Fasin Blong Trastem Jeova i Givim Paoa Long Mi

AGENOR DA PAIXÃO I TALEM STORE YA

Pol, wan pikinini boe nomo we mitufala i gat, i ded from wan strong kof, taem hem i jes kasem 11 manis. Tri manis biaen, long Ogis 15, 1945, gudfala waef blong mi i ded from sik ya numonya. Mi gat 28 yia long taem ya, mo ol trabol ya oli mekem tingting blong mi i foldaon mo mi harem nogud tumas. Be, fasin blong trastem Jeova mo ol promes blong hem i givim paoa long mi. Bambae mi talem long yufala olsem wanem mi kasem fasin ya blong trastem Jeova.

MI MI bon long Salvado, Baea Stet, Brasil, long Janewari 5, 1917. Stat long taem ya, Mama i tijim mi blong wosipim ol “tabu man” blong Katolik Jyos. Mo tu, hem i wekemap mi mo ol brata blong mi long eli moning, blong mifala i save prea tugeta. Be long semtaem, papa mama blong mi tufala i stap go long ol miting blong ‘kandomblei,’ hemia ol vudu kastom blong Afrika mo Brasil. Mi gat respek long ol bilif ya, be mi no trastem ol man we oli kolem se ol tabu man blong Katolik Jyos, mo mi no trastem kandomblei tu. Wan samting we i mekem mi mi harem nogud tumas, hemia fasin blong agensem ol man blong narafala kala, we ol skul ya oli soemaot.

Biaen, tufala fasbon brata blong mi oli lego haos blong lukaot wok. Biaen bakegen, papa blong mi i ronwe long famle. Taswe, taem mi gat 9 yia, mi mas faenem wok blong halpem mama mo yangfala sista blong mi. Samwe long 16 yia biaen, ol storeyan we mi gat wetem wan man we i wok wetem mi, oli jenisim laef blong mi.

Kasem Fasin Blong Trastem Jeova

Long 1942, mi mitim Fernando Teles. Plante taem, hem i talem long mi se i rong blong wosipim ol “tabu man.” (1 Korin 10:14; 1 Jon 5:​21) Fastaem, mi no lesin long hem. Be mi laekem hem from we hem i toktok wetem fulhat blong hem, mo hem i intres long ol man, nomata wanem kala blong olgeta. Mi stat blong tinghae long save we hem i gat long saed blong Baebol, antap moa, taem hem i tokbaot Kingdom blong God mo paradaes long wol. (Aesea 9:​6, 7; Daniel 2:​44; Revelesen 21:​3, 4) Hem i luk se mi intres long ol samting we hem i stap talem, ale hem i givim long mi wan Baebol mo sam buk blong eksplenem Baebol.

Sam wik biaen, mi agri blong go long wan Baebol stadi blong kongregesen.a Grup ya i stap stadi long buk ya Religion, we Watch Tower Bible and Tract Society i wokem. Mi laekem stadi ya, mo mi stat blong go long olgeta miting blong ol Wetnes blong Jeova. Samting we mi laekem tumas long ol miting ya se, i no gat fasin blong agensem man blong narafala kala, mo olgeta long miting oli soem fasin fren long mi kwiktaem nomo. Long taem ya, mi stat fren wetem wan gel we nem blong hem Lindaura. Mi talem long hem ol samting we mi stap lanem, ale hem i stat kam long ol miting wetem mi.

Wan narafala samting we i mekem mi sapraes long saed blong ol miting, hemia se oli toktok plante long saed blong wok blong prij. (Matyu 24:14; Ol Wok 20:20) Ol paenia, hemia nem blong olgeta we oli stap prij fultaem, oli leftemap tingting blong mi blong tekem jans blong prij, ale mi stat toktok wetem ol man long tren taem mi stap go mo kambak long wok. Taem mi faenem wan man we i soem intres, mi tekem adres blong hem mo visitim hem blong traem mekem intres blong hem i kam bigwan moa.

Long semtaem, fasin blong mi blong trastem Jeova mo ogenaesesen we hem i yusum, i stap kam strong moa. Taswe, afta we mi lesin long wan tok long saed blong Baebol we i tokbaot Kristin fasin blong givim laef long God, mi mi tekem baptaes long Atlantik Si, long Epril 19, 1943. Long semfala dei ya, mi go prij long ol haos wanwan. Hemia faswan taem blong mi blong joen long wok ya.

Tu wik biaen, long Mei 5, mi mo Lindaura i mared. Long Ogis 1943, hem i tekem baptaes long faswan asembli we ol Wetnes blong Jeova oli mekem long taon blong Salvado. 1973 Yearbook of Jehovah’s Witnesses i tokbaot asembli ya se: “Ol lida blong skul oli blokem pablik tok long Salvado, be taem oli stap traem blong mekem olsem, oli talem plante toktok . . . we i olsem ol gudfala pablisiti.” Ol samting we oli kamaot oli soem klia se Jeova i stap lidim ol man blong hem taem ol narafala oli mekem trabol long olgeta. Samting ya i mekem fasin blong mi blong trastem Jeova i kam strong moa.

Olsem mi talem long stat blong store ya, tu yia nomo afta we Lindaura, waef blong mi we mi laekem hem tumas, i tekem baptaes, hem i ded. Hemia tri manis nomo afta we boe blong mitufala i ded. Waef blong mi i gat 22 yia nomo. Be fasin blong trastem Jeova i givim paoa long mi long ol manis ya we oli strong tumas long mi.

Wok Long Saed Blong Speret i Mekem Mi Mi Strong

Long 1946, wan yia afta we mi lusum waef mo boe blong mi, oli putumap mi olsem man blong lukaot long ol Baebol stadi long Salvado, we i gat wan kongregesen nomo. Long sem yia ya, Tiokratik Skul i stat long ol kongregesen long Brasil, nao mi kam faswan blong lidim skul ya long Baea Stet. Biaen, long Oktoba 1946, i gat Tiokratik Asembli “Ol Nesen We Oli Glad,” long taon ya Sao Polo. Bos blong mi we mi wok blong hem blong ten yia finis, i talem se i nidim mi, mo i traem fosem mi blong no go long asembli ya. Be afta we mi eksplenem long hem from wanem mi wantem tumas blong go long asembli ya, hem i givim wan bigfala presen long mi, mo i talem long mi blong gat wan gudfala trep.

Ol tok blong asembli long Minisipol Haos long Sao Polo oli kamaot long lanwis Potugis​—hemia lanwis blong ol man Brasil. Oli kamaot tu long Engglis, lanwis blong Jemani, Hangari, Polan mo Rasia. Long asembli ya, magasin ya Wekap! i kamaot long lanwis Potugis. Asembli ya we 1,700 man oli kam long pablik tok blong hem, i gat bigfala paoa long mi. Ale, mi fulumap wan pepa blong statem wok blong paenia long Novemba 1, 1946.

Long paenia wok blong mifala long taem ya, mifala i yusum mesin we i talemaot ol tok we oli rikodem finis. Tok ya “Proteksen” i wan we mifala i yusum plante, mo mifala i traem pulum ol man blong haos blong lesin long hem. Afta long tok ya, mifala i talem se: “Blong protektem yumi long wan enemi we yumi no save luk hem, yumi mas fasgud long wan fren we yumi no save luk hem tu. Jeova i nambawan fren blong yumi, mo hem i gat moa paoa i bitim enemi blong yumi, Setan. Taswe, yumi mas stap kolosap long Jeova blong i protektem yumi long Setan.” Nao mifala i soem smol buk ya Protection, we i givim moa save.

Mi no paenia wan yia yet, taem oli askem mi blong mekem wok blong spesel paenia long kongregesen blong Karioka long Rio de Janero. Long ples ya, samtaem mifala i fesem bigfala fasin agens. Wan taem, wan man blong haos i kilim Ivan Brenner, brata we i wok wetem mi. Ol man raonabaot oli singaot long polis, mo polis i tekem mifala i go long polis stesen.

Taem oli stap askem ol kwestin long mifala, man blong haos we i kros tumas i talem se mifala i stap spolem pis. Jif blong polis i talem strong long hem blong stap kwaet. Nao jif blong polis i tanem hem i kam long mifala mo wetem kwaet fasin, hem i talem se mifala i save gofri. Hem i holem man ya we i agensem mifala, mo i givim panis long hem from we hem i kilim wan man. Ol samting olsemia oli mekem fasin blong mi blong trastem Jeova i stap strong.

Fultaem Minista Wok i Kam Bigwan

Long Julae 1, 1949, mi mi glad tumas taem oli askem mi blong wok long Betel, hemia nem blong hedkwota blong ol Wetnes blong Jeova long ol kantri. Long taem ya, Betel long Brasil i stap long 330 Lisinio Kadoso Rod long Rio de Janero. Mo i gat 17 memba nomo blong hem. Blong smoltaem, mi joen long kongregesen blong Engeno de Dentro. Biaen, oli putumap mi olsem presiden elda long Belfod Rokso, wan taon we i stap sam kilomita longwe long Rio de Janero, mo we i gat wan kongregesen nomo long hem.

Ol wiken oli bisi tumas. Long Sarede, mi tekem tren i go long Belfod Rokso, joen long wok blong prij long aftenun, mo long naet, mi go long Tiokratik Skul mo Miting Blong Kingdom Wok. Long naet ya, mi slip long haos blong sam brata, mo mi go prij wetem olgeta long nekis moning. Long aftenun, mi joen long miting blong pablik tok mo Wajtaoa Stadi, mo mi gobak long Betel long haf pas naen long naet. Naoia, i gat 18 kongregesen long Belfod Rokso.

Long 1954, afta we mi bin folem program ya blong tri yia haf, oli sanem mi mi gobak long Rio de Janero bakegen. Oli putumap mi olsem presiden elda long kongregesen blong Sao Kristovao. Mi stap wok wetem kongregesen ya blong ten yia.

Ol Wok Blong Mi Long Betel

Faswan wok blong mi long Betel, hem i blong bildim wan smol haos blong putum wan trak nomo we Betel i gat, i stap insaed long hem. Trak ya i wan Doj blong 1949, we oli putum nem blong hem se Joklet, from we kala blong hem i braon. Taem smol haos ya i finis, oli givim wok long mi long kijin, mo mi wok tri yia long ples ya. Biaen, oli askem mi blong wok long Job Pres Dipatmen, long ples blong prentem ol buk. Oli yusum mesin ya job pres, blong prentem plante smosmol samting, olsem ol leta mo Kingdom Wok Blong Yumi. Mi wok long job pres ya blong bitim 40 yia, kasem naoia.

Bighaf blong ol mesin blong prentem ol buk oli sekenhan. Eksampel, blong plante yia, mifala i gat wan olfala mesin we mifala i kolem Sera, olsem woman blong Ebraham. Oli bin yusum mesin ya plante yia finis, long faktri long hedkwota blong Watch Tower Society long Bruklin, Nyu Yok. Nao samwe biaen long yia 1950, oli sanem hem i kam long Brasil long sip. Olsem waef blong Ebraham, hem i karem pikinini long ples ya, nating se hem i olfala finis. Ol pikinini, hemia ol Wajtaoa mo Wekap!

Mi sapraes blong luk olsem wanem namba blong ol buk long saed blong Baebol we oli prentem long Brasil, i stap go antap oltaem. !Long fulwan yia blong 1953, mifala i prentem 324,400 Wajtaoa mo Wekap! !Be naoia, mifala i prentem bitim tri milyan evri manis!

Betel Blong Mifala

Long ol yia we oli pas, mifala i haremgud blong luk olsem wanem hedkwota blong mifala long Brasil i kam bigfala moa. Long 1952, mifala i bildim wan faktri we i gat tu store blong hem, biaen long Betel haos long Rio de Janero. Afta long yia 1968, oli seftem Betel i go long wan nyufala haos long taon blong Sao Polo. Taem mifala i muf i go long ples ya, i luk olsem we haos ya i bigwan tumas, from we famle blong Betel i gat 42 memba nomo. Mifala i gat strong tingting se haos ya bambae i naf blong mifala long ol yia we oli kam. Be, long 1971, oli bildim tu moa haos we oli gat faef store blong olgeta. Mo tu, oli pem wan narafala faktri we i stap kolosap, mekem hem i kam nyuwan bakegen, mo oli joenem hem long ol nyufala haos ya. Be namba blong ol pablisa i gohed blong kam antap oltaem​—i bitim 100,000 long 1975. Taswe, smoltaem biaen nomo, mifala i nidim moa ples blong wok.

Ale, oli bildim sam nyufala haos bakegen, samwe long 140 kilomita longwe long Sao Polo, kolosap long smol taon blong Sesario Lanj. Long 1980, Betel famle we i gat 170 memba, i muf i go long ol nyufala haos ya. Afta long taem ya, wok blong Kingdom i gru kwiktaem nomo. !Naoia, i gat bitim 410,000 we oli stap prij long Brasil! Blong lukaot long nid long saed blong speret blong ol man ya blong talemaot Kingdom, mifala i stap bildim ol nyufala faktri blong prentem ol buk we oli tokbaot Baebol, mo ol nyufala haos blong slip blong olgeta we oli wok long Betel. !Naoia, i gat samwe 1,100 memba blong Betel!

Ol Sas Blesing We Mi Kasem

Mi tingbaot wok long Betel olsem wan blesing we i sas tumas. Taswe, nating we long ol yia bifo, mi tingting blong mared bakegen, mi jusum blong putum tingting blong mi i stap fulwan long ol blesing nomo we mi gat long Betel mo long wok blong prij. Mi haremgud tumas blong wok wetem fulap yangfala long ples blong prentem ol buk, mo blong trenem olgeta long wok we oli stap mekem. Mi traem mekem long olgeta olsem we oli stret pikinini blong mi. Fasin blong olgeta blong wok strong mo blong no tingbaot olgeta nomo, oltaem i leftemap tingting blong mi bigwan.

Wan narafala blesing we mi gat long ol yia we oli pas, hemia blong kampani wetem olgeta we oli stap long sem rum wetem mi. I tru, samtaem i gat traem i kamaot from we mifala i gat ol defdefren fasin. Be, mi lanem blong no tingbaot narafala olsem we hem i mas stret olgeta. Mi mi traehad blong winim fasin blong no mekem wan smol trabol i kam wan bigfala samting, mo blong ting se mi mi impoten tumas. Fasin blong laf long ol mastik blong mi, hemia samting we i givhan long mi blong fogetem mastik blong narafala.

Wan narafala nambawan blesing we mi kasem, hemia se mi bin go long sam bigfala intenasnal asembli long Yunaeted Stet. Wan long ol asembli ya, “Gud Nyus Blong Olwe,” oli mekem long Yanki Stadium, Nyu Yok, long 1963. Wan narafala intenasnal asembli, hemia “Pis Long Wol,” we oli mekem long sem ples long 1969. !Taem mi stap long ples ya, mi glad blong visitim hedkwota blong ol Wetnes blong Jeova long wol, we i stap long Bruklin, Nyu Yok, kolosap long ples blong asembli ya!

Mo tu, blong ten yia, mi kasem blesing ya wetem sam narafala elda, blong lidim moning wosip long Betel. Be, blesing we i bigwan moa bitim ol narawan, we i stap karem bigfala glad long mi mo i stap leftemap tingting blong mi bigwan, hemia jans blong talemaot mesej blong Kingdom long ol man we hat blong olgeta i stret, olsem Masta blong yumi, Jisas Kraes, i bin mekem.

Long ol yia we oli jes pas, mi kasem traem from wan sik, we oli kolem sik blong Pakinson. Ol brata mo sista we oli lukaot wetem lav long ol sikman long Betel, oli givhan long mi mo mekem mi mi haremgud oltaem. Wetem strong bilif, mi mi prea long Jeova blong givim paoa long mi blong gohed blong traem bes blong mi blong sapotem trufala wosip blong hem.

[Futnot]

[Tok blong pija long pej 23]

Betel long Brasil we mi stap long hem naoia

[Tok blong pija long pej 23]

Wetem waef blong mi, we i ded long 1945