yumi blong gohed. Mesej we God i putum long han blong yumi blong talemaot, hem i wan mesej we ol man oli nidim. Hem i wan mesej blong pis. Yes, mesej ya nao we Jisas hem wan i bin talemaot​—⁠gud nyus blong Kingdom blong God.

[Ol futnot]

?Wanem Ansa Blong Yu?

◻ ?Olsem wanem profet tok blong Aesea 52:7 i kamtru long ol man Isrel bifo?

◻ ?Olsem wanem Jisas i pruvum se hem i nambawan man blong talemaot mesej blong pis?

◻ ?Olsem wanem aposol Pol i joenem Aesea 52:7 wetem wok we ol Kristin oli mekem?

◻ ?Long taem blong yumi, ol man blong talemaot mesej blong pis oli mas mekem wanem?

[Tok blong pija long pej 13]

Olsem Jisas, ol Wetnes blong Jeova oli talemaot pis blong God

[Tok blong pija long pej 15]

Nating se ol man oli laekem no oli no laekem mesej blong Kingdom, ol Wetnes blong Jeova oli holem pis