Halpem Ol Narafala Blong Lanem Ol Samting We God i Wantem Olgeta Blong Mekem

‘Hemia i wok blong mi we mi mas mekem. Sipos mi no talemaot gud nyus ya, hemia bigfala trabol blong mi ya, bambae mi harem nogud tumas from.’​—1 KORIN 9:​16.

1, 2. (a) ?Jeova i wantem se yumi joen long wanem wok we i gat tu haf blong hem? (b) Ol man we hat blong olgeta i stret oli mas lanem wanem sipos oli wantem stap aninit long Kingdom blong God?

JEOVA i gat gud nyus blong talemaot long olgeta man. !Hem i gat wan Kingdom, mo hem i wantem se ol man long evri ples oli harem nyus blong Kingdom ya! Taem yumi kasem save long gud nyus ya, God i wantem se yumi go talemaot long ol narafala. Hemia wan wok we i gat tu haf blong hem. Faswan haf se, yumi mas talemaot gud nyus blong Kingdom blong God. Long profet tok blong Jisas long saed blong ‘en blong ol rabis fasin blong wol ya,’ hem i talem se: ‘Bambae ol man oli stap talemaot gud nyus ya blong kingdom blong God. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae en i save kam.’​—Matyu 24:​3, 14.

² Namba tu haf blong wok ya se, yumi mas tijim ol man we oli glad blong lesin long mesej blong Kingdom. Afta we Jisas i laef bakegen, hem i talem long wan bigfala grup blong ol disaepol blong hem se: ‘From samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.’ (Matyu 28:19, 20) ‘Ol tok we Kraes i givim,’ oli no kamaot long hem nomo. Hem i tijim ol narafala blong folem ol loa blong God, no blong mekem ol samting we God i wantem olgeta blong mekem. (Jon 14:23, 24; 15:10) Taswe, taem yumi tijim ol narafala blong ‘folem ol tok we Kraes i givim,’ i olsem we yumi stap halpem olgeta blong kasem save long ol samting we God i wantem olgeta blong mekem. Ol man we hat blong olgeta i stret, oli mas mekem samting we God i wantem olgeta blong mekem. Olsem nao, oli save stap aninit long Kingdom blong hem.

3. ?Wanem ya Kingdom blong God? ?Kingdom ya bambae i mekem wanem samting we i rili wan gud nyus?

³ ?Wanem ya Kingdom blong God? ?Kingdom ya bambae i mekem wanem samting we i olsem gud nyus? Kingdom blong God i wan gavman long heven. Hem i gud tumas long tingting blong Jeova, from we bambae Hem i yusum Kingdom ya blong mekem nem blong hem i tabu, mo blong tekemaot olgeta doti we ol man oli bin sakem long nem blong hem. Kingdom ya i olsem tul we bambae Jeova i yusum blong mekem ol samting we hem i wantem oli kamaot long wol, olsem oli kamaot finis long heven. Hemia nao from wanem Jisas i tijim yumi blong prea se Kingdom blong God bambae i kam, mo from wanem hem i talem long yumi blong putum Kingdom ya long fasples long laef blong yumi. (Matyu 6:​9, 10, 33) ?Yu yu luksave from wanem Jeova i ting se i impoten tumas we yumi tijim ol narafala long saed blong Kingdom blong hem?

Wan Traem Be i No Strong Tumas

4. ?Olsem wanem blong eksplenem se wok blong yumi blong talemaot gud nyus i no strong tumas?

⁴ ?Olsem wanem? ?I strong tumas long yumi blong talemaot gud nyus ya? !No gat! Wan eksampel: Wan papa i mas givim ol samting we famle blong hem i nidim long saed blong bodi. Sipos hem i no mekem wok ya, i olsem we hem i sakemaot Kristin bilif. Aposol Pol i raetem se: “Man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timote 5:8) ?Be wok ya i strong tumas long Kristin man ya? No gat. Sipos hem i laekem famle blong hem tumas, bambae hem i wantem givim ol samting we oli nidim.

5. ?Nating se wok blong talemaot gud nyus mo blong mekem disaepol i wan wok we yumi mas mekem, from wanem yumi glad blong joen long hem?

⁵ I sem mak, wok blong talemaot gud nyus mo mekem disaepol i wan wok we yumi mas mekem, wan wok we God i wantem yumi blong mekem, we laef blong yumi i dipen long hem. Pol i talem se: ‘Hemia i wok blong mi we mi mas mekem. Sipos mi no talemaot gud nyus ya, hemia bigfala trabol blong mi ya, bambae mi harem nogud tumas from.’ (1 Korin 9:​16; skelem wetem Esikel 33:​7-9.) Be, lav nao i pusum yumi blong talemaot gud nyus, i no from we yumi mas mekem nomo. Faswan samting se, yumi laekem God tumas. Be tu, yumi laekem ol man raonabaot long yumi, mo yumi save se i impoten tumas we oli harem gud nyus. (Matyu 22:37-​39) Gud nyus ya i givim hop long olgeta long saed blong fyuja. I no longtaem, bambae Kingdom blong God i tekemaot ol rabis fasin, fasin blong harem nogud aninit long han blong narafala, mo bambae i putumbak pis mo fasin joengud​—blong givim blesing blong olwe long olgeta we oli obei long rul blong hem we i stretgud. ?Yumi wantem tumas, yes yumi glad tumas, blong talemaot gud nyus ya long ol narafala?​—Ol Sam 110:3.

6. ?From wanem wok blong talemaot gud nyus mo mekem disaepol i givim wan bigfala traem?

⁶ Be, wok ya blong talemaot gud nyus mo mekem disaepol i wan bigfala traem tu. Olgeta man wanwan oli no sem mak. Ol samting we oli intres long hem mo save blong olgeta i no sem mak evriwan. Samfala oli skulgud, samfala oli no skulgud. Fasin blong rid​—we bifo ol man oli laekem tumas​—naoia oli tingbaot olsem wan wok. Fasin ya we man i les blong rid, i minim se “man i save rid be i no wantem rid.” Hem i wan problem we i stap kam antap bigwan. Mo i stap kam antap tu, long ol kantri we oli tok flas from bigfala namba blong ol man we oli save rid. ?Nao, olsem wanem yumi save givhan long ol man ya we oli gat ol defdefren laef mo intres, blong lanem samting we God i wantem olgeta blong mekem?​—Skelem wetem 1 Korin 9:​20-​23.

Ol Stret Tul Blong Halpem Ol Narafala

7. ?Olsem wanem “slef ya we i stret mo waes” i givim ol tul long yumi blong halpem ol narafala blong lanem ol samting we God i wantem olgeta blong mekem?

⁷ I moa isi blong mekem wan strongfala wok sipos yu gat ol stret tul. Maet wan tul i stret blong mekem wan spesel wok tede. Be, maet tumora wan nid i kamaot we i mekem se narafala tul i mas tekem ples blong hem. Samting ya i sem mak long wok blong yumi blong talemaot mesej blong Kingdom blong God. Long ol yia we oli pas, “slef ya we i stret mo waes” i bin givim ol stret tul long yumi, hemia ol buk blong mekem Baebol stadi wetem ol man long haos blong olgeta. (Matyu 24:​45, NW) Tru long slef ya, yumi bin kasem ol tul blong givhan long ol man long “olgeta laen, mo long olgeta kantri mo long olgeta lanwis,” blong oli lanem ol samting we God i wantem olgeta blong mekem. (Revelesen 7:9) Bakegen mo bakegen, taem ol samting long wol oli jenis, yumi bin kasem ol nyufala tul blong gohed long wok blong yumi. Yumi luk sam eksampel.

8. (a) ?Buk ya “Let God Be True” i bin givhan olsem wanem blong tijim ol man long Baebol? (b) ?Wanem tul blong mekem Baebol stadi i kamaot long 1968, mo oli wokem tul ya long wanem spesel fasin? (c) ?Olsem wanem Trutok buk i givhan long wok blong mekem disaepol?

⁸ Stat long 1946 kasem 1968, buk ya “Let God Be True” i bin stap olsem wan strongfala tul blong tijim ol man long Baebol, mo oli wokem kolosap 19,250,000 kopi blong hem long 54 lanwis. Buk ya, Trutok Blong Soemaot Rod Blong Itenel Laef, i kamaot long 1968. Tul ya i wokgud blong plante yia blong mekem stadi blong Baebol wetem ol man we oli intres. Bifo, plante man oli stadi wetem ol Wetnes blong Jeova blong plante yia, we oli no tekem baptaes. Be oli raetem buk ya long fasin we i pulum studen blong mekem ol samting we hem i lanem, i wok long laef blong hem. ?Wanem frut i kamaot? Buk ya Jehovah’s Witnesses​—Proclaimers of God’s Kingdom i talem se: “Long trifala sevis yia, stat long Septemba 1, 1968 kasem Ogis 31, 1971, i gat 434,906 man we oli tekem baptaes​—!namba ya i moa long tu taem antap long namba blong ol man we oli baptaes long trifala sevis yia bifo!” Stat long taem we Trutok buk i kamaot, oli seremaot fulap kopi blong hem​—bitim 107,000,000 long 117 lanwis.

9. ?Wanem samting we i spesel long saed blong Laef Foreva buk, mo olsem wanem hem i givhan bigwan long namba blong ol man blong talemaot Kingdom?

⁹ Long 1982, buk ya Yu Save Laef Foreva Long Paradaes Long Wol i kam olsem stampa buk blong mekem ol Baebol stadi. Insaed long buk ya, i gat bitim 150 pija, wetem ol sotfala tok we oli makem bigfala poen blong tijim man long ol wanwan pija ya. Kingdom Wok Blong Yumi long Oktoba 1982 i talem se: “Long kolosap 20 yia (stat long 1946 kasem 1965) we buk ya ‘Let God Be True’ i stampa buk blong mekem stadi, bitim wan milyan nyufala man blong talemaot Kingdom oli joen long ogenaesesen blong yumi. Biaen, afta we buk ya Trutok Blong Soemaot Rod Blong Itenel Laef i kamaot long 1968, mo i kam stampa buk blong mekem stadi, i gat wan milyan man bakegen we oli stat talemaot Kingdom. ?Olsem wanem long nyufala buk ya Yu Save Laef Foreva Long Paradaes Long Wol, we yumi stap yusum naoia blong mekem stadi? ?Bambae yumi luk plante moa man bakegen oli kam man blong talemaot Kingdom? !Bambae i mas, sipos Jeova i wantem!” !Yes, i klia se Jeova i wantem, from we stat long 1982 kasem 1995, bitim 2,700,000 man oli kam man blong talemaot Kingdom!

10. ?Yumi kasem wanem nyufala tul long 1995, mo from wanem hem i save givhan long ol Baebol stadi blong gru kwik long saed blong speret?

¹⁰ Jisas i talem se: “I gat plante kakae tumas i stap long garen, be smol man nomo oli stap blong karem i go.” (Matyu 9:​37) I tru, i gat plante kakae tumas i stap long garen. I gat plante wok yet blong mekem. Long sam kantri, ol Wetnes oli mas raetemdaon nem blong ol man we oli wantem stadi Baebol, mo talem long olgeta blong wet kasem we oli gat naf taem blong stadi wetem olgeta. “Slef ya we i stret mo waes” i gat tingting blong mekem save blong God i kasem ol man moa kwik. Taswe, long 1995, oli givim wan nyufala tul, hemia buk ya we i gat 192 pej, nem blong hem, Save Blong Lidim Yu Long Laef We i No Save Finis. Nambawan tul ya i no tokbaot ol gyaman tijing. Hem i talemaot stret ol trutok blong Baebol. Yumi hop se buk ya bambae i givhan long ol Baebol stadi blong oli gru kwiktaem long saed blong speret. Buk ya Save i stap mekem bigfala wok finis long wol. Oli prentem finis 45,500,000 kopi blong hem long 125 lanwis, mo wok i stap gohed blong tanem i go long 21 lanwis bakegen.

11. ?Yumi kasem wanem tul we i wokgud blong givhan blong tijim olgeta we oli no save rid nating no oli no ridgud? ?Mo olsem wanem tul ya i givhan bigwan long wok blong yumi blong tijim ol man raon long wol?

¹¹ Sam samtaem, ‘slef ya we i stret’ i bin givim ol tul we oli stretgud long samkaen man nomo. Eksampel, ?olsem wanem long ol man we maet oli nidim spesel help from kastom no skul we oli gruap long hem? ?Olsem wanem yumi save givhan long olgeta blong kasem save long samting we God i wantem olgeta blong mekem? Long 1982, yumi kasem stret tul we yumi nidim long saed ya​—buklet ya we i gat 32 pej blong hem, !Yu Yu Save Harem Gud Blong Olwe Long Wol! Buklet ya we i gat plante pija, i olsem wan tul we i wokgud blong tijim olgeta we oli no save rid nating no oli no ridgud. Hem i eksplenem ol stampa tijing blong Baebol long fasin we i kliagud mo i isi blong kasem save long olgeta. Stat long taem we buklet ya Yu Save Haremgud Blong Olwe i kamaot, hem i bin givhan bigwan long yumi blong tijim ol man raon long wol. Oli bin wokem moa long 105,100,000 kopi blong hem long 239 lanwis. !Namba ya i bigwan moa bitim namba blong eni narafala buk we Watch Tower Sosaeti i bin tanem i go long ol defren lanwis!

12, 13. (a) ?Stat long 1990, ‘slef we i stret’ i givim wanem nyufala tul blong kasem ol man long plante ples? (b) ?Olsem wanem yumi save yusum video kaset blong Sosaeti long wok blong talemaot gud nyus? (c) ?I no longtaem i pas, yumi kasem wanem nyufala tul we i givhan long wok blong mekem disaepol?

¹² Antap long ol buk ya, stat long 1990, ‘slef we i stret’ i wokem wan narafala tul blong tijim ol man, we i olsem wan nyufala rod blong kasem moa man​—ol video kaset. Long Oktoba long sem yia ya, video kaset ya blong 55 menet, Jehovah’s Witnesses​—The Organization Behind the Name, i kamaot​—hemia faswan video blong Watch Tower Sosaeti. Video kaset ya we i soem ol naesfala samting, mo we i givimaot plante save, i kamaot long kolosap 35 lanwis. Hem i soem ogenaesesen blong ol trufala man blong Jeova raon long wol, we oli stap folem oda blong Jisas blong talemaot gud nyus long olgeta ples long wol. Oli wokem video kaset ya blong givhan long wok blong mekem disaepol. Kwiktaem nomo, ol man blong talemaot Kingdom oli stat blong yusum nyufala tul ya long wok blong talemaot gud nyus. Samfala oli karem kaset ya wetem olgeta long basket blong olgeta, mo oli rere oltaem blong soem no givim long ol man we oli intres. Smoltaem afta we video kaset ya i kamaot, wan elda we i goraon blong visitim ol kongregesena i raetem se: “Ol video kaset oli olsem samting blong ol yia biaen long 2000, we yumi save yusum naoia blong kasem maen mo hat blong plante milyan man. Ale, yumi hop se hemia i stat nomo blong plante video kaset we bambae Sosaeti i wokem, blong mekem wok blong Kingdom i gohed moa.” I tru, Sosaeti i bin mekem moa video kaset, olsem kaset ya we i gat tri haf blong hem The Bible​—A Book of Fact and Prophecy mo tu, Jehovah’s Witnesses Stand Firm Against Nazi Assault. Sipos ol video kaset ya blong Sosaeti oli kamaot long lanwis blong yu, ?yu stap yusumgud olgeta long wok blong prij?b

¹³ I no longtaem i pas, yumi kasem wan nyufala tul, buklet ya ?Wanem Samting We God i Wantem Yumi Blong Mekem?, blong givhan long yumi long wok blong mekem disaepol. ?From wanem Sosaeti i wokem buklet ya? ?Olsem wanem blong yusum hem?

Luklukgud Long Wan Nyufala Tul

14, 15. ?Oli wokem buklet ya Samting We God i Wantem blong givhan long hu, mo wanem ol samting insaed long buklet ya?

¹⁴ Nyufala buklet ya, ?Wanem Samting We God i Wantem Yumi Blong Mekem?, i blong givhan long ol man we oli bilif finis long God mo oli gat respek long Baebol. Ol elda we oli goraon blong visitim ol kongregesen, mo ol misinari we oli bin tren long Gilead mo we oli laef plante yia finis long ol pua kantri, oli givhan blong rerem buklet ya. Insaed long buklet ya, i gat wan ful kos blong stadi long saed blong ol stampa tijing blong Baebol. Ol tok blong hem oli kaengud, i isi blong kasem save long olgeta, mo oli klia. Be, hem i go dip tu. Hem i no givim “melek” nomo, be hem i givim “strong kakae” we i kamaot long Tok blong God, mo hem i mekem long fasin we bighaf blong ol man oli naf blong kasem save long hem.​—Hibrus 5:​12-​14.

¹⁵ Long ol yia we oli jes pas, ol man blong talemaot Kingdom long ol defren kantri, oli askem wan buk olsem. Eksampel, hedkwota blong Watch Tower Sosaeti long Papua Nyu Gini i raetem se: “Tingting blong ol man i fasfas from ol defdefren tijing blong skul. Oli nidim ol sotfala tok blong eksplenem trutok, wetem sam vas blong Baebol blong sapotem ol tok ya, we oli save jekem olgeta long prapa Baebol blong olgeta. Oli nidim ol tok we i klia mo i eksplenem ol wanwan samting we God i wantem ol trufala Kristin blong mekem, mo weswan kastom mo fasin Hem i no laekem.” Buklet ya Samting We God i Wantem, hem i stret tul we yumi nidim blong givhan long ol man olsem, blong oli lanem ol samting we God i wantem olgeta blong mekem.

16. (a) ?Isi fasin we buklet i yusum blong eksplenem ol samting bambae i givhan moa long hu? (b) ?Olsem wanem buklet ya Samting We God i Wantem, i save givhan long ol man long ples blong yu?

¹⁶ ?Olsem wanem blong yusum nyufala tul ya? Fastaem, yu save yusum blong stadi wetem ol man we oli no save ridgud, mo ol man we oli no intres blong rid.c Isi fasin blong eksplenem ol samting insaed long buklet ya i save givhan long ol man olsem. Bifo we Watch Tower Sosaeti i prentem buklet ya, ol hedkwota blong Sosaeti oli gat jans blong lukluk tru long buklet ya, nao oli raetem ol tok ya: “Buklet ya bambae i givhan bigwan long plante ples blong kantri ya we ol man oli no intres tumas blong rid.” (Brasil) “I gat plante man blong ol narafala kantri we oli no save ridim prapa lanwis blong olgeta, mo i hadwok yet long olgeta blong ridim Franis. Buklet ya bambae i givhan long mifala blong stadi wetem ol man olsem.” (Franis) ?Yu save tingbaot sam man long ples blong yu we maet buklet ya Samting We God i Wantem, bambae i givhan long olgeta?

17. ?Long plante kantri, olsem wanem nyufala buklet ya i save givhan, mo from wanem?

¹⁷ Namba tu samting se, long plante kantri, buklet ya bambae i givhan bigwan blong statem Baebol stadi wetem ol man we oli fraetgud long God, nating se oli skulgud. I tru, yumi mas traehad blong statem wan stadi long buk ya Save Blong Lidim Yu Long Laef We i No Save Finis. Be samtaem, maet i moa isi blong statem stadi long wan buklet. Biaen, long wan taem we i stret, yumi save jenis i go long buk ya Save, stampa buk mo nambawan buk we yumi mas yusum long ol stadi. Long saed blong fasin blong yusum buklet Samting We God i Wantem, sam hedkwota blong Watch Tower oli raetem se: “I hadwok blong statem ol Baebol stadi, mo i luk olsem se i moa isi long ol pablisa blong statem Baebol stadi taem oli yusum wan buklet fastaem.” (Jemani) “Buklet ya bambae i givhan bigwan blong statem ol nyufala Baebol stadi, we biaen, oli save gohed long buk ya Save.” (Itali) “Nating se ol man Japan oli skulgud, bighaf blong olgeta oli gat smol save nomo long Baebol mo ol stampa tijing blong hem. Buklet ya bambae i gud tumas blong statem stadi, mo biaen oli save gohed long buk ya Save.”​—Japan.

18. ?Wanem samting yumi mas tingbaot long saed blong fasin blong mekem ol samting we God i wantem yumi blong mekem?

¹⁸ Ol hedkwota blong Sosaeti raon long wol oli askem buklet ya, mo Sosaeti i agri finis blong tanem i go long 221 lanwis. Nyufala buklet ya bambae i givhan bigwan long yumi blong halpem ol narafala blong save samting we God i wantem olgeta blong mekem. Long saed blong yumi wanwan, yumi mas tingbaot se fasin ya blong mekem ol samting we God i wantem yumi blong mekem, olsem wok blong prij mo mekem disaepol, i givim nambawan jans long yumi blong soem long Jeova se yumi laekem hem tumas. Yes, samting we God i wantem yumi blong mekem i no strong tumas. !Hem i beswan rod blong folem long laef!​—Ol Sam 19:​7-​11.

[Ol futnot]

?Yu Yu Save Eksplenem?

◻ ?Wanem wok we i gat tu haf blong hem we Jeova i wantem se ol man blong hem oli mekem?

◻ ?From wanem wok we yumi mas mekem blong prij mo blong mekem disaepol i no strong tumas?

◻ ?Wanem ol tul we “slef ya we i stret mo waes” i givim long yumi blong yusum long wok blong prij mo mekem disaepol?

◻ ?Buklet ya Samting We God i Wantem, oli wokem blong givhan long hu, mo olsem wanem yumi save yusum buklet ya long wok blong talemaot gud nyus?

[Tok blong pija long pej 24]

Wok blong prij mo blong mekem disaepol i no strong tumas long yumi

[Tok blong pija long pej 26]

“Let God Be True” (1946, mo oli wokem bakegen long 1952): 19,250,000 long 54 lanwis

“Trutok Blong Soemaot Rod Blong Itenel Laef” (1968): 107,000,000 long 117 lanwis (pija i soem Franis)

“Yu Save Laef Foreva Long Paradaes Long Wol” (1982): 80,900,000 long 130 lanwis (pija i soem lanwis blong Rasia)

“Save Blong Lidim Yu Long Laef We i No Save Finis” (1995): 45,500,000 long 125 lanwis (pija i soem lanwis blong Jemani)