!Bilif Bambae i Pusum Yumi Blong Wok!

“Yu luk. Fasin blong bilif blong hem [Ebraham] mo fasin blong laef blong hem, tufala i joen. Fasin blong laef blong hem i mekem fasin blong bilif blong hem i no sot long wan samting.”​—JEMES 2:​22.

1, 2. Sipos yumi gat bilif, ?bambae yumi mekem wanem?

PLANTE man oli talem se oli gat bilif long God. Be, fasin ya blong talemaot nomo se yumi gat bilif, i olsem wan dedbodi we i no moa gat laef long hem. Disaepol Jemes i raetem se: ‘Sipos fasin blong bilif blong yumi i no gat wok i joen wetem, hem i ded nomo.’ Hem i talem tu se, Ebraham we i onagud long God i gat bilif we ‘i joen wetem fasin blong laef blong hem.’ (Jemes 2:​17, 22) ?Olsem wanem ol tok ya oli impoten long yumi?

² Sipos yumi gat trufala bilif, bambae yumi no jes bilif long ol samting we yumi harem long ol Kristin miting. Bambae yumi soemaot bilif ya, from we yumi wan Wetnes blong Jeova we i wok strong. Yes, bilif bambae i pusum yumi blong folem ol Tok blong God long laef blong yumi, mo blong wok.

Fasin Blong Mekem i Gud Moa Long Samfala Man i No Laenap Wetem Bilif

3, 4. ?Olsem wanem bilif i mas gat paoa long fasin we yumi mekem long ol narafala?

³ Sipos yumi gat trufala bilif long God mo Jisas Kraes, bambae yumi no mekem i moagud long samfala i bitim ol narafala. (Jemes 2:​1-4) Samfala we Jemes i raetem leta i go long olgeta, oli no stap mekem i sem mak long olgeta man, olsem ol trufala Kristin oli mas mekem. (Rom 2:​11) Taswe, Jemes i askem se: “?Weswe yufala we i folem bilif blong Jisas Kraes, Masta blong yumi we yumi ona long hem, i save mekem i moagud long samfala i bitim ol narafala?” (NW) Sipos tu man we tufala i no gat bilif i kam long miting, wan we i rijman, ale klos blong hem i flasgud mo i putum gol ring long fingga blong hem, narawan i “puaman, we klos blong hem i brobrok,” ol Kristin oli mas mekem welkam long tufala evriwan. Be ol Kristin ya long taem bifo oli stap mekem i moagud long olgeta we oli rij. Oli stap givim “ol nambawan” ples blong sidaon long ol rijman, be oli talem long ol puaman blong stanap no blong sidaon long floa nomo.

⁴ Jeova i givim Jisas Kraes olsem wan ransom blong pemaot olgeta man, ol rijman mo ol puaman tu. (2 Korin 5:​14) Taswe, sipos yumi mekem i moagud long ol rijman, yumi stap gowe long bilif blong Kraes, we ‘hem i kam pua blong yumi save kam rij.’ (2 Korin 8:9) Yumi no mas skelem ol man long nogud fasin ya​—wetem wan tingting we i no stret, hemia blong givim ona long samfala from we oli save mekem i gud long yumi bakegen. God i stap mekem i sem mak long olgeta man. Taswe, sipos yumi mekem i moagud long sam man i bitim ol narafala, yumi stap “jajem man long nogud fasin.” (Job 34:19) Sipos yumi rili wantem mekem God i glad, bambae yumi no letem wan samting i pulum yumi blong mekem i moagud long samfala i bitim ol narafala, no blong ‘tok swit long samfala sipos yumi ting se long fasin ya yumi save win.’​—Jud 4, 16.

5. ?God i jusumaot hu blong oli kam “rijman long fasin blong bilif,” mo wanem fasin blong plante man we oli gat mane mo plante sas samting?

⁵ Jemes i makemaot ol man we oli rili rij, mo i talem se yumi mas soem lav long olgeta man evriwan. (Jemes 2:​5-9) ‘God i jusumaot ol man we oli puaman, blong mekem oli kam rijman long fasin blong bilif, mo blong oli go insaed long kingdom.’ Hemia i tru, from we plante taem, ol puaman nao oli rere moa blong lesin long gud nyus. (1 Korin 1:​26-​29) Plante rijman oli mekem i strong tumas long ol man we oli gat kaon long olgeta, oli no givim gudfala pei long ol man, mo oli putum plante man long kot. Oli tok nogud long saed blong Jisas Kraes, mo mekem i nogud long yumi from we yumi karem nem blong Kraes. Be yumi mas gat strong tingting blong obei long ‘stampa loa ya’ blong laekem ol man we oli stap raonabaot long yumi, hemia se yumi laekem ol rijman sem mak long ol puaman. (Levitikas 19:18; Matyu 22:37-​40) God nao i talem se yumi mas mekem olsemia. Taswe, sipos yumi mekem i moagud long sam man i bitim ol narafala man, ‘yumi mekem sin.’

‘Fasin Sore i Moagud Bigwan i Bitim Fasin Blong Jajem Man’

6. ?Olsem wanem yumi brekem loa sipos yumi no gat sore long ol narafala man?

⁶ Sipos yumi no gat sore mo yumi mekem i moagud long samfala i bitim ol narafala, yumi man blong brekem loa. (Jemes 2:​10-​13) Taem yumi mekem samting ya we i no stret, i olsem se yumi brekem olgeta loa blong God. Maet ol man Isrel bifo oli no slip wetem hasban no waef blong narafala, be sipos oli stilim olting blong narafala, oli brekem Loa blong Moses. From we yumi Kristin man, ‘loa blong ol friman’ i stap jajem yumi​—ol friman ya, hemia Isrel long saed blong speret we oli stap aninit long nyufala kontrak mo oli holem ol loa blong hem oli stap long hat blong olgeta.​—Jeremaea 31:31-​33.

7. ?From wanem olgeta we oli stap mekem i moagud long samfala i bitim ol narafala oli no save ting se God bambae i sore long olgeta?

⁷ Sipos yumi stap talem se yumi gat bilif be yumi gohed blong mekem i moagud long samfala i bitim ol narafala, yumi stap long denja. Taem God i jajem man we i no gat lav mo sore, bambae Hem tu i no gat sore. (Matyu 7:​1, 2) Jemes i talem se: “Fasin blong sore long man i moagud bigwan i bitim fasin blong jajem man.” (NW) Sipos yumi letem tabu speret blong Jeova i lidim yumi, nao yumi soem sore oltaem long ol narafala, God bambae i no jajem yumi long strong fasin. Be, bambae hem i sore long yumi. Long rod ya, bambae yumi winim strong jajmen blong God no strong rod we bambae hem i yusum blong soemaot stret fasin.

Bilif i Lidim Man Blong Mekem Ol Gudfala Wok

8. ?Olsem wanem long man we i stap talem se i gat bilif be i no mekem ol gudfala wok tu?

⁸ Bilif i pusum man blong soemaot lav mo fasin sore, be antap long hemia, i lidim man blong mekem ol narafala gudfala wok tu. (Jemes 2:​14-​26) Yes, sipos yumi talem se yumi gat bilif be yumi no mekem ol gudfala wok tu, samting ya i no save sevem yumi. Be, i tru tu se, sipos yumi mekem ol wok we Loa i talem, samting ya nomo i no save mekem yumi stret man long fes blong God. (Rom 4:​2-5) Jemes i stap tokbaot ol wok we yumi mekem from bilif mo lav, i no from we ol loa oli talem se yumi mas mekem. Sipos bilif mo lav i pusum yumi, bambae yumi no jes talem ol gudfala tok long wan Kristin we i sot long plante samting blong laef. No gat. Bambae yumi givim klos mo kakae long Kristin brata no sista ya we i no gat klos mo i hanggri. Jemes i askem se: ‘Sipos yu talem long wan brata no sista we i gat nid se “God i blesem yu. Yu go wom, yu go kakae,” be yu no givim blangket mo kakae long hem, ?olsem wanem samting ya bambae i givhan long hem?’ Bambae i no givhan nating. (Job 31:16-​22) !Wan “bilif” we i olsem, hem i ded nomo!

9. ?Wanem samting i soemaot se yumi gat bilif?

⁹ Maet yumi stap joen wetem ol man blong God. Be, ol wok we yumi mekem wetem fulhat blong yumi, olgeta nomo oli save pruvum se yumi gat bilif. I gud tumas sipos yumi sakemaot tijing blong Triniti, mo yumi kasem save se i gat wan trufala God nomo. Be save nomo i no soem se yumi gat bilif. ‘Ol devel oli gat save’ be oli “stap seksek” tu, from we long fyuja bambae oli lus. Sipos yumi gat trufala bilif, bambae hem i pusum yumi blong mekem ol wok, olsem talemaot gud nyus, mo givim kakae mo klos long ol narafala Kristin we oli gat nid. Jemes i askem se: “Yu, we hed blong yu i emti (i no fulap long stret save blong God), ?yu yu no save se bilif we i no gat wok i joen wetem, i blong nating nomo?” (NW) Yes, blong soemaot bilif, yumi mas mekem wok.

10. ?From wanem Baebol i kolem Ebraham se “stampa blong olgeta we oli bilif long God”?

¹⁰ Bilif blong olfala Ebraham we i onagud long God, i pusum hem blong mekem wok. Ebraham i ‘olsem stampa blong olgeta we oli bilif long God,’ mo ‘God i mekem hem i stret man long fes blong hem from wok blong hem, afta we hem i tekem pikinini blong hem Aesak, fasem hem long olta, mo givim i go long God.’ (Rom 4:​11, 12; Jenesis 22:​1-​14) ?Olsem wanem sipos Ebraham i no bin bilif fulwan se God i save mekem Aesak i laef bakegen long ded, mo se i save yusum Aesak blong mekem promes long saed blong laen i kamtru? Sipos i olsem, Ebraham i no save givim pikinini blong hem olsem wan sakrifaes. (Hibrus 11:19) Ol wok blong Ebraham blong obei long God, oli mekem se “bilif blong hem i no sot long wan samting,” hemia i min se bilif blong hem i stretgud olgeta. Long rod ya, “tok blong Baebol [long Jenesis 15:6] i kamtru, we i talem se ‘Ebraham, hem i bilif long God. Mo from we hem i bilif long God olsem, God i mekem hem i stret man long fes blong hem.’” Wok blong Ebraham we hem i rere blong givim Aesak olsem wan sakrifaes, i pruvum tok ya we God i talem bifo finis, se Ebraham i wan stret man. Ol wok we hem i mekem from bilif, oli soem se hem i laekem God tumas, taswe ol man oli singaot hem se ‘Fren blong Jeova.’

11. ?Rehab i mekem wanem blong soemaot bilif blong hem?

¹¹ Ebraham i pruvum se ‘God i mekem man i stret man long fes blong hem from ol wok blong hem, i no from bilif blong hem nomo.’ Samting ya i tru long saed blong Rehab tu. Hem i wan woman blong rod long Jeriko. Be, ‘God i mekem hem i stret woman long fes blong hem from wok blong hem, taem woman ya i lukaotgud long tufala man Isrel we tufala i kam blong lukluksave Jeriko, mo biaen hem i sanemaot tufala i gohom long narafala rod.’ From samting ya, tufala i haed long ol man Kenan we oli enemi blong olgeta. Bifo we Rehab i haedem tufala spae ya blong Isrel long haos blong hem, hem i luksave finis se Jeova i trufala God. Nao ol tok we hem i talem biaen, wetem wok blong hem blong lego fasin blong woman blong rod, oli soemaot se hem i gat bilif. (Josua 2:​9-​11; Hibrus 11:31) Afta we Jemes i tokbaot namba tu eksampel ya blong bilif, Rehab, hem i se: “Bodi we i no gat speret long hem, hem i ded. Mo long sem fasin, fasin blong bilif we i no gat fasin blong laef i go wetem, hem tu i ded.” Taem wan man i ded, bodi blong hem i no moa gat “speret,” hemia paoa we i pusum hem blong muvmuf mo wok, taswe hem i no save mekem wan samting nating. Sipos yumi talem nomo se yumi gat bilif, ale bilif ya i ded mo i no save mekem wan samting, olsem wan dedbodi. Be, sipos yumi gat trufala bilif, bambae hem i pusum yumi blong mekem ol wok we oli givim ona long God.

!Bos Long Tang Blong Yumi!

12. ?Ol elda long kongregesen oli mas mekem wanem?

¹² Ol toktok mo tijing we yumi talemaot, olgeta tu oli save soem se yumi gat bilif. Be yumi mas lukaotgud. (Jemes 3:​1-4) Ol elda oli ol tija long kongregesen. Hemia wan hevi wok, mo oli mas talemaot long God olsem wanem oli mekem wok ya. Taswe, oli mas gat tingtingdaon, mo skelemgud ol tingting we i stap pusum olgeta, mo ol fasin blong olgeta tu. Antap long save mo waes we i mekem olgeta oli nafgud, oli mas gat bigfala lav long God mo long ol narafala Kristin. (Rom 12:​3, 16; 1 Korin 13:​3, 4) Olgeta advaes we ol elda oli givim i mas stanap long Baebol. Sipos wan elda i givim nogud advaes mo samting ya i mekem trabol i kamaot long samfala, ale, God bambae i yusum Kraes blong jajem hem from. Taswe, ol elda oli mas gat tingtingdaon, stadi oltaem, mo fasgud long Tok blong God.

13. ?From wanem yumi stap mekem mastik long ol toktok blong yumi?

¹³ Yumi evriwan​—yes, ol nambawan tija tu​—‘plante taem yumi mekem i no stret,’ from we yumi sinman. Ating yumi mekem moa mastik mo spolem moa man long ol toktok blong yumi, i bitim ol narafala samting. Jemes i talem se: “Man we i no mekem mastik samtaem long tok blong hem, hem i wan man we i stret gud olgeta. Man olsem, bambae i save blokem olgeta rabis samting we i save mekem long laef blong hem.” Yumi no naf blong bos fulwan long tang blong yumi, olsem Jisas Kraes i bin mekem. Sipos yumi naf blong mekem olsem, yumi save bos long olgeta narafala fasin we bodi blong yumi i wantem. Smol aean we yumi putum long maot blong hos, i mekem se yumi save pulum hem i go long weples yumi wantem. Mo tu, stia blong bigfala sip i smol nomo, be man we i holem stia i save mekem sip ya i go long weples hem i wantem, nating se i gat bigfala win.

14. ?Olsem wanem Jemes i soemaot klia se i nidim fasin traehad blong bos long tang blong yumi?

¹⁴ Yumi evriwan i savegud se i rili hadwok blong bos long tang blong yumi. (Jemes 3:​5-​12) Aean we yumi putum long maot blong hos i smol nomo taem yumi skelem wetem hos ya. Mo stia blong sip i smol nomo taem yumi skelem wetem bigfala sip ya. Long sem fasin, tang i smol nomo taem yumi skelem wetem ful bodi blong man. Nating se i olsem, “hem i save tok flas long plante bigbigfala samting.” Baebol i talem klia se God i no laekem fasin ya blong tok flas. Taswe, yumi mas askem Hem blong givhan long yumi blong blokem fasin ya. (Ol Sam 12:​3, 4; 1 Korin 4:7) Mo tu, yumi mas holemtaet tang blong yumi taem narafala i mekem yumi kros. I gud blong tingbaot se wan smol faea nomo i save bonem ol haos long wan bigfala velej we i finisim olgeta. Jemes i talem se, ‘tang i olsem wan faea’ we i naf blong mekem bigfala trabol. (Proveb 18:21) !Yes, tang we man i no bos long hem, i olsem “wol ya we i fulap long ol samting nogud”! Olgeta nogud fasin blong ol man blong wol ya we oli no obei long God, oli olsem tang we man i no bos long hem. Tang i stampa blong plante nogud fasin, olsem gyaman toktok we i spolem nem blong narafala man, mo ol gyaman tijing. (Levitikas 19:16; 2 Pita 2:1) ?Wanem tingting blong yu? ?Yu ting se bilif i mas pusum yumi blong traehad oltaem blong bos long tang blong yumi?

15. ?Wanem trabol i save kamaot from tang we man i no bos long hem?

¹⁵ Tang we yumi no bos long hem i ‘save mekem yumi sem’ fulwan. Tingbaot, sipos ol man oli faenemaot se yumi stap gyaman oltaem, maet oli tingbaot yumi olsem wan man blong gyaman nomo. Be, ?olsem wanem tang we yumi no bos long hem i save “mekem wil blong laef i bon long faea”? (NW) Hem i save mekem laef blong yumi i kam olsem we yumi stap tanraon long sem ples nomo. Olgeta man long kongregesen oli save harem nogud from wan man nomo we i no bos long tang blong hem. Jemes i tokbaot “Gehena,” hemia wan bigfala hol long taem bifo, nem blong hem Hinom. Fastaem, ol man oli yusum hol ya blong kilim pikinini olsem sakrifaes. Biaen, ol man long Jerusalem oli sakem mo bonem ol doti long hem. (Jeremaea 7:​31) Taswe, Gehena i olsem wan pijatok we i minim lus blong olwe. Long wan fasin, paoa blong Gehena blong spolemgud ol samting, i sem mak long tang we man i no bos long hem. Sipos yumi no holemtaet tang blong yumi, maet yumi statem wan faea we bambae i kakae yumi bakegen. (Matyu 5:​22) Kongregesen i save sakemaot yumi tu sipos yumi spolem narafala tumas wetem tang blong yumi.​—1 Korin 5:11-13.

16. ?Yumi mas mekem wanem blong blokem bigfala trabol we i save kamaot from tang we yumi no bos long hem?

¹⁶ From ol samting we yu ridim finis long Tok blong God, ating yu save se Jeova i bin talem long man blong mekem ol anamol oli stap daon aninit long paoa blong hem. (Jenesis 1:​28) Mo man i bin mekem plante defren kaen anamol oli kam kwaet. Tingbaot bigfala pijin ya falkon. Sam man oli bin tijim olgeta ya blong ronem ol anamol. ‘Ol samting we oli wokbaot long graon’ we Jemes i tokbaot, ating i save minim ol snek we man i tijim olgeta blong harem voes blong hem, taem i pleplei long olgeta. (Ol Sam 58:​4, 5) Ol man oli save mekem ol welfis oli obei tu. Be yumi ol sinman, yumi no naf blong mekem tang i stap kwaet. Nating se i olsem, yumi mas lukaotgud blong no tok nogud long narafala, talem ol tok we i stikim narafala, mo ol gyaman tok we i save spolem nem blong narafala. Wan tang we man i no bos long hem, i olsem wan posen we i save kilim narafala man i ded. (Rom 3:13) Sore tumas, tang blong ol gyaman tija i mekem se sam long ol faswan Kristin oli lego God. Taswe, yumi neva mas letem ol tok blong ol man blong apostasia we i olsem posen, i winim yumi, nating se oli raetem no talem ol tok ya.​—1 Timote 1:​18-​20; 2 Pita 2:​1-3.

17, 18. ?Jemes 3:​9-​12 i tokbaot wanem tufala samting we oli defren olgeta, mo yumi mas mekem wanem long saed ya?

¹⁷ Bilif long God mo tingting blong wantem tumas blong mekem hem i glad, i save blokem yumi blong lesin long ol man blong apostasi, mo blong yusum tang blong yumi long fasin we i olbaot nomo. Jemes i tokbaot samfala we oli yusum tang blong olgeta olbaot nomo, i se: “Yumi tok long tang blong yumi blong presem Hae God ya we i Papa blong yumi, mo blong tok nogud long ol narafala man we God i mekem olgeta oli olsem pija blong hem.” (Jenesis 1:​26) Jeova i Papa blong yumi from “hem nomo i stap mekem yumi evriwan i laef, mo hem i stap givim olgeta samting long yumi evriwan.” (Ol Wok 17:24, 25) Mo long saed blong speret, hem i Papa blong ol tabu Kristin tu. Yumi evriwan i ‘olsem pija blong God,’ long saed blong tingting mo ol fasin we yumi naf blong folem. Hemia ol fasin olsem lav, stret fasin, mo waes, we oli mekem yumi defren long ol anamol. Taswe, sipos yumi gat bilif long Jeova, ?yumi mas mekem wanem fasin?

¹⁸ Sipos yumi tok nogud long ol narafala man, i olsem se yumi askem, no yumi singaot wan nogud samting i kam long olgeta. Be, yumi no olsem ol profet we God i givim tok long olgeta, nao oli gat raet blong singaot wan nogud samting i kam long wan man. No gat. Taswe, ol nogud tok i soemaot se yumi no laekem narafala man nating, mo bambae i mekem se tok blong yumi blong presem God i blong nating nomo. I no stret we ol ‘tok blong presem God mo ol tok nogud long narafala,’ tufala evriwan oli kamaot long semfala maot. (Luk 6:​27, 28; Rom 12:14, 17-​21; Jud 9) !I wan bigfala sin blong singsing presem God long ol miting, mo biaen, tok agensem ol Kristin brata mo sista blong yumi! “Wora mo solwora,” tufala i no save kamaot long semfala wel. ‘Manggo i no save karem frut blong aranis, no paenap i karem frut blong manggo.’ Long sem fasin, wora blong dring i no save kamaot long solwora. Yumi mas tokbaot ol gudfala samting oltaem. Sipos ol tok blong yumi i nogud mo i stap spolem narafala, yumi gat wan problem long saed blong speret. Blong winim problem ya, yumi mas prea long Jeova blong i givhan long yumi blong finis long ol nogud tok ya.​—Ol Sam 39:1.

Soem Waes Blong Heven Long Ol Wok Blong Yumi

19. Sipos waes blong heven i lidim yumi, ?fasin blong yumi i save gat wanem paoa long narafala?

¹⁹ Yumi evriwan i nidim waes blong talem mo mekem ol samting we oli laenap wetem strong bilif. (Jemes 3:​13-​18) Sipos yumi fraetgud long God, hem i save givim waes blong heven long yumi, hemia se yumi naf blong yusum save long gudfala rod. (Proveb 9:​10; Hibrus 5:​14) Tok blong hem i tijim yumi olsem wanem blong gat ‘kwaet fasin we i kamaot from waes.’ Taem yumi gat kwaet fasin, yumi givhan blong holem pis insaed long kongregesen. (1 Korin 8:​1, 2) Man we i stap tok flas se hem i wan nambawan tija blong ol Kristin brata mo sista blong hem, ‘hem i stap gyaman blong haedem Kristin trutok’ we i agensem flas fasin blong hem. (Galesia 5:​26) “Waes” blong ol man olsem i “kamaot long wol ya”​—hemia waes blong ol sinman we oli stap longwe long God. Waes ya i blong ‘anamol,’ from we i kamaot long rabis tingting blong man nomo. !Yes, waes ya i ‘kamaot long ol rabis speret’ tu, from we ol rabis enjel ya oli flas! (1 Timote 3:6) Taswe, yumi mas soem waes mo tingtingdaon, long olgeta samting we yumi mekem. Olsem nao, bambae yumi no mekem wan samting blong leftemap ol “fasin nogud,” olsem ol tok we i spolem nem blong narafala, no fasin blong mekem i gud moa long samfala i bitim ol narafala.

20. Traem eksplenem waes blong heven.

²⁰ ‘Nambawan samting long saed blong waes blong heven, se i mekem laef blong man i klingud.’ Hem i mekem yumi klin long ol fasin blong yumi mo long saed blong speret tu. (2 Korin 7:​11) Hem i leftemap “pis,” mo i pusum yumi blong holem pis wetem olgeta man. (Hibrus 12:14) Waes blong heven i save mekem yumi “joengud long narafala man,” yumi no strong tumas we yumi no wantem agri wetem narafala mo joengud tugeta. (Filipae 4:5) Waes blong heven i mekem se man i ‘rere blong obei,’ hemia obei long ol tijing blong Jeova, mo wokgud wetem ogenaesesen blong Hem. (Rom 6:​17) Mo tu, waes blong heven i save mekem se yumi gat sore, mo yumi mekem i gud long narafala. (Jud 22, 23) Waes ya i karem “plante gudfala frut,” from we i pusum yumi blong tingbaot ol narafala man, mo blong mekem ol samting we i soemaot gudfala fasin, stret fasin, mo trutok. (Efesas 5:9) Mo from we yumi traehad blong holem pis wetem ol man, yumi kasem ‘frut blong stret fasin,’ we i kamaot bigwan taem i gat pis i stap.

21. ?Jemes 2:1​ kasem 3:​18 i soem se bilif long God i mas pusum yumi blong mekem wanem?

²¹ Ale, i klia se bilif i mas pusum yumi blong wok. Hem i pulum yumi blong mekem i sem mak long olgeta man, soem sore, mo mekem plante gudfala wok. Bilif i save givhan long yumi blong bos long tang blong yumi, mo blong soem waes blong heven long evri samting we yumi mekem. Be i no hemia nomo we yumi lanem long leta ya blong Jemes. Jemes i givim moa advaes we i save halpem yumi blong mekem fasin we i soemaot bilif long Jeova.

[Futnot]

?Bambae Yu Yu Ansa Olsem Wanem?

◻ ?From wanem i rong blong mekem i gud moa long samfala i bitim ol narafala?

◻ ?Olsem wanem bilif i joen wetem ol gudfala wok?

◻ ?From wanem i impoten tumas blong bos long tang blong yumi?

◻ Eksplenem waes blong heven.