!Yumi Mas Holemstrong Long Bilif Blong Yumi We I Sas Tumas!

“Long yufala we yumi gat sem fasin blong bilif ya we i gud tumas.”​—2 PITA 1:1.

1. ?Jisas i givim wanem woning long ol aposol blong hem, be Pita i tok flas olsem wanem?

LONG naet bifo we Jisas i ded, hem i talem se ol aposol blong hem bambae oli lego hem. Wan long ol aposol ya, Pita, i tok flas se: “Maet bilif blong olgeta ya evriwan i save foldaon, be bilif blong mi bambae i no save foldaon samtaem.” (Matyu 26:33) Be Jisas i save se bambae i no olsem. Taswe, hem i talem long Pita se: “Mi mi prea finis from yu, blong bilif blong yu bambae i no save foldaon olgeta. Mo taem yu tanem tingting blong yu, yu kambak, yu biaen long mi bakegen, bambae yu mas mekem tingting blong ol brata blong yu oli strong moa.”​—Luk 22:32.

2. Nating se Pita i suagud long hem wan, ?hem i mekem wanem we i soemaot klia se bilif blong hem i slak?

² Pita i trastem hem wan tumas long saed blong bilif blong hem, be long sem naet ya nomo, hem i haedem we hem i save Jisas. !Tri taem, hem i gyaman se hem i no save Kraes nating! (Matyu 26:69-​75) Taem Pita i “kambak,” i sua se hem i tingtingbak plante taem long ol tok blong Masta blong hem se, “mekem tingting blong ol brata blong yu oli strong moa.” Advaes ya we Pita i kasem, i jenisim fulwan laef blong hem biaen. Yumi luksave samting ya long tufala leta blong hem we oli stap long Baebol.

?From Wanem Pita i Raetem Ol Leta Ya?

3. ?From wanem Pita i raetem faswan leta blong hem?

³ Raonabaot 30 yia afta we Jisas i ded, Pita i raetem faswan leta blong hem. Leta ya i go long ol Kristin brata blong hem long Pontas, Galesia, Kapadosia, Esia, mo Bitinia, ol ples we naoia oli not mo wes saed blong Teki. (1 Pita 1:1) I sua se sam long ol brata ya we Pita i raet i go long olgeta, oli ol man Jyu we oli kam Kristin long Pentekos 33 K.T.a (Ol Wok 2:1, 7-9) Plante blong olgeta, oli blong ol narafala nesen, mo oli stap fesem sam strong traem from ol man we oli agensem olgeta bigwan. (1 Pita 1:​6, 7; 2:​12, 19, 20; 3:​13-​17; 4:​12-​14) Taswe, Pita i raetem leta long ol brata ya blong leftemap tingting blong olgeta. Hem i wantem halpem olgeta ya blong ‘kasem samting ya we oli bilif blong kasem, we God bambae i sevem laef blong olgeta.’ Taswe, laswan advaes we hem i givim, hemia: “Yufala i mas stanap strong long bilif blong yufala, blong blokem [Setan].”​—1 Pita 1:9; 5:​8-​10.

4. ?From wanem Pita i raetem namba tu leta blong hem?

⁴ Biaen, Pita i raetem wan narafala leta i go long ol Kristin ya. (2 Pita 3:1) ?From wanem? From we i gat wan denja we i bigwan moa i stap kam antap. !Sam man we oli gat rabis tingting long saed blong seks, bambae oli stat blong wokem ol doti fasin blong olgeta long medel blong ol man blong bilif, mo bambae oli lidim sam long olgeta oli go krangke! (2 Pita 2:​1-3) Mo tu, Pita i givim woning se sam long olgeta bambae oli laf long tok blong God. Long faswan leta blong hem, hem i bin raetem se, “yumi kam kolosap finis long taem we ol samting blong wol ya bambae i lus.” Naoia i luk olsem se samfala oli stap laf long tok ya. (1 Pita 4:7; 2 Pita 3:​3, 4) I gud yumi lukluk moa long namba tu leta blong Pita mo traem faenemaot olsem wanem leta ya i mekem ol brata oli stanap strong long bilif. Long faswan stadi ya, bambae yumi lukluk long 2 Pita japta 1.

Stampa Tingting Blong Japta 1

5. ?Olsem wanem Pita i mekem tingting blong ol man we oli ridim leta blong hem, i rere blong bambae hem i tokbaot ol problem?

⁵ Pita i no stat wantaem nomo blong tokbaot ol bigfala problem. Be, sloslou hem i lidim tingting blong ol man we oli ridim leta ya i go long ol problem ya, taem hem i pulum olgeta blong gat tangkyu from ol samting we oli bin kasem taem oli kam Kristin. Hem i mekem olgeta oli tingtingbak long ol nambawan promes blong God, mo hem i soemaot olsem wanem we oli save trastem fulwan olgeta profet tok blong Baebol. Blong mekem olsem, hem i tokbaot wan vison we hem i bin luk bodi blong Jisas i jenis i kam narafala. Hemia i soemaot taem ya we Kraes bambae i rul wetem bigfala paoa long Kingdom blong hem.​—Matyu 17:​1-8; 2 Pita 1:​3, 4, 11, 16-​21.

6, 7. (a) ?Fastok long leta blong Pita, i tijim yumi long wanem samting? (b) Sipos yumi givim advaes, ?samtaem i save givhan long narafala sipos yumi talemaot wanem long saed blong yumi wan?

⁶ ?Yumi save lanem wanem from fastok ya blong Pita? Taem yumi givim advaes long wan narafala, ?yu ting se bambae hem i rere moa blong lesin long yumi sipos fastaem, yumi tokbaot nambawan hop blong Kingdom we i sas tumas long yumi mo long hem tu? Mo, ?olsem wanem sipos yumi tokbaot samting we yumi bin fesem long laef blong yumi wan? I sua se, afta we Jisas i ded, Pita i talemaot long plante man se hem i bin luk wan vison blong Kraes we i sidaon long jea blong King wetem bigfala paoa.​—Matyu 17:9.

⁷ Mo tu, rimemba se, taem Pita i raetem namba tu leta blong hem, ating Gospel blong Matyu mo leta blong aposol Pol we i go long ol man Galesia, oli goraon finis long plante man. Taswe, ating ol man long taem blong Pita oli savegud long olgeta slak fasin blong hem, mo long strong bilif we hem i stap soemaot tu. (Matyu 16:21-​23; Galesia 2:​11-​14) Be, samting ya i no mekem we hem i fraet blong toktok. Maet samting ya i mekem se moa man oli lesin long leta blong hem, from we oli luksave se oli gat sam slak fasin tu. Taswe, taem yumi halpem olgeta we oli gat problem, maet i save givhan moa sipos yumi talemaot klia long olgeta se yumi stap mekem mastik tu.​—Rom 3:​23; Galesia 6:1.

Wan Halo We i Leftemap Tingting

8. ?Ating Pita i yusum tok ya “bilif” blong minim wanem?

⁸ Naoia, tingbaot fasin blong Pita blong talem halo. Hem i stat wantaem nomo blong tokbaot bilif. Hem i kolem ol man we oli ridim leta blong hem se, “yufala we yumi gat sem fasin blong bilif ya we i gud tumas.” (2 Pita 1:1) Long ples ya, i luk olsem se tok ya “bilif ya” i minim “strongfala save we i pulum man blong bilif,” hemia olgeta Kristin bilif no tijing, we samtaem Baebol i kolem olgeta se “trutok.” (Galesia 5:7; 2 Pita 2:2; 2 Jon 1) Plante taem, tok ya “bilif” i minim trutok, i bitim we hem i minim fasin blong trastem no putum tingting i stap strong long wan man no wan samting.​—Ol Wok 6:7; 2 Korin 13:5; Galesia 6:​10; Efesas 4:5; Jud 3.

9. ?From wanem fasin blong Pita blong talem halo i mas mekem ol man blong narafala nesen oli haremgud?

⁹ Ating ol tok we Pita i yusum blong talem halo, oli mekem ol man we oli no man Jyu oli haremgud moa i bitim ol narafala we oli ridim leta blong hem. Ol man Jyu oli neva joen wetem ol man blong narafala nesen, oli no laekem olgeta nating. Mo fasin ya blong no laekem ol man blong narafala nesen, i stap yet long tingting blong ol man Jyu afta we oli kam Kristin tu. (Luk 10:29-​37; Jon 4:9; Ol Wok 10:28) Nating se i olsem, Pita, we i bon olsem wan man Jyu mo we i wan aposol blong Jisas Kraes, i talem long ol man we oli ridim leta blong hem​—ol man Jyu mo ol man blong ol narafala nesen​—se oli gat sem bilif olsem hem mo oli kasem semfala blesing ya wetem hem.

10. ?Yumi save lanem wanem from fastok blong Pita blong talem halo?

¹⁰ Tingbaot gudfala lesen we fastok blong Pita i save tijim yumi long hem, tede. God i no stap mekem i moagud long sam man i bitim ol narafala. Hem i no stap laekem moa ol man blong wan kala, no wan kantri, i bitim ol narafala. (Ol Wok 10:34, 35; 11:​1, 17; 15:​3-9) Jisas hem wan i bin tijim se olgeta Kristin oli olsem ol brata nomo, mo yumi no mas tingting se yumi hae moa long narawan. Mo tu, fastok blong Pita blong talem halo, i soemaot klia se yumi rili olsem wan famle nomo long ful wol, we yumi gat “sem fasin blong bilif” we Pita mo ol narafala aposol oli gat.​—Matyu 23:8; 1 Pita 5:9.

Save Mo Olgeta Promes Blong God

11. Afta we Pita i talem halo, ?wanem sam impoten samting we hem i mekem i klia?

¹¹ Afta long fastok ya blong talem halo, Pita i raetem se: “Hemia prea blong mi, we oltaem God bambae i stap givhan moa long yufala long gladhat blong hem, mo i stap putum pis i kam moa long yufala.” ?Olsem wanem gladhat mo pis i save kam moa long yumi? Pita i ansa se: ‘From we yufala i kasem stret save long saed blong God mo Jisas, Masta blong yumi.’ Biaen, hem i se: “Long paoa blong God, hem i givim olgeta samting long yumi we yumi mas gat blong mekem ol fasin we hem i wantem.” Be ?olsem wanem yumi save kasem ol impoten samting ya? ‘Hemia i kamtru long yumi from we yumi gat stret save long saed blong man ya we i singaot yumi blong yumi joen long haenem mo stret laef blong hem.’ Taswe, tu taem, Pita i soemaot klia se i impoten tumas blong gat stret save long saed blong God mo Pikinini blong hem.​—2 Pita 1:​2, 3; Jon 17:3.

12. (a) ?From wanem Pita i soemaot se i impoten tumas blong kasem stret save? (b) Blong kasem ol promes blong God, ?yumi mas mekem wanem fastaem?

¹² Ol “gyaman profet” we Pita i givim woning long saed blong olgeta long japta 2, oli yusum “ol gyaman toktok” blong trikim ol Kristin. Long rod ya, oli traem pulum ol Kristin ya blong folem bakegen ol nogud fasin long saed blong seks we oli bin lego. Ol man we fastaem God i sevem olgeta tru long ‘stret save long saed blong Masta mo Sevya Jisas Kraes,’ be biaen oli foldaon long ol trik olsem, bambae oli kasem bigfala trabol. (2 Pita 2:​1-3, 20) I klia se, Pita i wantem tokbaot problem ya biaen, taswe hem i soemaot long stat blong leta blong hem se i nidim stret save blong stap klin long fes blong God. Pita i talem se God “i givim ol bigbigfala promes long yumi, we yumi luk oli gud tumas. Nao taem [yumi] kasem ol promes ya, . . . [yumi] save kam blong joen long laef blong God.” Be, blong kasem ol promes ya, we Pita i talem se oli wan impoten haf blong bilif blong yumi, fastaem yumi mas “ronwe long fasin ya we i stap long wol, we i stap spolem ol man from we oli wantem tumas ol samting nogud.”​—2 Pita 1:4.

13. ?Ol Kristin we tabu speret i makemaot olgeta mo ol “narafala sipsip,” oli gat strong tingting blong holemtaet wanem?

¹³ ?Wanem tingting blong yu long saed blong ol promes blong God? ?Tingting blong yu i sem mak long ol tabu Kristin we oli stap yet long wol? Long 1991, Frederick Franz, we hem i presiden blong ‘Watch Tower Bible and Tract Society’ long taem ya, mo we i bin mekem wok blong fultaem paenia blong bitim 75 yia, i talemaot filing blong olgeta we oli gat hop blong go rul wetem Kraes, i se: “Mifala i stanap strong kam kasem naoia, mo bambae mifala i gohed blong stanap strong gogo kasem taem we God bambae i mekem olgeta ‘bigbigfala promes blong hem we oli gud tumas,’ oli kamtru.” Brata Franz i trastem fulwan, promes blong God blong mekem samfala oli laef bakegen long heven, mo hem i holemtaet bilif gogo kasem ded blong hem taem hem i gat 99 yia. (1 Korin 15:42-​44; Filipae 3:​13, 14; 2 Timote 2:​10-​12) Long sem fasin, plante milyan man oli stap holemtaet bilif, mo oli stap putum tingting blong olgeta i strong long promes blong God long saed blong wan paradaes long wol, we ol man long hem bambae oli glad mo oli save gat laef we i no save finis. ?Yu yu wan long olgeta ya?​—Luk 23:43; 2 Pita 3:​13; Revelesen 21:​3, 4.

Soem Tangkyu From Ol Promes Blong God

14. ?From wanem Pita i talem se faswan fasin we yumi mas ademap long bilif hemia stret fasin?

¹⁴ ?Yumi gat tangkyu long God from ol promes we hem i mekem? Sipos yes, ale, Pita i eksplenem se, yumi mas soemaot samting ya. “Nao, from samting ya” (from we God i givim ol promes ya long yumi we oli gud tumas) yumi mas traehad bigwan long wok blong God. I no naf jes blong talem se yumi bilif no yumi save ol trutok blong Baebol nomo. !No gat! Ating long taem blong Pita, samfala man insaed long kongregesenb oli toktok plante long saed blong bilif, be oli joen long sam rabis fasin long saed blong seks tu. Oli nidim blong mekem stret fasin, taswe Pita i talem se: “Yufala i gat fasin blong bilif, ale yufala i mas joenem long stret fasin.”​—2 Pita 1:5; Jemes 2:​14-​17.

15. (a) ?From wanem save i nekiswan samting, afta long stret fasin, we yumi mas ademap long bilif? (b) ?Wanem sam narafala fasin we bambae oli givhan long yumi blong holemtaet bilif?

¹⁵ Afta we Pita i tokbaot stret fasin, hem i gohed blong tokbaot sikis narafala fasin we yumi mas joenem, no ademap, long bilif blong yumi. Yumi nidim olgeta evriwan ya sipos yumi wantem “stanap strong long bilif.” (1 Korin 16:13) Ol man blong apostasic long taem bifo, oli stap ‘tanem mining blong ol tok blong Baebol’ mo karem ol ‘gyaman tijing’ oli kam insaed long kongregesen. From samting ya, nekiswan samting we Pita i talem se i impoten, hemia save. Hem i se: “Yufala i gat stret fasin, ale yufala i mas joenem long save.” Nao hem i gohed se: “Yufala i gat save, ale yufala i mas joenem long fasin blong bos long tingting. Ale yufala i mas joenem fasin blong stanap strong longtaem long fasin blong bos long tingting. Ale yufala i mas joenem fasin fasgud long God long fasin blong stanap strong longtaem. Ale yufala i mas joenem fasin blong laekem tumas ol brata blong yufala long fasin fasgud long God. Yufala i gat fasin blong laekem tumas ol brata blong yufala, ale yufala i mas joenem long fasin blong laekem tumas ol man.”​—2 Pita 1:​5-7, NW; 2:​12, 13; 3:​16.

16. ?Wanem bambae i hapen sipos yumi ademap olgeta fasin ya we Pita i tokbaot oli go long bilif blong yumi, mo wanem bambae i hapen sipos yumi no mekem olsem?

¹⁶ ?Wanem bambae i hapen sipos yumi ademap ol seven samting ya oli go long bilif blong yumi? Pita i ansa se: “Sipos yufala i gat ol fasin ya oli strong long laef blong yufala, be bambae yufala i no save stap nating. Bambae yufala i save karem frut long laef blong yufala, from we yufala i gat stret save long saed blong Jisas Kraes, Masta blong yumi.” (2 Pita 1:​8, NW) Nao Pita i tokbaot man we i defren olgeta, i se: “Be man we i no gat ol fasin ya long laef blong hem, i olsem we ae blong hem i nogud, hem i no save luk longwe nating. Hem i foget finis we God i wasemaot ol sin we hem i mekem fastaem.” (2 Pita 1:9) Makem se Pita i jenisim fasin blong hem blong toktok. Hem i no moa yusum ol tok olsem “yufala,” mo “yumi,” be hem i yusum “man,” “hem,” mo “blong hem,” long vas ya. Sore tumas we samfala oli blaen long saed blong speret, oli fogetem plante samting mo oli mekem doti fasin. Nating se i olsem, Pita i tok long kaengud fasin. Ol wanwan man we oli ridim tok blong hem, oli no save tingting se hem i stap tok nogud long saed blong olgeta.​—2 Pita 2:2.

Mekem Ol Brata Oli Strong

17. ?Ating wanem samting nao i pusum Pita blong askem olgeta wetem kaen fasin blong mekem “ol samting ya”?

¹⁷ Ating Pita i luksave se i isi moa long olgeta we oli jes kam Kristin i no longtaem blong bilivim ol gyaman tok. Taswe, hem i leftemap tingting blong olgeta wetem kaen fasin, i se: “Ol brata mo sista. God i jusumaot yufala, mo i singaot yufala blong yufala i man blong hem. From ol samting ya, yufala i mas traehad moa blong mekem tufala samting ya i karem frut long laef blong yufala. Sipos yufala i mekem olsem, bambae yufala i no save foldaon samtaem.” (2 Pita 1:​10; 2:​18) Ol tabu Kristin we oli ademap olgeta seven samting ya i go long bilif blong olgeta, bambae oli kasem wan nambawan praes, olsem Pita i talem: ‘Bambae God i givim raet long yufala blong yufala i go insaed long kingdom ya we bambae i no save lus samtaem, we Jisas Kraes, Masta mo Sevya blong yumi, hem i king long hem.’ (2 Pita 1:​11) Ol “narafala sipsip” bambae oli kasem praes blong laef blong olwe long wol ya, aninit long rul blong Kingdom blong God.​—Jon 10:​16, NW; Matyu 25:33, 34.

18. ?From wanem Pita i rere blong “talemaot ol tok ya oltaem” long ol brata blong hem?

¹⁸ Pita i rili wantem se ol brata blong hem oli kasem wan nambawan praes olsem. Hem i raetem se: “Tru, yufala i save finis ol samting ya, mo yufala i stap stanap strong long ol trutok we yufala i kasem finis. Be nating. Oltaem mi mi mas stap talemgud ol trutok ya bakegen long yufala.” (2 Pita 1:​12) Pita i yusum Grik tok ya ste·riʹzo, we long ples ya oli tanem i kam “stap stanap strong.” Long advaes we Jisas i bin givim fastaem long Pita se, “Mekem tingting blong ol brata blong yu oli strong moa,” oli tanem tok ya i kam “strong moa.” (Luk 22:32) From we Pita i yusum semfala Grik tok ya long leta blong hem, maet samting ya i soem se hem i stap tingbaot strongfala advaes ya we Masta i bin givim long hem. Nao Pita i talem se: “Laef blong mi long wol ya, i olsem we mi stap long wan haos tapolen nomo. Mo mi savegud se bambae i no longtaem, mi ded, olsem we mi aot long haos tapolen ya blong mi . . . Oraet, be tingting blong mi i klia. Taem mi stap long haos tapolen ya blong mi yet, wok blong mi i blong talemaot ol tok ya oltaem, blong wekemap yufala.”​—2 Pita 1:​13, 14.

19. ?Yumi nidim wanem samting tede blong halpem yumi?

¹⁹ Nating se Pita i talem long kaengud fasin se ol man we oli ridim leta blong hem oli stap “stanap strong long ol trutok,” hem i luksave se bilif blong olgeta i save foldaon sipos oli kasem traem. (1 Timote 1:​19) Hem i save se i no longtaem bambae hem i ded. Taswe, blong mekem ol brata blong hem oli strong, hem i tokbaot sam samting we oli save tingbaot bakegen long fyuja, blong stap strong long saed blong speret. (2 Pita 1:​15; 3:​12, 13) Long sem fasin, tede yumi nidim we narafala i talem tok bakegen mo bakegen long yumi, blong yumi save stanap strong oltaem long bilif. Nomata se yumi hu mo hamas yia yumi bin stap long trutok, yumi no mas lego fasin blong ridim Baebol evri dei, stadi wanwan, mo kam long ol miting blong kongregesen. Samfala oli faenem eskyus blong no kam long ol miting. Maet oli talem se oli taed tumas, no oli les from we ol miting oli talem sem samting bakegen oltaem, no ol brata oli no givim ol tok long fasin we i pulum intres blong olgeta. Be, Pita i savegud olsem wanem bilif blong yumi wanwan i save lus kwiktaem nomo sipos yumi trastem yumi tumas.​—Mak 14:66-​72; 1 Korin 10:12; Hibrus 10:25.

Strong Faondesen Blong Bilif Blong Yumi

20, 21. ?Olsem wanem vison blong Jisas we bodi blong hem i jenis i kam narafala, i mekem bilif blong Pita mo ol man we oli ridim leta blong hem, mo yumi tede tu, i kam strong moa?

²⁰ ?Olsem wanem? ?Bilif blong yumi i stanap long sam kastom store nomo we man i mekemap mo eksplenem long fasin we i waesgud blong pulum tingting blong yumi? Pita i talemaot klia se: ‘Taem mifala i talemaot long yufala se Jisas Kraes Masta blong yumi i gat paoa, mo bambae hem i kambak bakegen, be mifala i no kasem ol samting ya long ol storeyan olbaot, no gat. Mifala tri, long ae blong mitrifala, mifala i luk laet ya we i saenaot long Kraes, we i saen we i saen.’ Long wan taem we Pita, Jemes, mo Jon oli stap wetem Jisas, oli luk wan vison we i soem Jisas taem hem i kasem bigfala paoa finis long Kingdom blong hem. Pita i eksplenem se: “Taem God Papa blong yumi i leftemap nem blong hem, nao i mekem laet ya i saenaot long hem, . . . mitrifala i harem tok i kamaot long bigfala laet blong heven, i talem se ‘Hemia Pikinini blong mi ya, we mi mi laekem hem tumas. Tingting blong mi i glad tumas long hem.’ Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam.”​—2 Pita 1:​16-​18.

²¹ !Taem Pita, Jemes, mo Jon oli luk vison ya, oli luksave se Kingdom i rili wan trufala samting! Pita i talem se: “Ol samting ya oli mekem mifala i save moa we tok blong ol profet i tru. I gud yufala i lesingud long hem.” Yes, ol man long taem bifo we oli bin ridim leta ya blong Pita, wetem yumi tede tu, oli gat strongfala risen blong lesingud long ol profet tok long saed blong Kingdom blong God. ?Fasin blong yumi blong lesingud i mas sem mak long wanem samting? Pita i ansa se: ‘Olsem wan laet we i stap saen long ples we i tudak . . . gogo i brok delaet, nao [dei] i kamtru, mo laet blong moningsta i kasem hat blong yufala.’​—2 Pita 1:​19; Daniel 7:​13, 14; Aesea 9:​6, 7.

22. (a) ?Hat blong yumi i nidim blong stap wekapgud long saed blong wanem? (b) ?Long wanem rod yumi save lesingud long ol profet tok?

²² Hat blong yumi bambae i tudak nomo sipos ol profet tok oli no saenaot olsem wan laet long hem. Be from we ol Kristin oli lesingud long ol profet tok ya, oli wekapgud long hat blong olgeta. I olsem we oli luk delaet blong wan nyufala dei, hemia taem ya we “moningsta,” Jisas Kraes, i tekem paoa blong hem long Kingdom. (Revelesen 22:16) ?Long wanem rod yumi save lesingud long ol profet tok tede? Yumi mekem olsem, taem yumi stadi Baebol, rerem ol miting mo joen long olgeta, mo ‘putum tingting blong yumi i stap strong blong mekem olgeta samting ya.’ (1 Timote 4:​15) Sipos ol profet tok oli olsem wan laet we i saen long “ples we i tudak” (long hat blong yumi), oli mas gat bigfala paoa long yumi​—long ol samting we yumi wantem, ol filing blong yumi, ol tingting we oli pusum yumi blong wok, mo ol mak we yumi traehad blong kasem long laef blong yumi. Yumi mas ol gudfala studen blong Baebol, from we long lastok blong Pita long japta 1, hem i se: “Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan. . . . I no gat tok blong profet we i kamaot from we man nomo i wantem olsem. Taem tok blong profet i kamaot, ol profet oli talem, be [tabu speret] i stap givim tok long olgeta, nao oli talemaot tok we i kamaot long God.”​—2 Pita 1:​20, 21.

23. ?Faswan japta blong 2 Pita i rerem tingting blong ol man we oli ridim hem from wanem samting?

²³ Long faswan japta blong namba tu leta blong Pita, hem i givim sam strongfala tok we oli pusum yumi blong holemstrong bilif blong yumi we i sas tumas. Naoia, yumi rere blong luklukgud long ol impoten poen we oli kam biaen. Nekis stadi bambae i tokbaot japta 2 blong 2 Pita, we aposol Pita i tokbaot samfala long kongregesen we oli stap mekem rabis fasin long saed blong seks, mo oli stap pulum sam narafala long rod ya tu.

[Ol futnot]

?Yu Yu Rimemba?

◻ ?From wanem Pita i makemgud se i impoten blong kasem stret save?

◻ ?Maet from wanem risen nao hem i raetem stret fasin olsem faswan samting we yumi mas ademap long bilif blong yumi?

◻ ?From wanem Pita i rere oltaem blong talem sem tok bakegen mo bakegen long ol brata blong hem?

◻ ?Pita i tokbaot wanem strong faondesen blong bilif blong yumi?

[Tok blong pija long pej 9]

Ol mastik blong Pita oli no mekem hem i lego bilif blong hem