!Wol We i Fulap Long Stret Fasin i No Wan Drim!
WAN haeman blong politik long Amerika, Daniel Webster, i talem se: “Fasin no stret hemia bigfala wari blong ol man long wol ya.” Mo, Baebol i talem se: “Jeova i laekem stret fasin.” (Ol Sam 37:28, NW) From we God i wokem faswan man mo woman we tufala i olsem pija blong hem, tufala i gat ol fasin blong God. Wan long ol fasin ya, hemia se oli laekem stret fasin.—Jenesis 1:26, 27.
Mo tu, Baebol i tokbaot ol ‘hiten man we oli no save loa, be taem oli folem tingting blong olgeta nomo, oli stap mekem ol samting olsem we loa i talem.’ Taswe, olgeta ya oli ‘soemaot we God i putum ol samting we Loa i talem oli stap finis long tingting blong olgeta. . . . From we samtaem oli harem long tingting blong olgeta we oli mekem i stret, mo samtaem oli harem we oli mekem i no stret.’ (Rom 2:14, 15) Yes, God i mekem ol man wetem wan tingting we i naf blong jajem olgeta—oli harem save wanem i stret mo wanem i no stret. I klia se, man i bon we hem i wantem stret fasin long laef blong hem.
Nid blong stret fasin long laef blong man i joen wetem fasin blong hem blong traem faenem glad tu, from we Ol Sam 106:3 i talem se: “Olgeta we oli stap obei long ol tok blong hem, mo we oltaem oli stap mekem ol fasin we i stret, bambae oli save harem gud.” Be ?from wanem nao man i no naf blong mekem stret fasin i stap long wol ya?
?From Wanem Ol Man Oli Mestem Mak?
Wan stampa risen we i mekem se man i no naf blong putum stret fasin long wol ya, hemia from sin we yumi kasem long faswan papa mama blong yumi, Adam mo Iv. Baebol i eksplenem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Samting we i stap spolem yumi hemia sin. Nating se God i wokem Adam mo Iv we tufala i no gat sin, be tufala i mekem disisen blong rebel agensem God ale, tufala i kam sinman. (Jenesis 2:16, 17; 3:1-6) From samting ya, tufala i pasem sin, mo ol slak fasin, oli go long ol pikinini blong tufala.
Fasin griri mo fasin blong agensem narafala from we hem i defren long yumi, oli kamaot long sin. Ol fasin ya nao oli stampa blong plante fasin no stret we oli kamaot long wol. ?I tru no? Yes, from fasin griri nao, ol man oli stap spolem wol mo ol laef samting raonabaot long olgeta. Mo from fasin ya tu, plante man oli gat bigfala hadtaem long saed blong mane. I sua se, fasin blong no laekem man we i defren long yumi, i stampa blong plante faet mo fasin no stret we oli stap spolem ol man blong ol defren laen mo kala blong skin. Mo tu, ol fasin ya oli pulum man blong stil, gyaman, mo mekem samting we i save spolem narafala.
Nating se yumi traehad wetem nambawan tingting blong mekem fasin we i stret mo i gud, be plante taem ol slak fasin we oli kamaot long sin oli blokem yumi. Aposol Pol i tokbaot hem wan i se: “Oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating.” Hem i gohed blong talem olsem wanem hem i traehad, i se: “Long tingting blong mi, mi glad tumas long Loa ya blong God. Be mi luk we rabis fasin ya we i stap wok long laef blong mi, hem i narafala. Mo narafala fasin ya i agens long Loa ya blong God, we long tingting blong mi, mi glad tumas long hem. Narafala fasin ya i stap mekem mi, olsem we mi mi slef blong fasin blong sin, we i stap wok oltaem long tingting blong mi.” (Rom 7:19-23) Tede, ating i gat semkaen fasin i stap wok insaed long yumi. From samting ya, ol fasin no stret oli kamaot oltaem.
Fasin we man i folem blong rul antap long narafala man tu, i stampa blong plante fasin no stret we oli stap long wol. Long evri kantri, i gat ol loa mo ol man we oli fosem ol narafala blong folem ol loa ya. Mo tu, i gat ol jaj mo ol kot. Yes, sam man we oli laekem ol stret rul oli bin traehad blong sapotem raet blong man mo leftemap fasin blong mekem i stret long olgeta man evriwan. Be, bighaf blong ol traehad blong olgeta oli foldaon. ?From wanem? Jeremaea 10:23 i talem long tok we i sot nomo, from wanem i olsem, i se: “O Jeova, mi mi savegud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” From we man i stap longwe long God, hem i no naf nating blong stanemap ol gudfala mo stret fasin long wol ya.—Proveb 14:12; Eklesiastis 8:9.
Wan bigfala samting we i blokem man blong i no save putum stret fasin long wol ya, hemia Setan. Baebol i talemaot klia se rebel enjel ya Setan, hem i faswan “man blong kilim man” mo “stampa blong ol gyaman toktok,” mo i talem tu se, “olgeta man blong wol oli stap long paoa blong Setan.” (Jon 8:44; 1 Jon 5:19) Aposol Pol i talem se, Setan hem i “rabis god blong wol ya.” (2 Korin 4:3, 4) From we Setan i no laekem stret fasin nating, hem i mekem evri samting we hem i naf blong mekem, blong leftemap ol rabis fasin. Oltaem we hem i gohed blong lidim wol ya, olkaen fasin no stret mo rabis frut blong olgeta bambae oli gohed blong holem ol man olsem we oli kalabus.
?Olgeta samting ya i minim se i no gat rod nating blong blokem fasin no stret long laef blong ol man? ?Wan wol we i gat stret fasin nomo long hem, i wan drim nomo?
Stret Fasin Bambae i Kamtru Long Wol Ya—?Olsem Wanem?
Sipos ol man oli wantem se wol i fulap long stret fasin, oli mas lukluk i go long hemia we i naf blong finisim olgeta stampa blong fasin no stret. Be, ?hu i save tekemaot sin mo finisim Setan wetem rul blong hem? I klia se, i no gat wan man no wan grup blong man we i naf blong mekem bigfala wok ya. !Jeova God nomo i save mekem olsem! Baebol i tokbaot Hem i se: “Hem i Bigfala Ston ya, ol wok blong hem oli stretgud olgeta, from we olgeta fasin blong hem oli stret. God ya i holem olgeta promes blong hem, i no save mekem i no stret. Hem i stret we i stret.” (Dutronome 32:4) Mo from we Jeova i “laekem stret fasin,” hem i wantem se ol man oli haremgud long laef long wan wol we i fulap long stret fasin.—Ol Sam 37:28, NW.
Aposol Pita i tokbaot plan blong God blong mekem stret fasin nomo i stap long wol ya, i raetem se: “God i promes finis blong putum nyufala [heven] mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.” (2 Pita 3:13) ‘Nyufala heven’ ya i no minim se prapa skae bambae i jenis. No gat. Skae ya, God i wokem i stretgud mo i givim ona long hem. (Ol Sam 8:3; 19:1, 2) ‘Nyufala heven’ i minim wan nyufala fasin blong rul antap long wol ya. ‘Heven’ blong naoia i minim olgeta gavman blong man. I no longtaem, long faet blong God long Amageden, olgeta ya bambae oli lus, nao ‘nyufala heven’ bambae i tekem ples blong olgeta—hemia Kingdom, no gavman blong God long heven. (Revelesen 16:14-16) King blong Kingdom ya hemia Jisas Kraes. Gavman ya bambae i finisim rul blong ol man blong olwe, mo hem nomo bambae i rul gogo i no save finis.—Daniel 2:44.
Ale, ?wanem ya “nyufala wol”? Hemia i no nyufala graon, from we God i mekem graon ya i stretgud blong man i stap laef long hem. Stampa tingting blong God se graon ya bambae i stap blong olwe. (Ol Sam 104:5) “Nyufala wol” i wan nyufala grup blong man. (Jenesis 11:1; Ol Sam 96:1) “Wol” ya we bambae i lus, hemia olgeta man we oli joen long ol rabis fasin blong wol ya. (2 Pita 3:7) “Nyufala wol” we bambae i tekem ples blong olgeta ya, hemia olgeta trufala man blong God, we oli no laekem nating ol rabis fasin be oli laekem ol fasin we oli gud mo stret. (Ol Sam 37:10, 11) Taswe, wol blong Setan bambae i lus blong olwe.
Be ?wanem samting bambae i hapen long Setan? Aposol Jon i talem se: “Hem [Jisas Kraes] i holem bigfala algita ya, we i snek ya blong bifo, we nem blong hem ‘Setan,’ no ‘Man we i stap agensem man.’ Nao i fasem hem long jen ya blong i stap wan taosen yia, nao i sakem hem i go long bigfala hol ya, mo i lokem doa blong hol. Mo i putum mak long doa ya blong bambae man i no openem, blong bambae algita ya i no moa gyaman long ol man, blong pulum olgeta oli go krangke.” (Revelesen 20:1-3) Setan bambae i kalabus long ol jen olsem wan presina we i kalabus long wan dip hol. Bambae hem i no moa gat paoa nating long ol man. !Long taem ya nao, bambae ol man oli jes haremgud, mo biaen, bambae wol ya i kam fulap long stret fasin! Mo long en blong wan taosen yia, Jisas bambae i spolem Setan olgeta, bambae hem i lus blong olwe.—Revelesen 20:7-10.
Be, ?olsem wanem long sin we yumi kasem taem yumi bon? Jeova i wokem wan rod finis blong karemaot sin ya blong yumi. ‘Mi mi Pikinini blong Man [Jisas Kraes], . . . mi kam blong givim laef blong mi olsem wan ransom blong pem rod blong plante man oli gofri.’ (Matyu 20:28) Wod ya ‘ransom’ i minim praes we man i pem blong mekem narafala man we i kalabus i gofri. Jisas i givim laef blong hem we i stretgud olgeta olsem wan ransom blong mekem ol man oli gofri.—2 Korin 5:14; 1 Pita 1:18, 19.
Naoia tu, yumi save kasem blesing from ransom sakrifaes blong Jisas. Sipos yumi soemaot bilif long sakrifaes ya, yumi save kam olsem we yumi klingud long ae blong God. (Ol Wok 10:43; 1 Korin 6:11) Ransom ya bambae i mekem se, aninit long rul blong Kingdom blong God, olgeta man oli save kam fri olgeta long sin. Laswan buk blong Baebol i tokbaot wan ‘reva blong wora blong laef’ we i kamaot long bigfala jea blong God, mo long tufala saed blong reva ya i gat sam tri we oli givim frut blong olgeta, mo we ol lif blong olgeta oli blong “tekemaot sik blong ol man blong ol kantri long wol.” (Revelesen 22:1, 2) Pijatok ya we Baebol i yusum, i minim ol nambawan samting we God bambae i mekem from ransom sakrifaes blong Jisas, blong ol man oli kam fri long sin. Taem olgeta samting ya we God i mekem oli wok fulwan, ale, olgeta man we oli obei long Hem bambae oli kam fri long kalabus blong sin mo ded.
Laef Long Wol We i Fulap Long Stret Fasin
Tingbaot laef aninit long rul blong Kingdom. Fasin blong brekem loa mo raf fasin bambae oli samting blong bifo nomo. (Proveb 2:21, 22) Fasin ya we sam man oli rij mo sam man oli pua, bambae i lus olgeta. (Ol Sam 37:6; 72:12, 13; Aesea 65:21-23) Ol fasin seraot from fasin blong laef, kala blong skin, laen mo kantri, bambae oli finis. (Ol Wok 10:34, 35) Bambae i no moa gat ol faet mo ol tul blong faet. (Ol Sam 46:9) Plante milyan dedman bambae oli laef bakegen long wol ya we i no moa gat fasin no stret long hem. (Ol Wok 24:15) Olgeta man bambae oli haremgud from oli gat bodi we i stretgud olgeta mo i strong. (Job 33:25; Revelesen 21:3, 4) Baebol i promes long yumi se: “Tru tumas, [Jisas Kraes] bambae i mekem stret fasin i win.”—Aesea 42:3.
Be, taem yumi stap wet long samting ya, fasin no stret bambae i gohed blong kasem yumi evriwan. Nating se i olsem, i nogud we yumi givimbak fasin we i no stret long ol narafala. (Maeka 6:8) Taem man i mekem i no stret long yumi, i gud yumi putum tingting blong yumi i stap long hop blong yumi. Wol blong stret fasin we God i promes long hem, bambae i kamtru i no longtaem. (2 Timote 3:1-5; 2 Pita 3:11-13) God we i gat Olgeta Paoa, i givim promes blong hem finis, mo bambae “i mas hapen olsem.” (Aesea 55:10, 11) Naoia i stret taem blong yumi rere blong kasem laef long wol ya we bambae i fulap long stret fasin nomo. Blong mekem olsem, yumi mas lanem wanem samting we God i wantem yumi blong mekem.—Jon 17:3; 2 Timote 3:16, 17.
[Tok Blong Pija Long Pej 7]
Olgeta fasin no stret bambae oli lus olgeta long nyufala wol we God i promes long hem