From Wanem Yumi Mas Gat Bilif Mo Waes
Ol Stampa Poen Blong Jemes
OL MAN blong Jeova oli nidim fasin blong stanap strong taem we oli kasem trabol. Mo tu, oli mas lukaot gud blong no mekem sin, from we God i no save glad long olgeta we oli mekem sin. Jemes i storebaot ol poen ya nao long leta blong hem mo olgeta we oli gat tingting blong kam gud moa long ol poen ya oli mas gat strong bilif mo waes ya we i kam long heven.
Man we i raetem leta ya i no talem se hem i wan long tufala aposol blong Jisas we nem blong tufala Jemes, be hem i talem se hem i ‘man blong wok blong Jisas Kraes.’ Long sem fasin, wan brata blong Jisas, Jud, i talem se: “Mi man blong wok blong Jisas Kraes, mo mi brata blong Jemes” (Jemes 1:1; Jud 1; Matyu 10:2, 3) Taswe, i klia nomo se haf brata blong Jisas we nem blong hem Jemes, hem nao i raetem leta ya blong Jemes.—Mak 6:3.
Leta ya i no tokbaot taem we Jerusalem i lus long 70 K.T.,a mo Josephus, wan man blong histri i talem se Jemes ya, oli kilim hem i ded smoltaem nomo afta we hed gavman blong Rom Festas i ded. Taswe yumi save ting se hem i raetem leta ya raonabaot long 62 K.T. Jemes i raetem leta ya blong “ol twelef laen” blong ol man Isrel long saed blong speret, mo hem i go stret nomo long olgeta we oli “bilif finis long Jisas Kraes.”—Jemes 1:1; 2:1; Galesia 6:16.
Jemes i yusum ol pija tok blong mekem se yumi no fogetem ol advaes we hem i givim. Hem i soemaot we man we i prea long God blong kasem waes, tingting blong hem i no mas hafhaf, “from we man we tingting blong hem i hafhaf, hem i olsem solwora nomo. Taem win i blu, solwora bambae i save go olbaot, olsem we win i pusum.” (1:5-8) Yumi mas lukaot gud long tang blong yumi from we tang blong yumi i save lidim yumi olsem we stia blong bot i mekem bot i go. (3:1, 4) Blong winim ol traem we yumi kasem, yumi mas soemaot longfala tingting. Yumi mas stanap strong olsem we wan man we i mekem garen i stap wet blong pikimap ol kakae we hem i planem.—5:7, 8.
Bilif, Ol Traem, Mo Ol Wok
Jemes i soemaot fastaem se ol Kristin oli mas stap harem gud nomo, nating se oli stap kasem traem. (1:1-18) Sam long ol traem ya, olsem sik, oli stap kasem evri man, be ol Kristin oli stap harem nogud tu from se olgeta oli slef blong God mo Kraes. Bambae Jeova i givim waes we yumi nidim blong stanap strong, sipos yumi gohed nomo blong askem long hem mo yumi bilif strong long hem. Hem i neva traem yumi wetem ol samting we i nogud, mo yumi save trastem hem oltaem se bambae hem i givim gudfala samting long yumi.
Blong kasem help blong God, yumi mas tru long wosip we yumi mekem long hem mo yumi mas soemaot long ol wok blong yumi se yumi gat bilif long hem. (1:19 kasem 2:26) Samting ya i min se ‘yumi mas mekem ol samting we tok blong God i talem,’ from we i no naf blong lesin nomo. Yumi mas lukaot gud long tang blong yumi, mo yumi mas kea gud long ol pikinini we oli lusum papa mama blong olgeta mo ol woman we oli lusum man blong olgeta. Mo tu, yumi mas stap klin gud long saed blong wol. Sipos yumi stap tinghae long ol rijman, be yumi lukluk ol puaman olsem nating nomo, yumi brekem “wan loa we . . . i stampa blong ol narafala Loa blong God.” Loa ya i talem se yumi mas laekem ol narafala man. Yumi mas soemaot bilif blong yumi from ol wok we yumi stap mekem. Store blong Ebraham mo Rehab i save givhan long yumi blong mekem olsem. Mo tu, “fasin blong bilif we i no gat fasin blong laef i go wetem, hem tu i ded.”
Waes We i Kam Long Heven Mo Prea
Blong mekem ol wok blong olgeta, ol man we oli stap tijim ol narafala oli nidim bilif mo waes. (3:1-18) Olgeta we oli gat wok blong tijim ol narafala oli gat wan bigfala wok stret. Sem mak long olgeta, yumi mas bos long tang blong yumi—waes blong heven i givhan long yumi blong mekem olsem.
Waes blong God i halpem yumi blong luksave se sipos yumi folem fasin blong wol, samting ya bambae i spolem fasin frengud blong yumi wetem God. (4:1 kasem 5:12) Sipos yumi stap wok strong blong kasem sam samting we yumi nomo yumi wantem no sipos yumi jajem ol brata blong yumi, yumi mas tanem tingting blong yumi from ol wok ya. !Mo yumi no mas mekem fren wetem wol ya from we fasin ya i olsem fasin blong slip olbaot long saed blong speret! Yumi no mas tanem baksaed long ol samting we God i wantem from we yumi stap ronem ol samting blong wol nomo. Mo tu, yumi no mas taed blong wet mo yumi no mas toktok konkon agens long ol narafala.
Sipos wan man i sik long saed blong speret, hem i mas lukaot help blong ol elda blong kongregesen. (5:13-20) Sipos wan long kongregesen i mekem sin, ol elda oli save mekem prea mo givim gudfala advaes blong halpem hem. Ale, hem i save tanem tingting blong hem from sin blong hem mo kamgud bakegen long saed blong speret. Yes, rili, “man we i tanem man nogud i aot long rong rod, i kambak long stret rod bakegen, hem i sevem laef blong man nogud ya, bambae man nogud ya i no lus [blong olwe long saed blong speret].”
[Futnot]
a K.T. i min se Kristin Taem
[Bokis blong pija long pej 30]
Ol Man We Oli Mekem Ol Samting We Tok Ya i Talem: “Yufala i mas mekem ol samting we tok ya [blong God] i talem. Man we i stap lesin long tok ya, be i no stap mekem ol samting we tok ya i talem, hem i olsem man we i stap lukluk fes blong hem long glas.” (Jemes 1:22-25) Hem i lukluk bodi blong hem long glas ale hem i gowe, mo “wantaem nomo hem i no moa save tingbaot we fes blong hem i olsem wanem.” Be wan ‘man we i mekem ol samting we tok ya i talem’ i folem gud loa blong God we i “stret olgeta.” Loa ya i stret olgeta from we hem i no sot long wan samting. Hem i talemaot olgeta wok we ol Kristin oli mas mekem. Man we i folem hem “i no save fogetem ol samting blong loa ya.” Be hem i gohed nomo blong skelem gud loa ya mo blong obei long hem, nao loa ya i stretem laef blong hem. (Ol Sam 119:16) ?Olsem wanem ‘wan man we i mekem ol samting we loa ya i talem’ i defren long wan man we i lukluk fes blong hem long wan glas mo i fogetem se fes blong hem i olsem wanem? !Man ya we i ‘mekem’ i folem tok blong Jeova long laef blong hem, mo i harem gud from we Jeova i glad long hem!—Ol Sam 19:7-11.