Jeova i No Save Lego Yumi

PETER PALLISER I TALEM STORE YA

Hemia Desemba 1985. Mitufala i glad tumas taem plen i stat godaon long intenasnal epot blong Naerobi, Kenya. Taem mitufala i stap ron long trak blong go long taon, ol samting we mitufala i mekem bifo oli stap kambak long tingting blong mitufala, mo mitufala i luk ol samting mo harem ol noes we mitufala i savegud olgeta.

MITUFALA i kam long Kenya blong go long Distrik Asembli blong ol Wetnes blong Jeova, “Ol Man We Oli Holemstrong Long God.” Twelef yia bifo, mi mo waef blong mi i mas livim Kenya, from we gavman i putum tabu long wok blong prij. Long ples ya, mitufala i bin stap long Betel, hemia nem blong ol hedkwota blong ol Wetnes blong Jeova. !Mitufala i kasem wan gudfala sapraes taem mitufala i gobak long ples ya!

Long Betel, wan yangfala gel we hem i wan Wetnes, i givhan blong mekemrere kakae long medel dei. Mitufala i save yangfala ya taem hem i gat tu yia nomo. Mitufala i save sikis memba blong famle blong Betel taem oli pikinini nomo. !Mitufala i kasem bigfala glad blong luk se olgeta we oli bigman finis naoia, wetem ol famle blong olgeta, oli stap strong yet long wok blong prij! God blong yumi, Jeova, i bin lukaotgud long olgeta, folem promes blong Baebol se: “Man we i holemstrong long yu, bambae yu yu stap kolosap long hem oltaem blong givhan long hem.” (2 Samuel 22:26) !Taem mi mi yangfala, laef blong mi i defren olgeta long laef blong ol yangfala ya we oli glad tumas!

Taem Mi Mi Yangfala, Laef Blong Mi i No Gat Mining

Mi bon long Skabra, Engglan, long Ogis 14, 1918. Tu yia biaen, mama mo stepsistaa blong mi, oli muf i go long Kanada. Ol tri yia we oli kam biaen, mi stap wetem papa blong mi, mama blong papa blong mi, mo sista blong papa blong mi. Taem mi gat faef yia, mama i tekemaot mi long han blong papa blong mi, mo i karem mi mi go long Montreol, Kanada. Fo yia biaen, hem i sanem mi mi gobak long Engglan, blong stap wetem papa, mo blong go long skul.

Mama mo stepsista blong mi, tufala i raetem leta i kam maet wan taem long sikis manis. Long en blong ol leta blong tufala, oli talem se oli wantem we mi mi stap olsem wan manples we i gat gudfala fasin, mo we i holemstrong long King mo kantri. Ating ol ansa blong mi oli mekem tufala i harem nogud, from we mi raetem se fasin ya blong tinghae moa long wan kantri bitim ol narafala kantri mo fasin blong faet, oli nogud. Nating se i olsem, i no gat wan we i lidimgud mi taem mi yangfala, ale laef blong mi i olbaot nomo.

Long Julae 1939, sikis wik bifo we Namba Tu Bigfala Faet blong Wol i stat, oli singaotem mi blong joen long ami blong Briten. Mi mi gat 20 yia nomo. Smoltaem biaen, oli sanem grup blong ami we mi mi stap long hem, i go long not blong Franis. Taem ol plen blong Jemani oli kam blong sakem bom, mifala i traem sutum olgeta wetem masket. Mifala i fraet oltaem. Ol ami blong Jemani oli stap kam kolosap moa, ale mifala i stap gobak biaen. Mi mi wan long olgeta we ol ami oli kam karemaot olgeta long Dankek long faswan wik blong Jun long 1940. Mi mi harem nogud yet blong tingbaot ol dedbodi blong wan ful grup blong soldia, we mi luk olbaot long sanbij. Mi stap laef tru long rabis taem ya we i olsem wan nogud drim, mo mi kasem Awij, wan ples long is blong Engglan, long wan smol sip.

Wan yia biaen, long Maj 1941, ami i sanem mi mi go long India. Long ples ya, mi kasem trening blong wok long ol mesin we oli makemaot rod blong ol plen oli folem. Afta we mi slip long hospital smoltaem from wan sik we mi kasem, oli sanem mi mi go long wan kamp blong ami long Deli, bigfala taon blong India. From we mi mi stap longwe tumas long ples blong mi, mo mi stap sik smol yet, ale mi stat tingbaot fyuja. Antap moa, mi wantem save wanem bambae i hapen long yumi taem yumi ded.

Wokem Wan Nyufala Fasin Blong Holemstrong

Long Deli, mi stap long wan rum wetem wan man Engglan, Bert Gale. Wan dei, hem i talem se, “ol skul oli kamaot long Setan.” Tok ya i wekemap tingting blong mi. Waef blong hem i joen wetem ol Wetnes blong Jeova, mo sam samtaem, hem i sanem sam buk we oli tokbaot Baebol, oli kam long hem. Wan long ol buk ya, nem blong hem Hope, i pulum intres blong mi. Hem i tokbaot hop blong laef bakegen long ded. Samting ya i rili mekem tingting blong mi i stap kwaet.

Long stat blong 1943, Bert i toktok long wan man we i haf Engglan mo haf India, nem blong hem Teddy Grubert. Hem i no wan ami, be hem i wok wetem mifala long kamp blong ami. Mitufala i sapraes tumas blong faenemaot se Teddy i wan Wetnes. Nating se gavman i putum tabu long ol buk blong ol Wetnes blong Jeova long 1941, Teddy i tekem mitufala i go long ol miting we ol Wetnes oli mekem long Deli. Long smol kongregesenb ya, mi faenem trufala fasin fren mo kaen fasin, we mi neva bin kasem long laef blong mi bifo. Basil Tsatos, wan olfala Kristin brata blong Gris, i soem bigfala intres long mi, mo i ansarem ol kwestin blong mi. Hem i givim ol ansa blong Baebol we oli klia nomo, long saed blong risen from wanem yumi kam olfala mo yumi ded, laef bakegen long ded, mo nyufala wol blong stret fasin we God i promes blong mekem i kamtru.​—Ol Wok 24:15; Rom 5:​12; 2 Pita 3:​13; Revelesen 21:​3, 4.

Mi gat spesel intres long buk ya Peace​—Can It Last?, we oli prentem long 1942. Buk ya i soemaot se “anamol we i red we i red” i minim Ligofnesen. (Revelesen 17:3) Oli raetem Revelesen japta 17, vas 11, mo biaen oli talem se: “Ale yumi save talem se Ligofnesen ‘fastaem hem i laef be naoia i no moa laef.’ ” Buk ya i gohed, i se: “Kampani blong ol nesen ya blong wol bambae i stanap bakegen.” !Long 1945, bitim tri yia biaen, samting ya i kamaot tru taem oli stanemap Yunaeted Nesen!

Taem gavman i putum tabu long ol buk blong ol Wetnes, mi gat jans blong halpem ol nyufala fren ya blong mi. Taem wan bokis blong ol buk ya Peace​—Can It Last? i kam, kongregesen i givim long mi blong mi holem i stap sef. ?Hu i save tingbaot blong luk long kamp blong ami blong faenem ol buk ya we gavman i putum tabu long olgeta? Evri taem we mi go long miting, mi karem sam long ol buk ya blong givim long ol brata. Mo tu, mi bin haedem ol prapa buk blong ol brata mo sista long saed blong Baebol, taem oli fraet se polis bambae i kam jekem haos blong olgeta. Ale biaen, long Desemba 11, 1944, gavman i tekemaot tabu long ol buk.

Fasin blong mi blong holemstrong long ol Kristin tijing i kasem traem long 1943, taem grup blong ami i mekemrere blong holem lafet blong Krismas. Mi no wantem mekem lafet ya, from we mi kasem save finis se Jisas i no bon long Desemba, taem we i kolkol, mo se ol faswan Kristin oli no bin mekem lafet blong Krismas tu.​—Lukluk Luk 2:​8-​12.

Mi mi go long Asembli ya, “Ol Man We Oli Joengud Blong Talemaot Mesej,” long Jubulpo (Jabalpur), long Desemba 27 kasem 31, 1944. I gat 150 man long asembli ya. Plante blong olgeta, oli aot long Deli long tren, oli kam. Hemia wan trep blong bitim 600 kilomita. Mi no save fogetem nambawan filing we i stap bitwin long ol man ya we oli sidaon afsaed nomo long open ples. Long ples ya, mi rili luk olsem wanem ogenaesesen blong Jeova i wok.

Ol man we oli kam long asembli ya, oli slip long ol skul blong pikinini. Long ples ya, mifala i singim ol singsing blong Kingdom, mo mifala i haremgud blong joen wetem ol hapi Kristin brata mo sista. Long asembli ya, mi stat joen long wok blong prij, wan wok we mi stap laekem tumas yet.

Wok Blong Fultaem Paenia Long Engglan

Long 1946, mi gobak long Engglan, mo smoltaem biaen, mi stat blong joen long kongregesen blong Wolvaton. Nating se i gat ten man nomo blong talemaot Kingdom long ples ya, oli mekem mi mi harem olsem we mi stap long stret ples blong mi, mo mi haremgud olsem mi bin haremgud wetem ol Wetnes long India. Long kongregesen ya, mi makem Vera Clifton olsem wan sista we i gat kaen fasin mo we i laekem ol narafala. Taem mi faenemaot se hem i gat sem tingting olsem mi blong kam wan paenia, hemia olgeta we oli prij fultaem, mitufala i mared long Mei 24, 1947. Mi mekemrere wan trak we oli bildim wan smol haos biaen long hem. Wan yia biaen, mitufala i go long faswan ples we mitufala i paenia long hem, hemia wan smol taon long bus, nem blong hem Hantingdon.

Ale, mitufala i stap goaot long eli moning long ol baskel blong mitufala, blong go prij long bus. Mitufala i stop smoltaem long medel dei nomo, blong kakae sanwij. Nating se win i strong mo ren i foldaon bigwan taem mitufala i stap gobak long haos long baskel, mitufala i hapi mo haremgud from we mitufala i bin mekem wok blong Masta.

Biaen, mitufala i wantem tumas blong mekem moa long wok blong prij, mo serem “gud nyus” wetem ol man blong ol narafala kantri. (Matyu 24:14) Taswe, mitufala i fulumap pepa blong askem sipos mitufala i save go long Gilead, skul blong trenem ol misinari, long Saot Lansing, Nyu Yok, Yunaeted Stet. Oli singaotem mitufala blong joen long klas namba 26, we i finis long Febuwari 1956.

Mitufala i Mekem Plante Moa Wok Long Afrika

Ples we oli sanem mitufala blong wok long hem, hemia Not Rodesia (naoia Sambia) long Afrika. Jes afta we mitufala i kasem ples ya, oli singaotem mitufala blong wok long Betel. Wan wok blong mi long Betel, hemia blong raetem ol leta oli go long ol kongregesen long Is Afrika. Long 1956, wan long ol kantri blong Is Afrika, Kenya, i gat fo Wetnes nomo. Be, long Not Rodesia, i gat bitim 24,000 Wetnes. Mi mo Vera i stat tingting se bambae i gud tumas sipos mitufala i save go wok long wan ples we i nidim moa man blong prij.

Long taem ya, samting we mi no bin tingbaot i kamaot. Oli singaotem mi blong gobak long Gilead Skul bakegen, blong mekem wan kos blong ten manis we i blong ol man blong lukaot long ol hedkwota. Vera i stap long Not Rodesia, mo mi mi go long Nyu Yok, ples we oli mekem Gilead Skul long taem ya. Long Novemba 1962, afta we kos i finis, oli askem mi blong stanemap wan hedkwota long Kenya. Long taem ya, namba blong ol Wetnes long Kenya i kasem bitim wan handred.

Taem mi stap mekem trep blong gobak long Not Rodesia blong karem Vera, plen i mas godaon blong smoltaem nomo long Naerobi, Kenya. Be taem mi kamtru, Bill Nisbet, we i bin stap long klas namba 25 blong Gilead skul, i mitim mi. Hem i talem se i gat jans naoia nomo, blong kasem pepa long gavman we i givim raet long mi blong stap long Kenya. Mitufala i go luk ol man long ofis blong imigresen, mo sam menet biaen nomo, mi kasem pepa blong wok long Kenya blong faef yia. Taswe, mi no moa gobak long Not Rodesia, be Vera i kam joenem mi long Naerobi.

Afta we oli givim wan spesel kos long mitufala long lanwis blong Swahili, mitufala i joen long wok blong prij wetem smol kongregesen blong Naerobi. Afta we mitufala i ridimaot tok we mitufala i wantem talem long man blong haos long lanwis Swahili, oltaem ol man oli talem se: “!Mi no kasem save long Engglis!” Nating se i olsem, mitufala i gohed, mo sloslou mitufala i save toktok lanwis ya.

Ples we mitufala i stap prij long hem i gat plante bigfala store haos long hem, we nem blong olgeta i kamaot long Baebol, olsem Jerusalem mo Jeriko. Kwiktaem, plante man oli intres, mo plante man long ples ya oli kam ol man blong talemaot Kingdom. !Trutok blong Baebol i gat bigfala paoa long ol man ya! Fasin blong holemstrong long Kingdom i mekem ol man blong Jeova oli joengud, ale ol tingting ya se wan laen i hae moa long narafala laen, oli lus. Mo tu, ol Wetnes blong wan laen oli mared wetem ol Wetnes blong narafala laen, hemia samting we i narakaen long tingting blong ol man we oli no Wetnes.

Ol man we oli jes stat blong talemaot Kingdom, oli bilif long trutok wetem strong tingting. Eksampel, Samson i wantem tumas se trutok blong Baebol i kasem ples blong hem. Taswe, hem i askem bakegen mo bakegen long Sosaeti, blong oli sanem ol paenia oli go long ples ya. Yes, hem i joenem wan narafala rum long haos blong hem long Ukambani, blong ol paenia oli save stap long hem. Smoltaem biaen, oli stanemap wan kongregesen long ples ya.

Plante taem, mi visitim ol brata long Itiopia, Is Afrika. Olgeta wanwan oli stap spenem bitim 20 haoa evri manis long wok blong prij, nating se plante oli stap long kalabus, ol man oli kilim olgeta, mo polis i stap wajemgud olgeta oltaem. Wan taem, tu bas we oli fulap long ol brata mo sista blong Itiopia, oli tekem wan wik blong kam long distrik asembli long Kenya. Oli mas pas long ol rod we oli denja tumas, bitwin long ol bigfala hil. Waes fasin we oli yusum blong kasem ol buk we oli tokbaot Kingdom long kantri blong olgeta, i nambawan. Mifala long Kenya i glad blong gohed blong sanem plante buk i go long olgeta.

Long 1973, gavman i putum tabu long wok blong ol Wetnes long Kenya, mo ol misinari oli mas livim kantri ya. Long taem ya, i gat bitim 1,200 Wetnes long Kenya. Plante long olgeta oli kam long epot blong talem tata long mitufala, samting we mitufala i no save fogetem. From we oli givim bigfala tata olsem long mitufala, wan man we i mekem trep long plen wetem mitufala i askem sipos mitufala i bigfala man mo woman blong singsing no blong plei long sinema. Ale, mi mo Vera i gobak long Engglan, mo Sosaeti i askem sipos mitufala i wantem wok long ples ya. Be, mitufala i wantem tumas blong gobak long Afrika.

Gobak Long Afrika

Ale sam manis biaen, mitufala i kasem wan nyufala ples blong wok, hemia Betel blong Akra, bigfala taon blong kantri blong Gana, long Wes Afrika. Long wan wok blong mi long ples ya, mi luk wetem prapa ae blong mi ol hadtaem we ol brata blong yumi oli fesem long kantri ya. Wok blong mi i blong pem ol kakae mo ol narafala samting we famle blong Betel i nidim, mo mi sapraes tumas we praes blong kakae i bigwan bitim mak. Plante taem, mi no save pem ol samting we mifala i nidim. Mo tu, problem i kam bigwan moa taem bensin i kam sot, mo taem mifala i no moa save kasem ol haf blong ol enjin mo mesin we oli brokdaon.

Mi lanem olsem wanem longfala tingting i impoten, mo hemia wan fasin we ol brata blong yumi long Gana oli lanem finis. I rili leftemap tingting blong mifala taem mifala i luk se oli holemtaet glad blong olgeta, nating se oli mas stanap strong agensem traem ya we oli mas pasem mane aninit long tebel sipos oli wantem kasem ol samting we oli nidim long laef. From samting ya, ol man long Gana oli savegud se ol man blong Jeova oli gat stret fasin oltaem, mo plante man blong gavman oli tinghae long olgeta from.

Nating se kantri ya i sot long plante samting long saed blong bodi, be wok blong halpem ol man long saed blong speret i stap gru bigwan. Long olgeta ples blong kantri ya, i gat sam buk blong ol Wetnes long saed blong Baebol, long kolosap evri haos. Taem mitufala i kam long Gana long 1973, i gat 17,156 man blong talemaot Kingdom. Be mitufala i luk olsem wanem namba ya i go antap kasem bitim 23,000 long 1981. Long yia ya, kansa blong skin we i kam moa nogud from we mi bin wokbaot plante yia long bigfala san long India mo Afrika, i fosem mitufala blong lego Gana mo gobak long Engglan, blong pas long wan spesel dokta oltaem.

Nyufala Laef Long Engglan

Taem mitufala i gobak, mi mas jenisim bigwan fasin blong mi blong prij. Bifo, mi lan finis blong toktok long isi fasin nomo long ol man we oli respektem God mo Baebol. Be long London, mi no faenem plante man wetem fasin olsem. Mi tinghae long ol brata long Briten from fasin blong olgeta blong gohed nomo long wok blong prij. Samting ya i mekem mi mi luksave se mi nidim blong traem kasem save moa long tingting mo filing blong ol man we oli “trabol tumas, oli no moa gat paoa” long saed blong speret.​—Matyu 9:​36.

Afta we mi mo Vera i livim Afrika, mitufala i wok long Betel blong London, go kasem taem we Vera i ded long Septemba 1991. Hem i gat 73 yia. I no isi blong lusum wan trufala fren olsem, we i wok kolosap long mi long wok blong prij blong plante yia. Mi mestem hem bigwan. Be mi glad long bigfala help we famle blong Betel long ples ya, we i gat 250 memba long hem, i givim long mi.

Hem i wan trufala blesing long mi blong luk we ogenaesesen blong Jeova i stap gohed strong, mo tu, blong luk se plante man oli mekem wok blong fultaem paenia i kam bigfala wok long laef blong olgeta. Mi save talem tru se i no gat wan fasin blong laef we i gud moa, from we Jeova “i no save lego ol stret man ya we tingting blong olgeta i stap strong long hem.”​—Ol Sam 37:28.

[Ol futnot]

[Tok blong pija long pej 23]

Mitufala i mekem wok blong paenia long Engglan stat long 1947 go kasem 1955

[Tok blong pija long pej 23]

Wan asembli long India, we hem i fastaem blong mi blong prij

[Tok blong pija long pej 23]

Mitufala i wok olsem misinari long Not Rodesia

[Tok blong pija long pej 23]

Long 1985, wetem ol fren we mi no bin luk olgeta blong 12 yia