?Wanem Tingting Blong Yu Long Saed Blong Sin?

“I NO gat sin long yu, i no gat trabol long yu. Yu yu olsem wan haos blong putum ol samting i stapgud long hem, yu yu fulap long paoa we i no save finis.” Wan man Hindu, we i stadi long bigfala waes blong wol mo we plante man oli save long hem, nem blong hem Vivekananda, i talem tok ya antap. Hem i stap traem blong eksplenem sam tok blong tabu buk blong ol man Hindu, hemia Bhagavad Gita. Hem i yusum bigfala bilif blong ol Hindu we nem blong hem Vedanta, i se: “Mastik we i bigwan olgeta, hem i blong talem se yu yu no strong, mo se yu yu wan sinman.”a

Be, ?i tru se man i no gat sin nating? Mo sipos i tru se man i kasem sam samting long blad blong papa mama blong hem taem hem i bon, ?wanem samting ya? Nikhilananda, wan tija blong ol man Hindu, i talem se “taem yumi bon, yumi kasem bodi mo fes blong papa mama blong yumi,” hemia nomo. Ol narafala fasin blong yumi oli kamaot long ol “samting we [yumi] bin mekem long ol laef blong yumi bifo.” Folem tok blong Vivekananda, “yumi wanwan i stap wokem plan blong prapa fyuja blong yumi.” Skul blong ol man Hindu i no tijim nating se man i gat sin taem hem i bon.

Mo tu, bilif ya se man i gat sin taem hem i bon, i no stap long tijing blong ol man we oli folem Soroasta, Sinto, Konfusyus, mo Buda. Long ol skul we oli joenem bilif blong ol man Jyu wetem Kristin bilif, oli bin tijim bifo se man i gat sin, be naoia tingting blong olgeta tu i jenis long saed blong sin. Namba blong ol man tede we oli no tingting se olgeta wanwan oli gat sin, i stap kam antap.

Cornelius Plantinga (Namba 2), wan tija we i stadi long ol bilif blong skul, i talem se: “Tingting we wol ya i leftemap, i no pulum ol man blong bilif se sam fasin oli rong. Antap moa, tingting ya i no pulum ol man blong bilif se olgeta wanwan oli save mekem i rong.” Ol jyos blong Krisendomb oli gat fol tu from we oli tokbaot sin olsem we i nating nomo. Wan lida blong jyos long Yunivesiti blong Dyuk, i talem se: “Sipos yu wantem kasem save long saed blong sin, i no nid blong go long jyos.” Mo folem toktok blong Plantinga, sam jyos oli joenem sin wetem ol trabol long wol nomo.

I tru, tede i gat plante tumas trabol long wol. Raf fasin, fasin blong brekem loa, faet, trabol bitwin ol defren laen blong man, fasin blong yusum drag, gyaman fasin, fasin blong daonem narafala, mo raf fasin agensem ol pikinini, olgeta fasin ya oli kam antap bigwan. Yes, ol man oli talem se long ol yia 19 handred, i gat moa blad i ron i bitim olgeta yia we oli pas bifo. Antap long olgeta trabol ya, i gat trabol soa mo fasin safa we oli kamaot from sik, olfala, mo ded. Ating evri man oli wantem tumas blong kam fri long ol bigbigfala problem ya we oli stap long wol tede, ?i tru no?

Ale, ?wanem tingting blong yu long saed blong sin? ?Yumi kasem sin long papa mama blong yumi taem yumi bon? ?Bambae i gat wan taem we yumi save kam fri long olgeta trabol soa mo wan taem we yumi no moa safa? Nekis haf bambae i tokbaot ol kwestin ya.

[Ol futnot]