!Holem Dei Blong Jeova i Stap Oltaem Long Tingting Blong Yu!
‘Long taem blong ol las dei, bambae sam man oli save kamtru, we . . . oli laf long yufala.’—2 PITA 3:3.
1. ?Wan Kristin long taem blong yumi, i gat wanem tingting long saed blong fasin blong hareap blong wok?
WAN brata we i mekem wok blong fultaem paenia bitim 66 yia finis, i raetem se: “Long ful laef blong mi, oltaem mi gat filing se yumi mas hareap blong wok. Oltaem mi tingbaot Amageden olsem se bambae i kam afta tumora nomo. (Revelesen 16:14, 16) Olsem papa blong mi, mo papa blong hem we i stap fastaem long hem, mi tu, long ful laef blong mi, mi bin folem advaes blong aposol [Pita], hemia blong ‘holem dei blong Jeova i stap oltaem long tingting blong mi.’ Oltaem mi tingbaot nyufala wol we Baebol i promes long hem olsem wan ‘samting we mi no save luk, be hem i stap.’”—2 Pita 3:11, 12; Hibrus 11:1; Aesea 11:6-9; Revelesen 21:3, 4.
2. ?I minim wanem se yumi holem dei blong Jeova i stap oltaem long tingting blong yumi?
2 Tok ya blong Pita se yumi ‘mas holem dei blong Jeova i stap oltaem long tingting blong yumi,’ i minim se yumi no stap seftem dei ya i go longwe tumas long tingting blong yumi. Yumi no mas fogetem se dei ya we bambae Jeova i spolem wol ya, i kolosap tumas. Yes, hemia faswan samting we bambae hem i mekem bifo we hem i putumap nyufala wol we hem i promes long hem. Dei ya i mas stap olsem wan trufala samting we i klia nomo long tingting blong yumi, olsem se hem i stap stret long fored blong yumi nomo. Ol profet blong God bifo, oli tingbaot dei ya olsem wan trufala samting, mo plante taem oli tokbaot dei ya se hem i kolosap tumas.—Aesea 13:6; Joel 1:15; 2:1; Obadaea 15; Sefanaea 1:7, 14.
3. ?Wanem i pulum Pita blong givim advaes long saed blong dei blong Jeova?
3 ?From wanem Pita i talem long yumi blong tingbaot dei blong Jeova olsem se bambae hem i kam “afta tumora nomo”? From we i gat samfala long taem bifo, we oli stat laf long promes blong Kraes se bambae hem i kambak mo i stap, mo bambae hem i panisim ol man we oli mekem i nogud. (2 Pita 3:3, 4) Taswe, long japta 3 blong namba tu leta blong Pita, we naoia bambae yumi lukluk long hem, Pita i givim ansa long ol man ya we oli jikim dei ya.
Toktok We i Kaengud Blong Singaot Yumi Blong Rimemba
4. ?Pita i wantem se yumi no fogetem wanem?
4 Yumi luksave se Pita i laekem tumas ol brata blong hem, from we plante taem long japta ya hem i singaot olgeta se “ol fren.” Blong statem tok blong hem, Pita i talem long olgeta long kaengud fasin se oli no mas fogetem tijing we oli bin kasem. Hem i se: “Ol fren. . . . Mi stap tok blong wekemap yufala, blong mekem tingting blong yufala i stret. Mi stap mekem yufala i tingbaot bakegen ol tok we ol tabu profet oli talem bifo, mo loa blong Masta mo Sevya blong yumi, we mifala aposol, mifala i bin talemaot long yufala.”—2 Pita 3:1, 2, 8, 14, 17; Jud 17.
5. ?Samfala profet oli talem wanem long saed blong dei blong Jeova?
5 ?Wanem kaen “tok we ol tabu profet oli talem bifo,” we Pita i askem ol man we oli ridim leta blong hem blong rimemba? Hemia ol tok long saed blong taem ya we bambae Kraes i kamtru mo i stap olsem King. Mo tu, hemia ol tok long saed blong jajmen blong ol man we oli no obei long God. Pita i tokbaot ol samting ya bifo finis. (2 Pita 1:16-19; 2:3-10) Jud i tokbaot Inok, we i faswan profet long Baebol blong givim woning long saed blong strongfala jajmen blong God agensem ol rabis man. (Jud 14, 15) Sam narafala profet oli kam biaen long Inok, mo Pita i no wantem se yumi fogetem ol tok we oli bin raetem.—Aesea 66:15, 16; Sefanaea 1:15-18; Sekaraea 14:6-9.
6. ?Wanem tok blong Kraes mo ol aposol blong hem, we i givim moa save long yumi long saed blong dei blong Jeova?
6 Mo tu, Pita i talem long ol man we oli ridim leta blong hem, se oli mas rimemba “loa blong Masta mo Sevya blong yumi.” Long loa blong Jisas, i gat advaes we i singaot yumi se: “Yufala i mas lukaot gud. Sipos yufala i letem tingting blong yufala i kam slak . . . bambae dei ya blong mi i kam kasem yufala wantaem, olsem we trap i sat.” “Yufala i mas lukaot gud, oltaem yufala i mas rere, from we yufala i no save taem ya we olgeta samting ya bambae oli kam.” (Luk 21:34-36; Mak 13:33) Pita i talem long yumi blong lesingud long ol tok blong ol aposol tu. Eksampel, aposol Pol i raetem se: “Dei ya blong Masta blong yumi bambae i mekem ol man oli sek, olsem wan man blong stil, we i kamtru long naet. I no stret blong yumi stap slip olsem ol narafala man. I stret blong yumi wekap, we hed blong yumi i klia gud.”—1 Tesalonaeka 5:2, 6.
Samting We Ol Man Blong Jikim Ol Woning Ya Oli Wantem
7, 8. (a) ?Ol man we oli laf long ol mesej we God i givim olsem woning, oli wanem kaen man? (b) ?Ol man ya blong laf oli stap talem wanem?
7 Olsem yumi talem finis, risen from wanem Pita i givim advaes ya hemia from we samfala oli stat blong laf long ol woning ya, olsem ol man Isrel bifo oli bin jikim ol profet blong Jeova. (2 Kronikel 36:16) Pita i eksplenem se: ‘Hemia wan samting we yufala i mas save, se long taem blong ol las dei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala.’ (2 Pita 3:3) Jud i talem se, samting we ol man ya blong jikim olgeta oli wantem tumas hemia “ol fasin we olgeta nomo oli wantem, we bambae oli no obei long God nating.” Hem i singaot olgeta se “ol man we oli folem fasin blong anamol nomo, we oli no laekem ol samting long saed blong speret.”—Jud 17-19, NW.
8 Ol gyaman tija we Pita i talem se ‘oli ronem ol samting blong bodi blong olgeta we i wantem tumas ol samting nogud,’ ating oli sam blong olgeta man ya blong jikim ol promes blong God we oli no laekem ol samting long saed blong speret. (2 Pita 2:1, 10, 14) Oli laf blong jikim ol Kristin we oli stap stanap strong, se: “?Olsem wanem nao? ?Hem i promes finis blong kam, be hem i stap wea? Ol olfala blong yumi, ol man oli berem olgeta finis, be i no gat wan samting i jenis, i stat bifo olgeta, taem we God i mekem wol ya fastaem, i kam kasem tede. Evri samting oli stap olsem nomo.”—2 Pita 3:4.
9. (a) ?From wanem ol man blong jikim ol promes blong God oli traem spolem tingting ya blong hareap blong wok, we i stap oltaem long Tok blong God? (b) ?Olsem wanem fasin ya blong holem dei blong Jeova i stap oltaem long tingting blong yumi, i save givhan long yumi?
9 ?From wanem oli laf olsem? ?From wanem oli talem se neva bambae Kraes i kambak mo i stap, mo se God i neva bin kam insaed long ol bisnes blong man mo bambae hem i neva mekem olsem tu? Ol man ya blong jikim ol promes blong God we fasin blong olgeta i olsem anamol nomo, oli wantem spolem tingting ya blong hareap blong wok, we Tok blong God i putum long yumi. Oli wantem pulum yumi blong kam slak long saed blong speret, nao bambae i isi long olgeta ya blong lidim yumi blong folem ol nogud fasin we bodi nomo i wantem. !Hemia wan strongfala advaes blong yumi tede blong stap wekap oltaem long saed blong speret! !Dei blong Jeova i mas stap oltaem long tingting blong yumi mo yumi no mas fogetem se Jeova i stap lukluk yumi! Samting ya bambae i pusum yumi blong mekem wok blong Hem wetem tingting we i strong, mo blong holemtaet ol tingting mo fasin we oli tabu, oli klin.—Ol Sam 11:4; Aesea 29:15; Esikel 8:12; 12:27; Sefanaea 1:12.
Oli Wantem Nomo Blong Mekem Rong Mo Oli Nogud Olgeta
10. ?Olsem wanem Pita i pruvum se ol man blong jikim ol promes blong God oli rong?
10 I gat wan impoten samting we i hapen long ol yia we oli pas, we ol man blong jikim ol promes blong God oli no luksave. Oli no wantem save long samting ya mo oli traem pulum ol narafala tu blong fogetem. ?From wanem? Blong mekem i isi moa long olgeta blong pulum ol narafala blong folem olgeta. Pita i raetem se: “From we olgeta nomo oli wantem olsem, ale oli satem ae blong olgeta long wan samting.” ?Wanem samting ya? “Bifo longtaem, God i tok, nao skae mo graon tufala i kamaot. Hem i mekem graon ya i stanap long ol wora mo i stap long medel blong ol wora. Mo hem i yusum wora ya bakegen blong spolem wol ya we i stap bifo, taem wora i ron bigfala.” (2 Pita 3:5, 6, NW) Yes, Jeova i spolem ol rabis man long wol ya taem Bigfala Wora i ron long dei blong Noa. Jisas tu i agri se samting ya i bin hapen. (Matyu 24:37-39; Luk 17:26, 27; 2 Pita 2:5) Taswe, defren olgeta long wanem we ol man ya blong jikim ol promes blong God oli talem, olgeta samting oli no stap olsem nomo, “stat bifo olgeta, taem we God i mekem wol ya fastaem, i kam kasem tede.” No gat.
11. ?Ol faswan Kristin oli bin gat wanem tingting we i eli tumas, mekem se samfala man oli laf long olgeta?
11 Maet ol man ya oli bin laf long ol trufala Kristin from we ol samting we ol Kristin ya oli wet long hem, oli no kamtru yet. Smoltaem bifo we Jisas i ded, ol disaepol blong hem oli ‘stap tingbaot se naoia nomo, kingdom blong God bambae i kamtru.’ Biaen bakegen, afta we Jisas i laef bakegen long ded, oli askem sipos Kingdom bambae i stanap long taem ya, no nogat. Mo tu, raonabaot long ten yia bifo we Pita i raetem namba tu leta blong hem, samfala oli “hareap blong go krangke” from we oli harem tok blong wan “man we i stap prij” no blong “wan leta,” we i talem se ‘dei ya blong Jeova i kam finis. Ol man oli ting se tok no leta ya i kam long aposol Pol no long ol man we oli wok wetem hem. (Luk 19:11; 2 Tesalonaeka 2:2; Ol Wok 1:6) Yumi no save talem se ol disaepol blong Jisas oli rong blong gat tingting ya we oli wantem dei ya blong kamtru, no gat, i jes we oli eli tumas. !Dei blong Jeova bambae i kam yet!
Yumi Save Trastem Tok Blong God
12. ?Olsem wanem ol profet tok long saed blong “dei blong Jeova” oli pruvum se yumi save trastem Tok blong God?
12 Olsem yumi talem fastaem, ol profet bifo long Kristin taem, oli givim woning plante taem se dei blong Jeova blong givim panis i kolosap. Taem Jeova i mekem jajmen blong hem i kamtru blong panisim ol stronghed man blong hem long 607 B.K.T.,a faet ya i olsem wan smol “dei blong Jeova.” (Sefanaea 1:14-18) Biaen, wan smol “dei blong Jeova” i kamtru long sam narafala nesen tu, olsem Babilon mo Ijip. (Aesea 13:6-9; Jeremaea 46:1-10; Obadaea 15) I gat profet tok tu we i bin talemaot se fasin blong laef blong ol man Jyu long faswan handred yia bambae i lus. Mo samting ya i kamtru taem ol ami blong Rom oli kam spolem Judia long yia 70 K.T. (Luk 19:41-44; 1 Pita 4:7) Be Pita i stap tokbaot wan “dei blong Jeova” we i stap yet long fyuja. !Taem ya we Bigfala wora i kavremap wol bifo, i smol nating nomo sipos yumi skelem wetem dei ya blong Jeova we i bigwan mo i strong tumas!
13. ?Wanem samting we i kamaot long taem bifo i mekem yumi sua se fasin blong laef blong naoia bambae i lus?
13 Bifo we Pita i eksplenem trabol ya we bambae i kam, hem i se: “Sem tok ya.” Fastaem finis, hem i bin talem se “God i tok” bifo we Bigfala Wora i ron, nao graon i “stanap long ol wora mo i stap long medel blong ol wora.” Fasin ya we God i yusum blong wokem wol, i laenap wetem store blong Baebol. Samting ya nao i mekem se, taem God i tok no i givim oda, bigfala wora i save foldaon mo kavremap fulwol. Pita i gohed se: “Sem tok ya [blong God] i blokem heven mo wol, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei we God bambae i jajem ol man we oli no obei long hem, nao oli lus.” (2 Pita 3:5-7, NW; Jenesis 1:6-8) !Yumi save trastem tok blong Jeova long saed ya! Bambae hem i finisim “heven mo wol”—fasin blong laef blong naoia—taem kros blong hem i hot olsem faea long bigfala dei blong hem! (Sefanaea 3:8) ?Be wetaem?
Yumi Wantem Tumas Se En i Kam Kwik
14. ?From wanem yumi save sua fulwan se yumi stap long ‘ol las dei’?
14 Ol disaepol blong Jisas oli wantem save wetaem en bambae i kam, taswe oli askem long hem se: ‘?Wanem saen we bambae i soemaot we yu yu kambak bakegen, mo wol ya i finis?’ I klia se, olgeta ya oli wantem save wetaem nao, fasin blong laef blong ol man Jyu bifo bambae i finis. Be taem Jisas i givim ansa, tingting blong hem i stap long taem ya we ‘heven mo wol’ blong naoia bambae oli kasem panis blong lus. Jisas i talemaot se bambae i gat ol bigfala faet, kakae i sot, graon i seksek, sik, mo fasin blong brekem loa bambae i kam antap. (Matyu 24:3-14; Luk 21:5-36) Stat long yia 1914, yumi luk se saen ya we Jisas i talem long saed blong ‘en blong wol ya’ i stap kamtru wetem olgeta samting we aposol Pol tu i bin talemaot se bambae oli makemaot ol ‘las dei.’ (2 Timote 3:1-5) !Yes, ol pruf oli klia tumas se yumi stap long taem ya we wol ya bambae i lus!
15. ?Ol Kristin oli bin mekem wanem mastik nating se Jisas i givim klia woning?
15 Ol Wetnes blong Jeova oli wantem tumas blong save wetaem dei blong Jeova bambae i kamtru. From samting ya, sam samtaem oli bin traem blong luksave stret taem we bambae dei ya i kamtru. Be, taem oli mekem olsemia, oli mekem mastik, long sem fasin we ol faswan disaepol blong Jisas oli bin mekem mastik. Oli no bin lesingud long woning blong Masta blong yumi se ‘yumi no save dei mo taem we samting ya bambae i kamtru.’ (Mak 13:32, 33) Ol man blong jikim ol promes blong God oli bin laf long ol trufala Kristin ya from we oli bin ting se dei ya i mas kamtru bifo finis. (2 Pita 3:3, 4) Nating se i olsem, Pita i talem klia se dei blong Jeova i sua blong kam, long stret taem we Hem i makem.
Yumi Nidim Blong Gat Sem Tingting Olsem Jeova
16. ?Wanem advaes we i waes blong folem?
16 Yumi mas gat semfala tingting olsem Jeova long saed blong ol taem. Pita i talem samting ya i se: ‘Ol fren. I gat wan poen we yufala i mas tingbaot. Long fes blong Jeova, wan taosen yia mo wan dei nomo, be hem i no luk se wan i narafala, wan i narafala, tufala i sem mak nomo.’ !Taem yumi tingting dip long tok ya, yumi luksave se laef blong yumi we i go kasem 70 no 80 yia, i sot nomo! (2 Pita 3:8; Ol Sam 90:4, 10) Taswe, sipos i luk olsem se ol promes blong God oli tektaem tumas, yumi mas tingbaot advaes blong profet blong God, se: “Nating sipos [taem ya we God i makem] i tektaem, be yu mas rere. From we bambae hem i kamtru. Hem i no save let.”—Habakuk 2:3.
17. Nating se ol las dei oli gohed longtaem moa i bitim tingting we plante man oli gat fastaem, ?yumi save sua long wanem samting?
17 ?From wanem ol las dei blong wol ya oli gohed longtaem moa i bitim tingting we yumi gat fastaem? From wan gudfala risen, olsem Pita i gohed blong eksplenem: ‘Sam man oli ting se Jeova i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem we wan man i lus. Hem i wantem we olgeta man bambae oli tanem tingting blong olgeta from ol sin blong olgeta.’ (2 Pita 3:9) Jeova i tingbaot wanem nao i beswan rod blong mekem i gud long olgeta man evriwan. Hem i wari long laef blong olgeta man, olsem hem i talem se: “Mi no haremgud taem wan nogud man i ded. No gat. Mi mi haremgud taem wan man nogud i tanem baksaed long rabis rod blong hem mo i kambak, blong hem i save stap laef.” (Esikel 33:11) !Taswe, yumi save sua se bambae en i kam long stretfala taem blong mekem stampa tingting blong God ya blong yumi we i Wokem Olgeta Samting mo we i gat lav mo waes, i kamtru!
?Wanem Samting We Bambae i Lus?
18, 19. (a) ?From wanem tingting blong Jeova i strong blong spolem fasin blong laef blong naoia? (b) ?Olsem wanem Pita i tokbaot en blong wol ya, mo wanem ol samting we bambae oli lus?
18 From we Jeova i rili laekem olgeta we oli mekem wok blong hem, bambae hem i ravemaot ol man we oli stap mekem trabol long olgeta. (Ol Sam 37:9-11, 29) Pita i talem se en blong olgeta ya bambae i kam long wan taem we yumi no save, olsem Pol i bin talem bifo finis. Pita i raetem se: “Dei blong Jeova bambae i kam olsem wan man blong stil. Long dei ya, heven bambae i lus wetem noes we i olsem wisel. Mo ol samting we oli hot we i hot tumas, bambae oli ronaot olsem wora. Nao bambae hem i faenemaot wol ya tu wetem olgeta wok we oli stap gohed long hem.” (2 Pita 3:10, NW; 1 Tesalonaeka 5:2) Prapa skae mo graon i no lus taem Bigfala Wora i ron, mo bambae oli no lus long dei blong Jeova. Ale, ?wanem bambae i “lus,” no i finis?
19 Ol gavman blong man we oli rul antap long ol man olsem “heven,” bambae oli lus. “Graon” ya, we i minim ol man we oli no wantem obei long God, bambae i lus tu. “Noes we i olsem wisel,” maet i minim se jenis we bambae i kamaot long saed blong heven, i hapen kwiktaem. “Ol samting” we oli joen wetem fasin blong laef blong ol rabis man tede, bambae oli “lus.” Mo “wol” ya wetem “olgeta wok we oli stap gohed long hem,” bambae God i “faenemaot” olgeta. I minim se bambae Jeova i soemaot long klia ples olgeta rabis wok blong ol man, taem hem i mekem fulwan fasin blong laef blong ol man ya i kasem en blong hem, rod ya we i stret nomo long olgeta.
Tingting Oltaem Long Hop Blong Yu
20. ?Save we yumi gat long ol samting we bambae oli kamaot yet, i mas gat paoa long laef blong yumi olsem wanem?
20 From we olgeta bigfala jenis ya bambae oli kamtru i no longtaem nating, Pita i talem se yumi mas stap mekem ‘ol fasin we oli tabu mo ol wok blong soem fasin fasgud long God, mo holem dei ya blong Jeova i stap oltaem long tingting blong yumi.’ !Yumi save sua fulwan se en ya bambae i kamtru! “Long dei ya, bambae heven i bon long faea mo i lus, mo ol samting we oli hot we i hot tumas, bambae oli ronaot olsem wora nomo.” (2 Pita 3:11, 12, NW) Long olgeta wok blong yumi mo olgeta plan we yumi mekem, yumi neva mas fogetem se ol bigfala samting ya oli save stat tumora.
21. ?Wanem bambae i tekem ples blong heven mo wol blong naoia?
21 Nao Pita i talem long yumi wanem samting we bambae i tekem ples blong olfala heven mo wol ya, i se: “Stret long promes we God i mekem finis, yumi stap wet long nyufala heven mo nyufala wol, we stret fasin nomo bambae i stap long hem.” (2 Pita 3:13, NW; Aesea 65:17) !Tru ya, bambae tingting blong yumi i save spelgud long taem ya! Kraes mo ol 144,000 man we oli rul wetem hem, bambae oli mekemap wan “nyufala” gavman no “heven,” mo olgeta man we oli laef tru long en blong wol ya bambae oli olsem “nyufala wol” ya.—1 Jon 2:17; Revelesen 5:9, 10; 14:1, 3.
Holem Tingting Blong Hareap Blong Wok Mo Mekem Ol Klin Fasin
22. (a) ?Wanem samting bambae i halpem yumi blong stap klingud long saed blong speret we i no gat poen long yumi? (b) ?Pita i givim woning long saed blong wanem denja?
22 Pita i gohed se: “Ol fren. From ol samting ya, taem yufala i stap wet blong lukluk Dei ya, yufala i mas traehad blong mekem we long fes blong God, laef blong yufala i klin gud, i no gat poen i stap long yufala. Nao long fasin ya, yufala i gat pis wetem God. Masta blong yumi i gat longfala tingting blong wet long yufala. Nao yufala i mas luk fasin ya blong hem olsem jans blong yufala blong kasem sef ples.” Yumi mas wet wetem wan tingting we yumi wantem tumas blong luk dei blong Jeova. Mo yumi mas tingbaot se, sipos i luk olsem se dei ya i tektaem tumas, hemia from we God i stap soemaot longfala tingting long yumi. Samting ya bambae i halpem yumi blong stap klin long saed blong speret, we i no gat poen long yumi. !Be, nating se i olsem, denja i stap yet! Pita i givim woning se, long hanraet blong “gudfala brata ya blong yumi Pol . . . sam tok blong hem i strong blong save. Mo sam man we oli no gat hed, we tingting blong olgeta i no stret, oli tanem mining blong ol tok ya i kam narafala, olsem we oli stap mekem long ol narafala tok we i stap long Baebol. Long fasin ya olgeta oli stap spolem olgeta, mo bambae oli lus.”—2 Pita 3:14-16.
23. ?Wanem laswan advaes we Pita i givim?
23 I klia se, ol gyaman tija oli bin tanem ol tok blong Pol long saed blong gladhat blong God, mo yusum ol tok ya olsem wan eskyus blong mekem ol fasin we oli nogud. Ating Pita i stap tingbaot samting ya taem hem i raetem advaes ya long lastok blong hem, se: “Ol fren. Yufala i kasem tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.” Nao hem i finisim leta blong hem wetem ol tok ya we i pusum olgeta, i se: “Oltaem yufala i mas gru long tufala samting ya, [gladhat mo save blong] Jisas Kraes, Masta mo Sevya blong yumi.”—2 Pita 3:17, 18, NW.
24. ?Yumi evriwan we i man blong wok blong Jeova, yumi mas gat wanem tingting?
24 I klia se, Pita i wantem mekem ol brata blong hem oli kam strong. Hem i wantem se olgeta evriwan oli gat tingting olsem Wetnes ya we yumi tokbaot long stat blong stadi ya, we i gat 82 yia, mo we i stanap strong long bilif blong hem. Hem i se: ‘Long ful laef blong mi, mi bin folem advaes blong aposol, hemia blong “holem dei blong Jeova i stap oltaem long tingting blong mi.” Oltaem mi tingbaot nyufala wol we Baebol i promes long hem, olsem wan “samting we mi no save luk, be hem i stap.” I gud yumi evriwan i folem sem fasin ya long laef blong yumi.’
[Futnot]
a B.K.T. i minim Bifo Kristin Taem.
?Bambae Yu Yu Ansa Olsem Wanem?
◻ ?I minim wanem blong ‘holem dei blong Jeova i stap oltaem long tingting blong yumi’?
◻ ?Ol man blong jikim ol promes blong God oli no wantem save long wanem samting, mo from wanem?
◻ ?From wanem risen ol man blong jikim ol promes blong God oli bin laf long ol trufala Kristin?
◻ ?Yumi mas holemtaet wanem tingting?
[Tok blong pija long pej 23]
Holem dei blong Jeova i stap oltaem long tingting blong yu . . .
[Tok blong pija long pej 24]
. . . mo nyufala wol we bambae i kam biaen long hem tu.